Génesis 32:10 - Chayahuita (Shahui)

¹⁰ Tëhuënchachin co noyacohuëꞌ niꞌto, co nosoroancosoꞌ yaꞌhuërinhuëꞌ. Co noꞌtëquënáchin catahuaancoso yaꞌhuëpirinhuëꞌ. Iráca yaꞌhuërahuë quëran pipipo, Cortaniiquë pëntoitërahuë. Naporoꞌ co maꞌsha tëranta quëparahuë. Pitananëhuëroꞌcoáchin paꞌnahuë. Napopirahuëꞌ, iporasoꞌ cato huënton pochin huaꞌanëntërahuë.

Génesis 32:10 ပူးပေါင်းရင်းမြစ်များ

Génesis 18:27

Apraaniso nipirinhuëꞌ, naquëranchin nontaantarin: —Quëmaso Yosënquën, caso topinan piyapico niporahuëꞌ, naquëranchin nontaantaꞌinquën. Ama ina marëꞌ noꞌhuicosohuëꞌ.

Génesis 24:12

Naporahuaton inaquë chachin Yosë nontërin: “Niꞌquë Sinioro, quëmaso Yosënquën. Huaꞌanëhuë Apraan, natërinquën. Huaꞌanëhuë nosoroaton catahuaco.

Génesis 28:13

Naporahuaton, Sinioro chachiontaꞌ, ina pirayan huaniarin niꞌnin. Inari nontaton, itapon: “Caso Sinioroco. Quëmaquën Tata masho, Apraan itopisoꞌ chinotërinco. Tata parionta chinotërinco. Quëhuëntëransoꞌ noꞌpaꞌ quëtaranquën. Shiparinpitantaꞌ, iso noꞌpa chachin huaꞌanëntaponaꞌ. Isoso noꞌpaꞌ, Canaan itopi.

Génesis 28:15

Niꞌquëꞌ. Carinquën caꞌtanaranquën. Intópanta paꞌpatan, carinquën aꞌpaiaranquën. Carinquën chachin iso noꞌpaquë quënantaranquën. Co onporonta pataranquënhuëꞌ, yaꞌipi shaꞌhuitëranquënsoꞌ naniquë huarëꞌ catahuararanquën,” itërin.

Génesis 30:43

Inapoaton inasoꞌ, paꞌpi maꞌhuanin. Paꞌpi notohuaroꞌ ohuica yaꞌhuëtahuaton, piyapinënpitanta quëmapiꞌsaꞌ, sanapiꞌsaꞌ, yaꞌhuëtërin. Notohuaroꞌ camiyoroꞌsaꞌ, moraroꞌsaꞌ, inapitanta yaꞌhuëtërin.

Génesis 31:3

Naporoꞌ Siniorori Cacopo itapon: “Tataparin, quëmopinënpita, inapita yaꞌhuërinso parti panantaquëꞌ. Carinquën caꞌtanatënquën catahuaranquën,” itërin.

Génesis 32:5

Naꞌa ohuacaroꞌsaꞌ, moraroꞌsaꞌ, ohuicaroꞌsaꞌ, inapita yaꞌhuëtërinco. Piyapinëhuëpitantaꞌ, quëmapiꞌsaꞌ, sanapiꞌsaꞌ, yaꞌhuëtërinco. Iso nanan, aꞌpataranquën noya ninicatë yaꞌhuëantacaso marëꞌ tënin,’ itocoꞌ,” itërin. Napotahuaton aꞌparin.

Génesis 32:7

Ina natanahuaton, Cacoposo paꞌpi paꞌyanin. Paꞌyanaton yonquirárin. Yonquirárin quëran, piyapinënpita, ohuicanënpita, ohuacanënpita, camiyonënpita, inapita cato huënton acorin. “Iya mashori, aꞌna huënton ahuëhuachinaꞌ, aꞌna huëntonso taꞌararin,” taꞌton naporin.

2 Samuel 17:24

Apësaronsoꞌ, Israiro sontaroꞌsa ayontonin. Ayontonahuaton Tapi ahuëcaso marëꞌ imarin. Naporahuaton sontaronënpitarë chachin Cortaniiꞌ pëntontërin. Naporoꞌ Tapinta piyapinënpitarë chachin, Maanain ninanoquë canconpi. Inaso ninanoꞌ, pairahuan.

2 Samuel 7:18

Naporoꞌ inasoꞌ, Yosë caposonën acopisoꞌ nëꞌmëtë pëiquë yaꞌconin. Yaꞌconaton iso pochin Sinioro nontërin: “Sinioro. Quëmaso Yosënquën. Chini chiníquën nanantëran. Caso co máquëncohuëꞌ. Quëmopinëhuëpitantaꞌ, co máquënoꞌsahuëꞌ. Napoaton israiroꞌsa copirnonëna nicaꞌhuasoꞌ co inashitërahuëꞌ.

Salmos 16:2

Quëmasáchin chinotëranquën. Co nohuitëranquënhuëꞌ naporini, co noya cancanchitohuëꞌ.

Salmos 8:5

Ina nipirinhuëꞌ, anquëniroꞌsa pochin shininancoi. Noya nicatoi huaꞌanëntaꞌhuaiso marëꞌ acorancoi.

Salmos 84:7

Yaꞌcaritapona pochin, chini chiníquën cancantëraponaꞌ. Quirosarinquë canconpachinara, Yosë chachin quënanëso pochin nicaponaꞌ.

Isaías 6:5

Ina yonquiato: “¡Maꞌhuantacha caso nicato chiminarahuë paya! ¡Caso co noyahuëꞌ cancantato naponi nonahuë! ¡Aꞌnapitanta ca pochachin cancantopi nipirinhuëꞌ, inapitarëꞌco yaꞌhuërahuë! ¡Napoaporahuëꞌ, Sinioro yaꞌipi nanitapaton yaꞌipi huaꞌanëntërinso quënanahuë!” tënahuë.

Isaías 63:7

Onpopinsona Sinioro nosorotërinso yonquiato, shaꞌhuiarahuë. Maꞌpitaquësona catahuarinpoaso yonquiato, cantarahuë. Israiro huënton nosoromiatërinso marëꞌ napoarahuë. Paꞌpi nosoroaton catahuarinso marëꞌ inapoarahuë.

Miqueas 7:20

Shimashonëhuëpita Apraan, Cacopo, inapita shaꞌhuitëran: ‘Shiparimapita nosoromiatato, co aꞌpoarahuëꞌ,’ itëran iráca. ¡Napotëranso chachin nicaton, nosorocoi!” itërahuë.

Lucas 17:10

Canpitantaꞌ iyaroꞌsaꞌ, Yosë shaꞌhuitohuachinquëmaꞌ, natëcoꞌ. Nani natëhuatamaꞌ: ‘Topinan piyapinënpoaꞌ niꞌtëhuaꞌ, natërëhuaꞌ,’ nitocoꞌ. Yaꞌipiya natëcamasoꞌ yaꞌhuërin,” itërin Quisosori.

Lucas 5:8

Ina nápoꞌ sami maꞌton, Simon Pitro paꞌyanin. Quisoso nantën pirayan isonahuaton, itërin: —¡Maꞌpítacha Sinioro nanitaparan paya! Casoꞌ oshahuanco niꞌto, co yaꞌcariancosoꞌ yaꞌhuërinhuëꞌ, itërin.

2 Corintios 12:11

Nisha aꞌchinaꞌpiroꞌsaꞌ paꞌyatëramaꞌ niꞌton, huaꞌyantërinso pochin nontëranquëmaꞌ. “Paono nóya aꞌchintërincoi,” itëramaꞌ naporini, co ina pochin cantaꞌ nonacaꞌhuasoꞌ yaꞌhuëꞌitonhuëꞌ. “Quiyasoꞌ noya noyacoi,” itopirinënquëmahuëꞌ, co ca quëran noya noyahuëꞌ inahuasoꞌ. Co caora nanitaporahuëꞌ, Quisocristo catahuarinco niꞌton, noya ninahuë.

Deuteronomio 8:18

Sinioro achinirinquëma niꞌton, sacatatoma nani maꞌsha maꞌpatëramaꞌ. Shimashonënpoapitarëꞌ anoyataton, shaꞌhuitërinsoꞌ nanicaso marëꞌ catahuarinquëmaꞌ. Ama ina naniantocosohuëꞌ.

1 Pedro 5:5

Huiꞌnapiꞌsanquëmantaꞌ ansianoꞌsaꞌ natëcoꞌ. Yaꞌipinquëmaꞌ noya yonquiatomaꞌ, nicatahuacoꞌ. Quiricanën quëran itërinpoaꞌ: “Caora noya nisarahuë, taꞌtomaꞌ, nocantohuatamaꞌ, Yosë co noya niꞌsarinquëmahuëꞌ. Nipirinhuëꞌ, ‘Caora co nanitërahuëꞌ noya nicaꞌhuasoꞌ. Catahuaco,’ topatamaꞌ, inaora nohuanton, Yosë nóya catahuarinquëmaꞌ,” tënin.