Habacuc 1:12 - Chayahuita (Shahui)

¹² Napotohuachincora, carinta itaantapo: “Sinioro quëmaso Yosënquën niꞌton, chinotëranquën. Noyasáchin nicaton yaꞌhuëmiatëran. Quëmari inapita quëran anaꞌintancoiso marëꞌ papironiaroꞌsa huayonan. Quëmasoꞌ paꞌpoyarápirancoihuëꞌ, anaꞌintancoiso marëꞌ inapita achiniran.

Habacuc 1:12 ပူးပေါင်းရင်းမြစ်များ

Génesis 21:33

Nani paꞌpachinara, Apraanso inaranchin Sinioro chinotërin. Inasoꞌ: “Yosë yaꞌhuëmiatërinsoꞌ,” itopi antaꞌ. Inaquë chinotaton, aꞌnara tamarisco nara shaꞌnin. Nani shaꞌhuirahuë chachin ina noꞌpasoꞌ, Piirsipa itopi.

2 Reyes 19:25

Quëmasoꞌ: “Caora nohuanto inaporahuë,” topiranhuëꞌ, iporaso nitotëquë huachi. ¡Ca nohuanton, ina pochin ninan! Iráca quëran huarëꞌ yonquirahuësoꞌ, nani nanirin. Napoaton pairahuan ninanoroꞌsa nipirinahuëꞌ, ataꞌhuantëran. Inapotahuaton naꞌpiroꞌsaꞌ, nararoꞌsaꞌ, inapitaraꞌ yamo yamo toconin acoran.

Salmos 118:17

¡Co chiminarahuëꞌ! Yosë catahuararinco. Sinioro naporinso shaꞌhuicaꞌhuaso marëꞌ nanpiarahuë.

Salmos 90:1

Sinioro quëmasoꞌ paꞌpoyarancoi. Iráca quëran huarëꞌ aꞌpairancoi.

Salmos 90:2

Coꞌhuara isoroꞌpaꞌ, motopiroꞌsaꞌ, inapita yaꞌhuëyátërasohuëꞌ, quëmasoꞌ yaꞌhuëran. Iráca quëran huarëꞌ yaꞌhuëran. Tahuëri nitiquipirinhuë tërantaꞌ, quëmaso yaꞌhuëápon. Quëmasáchin Yosënquën.

Salmos 93:2

Quëmaso Sinioro yaꞌhuëmiatëran. Nani maꞌsha caniaritërin quëran huarëꞌ, huaꞌanëntëran.

Isaías 31:1

Iquipitoroꞌsari catahuacaiso marëꞌ paapapisopita, ¡maꞌhuántacha nisapi paya! “Cahuarioroꞌsaꞌ, naꞌa sontaroꞌsa toronanquë paꞌpisopita, notohuaroꞌ cahuarioquë paꞌpisopita sontaroꞌsaꞌ, inapita catahuaponacoi,” topisopitantaꞌ, ¡maꞌhuantacha nisapi paya! Co Siniorori catahuacaiso ninapihuëꞌ. Inasoꞌ noyasáchin ninin niꞌton, Israirori chinotërin. Napoaponahuëꞌ, co ina nontopihuëꞌ. Ina marëꞌ ¡maꞌhuantacha nisapi paya!

Isaías 40:28

¡Nani canpitaso nitotëramaꞌ! ¡Nani shaꞌhuitërinënquëmasoꞌ natanamaꞌ! Sinioronënpoasoꞌ, Yosë yaꞌhuëmiatërinsoꞌ. Inari isoroꞌpaꞌ, yaꞌipi yaꞌhuërinsopitarë chachin acorin. Co aso canotaton nëꞌca nëꞌcatosárinhuëꞌ. Nitotërinsontaꞌ, co naninahuanhuëꞌ.

Isaías 43:15

Caso Sinioroco. Ca nohuanton israiroꞌsanquëma yaꞌhuëramaꞌ. Caso Yosëco noyasáchin nicato huaꞌanëntëranquëmaꞌ,” tënin.

