5 Napotohuachina, Iti huaꞌanoꞌsari itaponaꞌ:
Canaansoꞌ, paninan huiꞌnahuanpachina, Siton itërin. Ina quëran huiꞌnahuaantahuachina, Iti, itërin.
Ina quëran, saꞌincoꞌ nonën patahuaton, yaꞌhuëhuanoꞌsa nontapon paꞌnin. Yaꞌhuëhuanoꞌsasoꞌ, itiroꞌsa itopi. Huaꞌanoꞌsa nipisopita niyontoyantopiquë, quënanconin. Inaquë nontahuaton itapon:
—Caso co yaꞌhuëhuancohuëꞌ niporahuëꞌ, yacaparanquëmaꞌ. Saꞌahuë chiminin niꞌton, chiminpatamara nipoꞌmoramasoꞌ noꞌpaꞌ paꞌantoco canta topirahuë, itërin.
—Natanquë sinioro shaꞌhuichinquën. Yosë huayoninquën niꞌton, quëmasoꞌ chiníquën nanantëran. Nipoꞌmoraisoꞌ noꞌpaꞌ insosona noya noya niꞌnanquë, saꞌancoꞌ poꞌmoquëꞌ. Co incoi tëranta apiratarainquënhuëꞌ, itopi.
Popriyatopisopitasoꞌ nichaꞌërin. Noya nipi niꞌton, noya noya acorin. Huiꞌninapitantaꞌ, notohuaroꞌ yaꞌhuëtopi. Ohuicaroꞌsa pochin naꞌapi.
