Gálatas 6:8 - Chayahuita (Shahui)

⁸ Inapochachin co noyahuëꞌ yonquirápatëhuaꞌ, co noyahuëꞌ nisarëhuaꞌ. Ina marëꞌ anaꞌintinpoasoꞌ yaꞌhuërin. Nipirinhuëꞌ, Ispirito Santo natëhuatëhuaꞌ, nani tahuëri catahuarinpoaꞌ noya cancantacaso marëꞌ. Ina quëran Yosëꞌpaꞌ noya nanpicontarihuaꞌ.

Gálatas 6:8 ပူးပေါင်းရင်းမြစ်များ

Copo naporinso' 4:8

Co noyahuëꞌ nipisopita tëhuënchinsoꞌ, napopiso marëꞌ noꞌtëquën anaꞌintarin. Maꞌsharaya shaꞌpatëra, ina nitërinso chachin manëꞌ. Inapochachin Yosëriso noꞌtëquën iꞌhuërëtarin. Nani huaꞌqui tahuëri nicato, ina noyá nitotërahuë.

Eclesiastés 11:6

Napoaton tashiramiachin shaꞌtëquëꞌ. Iꞌhuanahuanquëntaꞌ, shaꞌtaantaquëꞌ. Co nitotërëhuahuëꞌ insoso noyatapon nimara. Yaꞌnan shaꞌnëhuaso aꞌna nimara, piquëran shaꞌtërëhuaso aꞌna nimara. Cato chachin aꞌna nimara.

Mateo 19:29

Aꞌnaquëma mini imamacoso marëꞌ maꞌshanëmaꞌ pataramaꞌ. Ina marëꞌ Yosë acanaarinquëmaꞌ. Aꞌnaquëmaꞌ pëinëmaꞌ, iyaparimaꞌ, oshiparimaꞌ, tataparimaꞌ, mamaparimaꞌ, saꞌamaꞌ, huiꞌnamaꞌ, noꞌpanëmaꞌ inapita pataramaꞌ aꞌchinacaso marëꞌ. Inapohuatamaꞌ, aꞌnaíchin marëꞌ pasa aquëtë canarëso pochin quëtarinquëmaꞌ. Ina quëran aꞌna tahuëri Yosëꞌpaꞌ nanpimiataramaꞌ.

Mateo 25:46

Parisitopiquë paꞌsahuatonaꞌ, inaquë yaꞌhuëmiatapi huachi. Noya nipisopitaso nipirinhuëꞌ, Yosë pochin nanpimiatapi huachi,” itërin Quisosori.

Lucas 18:30

Ca marëꞌ patohuatamaꞌ, ipora chachin Yosë naꞌcon naꞌcon quëtantarinquëmaꞌ. Ina quëran aꞌna tahuëri Yosëꞌpaꞌ nanpimiatarama huachi, itërin Quisosori.

Juan 4:14

Nisha iꞌsha carinquën quëtaranquën. Ina yaꞌhuëtohuachinquën, co huachi yamororëso pochin cancantaranhuëꞌ. Niꞌquëꞌ. Pancaiꞌ noꞌpa quëran pipihuachina, noyápiachin pipirárin. Co onporontaꞌ yanimarinhuëꞌ. Inapochachin nanpirin iꞌsha quëtohuatënquën, cancanënquë chachin yaꞌhuëtarinquën. Inaquë yaꞌhuápon huachi. Yosë nohuitaton, nanpimiataran, itërin.

Juan 4:36

Piyapiꞌsaꞌ aꞌchintohuatamaꞌ, Yosëꞌpaꞌ canaaramaꞌ. Noya noya nanpimiataramaꞌ. Catoꞌ piyapi sacatërinso pochin nisaramaꞌ. “Aꞌnasoꞌ yaꞌpirin shaꞌnin. Cayahuachina, aꞌnarintaꞌ manin,” topi. Napohuachina, catoꞌ aꞌchinaꞌpiroꞌsa chachin nóya cancantapi.

