Génesis 12:3 - Chayahuita (Shahui)

³ Inpitasona noya nicatënën catahuahuachinën, carinta inapita inapotarahuë. Inpitasona co huachi noya yaꞌhuëcamaso marëhuëꞌ shaꞌhuitohuachinën, carinta inapita napotarahuë. Quëmá quëran, yaꞌipi piyapiꞌsa nisha nisha nipisopita catahuararahuë,” itërin.

Génesis 12:3 ပူးပေါင်းရင်းမြစ်များ

Génesis 18:19

Nani ina huayonahuë huiꞌninpita, shinpita, inapita noya pënënacaso marëꞌ. Aꞌchintërahuësopita natëtonaꞌ, noya nicacaiso marëꞌ pënënarin. Inapohuachin, shaꞌhuitërahuëso chachin quëtarahuë huachi,” tënin yonquiaton.

Génesis 22:18

Quëma natëranco niꞌton, yaꞌipi isoroꞌpaquë nacionoꞌsa yaꞌhuërinsopita, shiparinpita quëran catahuararahuë,” itërin.

Génesis 24:35

Siniorori huaꞌanëhuë catahuamiatërin niꞌton, paꞌpi notohuaroꞌ maꞌsha yaꞌhuëtërin: Ohuacaroꞌsaꞌ, ohuicaroꞌsaꞌ, inapita notohuaroꞌ pëꞌtahuarin. Naporahuaton oro, prata inapita yaꞌhuëtërin. Piyapinënpitanta quëmapiꞌsaꞌ, sanapiꞌsaꞌ, inapita yaꞌhuëtërin. Camiyoroꞌsaꞌ, moraroꞌsaꞌ, inapitanta naꞌa pëꞌtahuarin.

Génesis 25:11

Apraan chiminpachina, Yosëri Isaco, catahuamiatërin. Inaso Nipicarë chachin: “Nanpiton niꞌsárincosoꞌ poso,” itopisoꞌ pirayan, yaꞌhuërapi.

Génesis 26:29

Quiyaso yaꞌhuëraiquë, co maꞌsha onpotërainquënhuëꞌ, noya nicatëinquën, noya quëran aꞌparainquën. Napoaton quëmantaꞌ, ama maꞌsha onpotocoisohuëꞌ. Yosë quëmasoꞌ ipora noya nicatënquën catahuarinquën niꞌton, napotarainquën, itërin.

Génesis 26:4

Ca nohuanto quëma shiparinpita, naꞌamiataponaꞌ. Tayoraroꞌsa piꞌiroꞌtëquë yaꞌhuërinso nápo, yaꞌhuaponaꞌ. Inapitari yaꞌipi iso noꞌparoꞌsa huaꞌanëntaponaꞌ. Naporahuaton, yaꞌipi isoroꞌpaquë nacionoꞌsa yaꞌhuërinsopitantaꞌ, shiparinpita quëran catahuararahuë.

Génesis 27:29

Huaꞌhuayátërahuë piyapiꞌsa camaiquëꞌ. Nacionoꞌsanta tëꞌhuatatënën natëinënquën. Iyaparinpitanta camaiquëꞌ. Tëꞌhuatatënën inapitanta natëinënquën. Noꞌhuitënën co huachi noya yaꞌhuëcamaso marëhuëꞌ shaꞌhuitohuachinën, Yosërinta inapotarin. Inpitasona noya yaꞌhuëcaso marëꞌ shaꞌhuitohuachinën, Yosërinta inapotarin,” itërin.

Génesis 28:14

Ca nohuanto shiparinpita naꞌamiataponaꞌ. Moꞌshi pochin naꞌaponaꞌ. Norti parti, sor parti, piꞌi pipirinso parti, piꞌi yaꞌconiniso parti, yaꞌipi inapita parti huaꞌanëntaponaꞌ. Quëmá quëran, yaꞌipi piyapiꞌsa nisha nisha nipisopita catahuararahuë. Shiparinpita quëraonta inapotarahuë.

Génesis 30:27

Napotopirinhuëꞌ, Napanorisoꞌ itapon: —Ama napoquësohuë api. Quëma yacaparanco niꞌton, Sinioro catahuarinco. Aniꞌtato, ina nitotërahuë. Napoaton quëparitëquë tënahuë.

