Gálatas 5:20 - Chayahuita (Shahui)

²⁰ Co noyahuëꞌ yonquihuachinara, mamanshi moshapi, pënotopi, co nanan anoyatopihuëꞌ, co napopianachin yonquipihuëꞌ. Aꞌpitatonaꞌ, aꞌnaroáchin noꞌhuitopi, nipinopi. Aꞌna huënton aꞌna huënton co noyahuëꞌ ninicatonaꞌ yaꞌhuëpi. Nisha nisha yonquiatonaꞌ, yaꞌhuëpi.

Gálatas 5:20 ပူးပေါင်းရင်းမြစ်များ

Romanos 2:8

Nipirinhuëꞌ, canpoara nohuantërëhuasoráchin nipatëhuaꞌ, noꞌhuiarinpoaꞌ. Noꞌtëquën anitotopirinpoahuëꞌ co natëhuatëhuahuëꞌ, anaꞌintarinpoaꞌ. Co noyahuëꞌ nipatëhuaꞌ, chiníquën anaꞌintarinpoaꞌ.

1 Corintios 11:19

Co yaꞌipi cancanëma quëran imapatamahuëꞌ, nisha nisha yonquiaramaꞌ. Co napopináchin yonquiaramahuëꞌ. Ina quëran Yosë cancanën manëhuasopita nohuitërinënpoaꞌ. Co yaꞌipinpoaꞌ nisha nisha yonquirëhuahuëꞌ. Aꞌnapitaso nipirinhuëꞌ co noya yonquiatonahuëꞌ, co noꞌtëquën imapihuëꞌ.

2 Corintios 11:19

Inapitasoꞌ nocanpirinënquëmahuëꞌ, noya natanamaꞌ niꞌquëhuarëꞌ, cantaꞌ piꞌpian tërantaꞌ natanco, topirahuëꞌ.

2 Corintios 12:20

Canconpato, co noya niꞌsaranquëmahuëꞌ nimara. Canpitantaꞌ co noya niꞌsaramacohuëꞌ nimara. Napoaton sëtato, yonquiáranquëmaꞌ. Ipora huantaꞌ aꞌnaquëmaꞌ nimara ninoꞌhuiaramaꞌ, niaꞌpitaramaꞌ, iquianan quëran ninontaramaꞌ, nipinosaramaꞌ, ninocanaramaꞌ, nisha nisha yonquiaramaꞌ nimara, tënahuë yonquiato.

Gálatas 5:15

Ninoꞌhuihuatamaꞌ, paꞌpi co noyahuëꞌ nisaramaꞌ. Tanan niꞌniroꞌsaꞌ niquëtëpiso pochin cancantaramaꞌ. Nipinocasontaꞌ co noyahuëꞌ. Ina pochin nipatamaꞌ, niꞌcona yaꞌipinquëmaꞌ nitapicancantamaꞌ.

Tito 3:10

Aꞌna piyapi nisha nanan aꞌchinpachin, imapisopita nisha nisha ayonquirin. Inasoꞌ pënënquëꞌ noꞌtëquën aꞌchinchin. Co yanatëhuachinquënhuëꞌ, naquëranchin pënëantaquëꞌ. Ina quëran co yanatëantahuachinquënhuëꞌ, shaꞌhuitëquëꞌ taꞌchin. Ama insoari tërantaꞌ ina natëinasohuëꞌ. Ama huachi imarinso pochin niꞌcosohuëꞌ.

Santiago 3:14

Aꞌnaquënso nipirinhuëꞌ aꞌnapita apiratatonaꞌ, nocanpi. Inahuara nohuantopisoráchin yonquiatonaꞌ noꞌhuitápi. Ina pochin cancantohuatamaꞌ: “Casoꞌ noyaco,” ama tocosohuëꞌ. Co noꞌtëquën yonquiramahuëꞌ. Nonpiánamaꞌ.

2 Pedro 2:1

Iráca Yosëri acorinsopita noꞌtëquën pënëntopi. Aꞌnaquënso nipirinhuëꞌ nonpin nanan pënëntatonaꞌ, israiroꞌsaꞌ nonpintopi. Inapochachin iporantaꞌ aꞌnaquën nonpin nanan yaaꞌchintarinënquëmaꞌ. Noyasha nontapirinënquëmahuëꞌ, nonpintarinënquëmaꞌ. “Quiyantaꞌ imarai,” taponaraihuëꞌ, nonpin nanan aꞌchinapi anishacancantacaiso marëꞌ. Quisocristo nichaꞌëinpoaso marëꞌ chiminin. Inaíchin natëcaso nipirinhuëꞌ, nisha aꞌchinaꞌpiroꞌsasoꞌ co yanatëpihuëꞌ. Ina marëꞌ aꞌna tahuëri Yosëri anaꞌintarin. Aꞌnanaya anaꞌintarin.

1 Juan 3:15

Aꞌna piyapi noꞌhuihuatamaꞌ, tëpatonaꞌpiroꞌsa pochin Yosë niꞌsarinquëmaꞌ. Tëpatonapiroꞌsasoꞌ, co Yosë pochin nanpimiatacaiso yaꞌhuërinhuëꞌ.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

1 Samuel 15:23

Pënotonquë aniꞌtohuatëra oshahuanëso pochachin, Yosë camaitërinsonta co natëhuatërahuëꞌ, oshahuanëꞌ. Mamanshi moshahuatëra oshahuanëso pochachin co Yosë natëchináchinhuëꞌ cancantohuatërantaꞌ, oshahuanëꞌ. Quëmasoꞌ Sinioro camairinquënsoꞌ, nocanan. Ina pochachin inantaꞌ, quëma copirno nisápasoꞌ nocaninquën,” itërin.