Juan 6:27

Cosharomia aꞌnaroáchin chanatërin. Ama inasáchin nohuantocosohuëꞌ. Cosharo pochin nininsoꞌ yaꞌhuërin. Cancanëma marëꞌ quëtaranquëmaꞌ. Ina co onporontaꞌ chanatarinhuëꞌ. Yaꞌhuëtohuachinquëmaꞌ, Yosë nohuitatomaꞌ nanpimiatarama. Ina naꞌcon naꞌcon yonquicoꞌ. Yosë quëran quëmapico niꞌto, quëtaranquëmaꞌ. Ina marëꞌ Tata Yosë acorinco. Ina nohuanton, nani maꞌsha nanitaparahuë nohuitamacoso marëꞌ, itërin.

Romanos 13:14

Sontaroꞌsaꞌ huaꞌna aꞌmopiso pochin Quisocristo yaꞌcopirinpoaꞌ ama sopai minsëinpoaso marëhuëꞌ. Napoaton Quisocristo naꞌcon yonquiatomaꞌ, ina pochachin cancantocoꞌ. Ina natëtomaꞌ, ama piꞌpian tërantaꞌ yonquicosohuëꞌ co noyahuëꞌ nicacamaso marëꞌ.

Romanos 6:13

Niꞌcoꞌ. Imiramaꞌ, nantëmaꞌ, yaꞌpiramaꞌ, huëratëmaꞌ, nanamëmaꞌ, inapita yaꞌhuëtërinquëmaꞌ. Inapita quëran co noyahuë nicacaso yaꞌhuëpirinhuëꞌ. Ama nohuantocosohuëꞌ. Yosë natëcamasoáchin yonquicoꞌ. Chiminama quëran nanpiantëramaso pochin cancantatomaꞌ, yaꞌipi nonëma quëran huarëꞌ noyasáchin nicoꞌ.

Romanos 6:23

Piyapi asacatohuatëra, pahuërërëꞌ. Inapochachin co noyahuëꞌ nipatëhuaꞌ, chiminpatëhuaꞌ parisitomiatarihuaꞌ. Yosëso nipirinhuëꞌ, inaora nohuanton nosororinpoaꞌ. Quisocristo imapatëhuaꞌ, ina nohuitatëhuaꞌ, nanpimiatarihua. Inasoꞌ huaꞌanënpoaꞌ. Inasáchin natërëhuaꞌ.

Romanos 8:11

Ispirito Santo yaꞌcoancantërinpoaꞌ. Yosë huaꞌyanën chachin niꞌton, achinicancaninpoaꞌ Yosë pochin cancantacaso marëꞌ. Aꞌna tahuërintaꞌ Yosë ananpitaantarinpoaꞌ. Quisocristo ananpitaantarinsoꞌ pochachin ananpitaantarinpoaꞌ canpoantaꞌ. Nonënpoaꞌ chiminacaso yaꞌhuëpirinhuëꞌ, Ispirito Santo yaꞌcoancantërinpoaꞌ niꞌton, nanpiantarihuaꞌ.

Romanos 8:13

Co noyahuëꞌ ninëhuasopita co aꞌpoasëhuahuëꞌ, chiminpatëhuaꞌ parisitomiatacasoꞌ yaꞌhuërin. Nipirinhuëꞌ, co noyahuëꞌ ninëhuasopita tëpatë pochin nitohuatëhuaꞌ, nanpimiatarihuaꞌ. Ispirito Santo catahuarinpoaꞌ co noyahuëꞌ ninëhuasopita tëpatë pochin nitacaso marëꞌ.

Romanos 8:6

Co noyahuëꞌ nicacasoráchin paꞌyatohuatëhuara, chimipi pochin niconëhuaꞌ. Co Yosë nohuitërëhuahuëꞌ. Nipirinhuëꞌ, Ispirito Santo paꞌyatatëhuaꞌ natëhuatëhuaꞌ, Yosë nohuitatëhuaꞌ, nanpimiatarihuaꞌ. Noya yonquiatëhuaꞌ, sano cancantarihuaꞌ.

1 Corintios 15:42

Inapochachin canpoantaꞌ nanpiantahuatëhuaꞌ, nisha yaꞌnoarihuaꞌ. Chiminpatëhuara, nonënpoaꞌ chanatopirinhuëꞌ, nanpiantahuatëhuaꞌ, nasha nonënpoaꞌ yaꞌhuëtarinpoaꞌ. Co onporontaꞌ chanatarinhuëꞌ.

