Génesis 22:17 - Chayahuita (Shahui)

¹⁷ Noya nicatënquën catahuamiataranquën. Ca nohuanto shiparinpita, tayoraroꞌsa nápo naꞌaponaꞌ. Marë yonsanquë inotëraꞌhuaya nápo, naꞌamiataponaꞌ. Naporahuaton, inapitaso inimiconëna minsëraꞌpiaponaꞌ.

Génesis 22:17 ပူးပေါင်းရင်းမြစ်များ

Génesis 12:2

Aꞌna tahuëri ca nohuanto, shiparinpita panca nacion ocoiaponaꞌ. Carinquën catahuamiataranquën. Inapotaranquën niꞌton, sacóshin nahuinaran. Naporahuaton, quëmá quëran aꞌnapitanta catahuararahuë.

Génesis 13:16

Ca nohuanto shiparinpita paꞌpi notohuaroꞌ naꞌamiataponaꞌ. Moꞌshi co pichicasohuëꞌ ninin. Inapochachin shiparinpitanta co onpo pichicasohuëꞌ naꞌaponaꞌ.

Génesis 15:5

Itahuaton, nëꞌmëtë pëinën quëran ocoirin. Ocoirahuaton, shaꞌhuitërin: —Piꞌiroꞌtë nëꞌpërahuaton, tayoraroꞌsa pichiquëꞌ. Nanitohuatan pichiquëꞌ. Ina nápo shiparinpita yaꞌhuëtarinquën, itërin.

Génesis 17:6

Carinquën catahuaranquën niꞌton, notohuaroꞌ shiparinpita yaꞌhuëtarinquën. Aꞌnaquën shiparinpita, copirno yaꞌconaponaꞌ. Aꞌnaquëontaꞌ, nacionoꞌsa ocoiaponaꞌ.

Génesis 24:60

Nani yapaꞌpachina, yoꞌini nóya yonquirapiton iso pochin shaꞌhuitërin: “Oshira, Yosë catahuainquën. Paꞌpi nohuantërai, noya huaꞌhuanaton, notohuaroꞌ amiparinpita yaꞌhuëtiinquënsoꞌ. Naporahuaton amiparinpitantaꞌ, Yosëri catahuain inimiconënapita minsëraꞌpiainaꞌ,” itërin.

Génesis 25:11

Apraan chiminpachina, Yosëri Isaco, catahuamiatërin. Inaso Nipicarë chachin: “Nanpiton niꞌsárincosoꞌ poso,” itopisoꞌ pirayan, yaꞌhuërapi.

Génesis 26:24

Naporo tashi Siniorori yaꞌnotahuaton itapon: “Caso Yosëco. Tataparin Apraan chinotërinco. Ama tëꞌhuaquësohuëꞌ. Carinquën caꞌtanatënquën catahuamiataranquën. Piyapinëhuë Apraan natërinco niꞌton, ca nohuanton shiparinpita naꞌamiatapon,” itërin.

Génesis 26:4

Ca nohuanto quëma shiparinpita, naꞌamiataponaꞌ. Tayoraroꞌsa piꞌiroꞌtëquë yaꞌhuërinso nápo, yaꞌhuaponaꞌ. Inapitari yaꞌipi iso noꞌparoꞌsa huaꞌanëntaponaꞌ. Naporahuaton, yaꞌipi isoroꞌpaquë nacionoꞌsa yaꞌhuërinsopitantaꞌ, shiparinpita quëran catahuararahuë.

Génesis 28:3

Yosë yaꞌipi nanitaparinsoꞌ catahuainquën. Naꞌa huiꞌnanpita quëchinquën. Quëmá quëran naꞌa nacionoꞌsa pipicaso marëꞌ inapochinquën.

