Génesis 15:18 - Chayahuita (Shahui)

¹⁸ Naporo tahuëri chachin, Sinioro Apranë anoyatërin. Anoyataton itapon: —Shiparinpita iso noꞌpaꞌ quëtarahuë: Iquipito iꞌ quëran huarëꞌ Iopiratisiiꞌ pancaiꞌpaꞌ, huaꞌanëntopiso naniarin.

Génesis 15:18 ပူးပေါင်းရင်းမြစ်များ

Génesis 12:7

Inaquë Siniorori, Apran yaꞌnotahuaton, itërin: “Yaꞌipi iso noꞌpaꞌ, shiparinpita quëtarahuë huaꞌanëntaponaꞌ,” itërin. Naporo chachin Apran Sinioro chinotacaso marëꞌ aꞌnara artaro ninin. Inaquë yaꞌnotërin niꞌton, chinotërin.

Génesis 13:15

Yaꞌipi noꞌpaꞌ niꞌnansoꞌ, carinquën huaꞌanëntacaso marëꞌ quëtaranquën. Quëmari huaꞌanëntomiataran. Naporahuaton, shiparinpitarinta huaꞌanëntomiataponaꞌ.

Génesis 2:14

Aꞌnantaꞌ, Tiquirisiiꞌ itopi. Inasoꞌ, Asiria ninano piꞌi yaꞌconinso parti quëran acorin. Yaꞌnatomarinsoso nipirinhuëꞌ, Iopiratisiiꞌ itopi.

Génesis 24:7

Siniorosoꞌ Yosë niꞌton, inápaquë huaꞌanëntërin. Nani ina shaꞌhuitërinco iso noꞌpaꞌ shihuëpitari huaꞌnëntacasoꞌ. Iráca tatahuë yaꞌhuërin noꞌpa quëran ocoirinco. Quëmopinëhuëpita yaꞌhuërin parti quëran ocoirinco huachi. Ocoirahuatonco isëquë quëninco. Inari chachin anquëninën aꞌpararin catahuainquënso marëꞌ. Ina nohuanton, sanapi nohuantarin isëquë huëcacasoꞌ.

Génesis 26:4

Ca nohuanto quëma shiparinpita, naꞌamiataponaꞌ. Tayoraroꞌsa piꞌiroꞌtëquë yaꞌhuërinso nápo, yaꞌhuaponaꞌ. Inapitari yaꞌipi iso noꞌparoꞌsa huaꞌanëntaponaꞌ. Naporahuaton, yaꞌipi isoroꞌpaquë nacionoꞌsa yaꞌhuërinsopitantaꞌ, shiparinpita quëran catahuararahuë.

Génesis 28:4

Yosëri Apraan noya yaꞌhuëcaso marëꞌ shaꞌhuitërinso chachin, quëmanta quëchinquën. Quëma shiparinpitantaꞌ, inachachin quëchin. Iso noꞌpaꞌ ipora yacapatërëhuasoꞌ, quëchinquëmaꞌ. Yosëri nani Apraan shaꞌhuitërin niꞌton, quëtarinquëmaꞌ,” itërin.

Génesis 50:24

Aꞌna tahuëri Cosisoꞌ, iinpita itapon: “Co huaꞌquiya quëranhuëꞌ, chiminapo huachi. Napoaponahuëꞌ, Yosëso catahuainquëmaso marëꞌ oꞌmararin. Iso noꞌpa quëran ocoiarinquëmaꞌ. Apraan, Isaco, Cacopo, inapita quëtacaso marëꞌ shaꞌhuitërinso noꞌpaquë, quëpantarinquëmaꞌ,” itërin.

2 Samuel 23:5

Napoaton cá quëran pipipisopitasoꞌ, Yosëri catahuarápon. Nani ina marëꞌ inarëꞌco anoyatomiatërahuë. Inaora chachin nanan yocaton co nonpintarincohuëꞌ. Ina nohuanton yaꞌipi inimicoroꞌsa minsërahuë. Yaꞌipi nohuantërahuësoꞌ natanpatëra, acotërinco. Ina chachin aꞌna tahuërinta nitáponco.

1 Reyes 5:1

Tiro copirno Iran itopisosoꞌ, Saromon paꞌpincorëꞌ noya nipayapi. Saromoni huachi paꞌpin yaꞌhuërëtaton, israiroꞌsa huaꞌanëntarinso natantërin. Ina natantaton, catahuacaso marëꞌ huaꞌanoꞌsa acorinsopita aꞌpatërin. Noya cancantërinso shaꞌhuitacaiso marëꞌ naporin.

Nehemías 9:8

‘Tëhuënchachin natëarinco,’ taꞌton, inarëꞌquën anoyatëran. Cananoꞌsaꞌ, itiroꞌsaꞌ, amororoꞌsaꞌ, huirisëroꞌsaꞌ, quiposoroꞌsaꞌ, quiriquiroꞌsaꞌ, inapita noꞌpanën matahuaton, shinpitari huaꞌanëntacaiso marëꞌ shaꞌhuitëran. Quëmasoꞌ noꞌtëquënáchin nonan niꞌton, shaꞌhuitëranso chachin nanirin.

Salmos 105:11

Ina shaꞌhuitaton: “Quëmari iso Canaan noꞌpaꞌ huaꞌanëntaran. Carinquën quëtaranquën niꞌton, napoaran,” itërin.

