Génesis 2:17 - Chayahuita (Shahui)

¹⁷ Anitotacaso nara nitërinsoíchin, co nohuantërahuë capamasoꞌ. Inaso caꞌpatan, noya nininso nitotaponahuëꞌ, co noyahuëꞌ nininsonta nitotaran. Ama ina nitërinso caꞌquësohuëꞌ. Ina caꞌpatan, tëhuënchachin chiminaran,” itërin.

Génesis 2:17 ပူးပေါင်းရင်းမြစ်များ

Génesis 2:9

Naporahuaton, nisha nisha noyápiachin cashinoꞌsa apapotërin. Yashi yashin caꞌchináchin nitërinsopita apapotërin. Nararo huancánachin nanpirin nara apapotërin. Inaquë chachin aꞌnantaꞌ, apapotërin. Anitotacaso nara itopisoꞌ. Ina caꞌpachinaꞌ, noya nininsopita nitotaponahuëꞌ, co noyahuëꞌ nininsopitanta nitotapi huachi.

Génesis 20:7

Iporaso nipirinhuëꞌ, soꞌin chachin quëtaantaquëꞌ. Inaso pënëntonaꞌpi niꞌton, quëma marëꞌ nontarinco. Ama chiminamaso marëhuëꞌ, nontarinco. Coꞌsoꞌ quëtaantahuatanhuëꞌ, saꞌan, huiꞌnanpita, inapitarëꞌquën chachin, taꞌhuantaran,” itërin huëꞌënquë.

Génesis 3:11

—¡Iꞌyan! ¿Onporahuatomata nitotapanamasoꞌ? Nara aꞌnaíchin nininsoꞌ: “Ama isoso nitërinso caꞌquësohuëꞌ,” itopiranquënhuëꞌ: ¡Nani caꞌnan! itërin.

Génesis 3:17

Ina quëran quëmapinta itapon: —Saꞌan natëton, nara nitërinso co capacasohuë nipirinhuëꞌ, caꞌnan. Naporanso marëꞌ yaꞌipiroꞌpaꞌ co huachi noyatacaso marëhuëꞌ shaꞌhuitarahuë. Napoaton nitapiarin. Paꞌpi chiníquën sacataquë huarëꞌ coshataran. Chiminaquë huarëꞌ inapoaran.

Génesis 3:19

Paꞌpi chiníquën sacatahuarëꞌ coshataran. Napoin quëran chiminaran huachi. Noꞌpa quëran ninanquën niꞌton, noꞌpa chachin niantamaso yaꞌhuërin, itërin.

Jeremías 26:8

Sinioro camairincosoꞌ, nani shaꞌhuihuatora, yaꞌipi natanpisopita masahuatonaco noꞌhuirinaco: “Iporasoꞌ chiminamaso yaꞌhuërin. Quëmasoꞌ pënëntohuatana, ‘Yosë chinotacaso nëꞌmëtë pëi Siroquë yaꞌhuërinsoꞌ, Siniorori ataꞌhuantërin. Ina pochachin isonta chinotërëhuaso pëiꞌ, ataꞌhuantarin. Iso ninanonta ataꞌhuantohuachin, tanahuantápon,’ tënan. Napoaton quëmasoꞌ, co tëꞌhuarohuanhuë pochin nonan. ¡Co ina pochin nonacaso yaꞌhuërinhuëꞌ!” itërinaco.

Ezequiel 18:13

Coriqui aꞌnanpachinarantaꞌ, naꞌcon naꞌcon ananpërin. Ina pochin nipachinaꞌ, co nanpicaso yaꞌhuërinhuëꞌ. Yaꞌipi inapita co costapirahuëꞌ, naporinso marëꞌ onpopionta chiminapon. Inaora tëhuënënquë napoapon.

Ezequiel 18:4

Yaꞌipi piyapiroꞌsa cari huaꞌanëntërahuë. Mashoroꞌsanta huiꞌninarë chachin huaꞌanëntërahuë. Insosona co noyahuëꞌ nicaton oshahuanpachin, inasoꞌ chiminapon.

Ezequiel 33:14

Yaꞌhuërëꞌ aꞌna piyapinta co noyahuëꞌ nininso marëꞌ: ‘Quëmasoꞌ chiminamaso yaꞌhuërin,’ itërahuë. Inaso napoaponahuëꞌ, oshahuaninso aꞌporahuaton, noyasáchin nisarin.

