Gálatas 5:1 - Chayahuita (Shahui)

¹ Quisocristo nichaꞌërinpoaꞌ inasáchin yonquiatëhuaꞌ noya cancantacaso marëꞌ. Ina imapatëhuaꞌ, catahuarinpoaꞌ noya nicacasoꞌ. Napoaton ama naquëranchin iráca pënëntërinsoꞌ imahuasohuëꞌ. Quisocristoráchin yonquiaꞌahuaꞌ.

Gálatas 5:1 ပူးပေါင်းရင်းမြစ်များ

Salmos 51:12

Co noyahuëꞌ ninahuë niꞌton, sëtërahuë. Anoyacancantoco noya cancantaantaꞌi. Quëma ispiritonën achiniantaꞌinco.

Proverbios 23:23

Noꞌtëquën nanan nitotacasoꞌ, yonquínahuan nicacasoꞌ, aꞌchinpisoꞌ noya natanacasoꞌ, yonqui yonquícharacasoꞌ, inapita cancantëquëꞌ. Ina pochin nipatan, ama aꞌpoquësohuëꞌ.

Isaías 61:1

Sinioro piyapinën naporin: “Sinioro ispiritonën yaꞌcoancantërinco niꞌton, noya catahuarinco. Ina chachin acorinco popriyaroꞌsa noya nanan shaꞌhuitaꞌhuaso marëꞌ. Aparisitopisopita catahuacaꞌhuaso marëꞌ acorinco. Yaꞌhuëpi quëran quëparahuatona huaꞌanëntapirinahuëꞌ, yaꞌhuëpiquë chachin paantacaiso shaꞌhuitarahuë. Tashinan pëiquë pochin yaꞌhuëapisopitantaꞌ, ina quëran pipicaisoꞌ shaꞌhuitarahuë.

Mateo 23:4

Niꞌcoꞌ. Panca pëꞌpëto quëpahuatëra, sacaiꞌ iratacasoꞌ. Inapitasoꞌ inapochachin aꞌchintërinënquëmaꞌ. Co Yosë quiricanënáchin aꞌchinpihuëꞌ. Inahuara yonquinëna quëraontaꞌ nisha nisha pënëntopi. Panca pëꞌpëto apëꞌpëtërëso pochin nitërinënquëmaꞌ. Aꞌchintopirinënquëmahuëꞌ, inahuara chachiontaꞌ co natëpihuëꞌ.

Lucas 5:38

Shaꞌmoroꞌ huinosoꞌ nasha morsaquë taꞌpanëꞌ. Huino, morsantaꞌ noya nisarin.

Hechos 15:10

Iráca Moisësë nisha nisha pënëntopirinhuëꞌ, shimashonënpoaꞌ co nanitopihuëꞌ yaꞌipiya noꞌtëquën natëcaisoꞌ. Canpoantaꞌ co nanitaparëhuahuëꞌ. ¿Maꞌmarëtaꞌ nipachin nisha piyapiꞌsaꞌ imapachinaꞌ, iráca pënëntopisoꞌ aꞌchinacasoꞌ nohuantëramaꞌ? tënahuë. Yosëri noya niꞌpachina, co canpoari nisha shaꞌhuicasoꞌ yaꞌhuërinhuëꞌ. Quisoso imapisopita tananpitahuaꞌ, Yosë anaꞌintohuachinpoaꞌ.

Romanos 6:14

Inapohuatamaꞌ, co huachi oshanëma huaꞌanëntatë pochin nitarinquëmahuëꞌ. Co yaꞌipi pënëntërinsoꞌ natëpiramahuëꞌ, inaora nohuanton, Yosë anoyacancantërinquëmaꞌ. Nosoroatënquëmaꞌ, catahuarinquëmaꞌ noya nicacamaso marëꞌ.

Romanos 6:18

Iporasoꞌ, co huachi oshanëma camaiarinquëmahuëꞌ. Nasha huaꞌanëmaꞌ yaꞌhuëtërinquëmaꞌ. Quisocristo natëtomaꞌ, noya nisaramaꞌ.

Romanos 7:6

Iráca nisha nisha pënëntërinsoꞌ yaꞌhuërin natëcasoꞌ, Moisësëri ninshitërinsoꞌ. “Co yaꞌipiya natëhuatëhuahuëꞌ, co onporontaꞌ chaꞌësarëhuahuëꞌ,” topi. Apinaꞌpi tashinan pëiquë yaꞌhuërinso pochin nipirëhuahuëꞌ. Iporasoꞌ co huachi Moisësë pënëntërinsoꞌ yonquiarëhuahuëꞌ. Quisocristorëꞌquënpoaꞌ chiminëhuaso pochin ninëhuaꞌ niꞌton, co huachi huaꞌanëntiinpoasoꞌ yaꞌhuërinhuëꞌ. Ispirito Santo catahuarinpoaꞌ cancanënpoa quëran huarëꞌ Yosë natëcasoꞌ. Nasha cancan quëtërinpoaꞌ. Napoaton noya nisarëhuaꞌ.