Éxodo 2:24

Piyapinënpita parisitopisoꞌ niꞌsahuaton, naꞌnëpisonta natanin. Naporoꞌ iráca shimashonënapitarëꞌ anoyatërinsoꞌ, yonquirin. Apraan, Isaco, Cacopo, inapitarëꞌ anoyatërinso yonquiaton, yacatahuarin huachi.

Éxodo 32:13

Piyapinënpita: Apraan, Isaco, Cacopo, inapita yonquiaton shinpita nosoroquëꞌ. ‘Caso Yosëco niꞌto, catahuaranquëmaꞌ. Shiparimapita tayora nápo naꞌapon. Iso noꞌpa chachin inapitari huaꞌanëntomiataponaꞌ,’ itëran. Ina yonquiquëꞌ,” itërin.

Éxodo 34:11

Yaꞌipi ipora camairanquëmasopita natëcoꞌ. Inapohuatamaꞌ, amororoꞌsaꞌ, cananoꞌsaꞌ, itiroꞌsaꞌ, huirisëroꞌsaꞌ, iporoꞌsaꞌ, quiposoroꞌsaꞌ, inapita tëꞌyatarahuë. Noꞌpanëna matamaso marëꞌ inapitaso napotarahuë.

Éxodo 34:24

Cari chachin yaꞌyoraninquëmasopita nacionoꞌsa aꞌpararahuë. Napoaton pancana huaꞌanëntaramaꞌ. Ina niꞌton, nani piꞌiquë cararo chinotamacoso marëꞌ huëꞌsaramaꞌ. Huëꞌpatamaꞌ, co insonta noꞌpanëma matiimaso yonquiaponhuëꞌ.

Éxodo 6:4

Canaan noꞌpaꞌ quëtaꞌhuaso marëꞌ nani inapitaroꞌco anoyatërahuë. Inaquë yaꞌhuëpirinahuëꞌ, nisharoꞌsa pochin topinan yacapatopi.

Isaías 55:3

Huëcapairahuatomaco noya natancoꞌ. Natanpatamaco nanpiaramaꞌ. Tapi nosoroato nani shaꞌhuitërahuë. Ina nanicaso marëꞌ canpitaroꞌco anoyatomiatarahuë.

Hechos 7:5

Huëꞌpirinhuëꞌ, Yosë nohuanton, co noꞌpaꞌ yaꞌhuëtërinhuëꞌ. Co piꞌpisha tërantaꞌ huaꞌanëntërinhuëꞌ. “Aꞌna tahuëri Canaan parti yaꞌhuëmiataramaꞌ. Quëma shiparinpita naꞌasahuatonaꞌ, ina noꞌpaꞌ huaꞌanëntapi,” itërin Yosëri. Co huiꞌnahuayantërasohuëꞌ, napotërin.

Deuteronomio 12:20

Sinioro shaꞌhuitërinquëmaso chachin, ina nohuanton aꞌna tahuëri aquëtë huarëꞌ noꞌpaꞌ quëtaantarinquëmaꞌ. Naporoꞌ nosha nayahuatamaꞌ, noya capamaso yaꞌhuërin.

Deuteronomio 34:4

Naporoꞌ Siniorori itapon: “Iso mini noꞌpaꞌ, Apraan, Isaco, Cacopo, inapita: ‘Caso Yosëco niꞌto, iso noꞌpaꞌ shiparimapita quëtarahuë,’ taꞌto shaꞌhuitërahuësoꞌ. Quëmaora yaꞌpiranën quëran chachin niꞌcamaso nohuantato, aꞌnotëranquën. Napoaponahuëꞌ, quëmasoꞌ co inaquë yaꞌconaranhuëꞌ,” itërin.

Deuteronomio 7:1

Naquëranchin Moisësëri israiroꞌsa nontaantarin: “Sinioroso Yosënënpoa niꞌton, catahuarinquëma noꞌpaꞌ quëtarinquëmaquë yaꞌconacamasoꞌ. Ina marëꞌ canchisë nacionoꞌsa aꞌpararin. Canpita quëran naꞌcon naꞌcon niꞌtona chini chiníquën nanantopirinahuëꞌ, aꞌpararin. Cananoꞌsaꞌ, itiroꞌsaꞌ, amororoꞌsaꞌ, huirisëroꞌsaꞌ, quiriquiroꞌsaꞌ, iporoꞌsaꞌ, quiposoroꞌsaꞌ, inapita itopisoꞌ aꞌpararin.

Hebreos 13:20

Yosë catahuainquëmaꞌ noya ninicatomaꞌ yaꞌhuëcamasoꞌ. Inasáchin asanocancaninpoaꞌ. Inari chachin iráca Quisocristo ananpitaantarin. Iporasoꞌ ohuicanënpita pochin nicatonpoaꞌ, Sinioro Quisoso aꞌpairinpoaꞌ. Huënainën paꞌnin niꞌton, nasha quëran anoyatërinso shaꞌhuitërinpoaꞌ imacaso marëꞌ. Ina anoyatërinsosoꞌ yaꞌhuëmiatarin. Co onporontaꞌ nishataponhuëꞌ.

Apocalipsis 9:14

“Catapini anquëniroꞌsaꞌ iꞌquiritëquë paꞌinaꞌ piyapiꞌsaꞌ aparisitacaiso marëꞌ. Panca iꞌ yonsanquë nani ninarapisoꞌ, Iyopiratisiiꞌ itopiquë,” itërin.