Ezequiel 33:8

Aꞌna piyapi co noyahuëꞌ nipachin, chiminacaso shaꞌhuitaranquën. Napotohuatënquën, co noyahuëꞌ nininsoꞌ aꞌpocaso marëꞌ quëmari shaꞌhuitaran. Shaꞌhuitopiranhuë co natëhuachinquënhuëꞌ, inasoꞌ oshanën marëꞌ chiminapon. Inapohuachin, co quëma naꞌintarinquënhuëꞌ. Shaꞌhuitacaso nipirinhuëꞌ, co shaꞌhuitohuatansohuëꞌ, inaso oshanën marëꞌ chiminapon. Napoaponahuëꞌ, ina chimininsoꞌ, quëma naꞌintarinquën,” itërinco.

Romanos 1:32

“Co noyahuëꞌ nipisopita chiminpachinara, anaꞌintacasoꞌ yaꞌhuërin,” tënin Yosë. Ina nitotaponaraihuëꞌ, inachachin niantapi. Naporahuatonaꞌ, aꞌnapitantaꞌ co noyahuëꞌ nipachinara, paꞌyatopi.

Romanos 6:16

Insosona natëhuatëhuaꞌ, inasoꞌ huaꞌanëntarinpoaꞌ. ¡Nani nitotëramaꞌ ipora! Oshanënpoa natëhuatëhuaꞌ, ina huaꞌanëntarinpoaꞌ. Camaihuachinpoara, co noyahuëꞌ ninëhuaꞌ. Oshanënpoaꞌ co aꞌpoasëhuahuëꞌ chiminpatëhuaꞌ, parisitopiquë paꞌsarëhuaꞌ. Nipirinhuëꞌ, Yosë natëhuatëhuaꞌ, noya nicarihuaꞌ.

Romanos 6:23

Piyapi asacatohuatëra, pahuërërëꞌ. Inapochachin co noyahuëꞌ nipatëhuaꞌ, chiminpatëhuaꞌ parisitomiatarihuaꞌ. Yosëso nipirinhuëꞌ, inaora nohuanton nosororinpoaꞌ. Quisocristo imapatëhuaꞌ, ina nohuitatëhuaꞌ, nanpimiatarihua. Inasoꞌ huaꞌanënpoaꞌ. Inasáchin natërëhuaꞌ.

Romanos 8:2

Oshanënpoa natëhuatëhuaꞌ, co noyahuë ninëhuaꞌ. Inapohuatëhuaꞌ, chiminpatëhuaꞌ, anaꞌintarinpoaꞌ. Nipirinhuëꞌ, Quisocristo imapatëhuaꞌ, Ispirito Santo catahuarinpoaꞌ nanpimiatacaso marëꞌ. Naporahuaton, co huachi oshanënpoa natëcasoꞌ yaꞌhuërinhuëꞌ.

1 Corintios 15:22

Atan pochin cancantatëhuaꞌ, yaꞌipinpoaꞌ chiminëhuaꞌ. Napoaponahuëꞌ, Quisocristo imapatëhuaꞌ, yaꞌipinpoaꞌ ananpitaantarinpoaꞌ.

1 Corintios 15:56

Yosë iráca pënëntërinsoꞌ co natëtatëhuahuëꞌ, oshahuanëhuaꞌ. Oshahuanëhuaꞌ niꞌton, chiminacasoꞌ yaꞌhuërin.

Gálatas 3:10

Moisësë iráca pënëntërinsoꞌ yaimapatamaꞌ, anaꞌintinquëmasoꞌ yaꞌhuërin. Co yaꞌipi natëramahuëꞌ niꞌton, Yosë anaꞌintarinquëmaꞌ. Iráca quiricanën quëran naporin: “Co yaꞌipimiáchin natëhuatamacohuëꞌ, chiníquën anaꞌintaranquëmaꞌ. Parisitopiquë aꞌparanquëmaꞌ,” tënin.

Efesios 5:14

Tahuëri nipachina, yaꞌipi quënanëꞌ. Ninshitatona napopiso chachin ninin. “Co noyahuëꞌ nipatamaꞌ, huëꞌërëso pochin cancantaramaꞌ. Ama ina pochin cancantatomarahuëꞌ, Yosë yonquicoꞌ. Chimipi pochin cancantohuatamaꞌ, Yosë nontocoꞌ nasha cancan quëchinquëmaꞌ. Ina quëran nanpiantarëso pochin cancantaramaꞌ. Quisocristo chachin aꞌpintarinquëmaꞌ noya nicacamaso marëꞌ,” topi.

Deuteronomio 30:15

Yaꞌipinquëma noya natancoꞌ: Ipora tahuëri quëtaranquëma huayonacamaso marëꞌ. Noyasáchin nipatamaꞌ, noya nanpiaramaꞌ. Yaꞌhuërëꞌ co noyahuëꞌ nicacasoáchin cancantohuatamaꞌ, co noya nanpiaramahuëꞌ. Chiminamaso yaꞌhuërin.

