Gálatas 4:15 - Chayahuita (Shahui)

¹⁵ Aꞌchintohuatënquëmara, paꞌyatëramaꞌ. Naꞌcon nosororamaco. Nanitëramaꞌ naporini, yaꞌpirama chachin quëchitomacohuëꞌ. ¿Onpoatomataꞌ iporaso nisha yonquiramaꞌ?

Gálatas 4:15 ပူးပေါင်းရင်းမြစ်များ

Lucas 8:13

Aꞌnaquëontaꞌ naꞌpiro pochin nipi. Yosë nanamën natanahuatonaꞌ, aꞌnaroáchin paꞌyatatonaꞌ, natëpirinahuëꞌ. Co chiníquën cancantatonahuëꞌ, co natëmiatopihuëꞌ. Maꞌsha onpohuachinara, Yosë aꞌpopi.

Romanos 10:2

Tëhuënchachin Yosë yachinotopirinahuëꞌ, co nanamën noꞌtëquën yonquipihuëꞌ.

Romanos 15:13

Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

Romanos 5:2

Quisocristo cancanënpoa quëran natëhuatëhuaꞌ, nichaꞌësarinpoaꞌ. Nosoroatonpoaꞌ, ipora huantaꞌ catahuarinpoaꞌ noya imacaso marëꞌ. Aꞌna tahuëri Yosëꞌpaꞌ paꞌpatëhuaꞌ, Yosë pochin nisarëhuaꞌ. Ina yonquiatëhuaꞌ, nóya cancantarihuaꞌ.

Romanos 9:3

Inapitasoꞌ quëmopinëhuëpita. Co Quisocristo imapihuëꞌ niꞌton, anaꞌintacasoꞌ yaꞌhuërin. Nanitërahuë naporini, inapita yaꞌhuërënamën parisitopiquë paꞌitohuëꞌ. Chaꞌëcaiso marëꞌ inaquë parisichitohuëꞌ.

2 Corintios 8:3

Co apiratonahuëꞌ, naꞌcon quëtopi. Pahuantaiquëhuarëꞌ quëtopi, cari niꞌnahuë. Co shaꞌhuitopiraihuëꞌ, inahuara nohuantatonaꞌ, quëtërinacoi pahuantërinsopita quëtacaꞌhuaiso marëꞌ.

Gálatas 3:14

“Yosë noꞌtëquën nontërinco,” tënin Apraan. Ina tëninso marëꞌ Yosëri noya niꞌnin. Nisha piyapiroꞌsarintaꞌ imacaiso marëꞌ Quisocristo chiminin. Ina natëhuachinara, Yosëri noya niꞌnin. Yaꞌipinpoaꞌ Quisocristo imapatëhuaꞌ, Ispirito Santo yaꞌcoancantarinpoaꞌ. Iráca Yosë shaꞌhuirinso pochachin yaꞌcoancantarinpoaꞌ.

Gálatas 4:14

Chiníquën caniopirahuëꞌ, co nocanamacohuëꞌ. Noya natanamaco. “Anquëni pochin Yosë nanamën aꞌchintërancoi,” itëramaco. Quisocristo noninso pochachin natanamaco.

Gálatas 4:16

Noꞌtëquën pënënanquëmaꞌ niꞌton, ¿noꞌhuiramaco ti?

Gálatas 4:19

Naꞌcon iyaroꞌsaꞌ nosororanquëmaꞌ. Huiꞌnahuëpita pochachin niꞌnanquëmaꞌ. Niꞌcoꞌ. Sanapi yahuaihuachina, chiníquën parisitërin. Inapochachin cantaꞌ naꞌcon yonquiatënquëmaꞌ, chiníquën parisitarëso pochin cancantërahuë. Canpitantaꞌ Quisocristo pochachin cancantacamasoꞌ naꞌcon nohuantërahuë. Quisocristoráchin imapatamaꞌ, oshaquëran ina pochachin cancantaramaꞌ. Ina marëꞌ naꞌcon yonquiáranquëmaꞌ.

Gálatas 5:22

Nipirinhuëꞌ, Ispirito Santo natëhuatëhuaꞌ, catahuarinpoaꞌ ninosorocasoꞌ. Catahuahuachinpoaꞌ, Yosë nohuitatëhuaꞌ, capa cancantarihuaꞌ. “Yosë noya niꞌsarinco,” taꞌtëhuaꞌ, sano cancantarihuaꞌ niꞌton, noya ninicatëhuaꞌ yaꞌhuarihuaꞌ. Piyapiꞌsaꞌ noꞌhuipirinpoahuëntaꞌ, co yanoꞌhuirihuahuëꞌ. Maꞌsha onpohuatëhuantaꞌ, ahuantarihuaꞌ. Nosoroatëhuaꞌ, nóya nontarihuaꞌ. Ispirito Santo catahuahuachinpoaꞌ, noya nicarihuaