Génesis 28:14 - Chayahuita (Shahui)

¹⁴ Ca nohuanto shiparinpita naꞌamiataponaꞌ. Moꞌshi pochin naꞌaponaꞌ. Norti parti, sor parti, piꞌi pipirinso parti, piꞌi yaꞌconiniso parti, yaꞌipi inapita parti huaꞌanëntaponaꞌ. Quëmá quëran, yaꞌipi piyapiꞌsa nisha nisha nipisopita catahuararahuë. Shiparinpita quëraonta inapotarahuë.

Génesis 28:14 ပူးပေါင်းရင်းမြစ်များ

Génesis 12:3

Inpitasona noya nicatënën catahuahuachinën, carinta inapita inapotarahuë. Inpitasona co huachi noya yaꞌhuëcamaso marëhuëꞌ shaꞌhuitohuachinën, carinta inapita napotarahuë. Quëmá quëran, yaꞌipi piyapiꞌsa nisha nisha nipisopita catahuararahuë,” itërin.

Génesis 13:14

Noto paꞌpachina, Siniorori Apran yaꞌnotaton itapon: “Huaniran quëran yaꞌipi parti notëtëquëꞌ: Pëꞌnatë parti, pëtëtë parti, piꞌi pipirinso parti, piꞌi yaꞌconinso parti, yaꞌipi inaquëpita notëton, noya niꞌquëꞌ.

Génesis 13:15

Yaꞌipi noꞌpaꞌ niꞌnansoꞌ, carinquën huaꞌanëntacaso marëꞌ quëtaranquën. Quëmari huaꞌanëntomiataran. Naporahuaton, shiparinpitarinta huaꞌanëntomiataponaꞌ.

Génesis 13:16

Ca nohuanto shiparinpita paꞌpi notohuaroꞌ naꞌamiataponaꞌ. Moꞌshi co pichicasohuëꞌ ninin. Inapochachin shiparinpitanta co onpo pichicasohuëꞌ naꞌaponaꞌ.

Génesis 22:17

Noya nicatënquën catahuamiataranquën. Ca nohuanto shiparinpita, tayoraroꞌsa nápo naꞌaponaꞌ. Marë yonsanquë inotëraꞌhuaya nápo, naꞌamiataponaꞌ. Naporahuaton, inapitaso inimiconëna minsëraꞌpiaponaꞌ.

Génesis 22:18

Quëma natëranco niꞌton, yaꞌipi isoroꞌpaquë nacionoꞌsa yaꞌhuërinsopita, shiparinpita quëran catahuararahuë,” itërin.

Génesis 26:4

Ca nohuanto quëma shiparinpita, naꞌamiataponaꞌ. Tayoraroꞌsa piꞌiroꞌtëquë yaꞌhuërinso nápo, yaꞌhuaponaꞌ. Inapitari yaꞌipi iso noꞌparoꞌsa huaꞌanëntaponaꞌ. Naporahuaton, yaꞌipi isoroꞌpaquë nacionoꞌsa yaꞌhuërinsopitantaꞌ, shiparinpita quëran catahuararahuë.

Génesis 32:12

Nani quëma chachin, catahuancoso marëꞌ aꞌninquëchin shaꞌhuitëranco. Naporahuaton, shihuëpitanta caquëran pipipisopita, inotëraꞌhuaya pochin naꞌacaisoꞌ shaꞌhuitëranco. Marë yonsanquë inotërahuaya yaꞌhuërinsoꞌ, co pichicasohuëꞌ. Ina pochin naꞌacaisoꞌ nani shaꞌhuitëranco,” itërin.

Génesis 48:19

Paꞌpinso nipirinhuëꞌ, co nohuantërinhuëꞌ inapocasoꞌ. Napoaton itapon: —¡Naporin mini conpa, nani nitotërahuë! Manasisinta shinpita quëran panca nacion nisarin. Iyaaꞌhuainso napoaponahuëꞌ, noya noya nicaton shinpita quëran naꞌcon naꞌcon nacionoꞌsa pipiarin.

Salmos 72:17

Noya copirno niꞌton, yaꞌipi parti noya nahuiꞌin. Piꞌi yaꞌhuërárinso pochin inantaꞌ, yonquiraꞌinaꞌ. Insosona noya yaꞌhuëcaso marëꞌ yashaꞌhuihuachin iꞌna yonquiaton shaꞌhuiꞌin. Yaꞌipi nacionoꞌsaquë yaꞌhuëpisopitari ina paꞌyachinaꞌ.

Éxodo 32:13

Piyapinënpita: Apraan, Isaco, Cacopo, inapita yonquiaton shinpita nosoroquëꞌ. ‘Caso Yosëco niꞌto, catahuaranquëmaꞌ. Shiparimapita tayora nápo naꞌapon. Iso noꞌpa chachin inapitari huaꞌanëntomiataponaꞌ,’ itëran. Ina yonquiquëꞌ,” itërin.