Gálatas 6:7

Niꞌcona sopai nonpintochinquëmaꞌ. Co Yosë tëhuacasoꞌ yaꞌhuërinhuëꞌ. Co insoari tërantaꞌ nanitërinhuëꞌ Yosë nonpintacasoꞌ. Noꞌtëquën yonquicoꞌ. Maꞌsha shaꞌpatëra, inachachin nitërin. Co nisha nitërinhuëꞌ.

1 Timoteo 1:16

Yosë nosororinco. Huaꞌqui co noyahuëꞌ nipirahuëꞌ, nosororinco. Aꞌnapitantaꞌ natëcaiso marëꞌ napotërinco. “Paono paꞌpi co noyahuëꞌ nipirinhuëꞌ, huaꞌqui ahuantaton, Quisocristori nosororin. Nosoroarinco cantaꞌ,” taꞌtonaꞌ, natëtapi. Natëtohuachinaꞌ, Yosë nohuitatonaꞌ, noya nanpiapi. Aꞌna tahuërintaꞌ inápaquë nanpimiatapi.

Tito 3:7

Napoaton iporasoꞌ Yosë noya niꞌninpoaꞌ. Iráca oshahuanpirëhuahuëꞌ, inaora nohuanton, nosoroatonpoaꞌ, nanan anoyatërinpoaꞌ. “Huëntonënquë ayaꞌconinpoaꞌ niꞌton, aꞌna tahuëri yaꞌhuërinꞌpaꞌ yaꞌhuëcontarihuaꞌ,” taꞌtëhuaꞌ, ninarëhuaꞌ. Inatohuaꞌ nanpimiatarihuaꞌ.

Santiago 3:18

Yosë yonquihuatëhuaꞌ, sano cancantatëhuaꞌ, nanan anoyatarihuaꞌ. Napoaton, noya niniꞌtëhuaꞌ yaꞌhuarihuaꞌ. Noya nipatëhuaꞌ, aꞌnapitantaꞌ nicatonpoaꞌ, noya nisapi.

2 Pedro 2:12

Nisha aꞌchinaꞌpiroꞌsasoꞌ maꞌsharoꞌsa pochin cancantopi. Co mantaꞌ yonquipihuëꞌ. Maꞌsona tërantaꞌ yanipachinara, nipi. Yosë yonquirinsoꞌ co nitotatonaraihuëꞌ pinopi. Niꞌcoꞌ. Maꞌsharoꞌsaꞌ tananquë quënanpatëra, tëparëꞌ, co nosororëhuëꞌ. Ina marëꞌ Yosëri acorin. Inapochachin nisha aꞌchinaꞌpiroꞌsasoꞌ taꞌhuantapi. Oshanëna marëꞌ Yosëri anaꞌintarin.

2 Pedro 2:19

“Co insontaꞌ natëcasoꞌ yaꞌhuërinhuëꞌ. Canpitaora nohuanton yaꞌhuëcoꞌ. Maꞌsona tërantaꞌ yanipatamaꞌ, nicoꞌ. Inapohuatamaꞌ, capa cancantaramaꞌ,” itopirinënquëmahuëꞌ, co inapita tërantaꞌ inahuara nohuanton yaꞌhuëpihuëꞌ. Sopai nohuanton, noꞌpipi, monshihuanpi, co noyahuëꞌ nipi. Insosona minsëhuachinpoaꞌ, huaꞌanëntërinpoaꞌ.

Judas 1:21

Inapotatomaꞌ, nani tahuëri nóya cancantocoꞌ Yosë nosoroꞌinquëmaꞌ. Ina naꞌcon nohuantocoꞌ. Quisocristo yonquiatomaꞌ, oꞌmantacasoꞌ tahuëri ninacoꞌ. Oꞌmantahuachin, nosoroatonpoaꞌ, chimirin quëran nichaꞌësarinpoaꞌ. Yosëꞌpaꞌ nanpimiatarihuaꞌ.

Apocalipsis 22:11

Aꞌnaquën natanaponaraihuëꞌ, co natëapihuëꞌ. Co noyahuëꞌ nipisopitasoꞌ, aquë aquëtëꞌ co noyahuëꞌ nisapi. Co nishinahuën cancantopisopitantaꞌ, aquë aquëtëꞌ niinaꞌ. Noya nipisopitasoꞌ nipirinhuëꞌ, noya noya nisapi. Yosëíchin cancantopisopitantaꞌ, noya noya imainaꞌ,” itërinco.