Isaías 49:7

Siniorosoꞌ nichaꞌëtonaꞌpi. Siniorosoꞌ noyasáchin ninin niꞌton, Israirori chinotërin. Ina chachin piyapinën nontaton: “Quëmasoꞌ nisha piyapiꞌsa nocamiatarinquën. Nisha nisha piyapiꞌsa noꞌhuiarinquën. Noꞌhuitërayaroꞌsa huaꞌanëntatënquën asacatarinquën. Inapotopirinënquënhuëꞌ, copirnoroꞌsaꞌ, huaꞌanoꞌsa inapita niꞌsarinënquën. Noya nicatënënquën huaniponaꞌ. Huanipi quëran moshapënën. Caso Sinioroco. Noyasáchin ninahuë niꞌton, Israiro chinotërinco. Carinquën huayonanquën. Napoaton shaꞌhuitëranquënsopita ananiarahuë,” itërin.

Miqueas 5:2

Naquëranchin Sinioro taantarin: “Pirin ninanosoꞌ, Iporata itopi antaꞌ. Inasoꞌ ninanoꞌ, aꞌnapita ninanoroꞌsa Cota huëntonquë yaꞌhuërin quëran nani naniaꞌhuaya. Ina niponahuëꞌ, yaꞌipi israiroꞌsa huaꞌanëntacaso marëꞌ inaquë aꞌnara copirno nasitapon. Ina shimashonënpitasoꞌ, iráca quëran huarëꞌ yaꞌhuëpi,” tënin.

Habacuc 3:2

Nonansopita natanahuë, acoransopitanta niꞌnahuë. Inapita yonquiato: ¡Ma noyacha Sinioroso paya! tënahuë. Iráca shimashonëhuëipita catahuaranso pochachin ipora tahuëriꞌsanta catahuacoi. Inapotatoncoi catahuacoi quiyanta nohuichinquën. Co noyahuëꞌ ninaiso marëꞌ noꞌhuiponcoirahuëꞌ, nosorochináchin cancantëransoꞌ, aꞌnotocoi.

Habacuc 3:6

Huëꞌsarin quëran chiniꞌ topachina, isoroꞌpaꞌ nacontërin. Isoroꞌpaꞌ nocohuachina, piyapiroꞌsa ropatopi. Iráca motopiroꞌsa yaꞌhuërinsoꞌ, nohuatapi. Soquirinso pochin nicatonaꞌ, taꞌhuantapi. Yosë pënënatonpoa ira aꞌnotërëso pochin nitërinpoasoso nipirinhuëꞌ, yaꞌhuëmiatarin.

Malaquías 3:5

Naquëranchin Sinioro nontatënquëmaꞌ: “Caso Sinioroco, yaꞌipi nanitapato shaꞌhuitaantaranquëmaꞌ: ‘Naporoꞌ oꞌmahuato, coisë pochin nisarahuë. Noya nipatamaꞌ, noya acoaranquëmaꞌ. Co noyahuëꞌ cancantatona pënotohuachinasoꞌ, anaꞌintarahuë. Nitëhuananpitohuachinaꞌ, Yoscoarëꞌ taponahuë nonpinpachinaꞌ, patronoꞌsa piyapinënapita co noꞌtëquën pahuërëhuachinahuëꞌ, quëyoronoꞌsaꞌ, saꞌahuaroꞌsaꞌ, inapita co nitocatahuahuachinahuëꞌ, nisharoꞌsa aparisitohuachinaꞌ, co tëꞌhuatohuachinacohuëꞌ, inapitanta anaꞌintarahuë,’ tënahuë,” itërinquëmaꞌ.

Malaquías 3:6

Naquëranchin Sinioro israiroꞌsanquëma nontatënquëmaꞌ: “Caso Sinioroco niꞌto, co nishatërahuëꞌ. Napoaton canpitaso Cacopo quëran pipiramasopita, co ataꞌhuantëranquëmahuëꞌ.

