Génesis 1:27 - Chayahuita (Shahui)

²⁷ Yosëri piyapi acoapon, inaora pochachin acorin. Aꞌnara quëmapi, aꞌnara sanapi. Inaíchin ninin.

Génesis 1:27 ပူးပေါင်းရင်းမြစ်များ

Génesis 2:18

Ina quëran Sinioroso Yosë niꞌton, taantarin: “Quëmapi inaora yaꞌhuëcasoꞌ, co noyahuëꞌ. Aꞌna niantaꞌi nipachin, inari noya catahuacaso marëꞌ,” tënin.

Génesis 2:7

Naporoꞌ Sinioroso Yosë niꞌton, yaniroꞌpaꞌ amocan quëran quëmapi ninin. Nani nisahuaton, nanpicaso marëꞌ pihuinitërin. Inapotohuachina, niirahuaton nanpirin huachi.

Génesis 9:6

Insosona piyapi tëpahuachin, aꞌnari iꞌhuërëtarin. Cá pochachin nicamaso marëꞌ acoranquëmaꞌ. Napoaton, co nitëpamaso yaꞌhuërinhuëꞌ.

Salmos 139:14

Nani maꞌsha ninansopita paꞌyapiro niꞌton, chinotaranquën. “¡Maꞌpitacha Siniorosoꞌ acorin paya,” tënahuë!

Isaías 43:7

Inapitasoꞌ ca pochachin ninintopi. Cari chachin inapitaso acorahuë. Catahuarahuëso nicatonaꞌ, yaꞌipiya quëran paꞌyatiinacoso marëꞌ acorahuë.

Malaquías 2:15

¡Ina Yosëráchin nonënpoaꞌ, ispiritonënpoaꞌ, inapita acotërinpoaꞌ! ¡Tëhuënchachin Yosësoꞌ, ina imarëhuaso capiniráchin nimacacaso nohuantërin! Huiꞌnanpoapitantaꞌ, inanquën nicacaiso marëꞌ naporin. Napoaton ispiritonëma aꞌpaiatomaꞌ, huiꞌnapitasëma sanapi manamasoꞌ, ama nonpintocosohuëꞌ.

Mateo 19:4

—¿Maꞌtaꞌ Yosë quiricanën quëran shaꞌhuitërinpoaꞌ? Iráca yaꞌnan piyapi nipon, catoíchin Yosëri ninin. Aꞌna quëmapi, aꞌna sanapi, inaíchin ninin.

Marcos 10:6

Napoaponahuëꞌ yaꞌnan piyapi nicapon, catoꞌ piyapiíchin Yosëri ninin. Aꞌna quëmapi, aꞌna sanapi, inaíchin ninin.

Efesios 2:10

Yosë anoyacancantërinpoaꞌ. Anoyacancantahuatonpoaꞌ, acorinpoaꞌ nóya nicacaso marëꞌ. Quisocristo catahuahuachinpoaꞌ, noya nisarëhuaꞌ. Iráca quëran huarëꞌ yonquirinpoaꞌ ina pochin nicacasoꞌ. Ina marëꞌ nichaꞌërinpoaꞌ.

Efesios 4:24

Nasha cancan Yosë quëtërinpoaꞌ ina pochin cancantacaso marëꞌ. Napoaton nasha aꞌmorëso pochin nasha cancantocoꞌ. Noꞌtëquën yonquiatomaꞌ, noyasáchin nicoꞌ.

Deuteronomio 4:32

Shimashonëmapita nosoroaton huayoninquëmaꞌ. Chiníquën nanantaton Iquipito quëran nichaꞌërinquëmaꞌ. Aꞌnapitaso canpita quëran chini chiníquënoꞌsaꞌ. Napopirinahuëꞌ, canpitari yaꞌhuërëtamaso marëꞌ inapitaso noꞌpanëna quëran Yosëri aꞌpararin. Ipora tahuëriꞌsa napoarinso chachin aꞌpararin. Inta nipachin yonquiricoꞌ: Coꞌhuara canpita yaꞌhuëyátërasënquëmahuëꞌ, yaꞌnan piyapi Yosëri ninin quëran huarëꞌ napopisoꞌ yonquiricoꞌ. Naporahuaton nisha nisha piyapiꞌsa isoroꞌpaquë yaꞌhuëpisopita natanicoꞌ. Natanpiramahuëꞌ: ¡Co onporo tëranta inahuasoꞌ, canpoa Yosë catahuamiatërinpoaso pochin catahuarinsoꞌ, shaꞌhuitaponënquëmahuëꞌ! Canpoasoꞌ, Yosë chachin pën huáncana quëran nontërinpoaso natanëhuaꞌ. Natanarihuarahuë co chiminëhuahuëꞌ. ¡Co inso nacionquë tëranta inapopihuëꞌ! Canpoasoꞌ, aꞌnapita nacionoꞌsa quëran Yosë huayoninpoaꞌ. Huayonatonpoaꞌ, acorinpoaꞌ piyapinënpita nicacaso marëꞌ. Ina marëꞌ iquipitoroꞌsa Yosëri tëniton, aparisitërin. Nisha nisha maꞌsha sacai nininsopita aꞌnotërin. Ina, yaꞌhuërënamënpoa iquipitoroꞌsa ahuëaton, aꞌpayanin. Inapoaton chiníquën nanantërinsoꞌ aꞌnotërinpoaꞌ. ¡Tëhuënchachin co intopa tëranta Yosë pochin mamanshiroꞌsa nipihuëꞌ! ‘Sinioroíchin Yosësoꞌ. Co aꞌna ina pochin yaꞌhuërinhuëꞌ,’ taꞌcamaso marëꞌ nani maꞌsha ninin. Inápa quëraonta pënënainquëmaso marëꞌ nontërinquëmaꞌ. Isoroꞌpaquëntaꞌ, panca pën aꞌnotërinpoaꞌ. Ina huáncana quëran nontërinpoasonta natanëhuaꞌ.

Colosenses 1:15

Tata Yosësoꞌ co quënanëhuëꞌ. Nipirinhuëꞌ, huiꞌnin isoroꞌpaquë oꞌmaton, paꞌpin anohuitërinpoaꞌ. Inantaꞌ Yosë chachin niꞌton, nóya anohuitërinpoaꞌ. Coꞌhuara isoroꞌpaꞌ yaꞌhuëyátërasohuëꞌ, huiꞌniontaꞌ inápaquë yaꞌhuërin.

Colosenses 1:26

Iráca iso nanan co nitotopihuëꞌ. Iporaso nipirinhuëꞌ imarëhuasopita anitotërinpoaꞌ. Yonquirinso chachin anitotërinpoaꞌ.

Colosenses 3:10

Nasha aꞌmorëso pochin nasha cancan manamaꞌ. Yosë nininpoaꞌ niꞌton, nani tahuëriya catahuarinquëmaꞌ ina pochin cancantacamaso marëꞌ. Ina quëran noya noya ina nohuitaramaꞌ. Ina marëꞌ nasha cancan quëtërinquëmaꞌ.