Gálatas 4:4 - Chayahuita (Shahui)

⁴ Ina quëran tahuërinën nanihuachina, Yosëri huiꞌnin aꞌpaimarin. Sanapi quëran nasitaton, piyapi chachin ninin. Cotio quëmapi niꞌton, iráca pënëntërinsoꞌ natëcasoꞌ yaꞌhuërin.

Gálatas 4:4 ပူးပေါင်းရင်းမြစ်များ

Génesis 3:15

Ca nohuanto sanapi inimicotarinquën. Quëmarinta ina inimicotaran. Quëmá quëran pipipisopitantaꞌ, sanapi quëran pipipisopitarëꞌ niinimicotaponaꞌ. Aꞌna tahuëri sanapi quëran pipirinsoari minsëmiatarinquën. Napoaponahuëꞌ, quëmarinta chiníquën ina aparisitaran, itërin.

Génesis 49:10

Co inso tëranta huaꞌan quëran, quëmasoꞌ Cota, ocoiarinënhuëꞌ. Huara sëꞌquëranso co insonta mataponënhuëꞌ. Huaꞌanën chachin oꞌmaquë huarëꞌ co nanitapaponënhuëꞌ. Ina oꞌmahuachin, yaꞌipi nacionoꞌsari natëpona huachi.

Isaías 7:14

Sinioro chachin napoahuarëꞌ maꞌsona aꞌnotarinquëma nitotamaso marëꞌ: Niꞌquëꞌ. Ca nohuanton nanon cayoapon. Inapoaton quëmapiaꞌhuaya huaipon. Inasoꞌ huaꞌhuin nohuitaton, Imanino itapon.

Jeremías 31:22

Huiꞌnama nimintatohuachin, patë patë́rantapon. Canpitanta israiroꞌsanquëma inaporapiramahuëꞌ, ¡copi toco huachi! Ca Sinioroco nasha nininsoꞌ isoroꞌpaquë acoarahuë. Naporahuësoꞌ natanpatamaꞌ, co natëtochináchinhuëꞌ cancantaramaꞌ,’ itërahuë,” tënin.

Malaquías 3:1

Yosë yaꞌipi nanitapaton shaꞌhuitaantarinquëmaꞌ: “Niꞌcoꞌ. Co huaꞌquiya quëranhuëꞌ, comisionëhuë aꞌpararahuë. Inasoꞌ, pënënatënquëma cancanëma anoyatarinquëmaꞌ. Noya ninarëso pochin nicasëmaꞌ, Sinioro oꞌmacaso marëꞌ napoarin. Ina Sinioro huaꞌqui ninarápiramahuëꞌ, aꞌnanaya chinotëramacoso pëiquë yaꞌconarin. Canpitaroꞌco anoyatërahuëso anitotiinquëmaso marëꞌ aꞌparahuësoꞌ, nani oꞌmacaso naniriarin. Ina canpitasoꞌ, naꞌcon nohuantërama niꞌcamasoꞌ.

Mateo 1:23

“Aꞌna tahuëri nanon inaora cayoapon. Co quëmapiri sëꞌhuapirinhuëꞌ, napoapon. Quëmapiaꞌhuaya huaihuachin, Imanino itapi,” tënin. Yosë chachin oꞌmaton, yacaparinpoaꞌ, tapon naporin. Ina pochin nasitimahuachina, iráca ninopisoꞌ nanirin huachi.

Mateo 3:15

Napotopirinhuëꞌ, Quisosori itërin: —Yosë nohuantërin niꞌton, yaꞌipi natëcaꞌhuasoꞌ yaꞌhuërin. Napoaton noya quëma aporintoco, itërin. Ina natanahuaton: —Noyahuaꞌ, itahuaton, iꞌquë aporintërin.

Mateo 5:17

Ina quëran itaantarin: “Iráca Moisësë, pënëntonaꞌpiroꞌsaꞌ, inapita naꞌcon pënëntopi. Pënëntatonaꞌ, ninshitopi. Co ina naniantacasoꞌ yaꞌhuërinhuëꞌ, tënahuë. Yaꞌipi inapita ninopisoꞌ nanicaso marëꞌ oꞌmarahuë. Maꞌsona tapon naporinsopita noꞌtëquën shaꞌhuichinquëmaꞌ.

Marcos 1:15

“Nani tahuëri nanirin huachi. Iso tahuëriꞌsaꞌ Yosë yahuaꞌanëntarinquëmaꞌ. Napoaton yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. Naporahuaton noya nanan natëcoꞌ Yosë nichaꞌëinquëmaꞌ,” itërarin.

Lucas 1:31

Natanco shaꞌhuichinquën. Quëmasoꞌ huaꞌhuanaran. Quëmapiaꞌhuaya huaihuatan, Quisoso itëquëꞌ.

