Génesis 35:27 - Chayahuita (Shahui)

²⁷ Aꞌna tahuëri Cacoposoꞌ paꞌpin yaꞌhuërinquë paꞌnin. Inasoꞌ, Mamiriquë yaꞌhuërin. Ina ninanosoꞌ Arapa itopi antaꞌ. Naporahuaton ina chachin Ipron itomantapi. Inaquë Apraan, Isaco, inapita yaꞌhuëpi.

Génesis 35:27 ပူးပေါင်းရင်းမြစ်များ

Génesis 13:18

Ina natanahuaton, Apranso piyapinënpitarë chachin nëꞌmëtë pëiroꞌsa ótënpiso mapi. Masahuatonaꞌ, insina nararoquë paꞌpi. Inaquë paꞌsahuatonaꞌ, yaꞌhuëconpi huachi. Ina nararosoꞌ, Mamiri itopisoari huaꞌanëntërin. Ipron ninano yaꞌcariya inasoꞌ. Inaquë Apran Sinioro chinotacaso marëꞌ aꞌna artaro niantarin.

Génesis 14:13

Napoaponahuëꞌ, aꞌnara quira quëran chaꞌërahuaton, Apran shaꞌhuitapon paꞌnin. (Apransoꞌ, iprio piyapi itopi.) Naporoꞌ inasoꞌ, Mamiriri huaꞌanëntërinso insina nararoquë yaꞌhuërarin. Mamirisoꞌ, amoro piyapi. Iin mashonënpitasoꞌ: Aniri, Iscoro, inapita. Inapitasoꞌ Apran payatonaꞌ, catahuapi.

Génesis 17:8

Yaꞌipi Canaan noꞌpaꞌ ipora yaꞌhuëranquë, huaꞌanëntacaso marëꞌ quëtaranquën. Shiparinpitanta iso noꞌpa chachin huaꞌanëntomiataponaꞌ. Inapitantaꞌ, casáchin chinotaponaco, itërin.

Génesis 18:1

Insina nararoꞌ, Mamiriri huaꞌanëntërinquë Apraan yaꞌhuëarin. Inaquë nisoꞌ, Siniorori, yaꞌnotaantarin. Camotëchin pochin nisapasoꞌ yaꞌnotërin. Nëꞌmëtë pëinën yaꞌcoananënquë huënsasoꞌ, napoarin.

Génesis 23:19

Nani anoyatahuaton Apraansoꞌ, Maquipira naninquë saꞌincoꞌ poꞌmorin huachi. Noꞌpaꞌ paꞌaninquë napotërin. Ina noꞌpasoꞌ shaꞌhuirahuëso chachin, Mamiriri huaꞌanëntërinso noꞌpa quëran, piꞌi pipirinso parti quëparitërin. Ina roꞌtësoꞌ, Ipron itopi antaꞌ. Canaan parti yaꞌhuërin.

Génesis 23:2

Ina quëran Quiria-arpa ninanoquë chiminin. Ina ninanosoꞌ, Ipron itopi antaꞌ. Inaso Canaan parti yaꞌhuërin. Saꞌin chimininso marëꞌ Apraansoꞌ, sëtaton, naꞌnërárin, ayanárin, naporin.

Génesis 28:5

Ina pochin Isacori Patan-aran parti Cacopo aꞌparin. Cacoposoꞌ paꞌsahuaton, Napano yaꞌhuërinquë canconin. Nani shaꞌhuirahuëso chachin inasoꞌ, Pitoiro huiꞌnin. Pitoirosoꞌ Aran piyapi. Napanosoꞌ, Nipica yoꞌin miáchin. Nipicantaꞌ, Cacopo, Isao, inapita aꞌshinaꞌ.

Génesis 37:14

—Inta conpa. Paꞌsahuaton iyamashoroꞌsa niꞌcontaquëꞌ. Ohuicaroꞌsaꞌ, chiporoꞌsaꞌ, inapitanta onpoinsona nisapisoꞌ, nahuicontaquëꞌ. Ina quëran huëꞌsahuaton, onpoapisona shaꞌhuitiico canta nitochi, itërin. Cacoposo Ipron motopianaroꞌsa quëran, Cosi aꞌparin. Inaso paꞌsápaton Siquimoquë canconin.

Génesis 49:29

Aꞌna tahuëri Cacoposoꞌ, huiꞌnipita camairin: “Co huaꞌquiya quëranhuëꞌ chiminarahuë huachi. Chiminpato, shimashonëhuëpita paꞌpitopiso pirayan poꞌmoontaco. Iti huënton piyapi, Ipron itopisori, ina noꞌpasoꞌ huaꞌanëntopirinhuëꞌ.

2 Samuel 2:1

Ina piquëran Tapisoꞌ, Sinioro natanapon: —Cota huënton noꞌpanënquë naꞌa ninanoroꞌsa yaꞌhuërin. ¿Noya ina ninanoroꞌsaquë pacaꞌhuaisoꞌ to? itërin. —Noya paquëꞌ, itërin Siniorori. —¿Inso ninanoquëta paꞌi? taantarin Tapi. —Iporon ninanoquë paquëꞌ, itaantarin Siniorori.

2 Samuel 2:3

Sontaronënpitantaꞌ, saꞌina huiꞌninpitarë chachin imapi. Inapitaso napopinchin Ipronquë yaꞌhuëconpi. Aꞌnaquëontaꞌ, ina yaꞌcari ninanoaꞌhuaroꞌsaquë yaꞌhuëconpi.

2 Samuel 5:1

Ina piquëran, yaꞌipi Israiro ansianoroꞌsa Ipronquë paꞌpi. Inaquë Tapi quënanconahuatonaꞌ, itaponaꞌ: “Canpoasoꞌ, israiroꞌsanpoaráchin.

2 Samuel 5:3

Inapoatona yaꞌipi Israiro ansianoroꞌsari Tapi Ipronquë nontoonpi. Napotohuachinara inarintaꞌ, “Sinioronta niꞌsárinco niꞌton, noya camaitarahuë,” itahuaton inapitarëꞌ anoyatërin. Napohuachina, inapitaso yaꞌipi israiroꞌsa copirnonëna nicacaso marëꞌ acopi huachi.

2 Samuel 5:5

Ipronquëꞌton yaꞌconaton, Cota huënton israiroꞌsa huaꞌanëntërin. Canchisë piꞌipi miria inaquë huaꞌanëntërin. Ina quëran yaꞌipi israiroꞌsa huaꞌanëntohuachina, cara shonca cara piꞌipi huaꞌanëntërin. Quirosarin ninanoquë naporin.