Romanos 8:15

Iráca Yosë tëꞌhuatëramaꞌ. Iporaso nipirinhuëꞌ Ispirito Santo yaꞌcoancantërinpoaꞌ niꞌton, co huachi mantaꞌ tëꞌhuatacasoꞌ yaꞌhuërinhuëꞌ. Huiꞌninpita pochachin Yosë niꞌninpoaꞌ. Ina nontohuatëhuara, “Tata,” itërëhuaꞌ.

Romanos 8:2

Oshanënpoa natëhuatëhuaꞌ, co noyahuë ninëhuaꞌ. Inapohuatëhuaꞌ, chiminpatëhuaꞌ, anaꞌintarinpoaꞌ. Nipirinhuëꞌ, Quisocristo imapatëhuaꞌ, Ispirito Santo catahuarinpoaꞌ nanpimiatacaso marëꞌ. Naporahuaton, co huachi oshanënpoa natëcasoꞌ yaꞌhuërinhuëꞌ.

1 Corintios 15:58

Napoaton iyaroꞌsaꞌ chiníquën cancantocoꞌ. Nosororanquëmaꞌ niꞌton, pënënaranquëmaꞌ: Ama nisha nisha yonquicosohuëꞌ. Naporahuaton, paatomaꞌ aꞌnapita aꞌchintëraꞌpiacoꞌ. Sinioro catahuahuachinquëmaꞌ, co onporontaꞌ topinan quëran aꞌchinaramahuëꞌ. Aꞌchinpatamaꞌ, Yosëri nohuantërinsopita imasapi huachi.

1 Corintios 16:13

Ama huëꞌërëso pochin cancantatomarahuëꞌ, noya yonquicoꞌ. Yaꞌipi cancanëma quëran natëmiatocoꞌ. Maꞌsha onpoapomarahuëntaꞌ, chiníquën cancantocoꞌ. Niachinicancancoꞌ.

1 Corintios 7:22

Patron marëꞌ sacatapomarahuëꞌ, Yosë huayonpachinquëmaꞌ, oshanëmaꞌ inquitatënquëmaꞌ, nichaꞌërinquëmaꞌ. Ina yonquiatomaꞌ, co huachi sëtacasoꞌ yaꞌhuërinhuëꞌ. Inapochachin aꞌnaquëmaꞌ co patron asacatopirinquëmahuëꞌ. Yosë nichaꞌërinquëmaꞌ niꞌton, ina naꞌcon naꞌcon natëcamasoꞌ yaꞌhuërin. Yosë piyapinënpita ninamaꞌ.

2 Corintios 11:20

Inapitasoꞌ chiníquën camairinënquëmaꞌ. Maꞌshanëmaꞌ topinan mapi. Nocaninënquëmaꞌ, yaahuërinënquëmaꞌ. Inapotopirinënquëmahuëꞌ, ¿maꞌmarëcha noya natanama nicaya? tënahuë, yonquiato.

2 Corintios 3:17

“Sinioro” topatëhuaꞌ, Ispirito Santo tapon naporëhuaꞌ. Ina catahuahuachinpoaꞌ, co huachi iráca pënëntërinsoꞌ imacasoꞌ yaꞌhuërinhuëꞌ. Ispirito Santo nichaꞌërinpoaꞌ noꞌtëquën yonquicaso marëꞌ.

Gálatas 2:4

Aꞌnaquën cotioroꞌsaso nipirinhuëꞌ, “Quiyantaꞌ imarai,” taponaraihuëꞌ, co Quisocristoráchin imapihuëꞌ. Iráca pënëntërinsontaꞌ imapi. Yashaꞌhuirapitonacoi, niyontonpiso pëiquë yaꞌconpi Quisocristo imatoi naporaisopita nicacaiso marëꞌ. “Iráca pënëntërinsontaꞌ natëcasoꞌ yaꞌhuërin,” taꞌtonaꞌ, yaanishacancantërinacoi nisha nisha natëcaꞌhuaiso marëꞌ.

Gálatas 3:25

Iporasoꞌ nani Quisocristo oꞌmarin niꞌton, co huachi maistro pochin nininsoꞌ nohuantarihuahuëꞌ.