Isaías 54:3

Inchinan quëran, apancanataramaꞌ. Ahuënan quëraonta inapotaramaꞌ. Canpita quëran pipipisopita naꞌa nacionoꞌsa canaponaꞌ. Ninanoroꞌsa tanahuantapisopitantaꞌ, yaꞌhuëtaantaponaꞌ.

Números 23:10

Amocan tomontërinso pochin, co onpo pichichináchinhuëꞌ naꞌapi. Onposo yaꞌhuëpisoꞌ, co insonta nitotërinhuëꞌ. Inahuaso noyasáchin nipi niꞌton, noyasha chiminaponaꞌ. Inahua pochin cantaꞌ, chiminahuë naporini, noya noya cancanchitohuëꞌ, tënahuë,” itërin.

Mateo 8:11

Iporaso huachi nisha nisha parti quëran huëꞌsapi. Nisha piyapiꞌsaꞌ niponaraihuëꞌ, imatonaꞌ, Yosë huaꞌanëntërinquë yaꞌconapi. Inápaquë paꞌpachinaꞌ, Apraan, Isaco, Cacopo, inapita nohuitapi. Inapitarëꞌ huënsëapi coshatacaiso marëꞌ. Nóya yaꞌhuërapi huachi, tënahuë.

Hechos 3:25

Yosë nohuanton, ninshitërinënquëmaꞌ, nitotëramaꞌ. Yosë chachin naporinsoꞌ natanamaꞌ. Shimashonënpita nontohuachina, yonquirinquëmaꞌ canpitantaꞌ. Iráca Apraan itërin: ‘Caora nohuanto, catahuaranquën. Quëma shiparinpita quëran yaꞌipi piyapiꞌsaꞌ noya cancantapi,’ itërin Yosëri.

Gálatas 3:16

Inapochachin iráca Yosëri nontaton, Apraan shaꞌhuitërin: “Caora nohuanto, nóya catahuaranquën. Quëma shipariontaꞌ catahuarahuë yaꞌipi piyapiꞌsaꞌ anoyacancantacaso marëꞌ,” itërin. Aꞌnaíchin shiin yonquiaton, naporin. Quisocristo ninoton, napotërin.

Gálatas 3:8

Co cotioroꞌsaráchin Yosëri nohuantërinhuëꞌ. Nisha piyapiꞌsantaꞌ imapachinaꞌ, noya niꞌsarin. Noya nicaton, co oshanëna marëꞌ anaꞌintarinhuëꞌ. Iráca iso noya nanan ninoton, Apraan itapon: “Nisha nisha piyapiꞌsantaꞌ quëma pochin cancantohuachinaꞌ, naꞌcon catahuaarahuë,” itërin Yosëri. Quiricanën quëran naporin.

Efesios 1:3

Ma noyacha Tata Yosëso paya. Sinioro Quisocristo paꞌpin inasoꞌ. Inápa quëran noya noya yonquirinpoaꞌ. Quisocristo imarëhuaꞌ niꞌton, naꞌcon catahuarinpoaꞌ noya noya cancantacaso marëꞌ. Oshanënpoaꞌ inquitatonpoaꞌ, anoyacancantërinpoaꞌ. Ina quëran nani tahuëri catahuarinpoaꞌ nohuantërinso chachin nicacasoꞌ. Co inápaquë yaꞌhuëyatërarihuarahuëꞌ, inatohuaꞌ yaꞌhuëarëhuaso pochin Yosë nohuitërëhuaꞌ. Ina yonquiatëhuaꞌ, “Yosparinquën Sinioro,” itahuaꞌ.

Deuteronomio 12:20

Sinioro shaꞌhuitërinquëmaso chachin, ina nohuanton aꞌna tahuëri aquëtë huarëꞌ noꞌpaꞌ quëtaantarinquëmaꞌ. Naporoꞌ nosha nayahuatamaꞌ, noya capamaso yaꞌhuërin.

Apocalipsis 7:4

Ina quëran tëꞌyainaquë Yosë marcanën acotëraꞌpiapi aꞌnapitari nohuitacaiso marëꞌ. Notohuaroꞌ acotëꞌyatëraꞌpiapi. Pichirahuaton: —Pasa catapini shonca catapini huaranca acotërai, tënin, natanahuë. Yaꞌipi Israiro huëntonoꞌsaquë napotërin.

Apocalipsis 7:9

Ina quëran huaꞌnarëso pochin niantarahuë. Huaꞌhuayatërahuëꞌ piyapiꞌsaꞌ Yosëꞌpaꞌ quënanahuë. Co pichicasohuëꞌ. Nisha nisha piyapiꞌsaꞌ Yosë huaꞌanëntacasoꞌ shiranën notënanquë huaniapi, nisha nisha nananquë nonpisopita. Nisha nisha parti quëran huëcatonaꞌ, Carniroaꞌhua yamotatonaꞌ, notërapi. Inapitasoꞌ huiríchin aꞌmopi. Mërëmë pochin nininsoꞌ sëꞌquërahuatonaꞌ, Yosë chinotapi.