Génesis 1:3 - Chayahuita (Shahui)

³ Naporoꞌ Yosë tapon: “¡Tashinantërinso niiꞌsohuanchin huachi!” tënin. Topachina, niiꞌsohuantërin huachi.

Génesis 1:3 ပူးပေါင်းရင်းမြစ်များ

Génesis 2:4

Ina pochin Yosë iráca: Isoroꞌpaꞌ, piꞌiroꞌtëꞌ, inapita acorin. Yaꞌipi noꞌtëquën shaꞌhuitaranquëmaꞌ. Sinioroso Yosë niꞌton, inapita yaꞌnan acoaponahuëꞌ,

Copo naporinso' 38:19

Tahuëri, tashiꞌ, inapita niquë niquë taparahuë. ¡Insëquësona taparahuësoꞌ, co quëmasoꞌ nitotëranhuëꞌ!

Salmos 104:2

Quëmasoꞌ noyasáchin nicaton, tahuëri pochin cancantëran. Nëꞌmëtëquë paꞌshintërëso pochin piꞌiroꞌtënta acoran.

Salmos 118:27

Siniorosoꞌ Yosë niꞌton, aꞌpintatë pochin nitarinpoaꞌ. Artaro pomonënpitaquë ina marëꞌ tëpacaiso maꞌsharoꞌsa aꞌsoncoꞌ.

Salmos 148:5

Yaꞌipi inapitari Sinioro chinochinaꞌ. Ina camaitërin quëran yaꞌipi inapita yaꞌhuëpi.

Salmos 33:6

Sinioro camaitohuachina, piꞌiroꞌtë yaꞌnorin. Inaquë yaꞌhuërinsopitantaꞌ, nonin quëran chachin acorin.

Salmos 33:9

Ina nonin quëran nani maꞌsha yaꞌhuërin niꞌton, natëcoꞌ. Ina camaitërin quëran noyá acopinan quëparitërin. Napoaton noya nicatoma natëcoꞌ.

Isaías 45:7

Ca nohuanton tahuëri yaꞌhuërin. Ca nohuanton chachin tashinta yaꞌhuërin. Ca nohuanton noya yaꞌhuëpi. Ca nohuanton chachin maꞌsha onpopi. Ca Sinioroco, yaꞌipi inapita acorahuë.

Isaías 60:19

Co huachi piꞌi aꞌpintiimasoꞌ, nohuantapomahuëꞌ. Co yoqui tërantaꞌ, aꞌpintiimaso nohuantapomahuëꞌ. Ca Sinioroco chachin aꞌpintomiatáponquëmaꞌ. Yosënëmaco niꞌton, noya noya acoaranquëmaꞌ.

Mateo 8:3

Quisosori sëꞌhuarahuaton, itërin: —Nohuantërahuë mini, iyasha. ¡Noyatëquë huachi! itërin. Itohuachina, aꞌnaroáchin noyatërin. Canio inquirin huachi.

Juan 1:5

Tashinantërinsoꞌ aꞌpintohuatëra, aꞌnaroáchin tahuëri pochin ninin. Co tashiri tacopitërinhuëꞌ. Inapochachin Quisocristo aꞌpintërinpoaꞌ. Co noyahuëꞌ nininsopitari yaminsëpirinahuëꞌ, co nanitapapihuëꞌ.

Juan 1:9

Shaꞌhuitërinpoaso chachin Quisocristo isoroꞌpaquë oꞌmarin. Oꞌmarahuaton, yaꞌipi piyapinpoaꞌ aꞌpintimarinpoaꞌ. Inasáchin noꞌtëquën anitotërinpoaꞌ.

Juan 11:43

Ina tosahuaton, chimipi chiníquën itapon: —¡Iya Nasaro, pipirahuaton huëquëꞌ! itërin.

Juan 3:19

Quisoso isoroꞌpaquë oꞌmaton, aꞌpintërinpoaso pochin oshanënpoaꞌ anitotërinpoaꞌ. Aꞌnaquëniso nipirinhuëꞌ, co nohuantopihuëꞌ Quisoso nohuitacaisoꞌ. Co noyahuëꞌ nicacaisoáchin paꞌyatatonaꞌ, tashi pochin cancantopi. Co yanatëpihuëꞌ niꞌton, Yosëri anaꞌintarin.

2 Corintios 4:6

Yaꞌnan isoroꞌpaꞌ acoapon yaꞌipi parti tashipirinhuëꞌ: “Niiꞌsohuanchin huachi,” tënin Yosë. Napohuachina, tahuëri yaꞌhuërin. Inapochachin iporasoꞌ cancanënpoaquë aꞌpintërinpoaꞌ ina nohuitacaso marëꞌ. Inasoꞌ noya noya. Quisocristo yaꞌpirin quëran aꞌpintërinpoaso pochin ninin. Ina yonquihuatëhuaꞌ, Yosë chachin anohuitarinpoa huachi.

Efesios 5:14

Tahuëri nipachina, yaꞌipi quënanëꞌ. Ninshitatona napopiso chachin ninin. “Co noyahuëꞌ nipatamaꞌ, huëꞌërëso pochin cancantaramaꞌ. Ama ina pochin cancantatomarahuëꞌ, Yosë yonquicoꞌ. Chimipi pochin cancantohuatamaꞌ, Yosë nontocoꞌ nasha cancan quëchinquëmaꞌ. Ina quëran nanpiantarëso pochin cancantaramaꞌ. Quisocristo chachin aꞌpintarinquëmaꞌ noya nicacamaso marëꞌ,” topi.

Efesios 5:8

Iráca tashi pochin cancantopiramahuëꞌ, iporasoꞌ Yosë imaramaꞌ niꞌton, anoyacantërinquëmaꞌ tahuëri pochin nicacamaso marëꞌ. Napoaton tahuëri pochin nicoꞌ.

1 Timoteo 6:16

Inasáchin co taꞌhuantarinhuëꞌ. Nanpirápon inasoꞌ. Noya noya niꞌton, huënaráchin pochin yaꞌnorin. Co yaꞌcarichinachinhuëꞌ. Iráca quëran huarëꞌ co insontaꞌ Yosë quënaninhuëꞌ. Ipora huantaꞌ co quënanarihuarahuëꞌ, yaꞌipi piyapiꞌsari chinochinaꞌ. Yaꞌipiya nanitaparin. Amen.

1 Juan 1:5

Noya nanan Quisocristo anitotërincoi. Ina nanan chachin shaꞌhuitaranquëmaꞌ. “Yosësoꞌ noyasáchin ninin. Tahuëri pochin cancantërin. Co piꞌpisha tërantaꞌ tashi pochin cancantërinhuëꞌ,” itërincoi.

1 Juan 2:8

Co nasha camaitërinsohuëꞌ niponahuëꞌ, nasha pochin ninshitaranquëmaꞌ cancanëma quëran huarëꞌ ninosorocamaso marëꞌ. Quisocristo yaꞌipi piyapi nosororin. Nosoroatonquëmaꞌ, aꞌpintërëso pochin anoyacancantërinquëmaꞌ tahuëri pochin cancantacamaso marëꞌ. Ninosorohuatamaꞌ, co huachi tashi pochin cancantaramahuëꞌ.