Lucas 1:35

—Ispirito Santo nohuanton, quëmaora huaꞌhuanaran. Yosë topinan yonquiarapirinquënhuëꞌ, cayoaran. Napoaton huaꞌhuan, Yosë huiꞌnin chachin nisarin. Co piꞌpisha tërantaꞌ oshahuanaponhuëꞌ.

Lucas 2:7

Paninan huairin, quëmapiaꞌhuaya. Nëꞌmëtërinquë soꞌquëëtahuaton, nonaꞌhuayaquë acorin, ohuaca coshatërinquë. Huëꞌëcaisoꞌ pëiꞌ nani yaꞌsotopi niꞌton, co inaquë huëꞌëpatërinhuëꞌ. Napoaton nonaꞌhuayaquë huaꞌhuin acorin.

Lucas 20:44

Shiaꞌhuain niponahuëꞌ, Cristo yonquiaton, “Sinioronëhuë,” tënin Tapi. Piyapi chachin nipirinhuëꞌ, Tapiri chinotërin. ¿Onpoatontaꞌ naporin? itërin Quisosori.

Juan 1:14

Quisocristo isoroꞌpaquë nasitimarin. Yosë niponahuëꞌ, piyapi chachin nasitërin. Canpoarë chachin yaꞌhuërin. Quiyasoꞌ niꞌnai. Inasoꞌ nóya, tënai. Yosë pochachin ninin. Inaíchin huiꞌnin inasoꞌ. Inaora nohuanton nosororinpoaꞌ. Noꞌtëquën nontërinpoaꞌ.

Juan 10:36

Tata Yosë chachin acorinco nanamën aꞌchinaꞌhuaso marëꞌ. Ina marëꞌ isoroꞌpaquë aꞌpaimarinco. “Casoꞌ Yosë huiꞌninco,” topatëra, ¿onpoatontaꞌ ina marëꞌ pinoramaco? tënahuë.

Juan 3:16

Yosësoꞌ yaꞌipi piyapiꞌsaꞌ paꞌpi nosoromiatërin. Napoaton aꞌnaíchin huiꞌnin nipirinhuëꞌ, isoroꞌpaquë aꞌpaimarin chiminacaso marëꞌ. Ina natëtëhuaꞌ: “Ca marëꞌ chiminin,” topatëhuaꞌ, co parisitopiquë paꞌsarëhuahuëꞌ. Yosë nohuitatëhuaꞌ, nanpimiatarëhuaꞌ.

Juan 6:38

Co caora nohuanto, maꞌsha ninahuëꞌ. Inápa quëran oꞌmarahuë Tata Yosë natëcaꞌhuaso marëꞌ. Ina aꞌpaimarinco.

Juan 8:42

Napotohuachinara: —Yosësoꞌ tatanëmaꞌ naporini, nosoroꞌitomacohuëꞌ. Yosë quëran oꞌmarahuë. Co caora nohuanto, oꞌmarahuëꞌ. Yosë aꞌpaimarinco.

Hechos 1:7

—Tata Yosëíchin chini chiníquën nanantërin. Inaora nohuanton, maꞌsha acorin. Ma tahuërisoꞌ acoamara. Onporosona napoarinsoꞌ, co Yosë nohuantërinhuëꞌ canpita nitotacamasoꞌ.

Romanos 1:3

“Huiꞌnahuë aꞌpaimarahuë,” tënin Yosë. Napoaton Quisocristo isoroꞌpaquë oꞌmarahuaton, piyapi chachin nasitimarin. Tapi shiin inasoꞌ.

Romanos 15:8

Iráca cotioroꞌsaꞌ shimashonënaꞌ nontaton, Yosëri itërin: “Aꞌna tahuëri Cristo aꞌpaimarahuë,” itërin. Napoaton Quisocristo aꞌpaimarin cotioroꞌsaꞌ catahuacaso marëꞌ. Shaꞌhuitërin niꞌton, aꞌpaimarin. Co onporontaꞌ nonpininhuëꞌ.

Romanos 5:6

Canpoara co nanitërëhuahuëꞌ chaꞌëcasoꞌ. Nipirinhuëꞌ, iráca oꞌmacasoꞌ nanihuachina, Quisocristo isoroꞌpaquë oꞌmarin. Oꞌmarahuaton, oshahuanoꞌsa marëꞌ chiminin.

Romanos 8:3

Iráca Yosë pënënpirinpoahuëꞌ. Co noyahuëꞌ cancantatëhuaꞌ, co nanitërëhuahuëꞌ noꞌtëquën natëcasoꞌ. Ina quëran huiꞌnin chachin isoroꞌpaquë aꞌpaimarin. Piyapi chachin nasitimarin. Co oshahuanaponahuëꞌ, oshanënpoaꞌ inquitinpoaso marëꞌ chiminin. Inapoaton, nichaꞌërinpoaꞌ ama huachi anaꞌintinpoaso marëhuëꞌ.

