Génesis 34:24 - Chayahuita (Shahui)

²⁴ Siquimo paꞌpinë chachin napopiso natanatonaꞌ, nohuantopi. Napoaton yaꞌipi quëmapiꞌsa chiníquënoꞌsa nipisoꞌ, marca niacotopi huachi.

Génesis 34:24 ပူးပေါင်းရင်းမြစ်များ

Génesis 17:23

Naporo tahuëri chachin Apraansoꞌ, huiꞌnin Ismairo itërinso marca acotërin. Piyapinënpita pëinënquë chachin nasitopisontaꞌ, inapotërin. Aꞌnapitanta coriquinën quëran paꞌaninsoꞌ, acotërin. Yaꞌipi quëmapiꞌsa Apraan pëinënquë yaꞌhuëpisopita, marca niacotopi huachi. Yosë camaitërinso chachin nipi.

Génesis 23:10

Ipronta Iti piyapi. Inanta inaquë chachin nisarin niꞌton, aꞌnapita huaꞌanoꞌsa natantonënquë inaora chachin Apraan shaꞌhuitërin. Chiníquën nonin ninano yaꞌcoanataquëchin, naꞌhuëpisopitantaꞌ, natanacaiso marëꞌ:

Génesis 34:23

Inapohuatëhuaꞌ, yaꞌipi yaꞌhuëtopiso canpoanquën nisarin. Pëꞌtahuanënaꞌ, maꞌshanënaꞌ, yaꞌipi inapita canpoanquën nisarin. Huëco nohuantoco inapoaꞌahuaꞌ. Napohuatëhuaꞌ, inapitaso canpoarëꞌ yaꞌhuëcaiso marëꞌ quëparitapi, itopi.

Mateo 7:6

Ina quëran itaantarin: “Isontaꞌ aꞌchinchinquëmaꞌ. Niꞌniroꞌsaꞌ, coshiroꞌsaꞌ, inapita co yonquipihuëꞌ. Huirinaꞌpi paꞌton nininsoꞌ co quëtacasoꞌ yaꞌhuërinhuëꞌ. Noꞌpaquë acoramaꞌ naporini, iꞌnachitonahuëꞌ. Ina quëran canpitantaꞌ yaquëtëitënquëmahuëꞌ. Aꞌnaquën piyapiꞌsantaꞌ niꞌniroꞌsa pochin cancantopi niꞌton, Yosë nanamën aꞌchintohuatamaꞌ, chiníquën noꞌhuiarinënquëmaꞌ. Co piꞌpisha tërantaꞌ nohuantohuachinahuëꞌ, tananpitocoꞌ,” itërin.

1 Corintios 7:19

Co marca yonquicasoꞌ yaꞌhuërinhuëꞌ. Yosë natëcasorachin yonquicoꞌ.