Deuteronomio 30:19

Ipora tahuëri chachin huayonacamaso marëꞌ shaꞌhuitëranquëmaꞌ. Noya nanpiamasohuë nipon, chiminamasohuë nipon. Yosë catahuainquëmasohuë nipon, anaꞌintiinquëmasohuë nipon. Sinioro natëtoma noya nanpicamasoꞌ huayoncoꞌ. Shiparimapitanta ina chachin huayoinaꞌ. Piꞌiroꞌtëꞌ, isoroꞌpaꞌ, inapita yaꞌhuërinso niꞌnëhuaꞌ. Inapochachin shaꞌhuitaranquëmasontaꞌ, noꞌtëquën nisarin.

Colosenses 2:13

Iráca canpitasoꞌ oshahuanatomaꞌ, chimipi pochin ninamaꞌ. Co noyahuëꞌ nicacasoráchin yonquiramaꞌ. Co Yosë piyapinënpita ninamahuëꞌ. Iporaso nipirinhuëꞌ Quisocristo imaramaꞌ niꞌton, anoyacancantërinquëmaꞌ. Oshanëmaꞌ inquitatënquëmaꞌ, nanpiantarinso pochin niꞌninquëmaꞌ.

1 Timoteo 5:6

Aꞌnaquën quëyoronoꞌsaso nipirinhuëꞌ, nipaꞌyatacasoáchin yonquipi. Nanpiaponahuëꞌ, chimipi pochin cancantopi. Co huachi Yosë yonquipihuëꞌ niꞌton, co inapita catahuacasoꞌ yaꞌhuërinhuëꞌ.

Santiago 1:15

Ipora huantaꞌ piꞌpian co noyahuëꞌ yonquirëhuaꞌ. Co aꞌnaroáchin naniantohuatëhuahuëꞌ, co noyahuëꞌ nisarëhuaꞌ. Naporahuatëhuaꞌ, oshahuanarëhuaꞌ. Oshahuanpatëhuaꞌ, chiminpatëhuaꞌ parisitomiatarëhuaꞌ. Niꞌcoꞌ. Sanapi huaꞌhuanpachina, oshaquëran oshaquëran huaꞌhuin nanihuachina, huairin. Inapochachin co noyahuëꞌ yonquihuatëhuaꞌ, oshaquëran oshaquëran co noyahuëꞌ nisarëhuaꞌ. Ina marëꞌ oshahuanarëhuaꞌ.

1 Juan 5:16

Aꞌnaquën Yosë imamiataponahuëꞌ, co noyahuëꞌ ninin. Co Yosë aꞌpoaponahuëꞌ, oshahuanin. Inapita marëꞌ Yosë nontahuaꞌ anoyacancanchin. Aꞌnaquënso nipirinhuëꞌ imapirinhuëꞌ, co noyahuëꞌ yonquiaton, Quisocristo chachin aꞌpomiatërin. Aꞌpomiatohuachina, chiminpi pochin cancantantapi. Co inapita marëꞌ Yosë nontacasoꞌ yaꞌhuërinhuëꞌ.

Apocalipsis 2:11

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, co parisitopiquë paatomaꞌ, parisitomiataramahuëꞌ. Nani huachi,” itëquëꞌ, ninshitohuatan, itërinco.

Apocalipsis 20:14

Chimirin, chiminpisopita yaꞌhuëpiquë, inapita panca sono pën orotárinquë tëꞌyatapi. Inaquë parisitomiatáponaꞌ.

Apocalipsis 20:6

Quisoso imarëhuasopitaꞌton ananpitaantarinpoaꞌ. Noya nicatëhuaꞌ, nóya cancantarihuaꞌ. Co onporontaꞌ chiminarihuahuëꞌ. Iráca corto huaꞌanoꞌsaꞌ yaꞌhuërin Yosë chinotacaiso marëꞌ. Aꞌna tahuëriso nipirinhuëꞌ, Quisoso imarëhuasopita noya noya chinotarihuaꞌ. Huaranca piꞌipi inarëꞌquënpoaꞌ huaꞌanëntarihuaꞌ.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

1 Samuel 14:39

Siniorosoꞌ nichaꞌërinpoaꞌ. Ina niꞌsárinco niꞌton, noꞌtëquën shaꞌhuitaranquëmaꞌ. Huiꞌnahuë tëranta tëhuërin nipachin, chiminarin, itërin. Napotopirinhuëꞌ, co insoari tëranta aꞌpanirinhuëꞌ.

1 Samuel 20:31

Inaso nanpirápachin, co quëmaso nanpicaso tëranta yaꞌhuërinhuëꞌ. Aquëtë huarëꞌ yaꞌhuërëtaancososoꞌ, co nanitaranhuëꞌ. Napoaton aꞌpaquë piyapinënpita macoinaꞌ. Inasoꞌ, chiminacaso yaꞌhuërin, itërin.