Génesis 24:7 - Chayahuita (Shahui)

⁷ Siniorosoꞌ Yosë niꞌton, inápaquë huaꞌanëntërin. Nani ina shaꞌhuitërinco iso noꞌpaꞌ shihuëpitari huaꞌnëntacasoꞌ. Iráca tatahuë yaꞌhuërin noꞌpa quëran ocoirinco. Quëmopinëhuëpita yaꞌhuërin parti quëran ocoirinco huachi. Ocoirahuatonco isëquë quëninco. Inari chachin anquëninën aꞌpararin catahuainquënso marëꞌ. Ina nohuanton, sanapi nohuantarin isëquë huëcacasoꞌ.

Génesis 24:7 ပူးပေါင်းရင်းမြစ်များ

Génesis 13:15

Yaꞌipi noꞌpaꞌ niꞌnansoꞌ, carinquën huaꞌanëntacaso marëꞌ quëtaranquën. Quëmari huaꞌanëntomiataran. Naporahuaton, shiparinpitarinta huaꞌanëntomiataponaꞌ.

Génesis 15:18

Naporo tahuëri chachin, Sinioro Apranë anoyatërin. Anoyataton itapon: —Shiparinpita iso noꞌpaꞌ quëtarahuë: Iquipito iꞌ quëran huarëꞌ Iopiratisiiꞌ pancaiꞌpaꞌ, huaꞌanëntopiso naniarin.

Génesis 16:7

Taꞌapirinhuëꞌ, Sinioro anquëninëni inotëro parti quënanin. Shor iraquë iꞌsha pipirinsoꞌ yaꞌcariꞌ, quënanin.

Génesis 17:8

Yaꞌipi Canaan noꞌpaꞌ ipora yaꞌhuëranquë, huaꞌanëntacaso marëꞌ quëtaranquën. Shiparinpitanta iso noꞌpa chachin huaꞌanëntomiataponaꞌ. Inapitantaꞌ, casáchin chinotaponaco, itërin.

Génesis 21:17

Yosëri, huiꞌnapi naꞌnërinsoꞌ natanin. Napoaton Yosë anquëninëni, inápa quëran përasahuaton nontërin: “¿Maꞌta Acara onporan? ¡Ama paꞌyanquësohuëꞌ! Yosëri, huiꞌnapi naꞌnërinsoꞌ natanin.

Génesis 22:11

Naporo chachin Sinioro anquëninëni, inápa quëran përarin: —¡Apraan! ¡Apraan! itërin. —Maꞌta Sinioro yaꞌhuëarahuë, itërin Apraani.

Génesis 24:40

Napotohuatora, shaꞌhuitërinco: “Niꞌquëꞌ, caso Sinioro iranën noꞌtëquën paꞌtërahuë niꞌton, anquëninën aꞌpararin catahuainquënso marëꞌ. Ina nohuanton, noya paꞌsahuaton sanapi quënamaran. Tatahuëi quëran quëmopinëhuë huiꞌnin chachin, huiꞌnahuë marëꞌ matomaran.

Génesis 26:24

Naporo tashi Siniorori yaꞌnotahuaton itapon: “Caso Yosëco. Tataparin Apraan chinotërinco. Ama tëꞌhuaquësohuëꞌ. Carinquën caꞌtanatënquën catahuamiataranquën. Piyapinëhuë Apraan natërinco niꞌton, ca nohuanton shiparinpita naꞌamiatapon,” itërin.

Esdras 1:2

“Caso Siroco. Pirsia copirnoco niꞌto, napotaranquëmaꞌ. Siniorosoꞌ Yosë niꞌton, inápaquë huaꞌanëntërin. Ina acorinco nisha nisha nacionoꞌsa huaꞌanëntaꞌhuaso marëꞌ. Camairinco niꞌton, Quirosarinquë ina chinotacaso pëi anitarahuë. Inaso ninanoꞌ, Cota parti yaꞌhuërin.

Salmos 103:20

Anquëniroꞌsanquëmanta chiníquën nanantapomarahuëꞌ, Sinioro chinotocoꞌ. Canpitaso ina camaihuachinquëma aꞌnaroáchin natëramaꞌ.