Génesis 30:30

Coꞌhuara huëꞌshátërapohuëꞌ, caraíchin yaꞌhuëtërinquën. Iporaso nipirinhuëꞌ, paꞌpi notohuaroꞌ naꞌamiatërin. Huëꞌnahuë quëran huarëꞌ Sinioro catahuarinquën. Iporaso huachi cantaꞌ, caora marëꞌ sacataꞌhuasoꞌ nanirin huachi, itërin.

Génesis 39:5

Ina acorin quëran huarëꞌ, Siniorori Potihuaro catahuamiatërin. Cosi noya nicaton, napotërin. Pëinënquënta maꞌsha nipachina catahuarin. Iminënquënta sacatohuachinaꞌ, shaꞌtopisoꞌ noya noyatërin.

Salmos 72:17

Noya copirno niꞌton, yaꞌipi parti noya nahuiꞌin. Piꞌi yaꞌhuërárinso pochin inantaꞌ, yonquiraꞌinaꞌ. Insosona noya yaꞌhuëcaso marëꞌ yashaꞌhuihuachin iꞌna yonquiaton shaꞌhuiꞌin. Yaꞌipi nacionoꞌsaquë yaꞌhuëpisopitari ina paꞌyachinaꞌ.

Números 24:9

Israiroꞌsa chinotai marëꞌ quëhuënpachinara, paꞌpiniroꞌsa pochachin niconpi. Co macari tëranta ochinanaponhuëꞌ. Inpitarisona inapita noya yaꞌhuëcaiso marëꞌ shaꞌhuitohuachinaꞌ, inapitanta noya yaꞌhuëcaiso marëꞌ shaꞌhuitaponaꞌ. Inpitarisona ama huachi noya yaꞌhuëcaiso marëhuëꞌ shaꞌhuitohuachina, inapitanta inapotacaiso yaꞌhuërin,” tënin.

Mateo 25:40

‘Coꞌta, imarinacosopita parisitohuachinara, catahuaramaꞌ. Topinan piyapiꞌsaꞌ, saꞌahuaroꞌsaꞌ, inapita maꞌsha pahuantohuachinara, quëtëramaꞌ. Imatomaco, aꞌnapita catahuaramaꞌ niꞌton, cantaꞌ catahuaramacoso pochin niꞌnahuë,’ itarahuë.

Mateo 25:45

‘Coꞌta imarinacosopita parisitopirinahuëꞌ, co catahuaramahuëꞌ. Saꞌahuaroꞌsaꞌ maꞌsha pahuantopirinahuëꞌ, co quëtëramahuëꞌ. Co inapita nosororamahuëꞌ niꞌton, co cantaꞌ nosororamacohuëꞌ,’ itarahuë. Itahuato, aꞌpararahuë huachi.

Lucas 24:27

Ina quëran Yosë quiricanënquë ninotona ninshitopisoꞌ, aꞌchintarin. Moisësëꞌton ninoton, Yosë quiricanënquë ninshitërin. Ina piquëran naꞌa pënëntonaꞌpiroꞌsaꞌ ninoantapi. Yaꞌipi Cristo ninopisoꞌ noꞌtëquën aꞌchintarin.

Romanos 4:11

Yosë natërin niꞌton, inari noya niꞌnin. Coꞌhuara marca niacochatërasohuëꞌ, piyapinën pochachin niꞌnin. Ina piquëran marca niacotërin imarinsoꞌ anitotacaso marëꞌ. “Noꞌtëquën nontërinco,” topachina, noya niꞌnin. Nisha piyapiꞌsantaꞌ ina pochachin natëtohuachinara, Apraan pochin cancantopi. Co marca niacotopirinahuëꞌ, Apraan huiꞌninpita pochin nipi.

1 Corintios 1:30

Yosë nohuanton, Quisocristo imarëhuaꞌ. Imapatëhuaꞌ, yaꞌcoancantërinpoaꞌ niꞌton, yonquínahuan pochin Yosë niꞌninpoaꞌ. Naporahuaton, catahuarinpoaꞌ noꞌtëquën yonquicasoꞌ. Oshanënpoaꞌ inquitohuachinpoaꞌ, noya huachi niꞌninpoaꞌ. Nasha cancan quëtërinpoaꞌ noya nicacaso marëꞌ. Quisocristo chachin nichaꞌërinpoaꞌ.

