Génesis 5:22 - Chayahuita (Shahui)

²² Inocosoꞌ, nani tahuëri Yosë chinotaton, ina nohuantërinsoráchin ninin. Matosarino nasitërin piquëran Inocosoꞌ, cara pasa piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

Génesis 5:22 ပူးပေါင်းရင်းမြစ်များ

Génesis 17:1

Apran iscon shonca iscon piꞌipitasoꞌ, Siniorori yaꞌnotahuaton, itapon: —Caso Yosëco, yaꞌipi nanitaparahuë. Natëtonco, nohuantërahuësoráchin niquëꞌ.

Génesis 24:40

Napotohuatora, shaꞌhuitërinco: “Niꞌquëꞌ, caso Sinioro iranën noꞌtëquën paꞌtërahuë niꞌton, anquëninën aꞌpararin catahuainquënso marëꞌ. Ina nohuanton, noya paꞌsahuaton sanapi quënamaran. Tatahuëi quëran quëmopinëhuë huiꞌnin chachin, huiꞌnahuë marëꞌ matomaran.

Génesis 48:15

Inaporahuaton Cosi noya yaꞌhuëcaso marëꞌ iso pochin shaꞌhuitërin: “Shimashonëhuëpita Apraan, Isaco, inapita Yosë natëpi. Canta huaꞌhuatërahuë quëran huarëꞌ ina chachin noya aꞌpairinco. Ina Anquëninën chachin yaꞌipi maꞌsha onporahuë quëran, nichaꞌërinco. Inari chachin isopita huiꞌnapiꞌsa catahuain. Notohuaroꞌ huiꞌninpita yaꞌhuëchinaꞌ. Huaꞌhuayátërahuë, isoroꞌpaquë naꞌainaꞌ. Inapita nicatona piyapiꞌsaꞌ, yonquiꞌinaco. Tata Isaco, tata masho Apraan, inapitanta yonquiꞌinaꞌ,” itërin.

Génesis 5:21

Inoco saota shonca aꞌnatërápo piꞌipitasoꞌ, huiꞌnin nasitërin. Nasitohuachina, Matosarino itopi.

Génesis 5:23

Yaꞌipiya quëran Inocosoꞌ, cara pasa saota shonca aꞌnatërápo piꞌipi yaꞌhuëtërin.

Génesis 5:24

Inasoꞌ, Yosë nohuantërinsoráchin nininso marëꞌ aꞌnanaya ayarin. Yosëri inápaquë quëparin.

Génesis 6:9

Noi naporinso shaꞌhuichinquëmaꞌ: Noiso Yosëíchin natëton, nóya ninin. Naporo tahuëriꞌsa inaíchin Yosë nohuantërinso ninin.

1 Reyes 2:4

Huiꞌnanpita, shiparinpita, inapitanta inasáchin natëcaiso yaꞌhuërin. Inapohuatamaꞌ, carë anoyatërinso chachin, quëmopinënporáchin israiroꞌsa copirnonëna nicaponaꞌ.

Salmos 116:9

Sinioroíchin isoroꞌpaquë natëarahuë huachi.

Salmos 16:8

Nani tahuëri quëmasoꞌ caꞌtanaranco. Inchinanëhuë quëran yaꞌhuëaran niꞌton, co anotatë pochin nisarahuë.

Éxodo 16:4

Naporo Yosëri, Moisësë itapon: “Ca nohuanto cosharoꞌ, inápa quëran oꞌnan pochin anotimapon. Nani tahuëri paꞌsahuatonaꞌ, macacaiso yaꞌhuërin. Pëꞌyainpichin macaponaꞌ. Pancasomaria tahuëriso nipirinhuëꞌ, cato tahuëri marëꞌ machinaꞌinaꞌ. Inapotato inpitasona natërinacosoꞌ, inpitasona co yanatërinacosohuëꞌ, nohuitarahuë,” itërin.

Oseas 14:9

Yonquínahuan niꞌtomaꞌ, niyátainpichin yaꞌhuëhuatamaꞌ, isoíchin shaꞌhuitaranquëmasoꞌ yonquicoꞌ: “Onpopinsona nanpicasoꞌ Sinioro pënëninpoaꞌ. Inasoꞌ, noꞌtëquënáchin pënëntërin. Noya nipisopitasoꞌ, ina natëpi. Co noyahuëꞌ nipisopitaso nipirinhuëꞌ, co ina natëpihuëꞌ tënahuë,” tënin Osiasë.

Amós 3:3

Cato yaꞌpi napopináchin yaꞌhuëhuachinara, anoyatopi niꞌton, naporin.

Miqueas 4:5

Nisha piyapiroꞌsasoꞌ, mamanshinëna natëpi. Canpoaso napoaponahuëꞌ: “Sinioroso Yosënënpoaꞌ,” taꞌtëhuaꞌ, inasáchin natëahuaꞌ.

Miqueas 6:8

Napopiramahuëꞌ, co inapita Siniorosoꞌ nataninquëmahuëꞌ. Nani inaso maꞌsona nicacasoꞌ shaꞌhuitërinpoaꞌ. Piyapiꞌsa nosoroatëhua paꞌpoyacaso yaꞌhuërin. Maꞌsona nicacasoꞌ shaꞌhuihuatëra, ananicaso yaꞌhuërin. Naporahuaton: “Caora co nanitërahuë noya nicaꞌhuasoꞌ,” taꞌtëhuaꞌ, Sinioroíchin natëcaso yaꞌhuërin.