Génesis 28:4

Yosëri Apraan noya yaꞌhuëcaso marëꞌ shaꞌhuitërinso chachin, quëmanta quëchinquën. Quëma shiparinpitantaꞌ, inachachin quëchin. Iso noꞌpaꞌ ipora yacapatërëhuasoꞌ, quëchinquëmaꞌ. Yosëri nani Apraan shaꞌhuitërin niꞌton, quëtarinquëmaꞌ,” itërin.

Génesis 32:12

Nani quëma chachin, catahuancoso marëꞌ aꞌninquëchin shaꞌhuitëranco. Naporahuaton, shihuëpitanta caquëran pipipisopita, inotëraꞌhuaya pochin naꞌacaisoꞌ shaꞌhuitëranco. Marë yonsanquë inotërahuaya yaꞌhuërinsoꞌ, co pichicasohuëꞌ. Ina pochin naꞌacaisoꞌ nani shaꞌhuitëranco,” itërin.

Génesis 32:13

Naporo tashi inaquë Cacopo huëꞌërin. Tahuëririnquë capayatahuaton, yaꞌcariya yaꞌhuërinsopita quëran, pëtahuaroꞌsa huayonin. Iin masho Isao nicanacaso marëꞌ huayonin:

2 Samuel 17:11

Napoaton carinquën pënëiquën: Pëtëtë parti Tano ninano yaꞌhuërin. Pëꞌnatëraonta Piirsipa ninano yaꞌhuërin. Yaꞌipi ina nani chachin israiroꞌsaso yaꞌhuëatonaꞌ, marë yonsanquë inotëraꞌhuaya pochin naꞌapi. Ina nápo chachin niyontoinaꞌ. Naporahuaton tata ahuëamaso marëꞌ quëmari chachin inapita quëpaquëꞌ.

Nehemías 9:23

Quëma nohuanton notohuaroꞌ huiꞌnahuanpi. Tayoraroꞌsa nápo naꞌapi. Shimashonënpita noꞌpaꞌ quëtacaso shaꞌhuitëranso chachin ahuaꞌanëntëran.

Éxodo 32:13

Piyapinënpita: Apraan, Isaco, Cacopo, inapita yonquiaton shinpita nosoroquëꞌ. ‘Caso Yosëco niꞌto, catahuaranquëmaꞌ. Shiparimapita tayora nápo naꞌapon. Iso noꞌpa chachin inapitari huaꞌanëntomiataponaꞌ,’ itëran. Ina yonquiquëꞌ,” itërin.

Oseas 1:10

Napoaponahuëꞌ, aꞌna tahuëri israiroꞌsaso notohuaroꞌ naꞌaponaꞌ. Marë yonsanquë inotëraꞌhuaya yaꞌhuërinso pochin naꞌaponaꞌ. Co incari tëranta pichicasoꞌ nanitaponhuëꞌ. Iporasoꞌ pënënatënquëma shaꞌhuitëranquëmaꞌ: ‘Canpitaso co piyapinëhuëpitanquëmahuëꞌ,’ itëranquëmaꞌ. Naporoso nipirinhuëꞌ: ‘Canpitaso huiꞌnahuëpitanquëmaꞌ. Caso Yosëco nanpito napotaranquëmaꞌ,’ itaranquëmaꞌ.

Oseas 2:1

Naporoꞌ canpitaso israiroꞌsanquëmaꞌ: ‘Canpoasoꞌ Yosë piyapinënpitanpoa ninëhuaꞌ,’ niitaramaꞌ. Sanapiꞌsantaꞌ: ‘Yosë nosoroantarinpoaꞌ,’ niitapi,” itërin.

Miqueas 1:9

Samariaquë yaꞌhuëpisopita Siniorori anaꞌintaton, co noyatochináchinhuëꞌ acoarin. Cota huënton israiroꞌsantaꞌ, parisitacaiso canquiarin. Quirosarin ninanoquë naꞌcon naꞌcon israiroꞌsa yaꞌhuëpirinahuëꞌ, inapitanta parisitacaiso canquiarin niꞌton, napoarahuë.