Salmos 32:8

Sinioronënpoa naporin: “Carinquën catahuaranquën noꞌtëquën yonquicasoꞌ. Anitotaranquën maꞌsona nicacasoꞌ. Noyasha pënënatënquën, noya ira aꞌnorëso pochin nitaranquën.

Salmos 34:7

Sinioro noya nicatë natëhuatëra, anquëninën tahuirapitatonpoa paꞌpoyararinpoaꞌ.

Salmos 73:24

Noya nicaꞌhuaso marëꞌ nani tahuëri ayonquiranco. Aꞌna tahuërintaꞌ, inápaquë quëpantaranco huachi.

Éxodo 32:13

Piyapinënpita: Apraan, Isaco, Cacopo, inapita yonquiaton shinpita nosoroquëꞌ. ‘Caso Yosëco niꞌto, catahuaranquëmaꞌ. Shiparimapita tayora nápo naꞌapon. Iso noꞌpa chachin inapitari huaꞌanëntomiataponaꞌ,’ itëran. Ina yonquiquëꞌ,” itërin.

Daniel 2:44

Ina copirnoroꞌsa huaꞌanëntasoiꞌ, Yosë inápaquë yaꞌhuërinso huaꞌanëntarin. Ina huaꞌanëntërinsoꞌ, co onporonta taꞌhuantarinhuëꞌ. Co aꞌnapita nacionoꞌsari minsëarinhuëꞌ. Aꞌnapita huaꞌanëntopisoꞌ, yaꞌipi ataꞌhuantapon. Yaꞌhuërëꞌ ina huaꞌanëntërinsosoꞌ, yaꞌhuëmiatapon.

Jonás 1:9

—Caso iprio piyapico niꞌto, Sinioro chinotërahuë. Inaso Yosë, inápaquë huaꞌanëntërin. Inari chachin isoroꞌpaꞌ, marëꞌ, inapita acorin.

Números 11:12

Iráca shimashonënpita shaꞌhuitëran noꞌpaꞌ quëtacasoꞌ. Inaquë quëpaꞌhuaso marëꞌ acopirancohuëꞌ, co huachi nanitërahuëꞌ. Inapita quëpacasosoꞌ, huaꞌhuaroꞌsa ipotë quëparëso pochin niconin. Co caso paꞌpinacohuëꞌ. Co caso aꞌshinacohuëꞌ. ¡Napoaton co quëpaꞌhuaso yaꞌhuërinhuëꞌ!

Números 14:16

“Caso Yosëco niꞌto, Canaan noꞌpaꞌ quëtaranquëmaꞌ,” taꞌton, israiroꞌsa quësapirinhuëꞌ, co huachi nanitatonhuëꞌ, inotëro parti tiquirin, itaponën.

Números 14:30

Caripi, Cosoi, inapitaráchin yaꞌconaponaꞌ. Inaquë poꞌmoanquëmaso marëꞌ noꞌtëquën shaꞌhuitopiranquëmahuëꞌ, co natëtëramahuëꞌ niꞌton, canpitaso co yaꞌconaramahuëꞌ.

Hechos 7:5

Huëꞌpirinhuëꞌ, Yosë nohuanton, co noꞌpaꞌ yaꞌhuëtërinhuëꞌ. Co piꞌpisha tërantaꞌ huaꞌanëntërinhuëꞌ. “Aꞌna tahuëri Canaan parti yaꞌhuëmiataramaꞌ. Quëma shiparinpita naꞌasahuatonaꞌ, ina noꞌpaꞌ huaꞌanëntapi,” itërin Yosëri. Co huiꞌnahuayantërasohuëꞌ, napotërin.

Deuteronomio 1:8

Nani yaꞌipi ina noꞌpaꞌ carinquëma quëtëranquëma huaꞌanëntamaso marëꞌ. Napoaton paꞌsahuatomaꞌ, ina noꞌpaꞌ máco huachi. Iráca shimashonëmapita Apraan, Isaco, Cacopo, inapita nani shaꞌhuitërahuë: ‘Caso Sinioroco niꞌto, quëtaranquëmaꞌ, itërahuë,’ itërinpoaꞌ,” tënin Moisësë.