Romanos 9:5

Shimashonënpitasoꞌ Yosëri chachin huayonin. Ina quëran Cristo isoroꞌpaquë oꞌmahuachina, Israiro sanapi quëran nasitërin. Inasoꞌ Yosë chachin. Yaꞌipiya huaꞌanëntërinpoaꞌ. ¡Ma noyacha inaso paya! tënëhuaꞌ. Amen.

Efesios 1:10

Ina tahuërinën nanihuachin, Quisocristo yaꞌipiya huaꞌanëntarin. Isoroꞌpaquë yaꞌhuërinsopita, inápaquë yaꞌhuërinsopita inapita huaꞌanëntarin. Aꞌna huëntoínchin pochin acoarin. Ina Yosë naꞌcon nohuantërin.

Colosenses 2:14

Iráca Moisësë pënëntërin nani maꞌsha natëcaso marëꞌ. Co inquënpoa tërantaꞌ nanitaparëhuahuëꞌ yaꞌipi natëcasoꞌ niꞌton, oshahuanëhuaꞌ. Ina marëꞌ anaꞌintinpoaso nipirinhuëꞌ, Quisocristo corosëquë chiminaton, nichaꞌërinpoaꞌ niꞌton, Yosë noya niꞌninpoaꞌ.

1 Timoteo 2:6

Quisocristo inaora nohuanton, nichaꞌëinpoaso marëꞌ chiminin. Chiminaton, oshanënpoaꞌ inquitërinpoaꞌ. Tahuëri nanihuachinaꞌ, Yosë yanichaꞌërinpoasoꞌ anitotërinpoaꞌ.

1 Timoteo 3:16

Iráca co Yosë nohuitopirëhuahuëꞌ, iporasoꞌ Quisocristo anohuitërinpoaꞌ: “Ma noyacha inaso paya,” tënëhuaꞌ. Yosë huiꞌnin isoroꞌpaquë oꞌmaton, piyapi chachin nasitimarin. Ispirito Santo chachin anitotërinpoaꞌ Yosë huiꞌnin nininsoꞌ. Nanpiantahuachina, anquëniroꞌsarintaꞌ quënanpi. Imapisopitari yaꞌipi parti paatonaꞌ, nanamën shaꞌhuiraꞌpiapi. Naꞌa piyapiꞌsaꞌ natëpi. Iporasoꞌ Yosëꞌpaꞌ noya yaꞌhuërin. Inatohuaꞌ Yosëri quëpantarin.

Hebreos 2:14

Piyapinpoaꞌ niꞌton, nonënpoaꞌ yaꞌhuëtërinpoaꞌ. Napoaton Quisocristontaꞌ oꞌmahuachina, piyapi chachin nasitimarin. Inantaꞌ nonën yaꞌhuëtërin. Piyapi chachin niquimaton, chiminin. Canpoasoꞌ sopai natëtëhuaꞌ, oshahuanëhuaꞌ niꞌton, chiminarëhuaꞌ. Quisocristoso nipirinhuëꞌ oshanënpoa marëꞌ chiminin. Canpoa marëꞌ chiminaton, sopai minsërin.

Hebreos 9:10

Iráca nisha nisha cosharoꞌ aꞌpopi. Nisha nisha oꞌocasontaꞌ aꞌpopi. Co noyahuëꞌ nipachinara, “Oshanëhuë inquiꞌi,” taꞌtonaꞌ, nisha nisha paꞌmopi. “Inapotohuatëhuaꞌ, Yosë noya niꞌsarinpoaꞌ,” topirinahuëꞌ, co ina marëꞌ noya cancantopihuëꞌ. Yosëri nasha nanan shaꞌhuitaton, anoyataquë huarëꞌ inapocaisoꞌ yaꞌhuërin.

1 Juan 4:14

Tata Yosëri huiꞌnin isoroꞌpaquë aꞌpaimarin nichaꞌëinpoaso marëꞌ. Quiyarisoꞌ niꞌnai. Nani tahuëri piyapiꞌsaꞌ shaꞌhuitárai.

1 Juan 4:2

Ispirito Santo noꞌtëquën anitotërinpoaꞌ. “Quisocristo Yosë huiꞌnin niponahuëꞌ, isoroꞌpaquë oꞌmaton, piyapi chachin nasitimarin. Nonën chachin yaꞌhuëtërin,” itërinpoaꞌ. Ina nanan aꞌchintohuachinënquëmaꞌ, noꞌtëquën aꞌchinapi. Ispirito Santori ayonquirin niꞌton, noya nonsapi.