Romanos 4:13

Iráca Yosëri Apraan itapon: “Nosoroatënquën, páncaroꞌpaꞌ quëchinquën. Piyapinëhuë pochin niꞌsaranquën. Quëma shinparinpitantaꞌ noya catahuaarahuë. Aꞌna tahuëri yaꞌipiroꞌpaꞌ huaꞌanëntaponaꞌ,” itërin. “Yosë co onporontaꞌ nonpintarincohuëꞌ,” tëninso marëꞌ Yosëri noya niꞌnin. Co naporoꞌ Moisësë pënënchátërarinhuëꞌ. Napoaton co ina natërinso marëꞌ Apraan noya niꞌninhuëꞌ.

Romanos 9:27

Isaiasëntaꞌ ninoton, ninshitërin. “Huaꞌhuayatërahuëꞌ israiroꞌsaꞌ yaꞌhuëpirinahuëꞌ, co yaꞌipiya chaꞌësapihuëꞌ. Marë yonsanquë inotëraꞌhuaya yaꞌhuërinso nápoꞌ yaꞌhuëpirinahuëꞌ, caraíchin Yosëri nichaꞌësarin.

1 Corintios 15:57

Yaꞌhuëpirinhuëꞌ, ¡ma noyacha Tata Yosësoꞌ niꞌton, nichaꞌërinpoa paya! Ina nohuanton, Quisocristo yaꞌhuërëtërinpoaꞌ. Corosëquë chiminaton, sopai minsërin. Nanpiantarahuaton, chimiriontaꞌ minsërin. Ina marëꞌ: “Yosparinquën,” itahuaꞌ.

Efesios 1:3

Ma noyacha Tata Yosëso paya. Sinioro Quisocristo paꞌpin inasoꞌ. Inápa quëran noya noya yonquirinpoaꞌ. Quisocristo imarëhuaꞌ niꞌton, naꞌcon catahuarinpoaꞌ noya noya cancantacaso marëꞌ. Oshanënpoaꞌ inquitatonpoaꞌ, anoyacancantërinpoaꞌ. Ina quëran nani tahuëri catahuarinpoaꞌ nohuantërinso chachin nicacasoꞌ. Co inápaquë yaꞌhuëyatërarihuarahuëꞌ, inatohuaꞌ yaꞌhuëarëhuaso pochin Yosë nohuitërëhuaꞌ. Ina yonquiatëhuaꞌ, “Yosparinquën Sinioro,” itahuaꞌ.

Deuteronomio 10:22

Canchisë shonca yaꞌpíchin iráca shimashonënpoapita Iquipitoquë yaꞌhuëcaiso marëꞌ paꞌmapi. Iporaso nipirinhuëꞌ, Yosë catahuarinpoa niꞌton, inápaquë tayora yaꞌhuërinso pochin, naꞌarëhuaꞌ,” itërin Moisësëri.

Hebreos 11:12

Apraan nani másho niponahuëꞌ, huiꞌnahuanin. Ina huiꞌnin quëran chachin naꞌapi. Oshaquëran huaꞌhuayátërahuë shinpita yaꞌhuëtërin. Tayora nápoꞌ yaꞌhuëpi. Marë yonsanquë notohuaroꞌ inotëraꞌhuaya yaꞌhuërin. Inotëraꞌhuaya nápoꞌ shinpita yaꞌhuëpi. Co pichicasohuëꞌ.

Apocalipsis 11:15

Ina quëran yaꞌnatontarinsoꞌ anquënintaꞌ, pihuiantarin. Pihuihuachina, inápaquë chiníquën nonsapi, natanahuë. “Iráca quëra huarëꞌ naꞌa copirnoroꞌsaꞌ yaꞌhuëpirinahuëꞌ, iporasoꞌ Yosëri yaꞌipiya huaꞌanëntarin. Quisocristorë chachin huaꞌanëntomiatarin. Co onporontaꞌ pipiapihuëꞌ,” tosapi.