Génesis 22:7 - Chayahuita (Shahui)

⁷ Papon pochin Isacori, Apraan itapon: —¡Tata! itërin. —¿Maꞌta conpaaꞌhuaꞌ? itërin paꞌpini. —Niꞌquë tata, nani ihuë yaꞌhuërin. Pëꞌto raꞌpinta yaꞌhuërin. Carniroaꞌhua yaꞌipi ahuiquitacaso marësoꞌ: ¿Intoparanta manëꞌ? itërin Isacori.

Génesis 22:7 ပူးပေါင်းရင်းမြစ်များ

Génesis 22:8

—Yosë nohuanton conpa yaꞌhuapon, itërin paꞌpini. Ina quëran, paantapi.

Génesis 8:20

Nani pipihuachinara, Noiso aꞌnara artaro ninin. Yosë chinotacaso marëꞌ maꞌsharoꞌsa tëpacaiso nipisopita masahuaton, tëparin. Anpiantëhuanoꞌsantaꞌ, manin. Aꞌnaya aꞌnaya nisha nisha nipisopita quëran tëparin. Tëparahuaton, Sinioro chinotacaso marëꞌ artaro aipi yaꞌipi ahuiquitërin.

Éxodo 12:3

Yaꞌipi israiroꞌsa nitotacaiso marëꞌ shaꞌhuitocoꞌ. Ipora yoquiráchin shonca tahuëritahuasoꞌ, nani pëiquë yaꞌhuëramasoꞌ, aꞌnara carniroaꞌhuahuë nipon, chipoaꞌhuahuë nipon mainaꞌ. Tëpatona capacaiso marëꞌ nisha acoꞌinaꞌ. Aꞌna piꞌipitërinsoꞌ. Co máquën tëranta tëhuërinsohuëꞌ inapochinaꞌ. Napoaponahuëꞌ, nanicaiso tantiainaꞌ. Aꞌnaquën pëiquë co naꞌashahuëꞌ nipachina, niyaꞌyoranpisoꞌ capini nipatomatatona caꞌinaꞌ.

Mateo 26:39

Amashamiachin paꞌsahuaton, isonconin. Noꞌpaquë huarëꞌ monshomarahuaton, Yosë nontërin: “Quëma nohuantohuatan Tata, nichaꞌëco ama maꞌsha onpoꞌisohuëꞌ. Main oꞌorëso pochin parisitaꞌhuasoꞌ yaꞌhuërin. Co parisitaꞌhuasoꞌ nohuantopirahuëꞌ, quëma nohuantohuatan, noya, tënahuë. Noꞌtëquën yanatëranquën,” itërin.

Mateo 26:42

Ina quëran paantarahuaton, Yosë nontaantarin. —Nohuantohuatan Tata, nichaꞌëco ama maꞌsha onpoꞌisohuëꞌ. Nipirinhuëꞌ co nohuantohuatanhuëꞌ, maꞌsona yaonpotohuatancontaꞌ noya, tënahuë. Noꞌtëquën yanatëranquën, itaantarin.

Juan 1:29

Tahuëririnquë inaquë Quisoso huëꞌsarin. Coanshari quënanahuaton, piyapiꞌsaꞌ itërin: “Pasoꞌ quëmapi niꞌcoꞌ. Yosëri aꞌpaimarinsoꞌ. Inasoꞌ carniroaꞌhua pochin nicaton, oshanënpoaꞌ inquitiinpoaso marëꞌ chiminapon.

Juan 18:11

Quisososo nipirinhuëꞌ co nohuantërinhuëꞌ. —Sahuëni iyasha poꞌmoantaquëꞌ. Tananpitëquëꞌ mainaco. Tatahuë nohuanton, masarinaco. Main oꞌorëso pochin chiníquën parisitarahuë. ¿Co ina nitotëranhuëꞌ ti? itërin.

Romanos 8:15

Iráca Yosë tëꞌhuatëramaꞌ. Iporaso nipirinhuëꞌ Ispirito Santo yaꞌcoancantërinpoaꞌ niꞌton, co huachi mantaꞌ tëꞌhuatacasoꞌ yaꞌhuërinhuëꞌ. Huiꞌninpita pochachin Yosë niꞌninpoaꞌ. Ina nontohuatëhuara, “Tata,” itërëhuaꞌ.

Apocalipsis 13:8

Huaꞌhuayatërahuëꞌ piyapiꞌsari natëapi. Carniroaꞌhua imapisopitaíchin co ina chinotapihuëꞌ. Inasoꞌ aꞌna quirica yaꞌhuëtërin. Nanpirin quirica itopisoꞌ. Inaquë nininënpita nani ninshitërin. Isoroꞌpaꞌ ninin quëran huarëꞌ imapisopita ninoton, inaquë ninshitërin. “Canpoa marëꞌ Carniroaꞌhua chiminin,” taꞌtonaꞌ, ina imasapi. Aꞌnapitaso nipirinhuëꞌ co nanpirin quiricaquë nininënpita yaꞌhuërinhuëꞌ niꞌton, maꞌsha marë quëran pipirinsoꞌ chinotapi.