Gálatas 6:16 - Chayahuita (Shahui)

¹⁶ Nani noꞌtëquën aꞌchintëranquëmaꞌ. Ina imapatamaꞌ, Yosë piyapinën chachin nisaramaꞌ. Yosë nosoroatënquëmaꞌ, noya catahuainquëmaꞌ. Asanocancainquëmaꞌ, tënahuë.

Gálatas 6:16 ပူးပေါင်းရင်းမြစ်များ

Salmos 73:1

Yosësoꞌ, israiroꞌsanpoa paꞌpi nosororinpoaꞌ. Noyápiachin cancantohuatëhuaꞌ, nosororinpoaꞌ.

Isaías 45:25

Israiroꞌsasoꞌ cari catahuarahuë niꞌton, noꞌtëquën yonquiaponaꞌ: ‘¡Ma noyacha Sinioro imatëhua naporëhua paya!’ tëcaponaꞌ,” tënin.

Oseas 1:10

Napoaponahuëꞌ, aꞌna tahuëri israiroꞌsaso notohuaroꞌ naꞌaponaꞌ. Marë yonsanquë inotëraꞌhuaya yaꞌhuërinso pochin naꞌaponaꞌ. Co incari tëranta pichicasoꞌ nanitaponhuëꞌ. Iporasoꞌ pënënatënquëma shaꞌhuitëranquëmaꞌ: ‘Canpitaso co piyapinëhuëpitanquëmahuëꞌ,’ itëranquëmaꞌ. Naporoso nipirinhuëꞌ: ‘Canpitaso huiꞌnahuëpitanquëmaꞌ. Caso Yosëco nanpito napotaranquëmaꞌ,’ itaranquëmaꞌ.

Juan 1:47

Natanino yaꞌcarirahuasoꞌ, Quisosori quënanin. —Pasoꞌ quëmapi niꞌcoꞌ. Israiromia chachin inasoꞌ. Co piꞌpisha tërantaꞌ nonpininhuëꞌ, itërin Quisosori.

Juan 14:27

Pantaporahuëꞌ, asanocancanaranquëmaꞌ. Tata Yosë natëto, co mantaꞌ tëꞌhuatërahuëꞌ. Catahuaaranquëmaꞌ ca pochachin cancantacamaso marëꞌ. Piyapiꞌsaꞌ inahuara co sano cancantopihuëꞌ. Aꞌnaroáchin paꞌyanpi. Carinquëmaso nipirinhuëꞌ catahuaaranquëmaꞌ sano cancantacamaso marëꞌ. Ama paꞌyancosohuëꞌ. Ama tëꞌhuacosohuëꞌ.

Juan 16:33

Nani naꞌcon shaꞌhuitëranquëmaꞌ sano cancantacamaso marëꞌ. Casáchin yonquihuatamaco, sano cancantaramaꞌ. Co paꞌyanaramahuëꞌ. Piyapiꞌsaꞌ aparisitopirinënquëmahuëꞌ, catahuaranquëmaꞌ niꞌton, chiníquën cancantocoꞌ. Yaꞌipi isoroꞌpaquë co noyahuëꞌ nipisopita nani minsëarahuë, itërincoi Quisoso.

Romanos 1:7

Napoaton Nomaquë yaꞌhuëramasopita ninshitaranquëmaꞌ. Yosë paꞌpi nosororinquëmaꞌ. Nani acorinquëmaꞌ piyapinënpita nicacamasoꞌ. Niꞌton, inasáchin yonquicasoꞌ yaꞌhuërin. Tata Yosë inaora nohuanton, catahuainquëmaꞌ. Asanocancainquëmaꞌ. Quisocristontaꞌ inapochachin catahuainquëmaꞌ. Inasoꞌ huaꞌanëntërinpoaꞌ.

Romanos 4:12

Cotioroꞌsantaꞌ Apraan pochin natëtohuachinara, huiꞌninpita pochin nipi antaꞌ. Co marca niacotopiso marëꞌ noya cancantopihuëꞌ. Coꞌhuara marca niacochatërasohuëꞌ, Apraansoꞌ natëtërin. Aꞌnapitantaꞌ ina pochin cancantohuachinara, Yosëri noya niꞌsarin.

