Génesis 19:17 - Chayahuita (Shahui)

¹⁷ Ninano quëran nani pipihuachinara, aꞌna anquëniri itapon: —¡Chaꞌëcamaso marëꞌ manóton taꞌacoꞌ! Ama pinëma parti tahuërëcosohuëꞌ. Paꞌmia pacoꞌ. Ama maꞌsha marëꞌ tëranta iso motopianaquë chinicosohuëꞌ. Chaꞌëcaso nohuantohuatamaꞌ, motopiroꞌsa parti taꞌacoꞌ, itërin.

Génesis 19:17 ပူးပေါင်းရင်းမြစ်များ

Génesis 13:10

Natanahuaton Notosoꞌ, motopiaꞌhua quëran, Cortaniiꞌ yonsan noyarotomarinso nocorin. Sohuaro ninanoaꞌhuaquë huarëꞌ notërinsoꞌ icanin. Inaquësoꞌ, notohuaroꞌ iꞌ yaꞌhuërin niꞌton, paꞌpi noyaroꞌpaꞌ ninin. Sinioro shaꞌtërinquë pochin niꞌton, Iquipito noꞌpaꞌ pochin ninin. (Ina pochin iráca ina noꞌpaꞌ nipirinhuëꞌ, coꞌhuara Siniorori Sotoma, Comora, inapita ninanoroꞌsa ataꞌhuanchátërasohuëꞌ, naporin.)

Génesis 14:10

Yaꞌipi Sitin motopianaquë, notohuaroꞌ toꞌni pochin nininsoꞌ posoroꞌsa yaꞌhuërin. Naporoꞌ quira nipachinara, Sotoma, Comora, inapita copirnoroꞌsaꞌ, piyapinënapitarë chachin taꞌapi. Taꞌapirinahuëꞌ, ina posoroꞌsaquë anotopi. Aꞌnapita cara copirnoroꞌsaso nipirinhuëꞌ, motopiroꞌsa taꞌatopi.

Génesis 18:22

Cato yaꞌpiso quëchitahuatonaꞌ, Sotoma ninanoquë paꞌpi. Apraanso nipirinhuëꞌ, Siniororëꞌ ninontacaso marëꞌ quëparitërin.

Génesis 19:18

Notoriso nipirinhuëꞌ, itapon: —¡Co Siniororoꞌsa topirahuëꞌ! Tëhuënchachin canpitasoꞌ, naꞌcon catahuaramaco huachi. Noyanquëma niꞌton, nichaꞌëramaco. Napoaponahuëꞌ, motopiroꞌsa parti taꞌacaꞌhuasoꞌ, co nanitarahuëꞌ. Huancopi niꞌsoiꞌ, ayaroꞌ icantatoncoi tiquihuachincoi.

Génesis 19:22

Napoaponahuëꞌ, ¡manóton inatohua pacoꞌ! Inatohua canama huarëꞌ Sotoma ninano ataꞌhuantarai huachi. Napoaton ina ninanosoꞌ, Soaro itopi.

Génesis 19:26

Noto saꞌinso nipirinhuëꞌ, co Soaroquë camarinhuëꞌ. Oshaquëran soꞌin imaquiáponahuëꞌ, pinën parti tahuërëhuachina, inaquë chachin yamora motoꞌ taranaton, chiminin.

Génesis 19:30

Inapita ninanoroꞌsa taꞌhuantopi piquëran, Notosoꞌ tëꞌhuatërin. Tëꞌhuataton, Soaroquë yaꞌhuëcaso co nohuantërinhuëꞌ. Napoaton cato huiꞌninpitarë chachin motopiroꞌsa parti, yaꞌhuëcaiso marëꞌ paꞌpi. Inaquë aꞌna motopi naninquë, cara chachin yaꞌhuëpi.

1 Reyes 1:12

Napoaton apira carinquën shaꞌhuichinquën maꞌsona noya nicamasoꞌ. Inapohuatan co tëpaponënhuëꞌ. Saromonta co tëpaponahuëꞌ.

1 Reyes 19:3

Ina natanaton, Iniasëso paꞌyanin: “Coꞌsoꞌ taꞌahuatohuëꞌ, tëpaponaco,” taꞌton Piirsipa ninanoquë piyapinënë chachin taꞌarin. Inaso ninanoꞌ, Cota huënton noꞌpanën paꞌmarinꞌpaꞌ yaꞌhuërin. Inaquë canconahuaton, piyapinën patërin.

Salmos 121:1

Motopiroꞌsa nëꞌpërahuato naporahuë: “¿Incha iporasoꞌ catahuaincoso marëꞌ huëꞌnëpoya?” tënahuë.

Mateo 3:7

Ina quëran naꞌa parisioroꞌsaꞌ, satosioroꞌsaꞌ, inapitanta huëꞌpi. —Quiyantaꞌ aporintocoi, itopirinahuëꞌ, Coansha co nohuantërinhuëꞌ: —¡Canpitasoꞌ yaꞌhuan pochin cancantatomaꞌ, yanonpinamaꞌ! “Yosë isoroꞌpaꞌ anaꞌintohuachin, chaꞌëpoi,” topiramahuëꞌ. Co topinan chaꞌësaramahuëꞌ.

Lucas 12:23

Yosë chachin ananpirinpoaꞌ. Nonënpoaꞌ quëtërinpoaꞌ. Co capacaso marëáchin isoroꞌpaquë acorinpoahuëꞌ. Noyápiachin aꞌmocasontaꞌ co onpopinchin yonquicasoꞌ yaꞌhuërinhuëꞌ. Yosë naꞌcon naꞌcon yonquihuatëhuaꞌ, catahuarinpoaꞌ noya yaꞌhuëcasoꞌ.

Lucas 9:62

Quisosori itërin: —Ama iyasha, nisha nisha yonquiquësohuëꞌ. Niꞌquëꞌ. Aꞌnëtohuatëra, noya nicatëꞌ ahuëhuatëra, noꞌtëquën ahuërëꞌ. Niquë notëtahuatëꞌ ahuëhuatërasoꞌ, co noya ahuërëhuëꞌ. Inapochachin nisha nisha yonquihuatamaꞌ, co nanitaramahuëꞌ Yosë huaꞌanëntërinsoꞌ noꞌtëquën imacamasoꞌ, itërin.

Hebreos 2:3

Iporaso nipirinhuëꞌ, Quisocristo aꞌpaimarin noya nanan shaꞌhuitiinpoaso marëꞌ. Naꞌcon nosoroatonpoaꞌ, yanichaꞌërinpoaꞌ. Huiꞌnin chachin niꞌton, co ina natëhuatëhuahuëꞌ, naꞌcon naꞌcon anaꞌintinpoasoꞌ yaꞌhuërin. Quisocristo chachin noya nanan shaꞌhuirin. Ina quëran caꞌtanoꞌsanënpitari natanahuatonaꞌ, inachachin shaꞌhuitaantarinënpoaꞌ.

1 Samuel 19:11

Naporo chachin Saonosoꞌ piyapinënpita camairin. Tapi pëinënquë paatona aꞌpaicaiso marëꞌ camairin: “Tashiraya pëinën quëran pipihuachin tëpacoꞌ,” taꞌton naporin. Saꞌiniso napoaponahuëꞌ, shaꞌhuitërin: —Coꞌsoꞌ ipora tashi taꞌahuatanhuëꞌ, tatari aꞌparinsopita tashiraya tëpaponquën, itërin.