Hechos 3:14

Quisososoꞌ noyasáchin ninin. Co piꞌpisha tërantaꞌ oshahuanpirinhuëꞌ, co nohuantëramahuëꞌ. ‘¿Intaꞌ ocoichinquëmaꞌ?’ itohuachinquëmara, tëpatonaꞌpi huayonamaꞌ.

Deuteronomio 32:4

Inasoꞌ, nóya paꞌpoyarinpoaꞌ. Maꞌsha nipachina, co tëhuërinhuëꞌ. Noꞌtëquënáchin nicaton nóya ninin. Inasoꞌ Yosë, noꞌtëquënáchin nonin. Topinansoꞌ co onporonta piyapi maꞌsha onpotërinhuëꞌ. Noꞌtëquënáchin ninin. Inaíchin Yosësoꞌ.

Deuteronomio 33:27

Yaꞌhuëmiatërinso Yosë chachin paꞌpoyarinpoaꞌ. Chini chiníquën nanantaton catahuarinpoaꞌ. Co onporonta sanpataponhuëꞌ. Ina catahuarinpoa niꞌton, inimicoroꞌsa nicatonpoa taꞌananpirinënpoaꞌ. Nani inapita ataꞌhuantacaso marëꞌ nanan quëtërinpoaꞌ.

1 Timoteo 1:17

Napoaton Yosëíchin natëahuaꞌ. Nani tahuëriya: “¡Ma noyacha Yosëso paya!” itahuaꞌ. Inasoꞌ co onporontaꞌ taꞌhuantaponhuëꞌ. Co quënanpirëhuahuëꞌ, huaꞌanëntomiatërinpoaꞌ. Inaíchin chinotacasoꞌ yaꞌhuërin. Ama onporontaꞌ ina naniantahuasohuëꞌ. Amen.

1 Timoteo 6:16

Inasáchin co taꞌhuantarinhuëꞌ. Nanpirápon inasoꞌ. Noya noya niꞌton, huënaráchin pochin yaꞌnorin. Co yaꞌcarichinachinhuëꞌ. Iráca quëran huarëꞌ co insontaꞌ Yosë quënaninhuëꞌ. Ipora huantaꞌ co quënanarihuarahuëꞌ, yaꞌipi piyapiꞌsari chinochinaꞌ. Yaꞌipiya nanitaparin. Amen.

Hebreos 13:8

Quisocristo co onporontaꞌ nishataponhuëꞌ. Iráca nosororinpoaꞌ. Ipora huantaꞌ catahuarinpoaꞌ. Co onporontaꞌ naniantarinpoahuëꞌ. Inasáchin imahuaꞌ.

Apocalipsis 1:11

Nontatonco, shaꞌhuitërinco: —Apira nani maꞌsha aꞌnotaranquën, quiricaquë ninshitëquëꞌ. Ina quëran canchisë ninanoroꞌsaquë aꞌpatëquëꞌ imarinacosopita nonchinaꞌ. Ipisoquë, Ismirinaquë, Pircamoquë, Tiatiraquë, Sartisiquë, Piratiripiaquë, Naotisiaquë inaquëpita yaꞌhuëpisopita aꞌpatëquëꞌ nitochinaꞌ, itërinco.

Apocalipsis 1:8

Yosë chachin shaꞌhuitërinpoaꞌ: “Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuërahuë. Ipora huantaꞌ nanpiárahuë. Co onporontaꞌ taꞌhuantapohuëꞌ, yaꞌhuërápo. Chini chiníquën nanantërahuë,” tënin.

1 Samuel 2:2

¡Inasáchin noya noyasoꞌ! ¡Co insonta ina pochin paꞌpoyarinpoahuëꞌ! Co aꞌna yosë ina pochin yaꞌhuërinhuëꞌ.