Malaquías 2:6

Nisahuaton, nanamëhuë noꞌtëquënáchin piyapiꞌsa aꞌchintërin. Noyápiachin cancantaton noyasáchin nonin. Carëꞌco noya nipayaton, sano cancantërin. Inapochin cancantaton aꞌchininso marëꞌ naꞌcon piyapiꞌsa co noyahuëꞌ nipisoꞌ, aꞌpopi.

Lucas 1:6

Cato chachin noya Yosë imapi. Yaꞌipi pënëntërinsoꞌ noꞌtëquën natëpi.

Hechos 9:31

Ina quëran Quisoso imapisopita noya yaꞌhuapi. Co huachi insoari tërantaꞌ aparisitërinhuëꞌ. Cotia parti, Cariria parti, Samaria parti, inaquëpita sano yaꞌhuatonaꞌ, noya noya imasapi. “Sinioro chiníquën nanantërin,” taꞌtonaꞌ, nóya natëpi. Ispirito Santori catahuarin niꞌton, aꞌnapitanta imasapi.

Romanos 8:1

Napoaton iporasoꞌ Quisocristo imapatëhuaꞌ, co huachi anaꞌintinpoasoꞌ yaꞌhuërinhuëꞌ.

1 Corintios 7:17

Yosë nohuanton, nisha nisha ninëhuaꞌ. Co napopináchin ninëhuahuëꞌ. Onpopinsona nicasëhuaꞌ Yosë imapatëhuaꞌ, inachachin niahuaꞌ. Yaꞌhuërëhuaquë chachin sano yonquiatëhuaꞌ, imahuaꞌ. Paato, yaꞌipi imapisopita inachachin pënënarahuë.

2 Corintios 6:16

Yosë chinotërëhuaquë noyasáchin nicacasoꞌ yaꞌhuërin. Co inaquësoꞌ mamanshi moshacasoꞌ yaꞌhuërinhuëꞌ. Inapochachin canpoantaꞌ Yosë imapatëhuaꞌ, yaꞌcoancantarinpoaꞌ niꞌton, ina pëinën pochin ninëhuaꞌ. Yosësoꞌ nanpiárin. Quiricanën quëran naporin: “Imapatamaco, yaꞌcoancantaranquëmaꞌ. Canpitaroꞌco yaꞌhuarahuë. Chinotohuatamaco, noya aꞌpaiaranquëmaꞌ. Piyapinëhuëpita pochin niꞌsaranquëmaꞌ,” tënin.

Efesios 5:15

Napoaton iyaroꞌsaꞌ noya yonquiatomaꞌ yaꞌhuëcoꞌ. Aꞌnaquën co mantaꞌ yonquipihuëꞌ. Ama inapita pochin cancantocosohuëꞌ. Noꞌtëquën yonquicoꞌ.

Deuteronomio 13:4

Siniorosoꞌ Yosë niꞌton, inaíchin noya nicatoma imacoꞌ. Camairinquëmasopita natëcoꞌ. Nohuantërinsoꞌ nitotatomaꞌ, ina inachachin nicoꞌ. Inasáchin cancantatoma yaꞌipi cancanëma quëran chinotocoꞌ.

Colosenses 1:10

Catahuaquëꞌ Sinioro quëma nohuantëranso chachin niinaꞌ. Inapohuachinaꞌ, noya noya niꞌsaran. Catahuaquëꞌ noyasáchin niinaꞌ. Naꞌcon naꞌcon nohuichinënquën.

Colosenses 4:5

Co imarinsopitasohuëꞌ huëꞌpachinaꞌ, noya nontocoꞌ. Ama tapanatomahuëꞌ, noya aꞌchintocoꞌ. Onpopiontaꞌ noya nanan shaꞌhuitocoꞌ.

1 Tesalonicenses 2:12

Achinicancanainquëmaꞌ. “Yosë imaramaꞌ niꞌton, noyasáchin nicoꞌ Yosë noya niꞌinquëmaꞌ,” itërainquëmaꞌ. Ina acorinquëmaꞌ huaꞌanëntërinquë yaꞌconacamasoꞌ. Aꞌna tahuëri yaꞌhuërinꞌpaꞌ quëpantahuachinquëmaꞌ, noya noya yaꞌhuëcontaramaꞌ.

1 Tesalonicenses 4:1

Iporasoꞌ iyaroꞌsaꞌ Sinioro Quisoso nanan quëtërincoi niꞌton, pënëantarainquëmaꞌ. Iráca pënënainquëmaꞌ noya nicacamaso marëꞌ. “Noya nipatamaꞌ, Yosë noya niꞌsarinquëmaꞌ,” itërainquëmaꞌ, natëramacoi. Iporasoꞌ aquë aquëtëꞌ natëtatomaꞌ, noyasáchin nicoꞌ, tënahuë.

1 Juan 1:7

Yosësoꞌ noyasáchin ninin. Tahuëri pochin cancantërin. Canpoantaꞌ tahuëri pochin yonquihuatëhuaꞌ, Yosë nohuitarihuaꞌ. Naporahuaton, noya niniꞌtëhuaꞌ yaꞌhuarihuaꞌ. Huiꞌnin chachin chiminin niꞌton, yaꞌipi oshanënpoaꞌ inquitarinpoaꞌ. Huënainën quëran anoyacancantarinpoaꞌ.