Gálatas 1:3

Inaora nohuanton, Tata Yosë catahuainquëmaꞌ. Asanocancainquëmaꞌ. Sinioro Quisocristontaꞌ inachachin catahuainquëmaꞌ.

Gálatas 3:29

Quisocristo imapatëhuaꞌ, Apraan shinpitanpoaꞌ ninëhuaꞌ canpoantaꞌ. Apraan shaꞌhuitërinso pochachin naꞌcon catahuarinpoaꞌ.

Gálatas 5:16

Ispirito Santo natëcoꞌ catahuainquëmaꞌ, tënahuë. Ina catahuahuachinquëmaꞌ, co noyahuëꞌ yonquiramasoꞌ naniantaramaꞌ. Inapita naniantatomaꞌ, nóya nisaramaꞌ.

Gálatas 5:25

Ispirito Santo yaꞌcoancantatonpoaꞌ, catahuarinpoaꞌ noya nicacasoꞌ niꞌquëhuarëꞌ, maꞌsona tërantaꞌ shaꞌhuitohuachinpoaꞌ, noya natëahuaꞌ.

Efesios 6:23

Quisocristo imaramaꞌ niꞌton, iyaroꞌsaꞌ, Tata Yosë asanocancainquëmaꞌ. Nosoroꞌinquëmaꞌ. Catahuainquëmaꞌ shaꞌhuitërinpoasoꞌ noya natëcamaso marëꞌ. Sinioro Quisocristontaꞌ inapochachin catahuainquëmaꞌ.

Filipenses 3:16

Anitotohuachinpoaꞌ, ama topinan quëran natahuansohuëꞌ. Naꞌcon yonquiaꞌahuaꞌ natëcaso marëꞌ. Yaꞌipi cancanënpoa quëran huarëꞌ imahuaꞌ.

Filipenses 3:3

Yosë marcanën co nonënpoaquë niacotërëhuahuëꞌ. Cancanënpoaꞌ Yosë anoyacancantërinpoaꞌ. Cancanënpoa quëran ina chinotarëhuaꞌ. Ispirito Santo chachin catahuarinpoaꞌ noya chinotacaso marëꞌ. Co canpoara nanitërëhuahuëꞌ noya cancantacasoꞌ. Quisocristoíchin anoyacancantohuachinpoaꞌ, nichaꞌësarinpoaꞌ, tënëhuaꞌ. Napoaton canpoasoꞌ Yosë piyapinënpita ninëhuaꞌ.

Filipenses 4:7

Apira apira Yosë nontohuatamaꞌ, asanocancanarinquëmaꞌ. Co imapisopitasohuëꞌ nipirinhuëꞌ co sano cancantopihuëꞌ. Maꞌsha onpohuachinara, aꞌnaroáchin paꞌyanpi. Canpoaso nipirinhuëꞌ Quisocristo imarëhuaꞌ niꞌton, ina yonquiatëhuaꞌ, sano cancantarihuaꞌ.

1 Pedro 1:3

Ma noyacha Tata Yosëso paya. Quisocristo paꞌpin inasoꞌ. Naꞌcon nosoroatonpoaꞌ, nasitantarëso pochin nasha cancan quëtërinpoaꞌ ina nohuitacaso marëꞌ. Quisocristo huaꞌanëntërinpoaꞌ. “Chiminaponahuëꞌ, nanpiantarin niꞌton, canpoantaꞌ nanpiantarihuaꞌ,” taꞌtëhuaꞌ, noya ninarëhuaꞌ. Natëtomiatërëhuaꞌ.

Judas 1:2

Yosë naꞌcon catahuainquëmaꞌ. Nanan anoyatërinpoaꞌ niꞌton, naꞌcon asanocancainquëmaꞌ. Nani tahuëriya nosoroꞌinquëmaꞌ canpitarintaꞌ noya noya nosorocamaso marëꞌ.