Gálatas 4:26

Apraan saꞌinso nipirinhuëꞌ co ina pochinhuëꞌ. Soꞌini noya noya niꞌnin. Co huaꞌanën pochin camairinhuëꞌ. Inapochachin inápaquë nasha Quirosarin yaꞌhuërin. Inatohuaꞌ co nisha nisha natëcasoꞌ yaꞌhuërinhuëꞌ. Quisocristo imapatëhuaꞌ, Sara huaꞌhuin pochin ninëhuaꞌ.

Gálatas 4:31

Napoaton iyaroꞌsaꞌ Quisocristo nanamën imapatëhuaꞌ, co pënëntërinsoꞌ nanan imacasoꞌ yaꞌhuërinhuëꞌ. Yosësoꞌ co patron pochin piyapitërinpoahuëꞌ. Huëntonënquë chachin ayaꞌconinpoaꞌ niꞌton, huiꞌnin pochachin niꞌninpoaꞌ.

Gálatas 4:9

Iporasoꞌ Yosë nohuitëramaꞌ. Inantaꞌ huiꞌninpita pochin nicatënquëmaꞌ, noya nohuitërinquëmaꞌ. Nani nichaꞌëpirinquëmahuëꞌ, ¿maꞌmarëcha naquëranchin iráca pënëntërinsoꞌ, aꞌnapita piyapiꞌsaꞌ natëtopisoꞌ, inapita natëtomaꞌ, tëꞌhuachinachin cancantantaramaꞌ? tënahuë. Inapita natëapomarahuëꞌ, co ina marëꞌ noyápiachin cancantëramahuëꞌ.

Gálatas 5:13

Ina pochin, iyaroꞌsaꞌ, nontaranquëmaꞌ. Canpitasoꞌ Quisocristo nohuantërinquëmaꞌ. Nichaꞌërinquëmaꞌ ama huachi tëꞌhuarëꞌquëmaꞌ yaꞌhuëcamaso marëhuëꞌ. Co huachi yaꞌipi iráca pënëntërinsoꞌ imacasoꞌ yaꞌhuëpirinhuëꞌ, co Yosë nohuantërinhuëꞌ oshahuanacamasoꞌ. Quisocristo imapatamaꞌ, co noyahuëꞌ yonquiramasoꞌ naniantacasoꞌ yaꞌhuërin. Ninosoroatomaꞌ, nicatahuacoꞌ noya cancantacamaso marëꞌ. Aꞌnapita naꞌcon naꞌcon yonquicoꞌ.

Efesios 6:14

Napoaton chiníquën cancantatomaꞌ, panca sintoronquë nitonpotopiso pochin noꞌtën nanan naꞌcon nohuantocoꞌ. Ina imatomaꞌ, noꞌtëquën noncoꞌ. Co piꞌpisha tërantaꞌ nonpinacasoꞌ yaꞌhuërinhuëꞌ. Huaꞌna coton aꞌmopiso pochin noyasáchin nicoꞌ Yosë catahuainquëmaso marëꞌ.

Filipenses 1:27

Iporasoꞌ iyaroꞌsaꞌ nóya nicoꞌ. Quisocristo nanamën yonquiatomaꞌ, ina pochachin cancantocoꞌ. Yosë huëntonënquë yaꞌconamaꞌ niꞌton, ina pochin cancantacasoꞌ yaꞌhuërin. Nicaponquëmaꞌ paꞌsamarahuë. Co aꞌnaꞌ nanitapohuëꞌ nimara. Ina niponahuëꞌ, nani tahuëri noya nicoꞌ noya nanan natanchi. Yaꞌipinquëmaꞌ, iyaroꞌsaꞌ, imamiatocoꞌ. Ama aꞌnayanquëma tërantaꞌ nisha yonquicosohuëꞌ. Napopináchin yonquiatomaꞌ, Quisocristo nanamën aꞌchinácoꞌ. Inapohuatamaꞌ, natantohuato, nóya cancantarahuë huachi.

1 Tesalonicenses 3:8

Quisocristo imamiataramaꞌ niꞌton, co huachi sëtëraihuëꞌ. Chiníquën cancantarai.

2 Tesalonicenses 2:15

Napoaton iyaroꞌsaꞌ, chiníquën cancantatomaꞌ, yaꞌipi cancanëma quëran imacoꞌ. Canpitataquë yaꞌhuasocoi, noꞌtëquën aꞌchintërainquëmaꞌ. Ina quëran quirica aꞌpatëranquëmaꞌ naꞌcon naꞌcon nitotacamaso marëꞌ. Noꞌtën nanansáchin imamiatocoꞌ.

