Génesis 34:7 - Chayahuita (Shahui)

⁷ Cacopo huiꞌninpita huënantahuachinara, napopisoꞌ natantopi. Natantahuatonaꞌ, paꞌpi noꞌhuitopi. Siquimori oshina co mashátëraponahuëꞌ, ichihuëꞌërin niꞌton, napopi: “Inapoaton inasoꞌ, israiroꞌsanpoa panca tëhuëtërinpoaꞌ. ¡Co onporonta inapocaso yaꞌhuërinhuëꞌ!” topi.

Génesis 34:7 ပူးပေါင်းရင်းမြစ်များ

Génesis 20:9

Ina quëran Apraan amatahuaton, itapon: —¡Maꞌhuantacha nitapirancoihuë paya! ¡Caso co maquë tëranta tëhuëtëranquënhuëꞌ! Quëmaso nipirinhuëꞌ, napotatoncoi panca yaaoshahuanpirancoihuëꞌ. Ca aoshahuanatonco, quëmopinëhuëpita, piyapinëhuëpita, inapita, naꞌinchitonhuëꞌ. ¡Co naporëhuëꞌ!

Génesis 34:6

Siquimo paꞌpinsoꞌ Cacopo nontacaso marëꞌ paꞌnin.

Génesis 34:8

Amoroso nipirinhuëꞌ, inapita nontaton napotërin: —Huiꞌnahuë Siquimo itërahuësoꞌ, oshiparima paꞌpi nohuantërin macacaso marëꞌ. Onpopionta quëtocoꞌ.

Salmos 93:5

Sinioronquën niꞌton, camaitëransopita yaꞌhuëmiatarin. Noyasáchin nicaton, chinotërinënquënso pëiquë yaꞌhuëran. Inaquë yaꞌhuëran niꞌton, pëinënsoꞌ noyápiachin yaꞌnorin.

1 Corintios 10:8

Ina quëran aꞌnapita monshihuanpi. Ina marëꞌ Yosëri anaꞌintërin. Ina nohuanton, cato shonca cara huaranca piyapiꞌsaꞌ chiminpi. Aꞌna tahuëriíchin nipirinhuëꞌ, inanapo chiminpi. Ina yonquiatomaꞌ, ama mantaꞌ monshihuanacamasoꞌ yonquicosohuëꞌ.

1 Corintios 6:18

Napoaton ama piꞌpisha tërantaꞌ monshihuancosohuëꞌ. Ihuatacasoꞌ, noꞌpicasoꞌ, inapita nicacasoꞌ co noyahuëꞌ, nipirinhuëꞌ, co atapicancaninpoahuëꞌ. Monshihuanpatamaꞌ, nitapicancanaramaꞌ. Nonëmantaꞌ tapiaramaꞌ.

Efesios 5:3

Yosë anoyacancantërinquëmaꞌ niꞌton, ama iyaroꞌsaꞌ monshihuancosohuëꞌ. Ama aꞌna quëmapi saꞌin noyapacosohuëꞌ. Ama maꞌsharáchin cancantatomaꞌ, apiracosohuëꞌ. Ama aꞌnapita tëranta ina pochin nipiso shaꞌhuitocosohuëꞌ.

Colosenses 3:5

Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

1 Timoteo 5:13

Aꞌnaquëontaꞌ topinan niꞌtaponaꞌ paꞌsápatonaꞌ, chiropi. Naporahuaton, maꞌtona maꞌtona nonsapi, pinotapi, co napocasohuëꞌ nipirinhuëꞌ.

Hebreos 13:4

Quëmapiꞌsaꞌ saꞌapachinaꞌ, ama aꞌna sanapi yonquiꞌinasohuëꞌ. Sanapiꞌsantaꞌ soꞌyahuachinaꞌ, ama soꞌinaꞌ tëhuananpichinasohuëꞌ. Ama mantaꞌ monshihuainasohuëꞌ. Monshihuanpatamaꞌ, Yosë chiníquën anaꞌintarinquëmaꞌ.

Santiago 3:10

Yosë noya nontapomarahuëꞌ, piyapi pinopatamaꞌ, co noyahuëꞌ cancantaramaꞌ. Co iyaroꞌsaꞌ nisha nisha nonacasoꞌ yaꞌhuërinhuëꞌ.

1 Pedro 2:9

Imarëhuasopitaso nipirinhuëꞌ nohuantërinpoaꞌ. Huayoninpoaꞌ ina nohuitacaso marëꞌ. Inasáchin huaꞌanëntërinpoaꞌ. Nani acorinpoaꞌ corto huaꞌanoꞌsa pochin nicatëhuaꞌ, ina marëꞌ sacatacasoꞌ. Noyápiachin cancan quëtërinpoaꞌ. Yosë piyapinënpoaꞌ ninëhuaꞌ. Iráca tashi pochin cancantopirëhuahuëꞌ, Yosë nichaꞌërinpoaꞌ tahuëri pochin cancantacaso marëꞌ. Acorinpoaꞌ Yosë noya nosororinpoasoꞌ shaꞌhuicaso marëꞌ.