Gálatas 3:16

Inapochachin iráca Yosëri nontaton, Apraan shaꞌhuitërin: “Caora nohuanto, nóya catahuaranquën. Quëma shipariontaꞌ catahuarahuë yaꞌipi piyapiꞌsaꞌ anoyacancantacaso marëꞌ,” itërin. Aꞌnaíchin shiin yonquiaton, naporin. Quisocristo ninoton, napotërin.

Gálatas 3:28

Yosësoꞌ co nisha nisha yonquirinpoahuëꞌ. Aꞌnaquënpoaꞌ cotio piyapinpoaꞌ, aꞌnaquëontaꞌ nisha piyapiꞌsaꞌ. Aꞌnaquëontaꞌ patronoꞌsaꞌ, aꞌnaquënsoꞌ piyapinënpita. Aꞌnaquën sanapiꞌsaꞌ, aꞌnaquënpoaꞌ quëmapinpoaꞌ nipirëhuahuëꞌ, yaꞌipinpoaꞌ Quisocristo imapatëhuaꞌ, aꞌna huëntoínchin pochin ninëhuaꞌ.

Gálatas 3:8

Co cotioroꞌsaráchin Yosëri nohuantërinhuëꞌ. Nisha piyapiꞌsantaꞌ imapachinaꞌ, noya niꞌsarin. Noya nicaton, co oshanëna marëꞌ anaꞌintarinhuëꞌ. Iráca iso noya nanan ninoton, Apraan itapon: “Nisha nisha piyapiꞌsantaꞌ quëma pochin cancantohuachinaꞌ, naꞌcon catahuaarahuë,” itërin Yosëri. Quiricanën quëran naporin.

Efesios 1:3

Ma noyacha Tata Yosëso paya. Sinioro Quisocristo paꞌpin inasoꞌ. Inápa quëran noya noya yonquirinpoaꞌ. Quisocristo imarëhuaꞌ niꞌton, naꞌcon catahuarinpoaꞌ noya noya cancantacaso marëꞌ. Oshanënpoaꞌ inquitatonpoaꞌ, anoyacancantërinpoaꞌ. Ina quëran nani tahuëri catahuarinpoaꞌ nohuantërinso chachin nicacasoꞌ. Co inápaquë yaꞌhuëyatërarihuarahuëꞌ, inatohuaꞌ yaꞌhuëarëhuaso pochin Yosë nohuitërëhuaꞌ. Ina yonquiatëhuaꞌ, “Yosparinquën Sinioro,” itahuaꞌ.

Colosenses 3:11

Quisocristo imapatëhuaꞌ, napopináchin Yosë niꞌninpoaꞌ. Aꞌnaquën cotioroꞌsaꞌ, aꞌnaquënso nipirinhuëꞌ cricoroꞌsaꞌ. Aꞌnaquën marca niacotopisoꞌ, aꞌnaquënso nipirinhuëꞌ co niacotopihuëꞌ. Aꞌnaquën nisha piyapiꞌsaꞌ, aꞌnaquëntaꞌ quëmaroꞌsaꞌ. Aꞌnaquën patron piyapinënpita, aꞌnaquënso nipirinhuëꞌ inahuara marëꞌ sacatopi. Nisha nisha nicarihuarahuëꞌ, napopináchin Yosë niꞌninpoaꞌ. Quisocristoíchin yonquicasoꞌ yaꞌhuërin. Ina imapatëhuaꞌ, yaꞌipinpoaꞌ yaꞌcoancantërinpoaꞌ. Co mantaꞌ pahuantarinpoahuëꞌ noya cancantacaso marëꞌ.

Apocalipsis 7:9

Ina quëran huaꞌnarëso pochin niantarahuë. Huaꞌhuayatërahuëꞌ piyapiꞌsaꞌ Yosëꞌpaꞌ quënanahuë. Co pichicasohuëꞌ. Nisha nisha piyapiꞌsaꞌ Yosë huaꞌanëntacasoꞌ shiranën notënanquë huaniapi, nisha nisha nananquë nonpisopita. Nisha nisha parti quëran huëcatonaꞌ, Carniroaꞌhua yamotatonaꞌ, notërapi. Inapitasoꞌ huiríchin aꞌmopi. Mërëmë pochin nininsoꞌ sëꞌquërahuatonaꞌ, Yosë chinotapi.