Hebreos 10:23

“Yosë noꞌtëquën shaꞌhuitërinpoaꞌ. Quisocristoíchin nichaꞌësarinpoaꞌ,” taꞌtëhuaꞌ, imamiatahuaꞌ. Ama piꞌpian tërantaꞌ nisha yonquiaꞌhuasohuë. Nani shaꞌhuitërinpoaꞌ niꞌton, co nonpintarinpoahuëꞌ.

Hebreos 3:14

Iráca Quisocristo natërëhuaꞌ. Chiminaquë huarëꞌ noya imahuaꞌ. Co aꞌpohuatëhuahuëꞌ, Quisocristorëꞌquënpoaꞌ yaꞌhuëcontarihuaꞌ.

Hebreos 3:6

Quisocristoso nipirinhuëꞌ co inpriatohuëꞌ. Yosë huiꞌnin chachin niꞌton, chini chiníquën nanantërin. Paꞌpin natëton, nóya huaꞌanëntarinpoa huachi. Napoaton chiníquën cancantatëhuaꞌ, chiminaquë huarëꞌ Quisocristo natëahuaꞌ. “Co naniantarinpoahuëꞌ,” taꞌtëhuaꞌ, noya cancantahuaꞌ. Imamiatohuatëhuaꞌ, piyapinënpita chachin nisarihuaꞌ.

Hebreos 4:14

Iporasoꞌ Quisoso imarëhuaꞌ. Yosë huiꞌnin chachin inasoꞌ. Nani inápaquë panantarahuaton, Yosëꞌpaꞌ yaꞌhuarin. Corto huaꞌan chini chiníquën nanantërinso pochin Yosëri acorin catahuainpoaso marëꞌ. Napoaton ama ina naniantatëhuahuëꞌ, imamiatahuaꞌ.

1 Pedro 2:16

“Yosë nichaꞌërinpoaꞌ,” taꞌtomaꞌ, noya yonquicoꞌ. Iráca nanan co natëcasoꞌ yaꞌhuëpirinhuëꞌ, ama ina yonquiatomaꞌ tëhuëcosohuëꞌ. Yosë huaꞌanëntërinquëmaꞌ niꞌton, ina nohuantërinsoáchin natëcoꞌ.

2 Pedro 2:19

“Co insontaꞌ natëcasoꞌ yaꞌhuërinhuëꞌ. Canpitaora nohuanton yaꞌhuëcoꞌ. Maꞌsona tërantaꞌ yanipatamaꞌ, nicoꞌ. Inapohuatamaꞌ, capa cancantaramaꞌ,” itopirinënquëmahuëꞌ, co inapita tërantaꞌ inahuara nohuanton yaꞌhuëpihuëꞌ. Sopai nohuanton, noꞌpipi, monshihuanpi, co noyahuëꞌ nipi. Insosona minsëhuachinpoaꞌ, huaꞌanëntërinpoaꞌ.

Judas 1:3

Carinquëmaꞌ iyaroꞌsaꞌ nosororanquëmaꞌ. Iꞌhuamiáchin yonquirahuë ninshitaꞌhuanquëmaso marëꞌ. Yosë anoyacancantërinpoasoꞌ noya noya yaaꞌchintopiranquëmahuëꞌ, apira nanan natantërahuë. Aꞌnaquënsoꞌ nonpin nanan aꞌchintarinënquëmaꞌ, natantërahuë. Napoaton pënënaꞌhuanquëmasoꞌ yaꞌhuërin, tënahuë. Quisocristo nanamën noꞌtëquën aꞌchintërainquëmaꞌ. Yosë nohuanton, noꞌtëquën ninshitërai yaꞌipi imapisopita nitotacaiso marëꞌ. Nani yaꞌipiya nanamën anitotërinpoaꞌ. Inasáchin natëtomaꞌ, aꞌnapitantaꞌ aꞌchintocoꞌ noꞌtëquën yonquicaiso marë antaꞌ. Ama piꞌpian tërantaꞌ nisha aꞌchintocosohuëꞌ, tënahuë.

Apocalipsis 2:25

Chiníquën cancantatomaꞌ, oꞌmantaꞌhuaquë huarëꞌ imamiatoco.

Apocalipsis 3:3

Yaꞌnan natanapomaꞌ, Yosë nanamën noꞌtëquën aꞌchintërinënquëmaꞌ. Ina yonquiatomaꞌ, yaꞌipi co noyahuëꞌ yonquiramasopita naniantocoꞌ. Yaꞌipi cancanëma quëran casáchin yonquico. Co noya cancantaantahuatamahuëꞌ, aꞌnaroáchin anaꞌintaranquëmaꞌ. Ihuatonaꞌpi huëꞌninso pochachin aꞌnanaya anaꞌintaranquëmaꞌ. Co nitotasënquëmahuëꞌ, oꞌmantararahuë.