Deuteronomio 34:4

Naporoꞌ Siniorori itapon: “Iso mini noꞌpaꞌ, Apraan, Isaco, Cacopo, inapita: ‘Caso Yosëco niꞌto, iso noꞌpaꞌ shiparimapita quëtarahuë,’ taꞌto shaꞌhuitërahuësoꞌ. Quëmaora yaꞌpiranën quëran chachin niꞌcamaso nohuantato, aꞌnotëranquën. Napoaponahuëꞌ, quëmasoꞌ co inaquë yaꞌconaranhuëꞌ,” itërin.

Hebreos 1:14

Inapitasoꞌ inpriatonënpita pochin niꞌton, Yosëri camairin. Aꞌpaimarin imarëhuasopita catahuainpoaso marëꞌ. Yosë chachin nichaꞌësarinpoaꞌ. Nani ina nitotëramaꞌ.

Hebreos 11:9

Aquë paaton, Canaan parti canconin. Inaquë yaꞌhuaponahuëꞌ, nëꞌmëtëꞌ pëiquëráchin yaꞌhuërin. Paꞌsápaton, co yaꞌhuëmiatërinhuëꞌ. Isaco, Cacopo, inapitantaꞌ nëꞌmëtëꞌ pëiroꞌsaquë yaꞌhuëpi. Yosëri nani shaꞌhuitërin. “Iso noꞌpa chachin quëchinquëmaꞌ,” itopirinhuëꞌ, co huaꞌanënchátërapihuëꞌ. “Co Yosë nonpintarinpoahuëꞌ. Aꞌna tahuëri ina nohuanton, huaꞌanëntarihuaꞌ,” taꞌtonaꞌ, Yosë natëpi.

Josué 1:6

Ama tëꞌhuatonhuëꞌ, chiníquën cancantëquëꞌ. Carinquën catahuaranquën inimicoroꞌsa minsëaran. Inapita minsërahuaton, noꞌpanëna israiroꞌsa patomataran. Nani shimashonënapita quëtaꞌhuasoꞌ shaꞌhuitërahuë niꞌton, inapotaran.

Josué 24:3

Apraansoꞌ, ina quëran ocoirahuë. Ocoirahuato, yaꞌipi iso noꞌpaꞌ paꞌtacaso camairahuë niꞌton, yaꞌipi paꞌtërin. Ina quëran ca nohuanton chachin shinpita naꞌamiatërin. Ca nohuanton huiꞌnahuanpachina Isaco itërin. Inaꞌton canpita shimashonëma ninin.

Apocalipsis 11:13

Naporo chachin panca ocohua paꞌsarin. Paꞌpachina, notohuaroꞌ pëiroꞌsaꞌ ohuatarin. Canchisë huaranca piyapiꞌsaꞌ chiminapi huachi. Aꞌnapitasoꞌ paꞌpi tëꞌhuatapi. “Yosë nohuanton, naporin. ¡Maꞌpitacha nanitaparin paya!” tosapi.

Jueces 2:1

Sinioro anquëninënso Quiricaro quëran pipirahuaton, Poquimo itopiquë pantarin. Inaquë cancontarahuaton, israiroꞌsa itapon: “Carinquëma Iquipito noꞌpaꞌ quëran ocoiranquëmaꞌ. Ocoirahuatënquëmaꞌ, iso noꞌpaquë quënanquëmaꞌ. Iso noꞌpasoꞌ, shimashonëmapita nani shaꞌhuitërahuë quëtaꞌhuanquëmaso marëꞌ: ‘Caso Yosëco niꞌto, iso noꞌpaꞌ shiparimapita quëtarahuë,’ itërahuë. Ina quëran canpitanta shaꞌhuitëranquëmaꞌ: ‘Canpitaroꞌco anoyatërahuësoꞌ co onporonta nishataponhuëꞌ. Canpitanta napoaponahuëꞌ, ama Canaanquë yaꞌhuëpisopitarëꞌquëmaꞌ, anoyatocosohuëꞌ. Mamanshi moshacaiso marëꞌ artaroroꞌsa nipisoꞌ ataꞌhuantocoꞌ,’ itëranquëmaꞌ. Napotopiranquëmahuëꞌ, canpitaso co natëramacohuëꞌ. Co natëtatomahuëꞌ paꞌpi noꞌhuípiro ninamaꞌ.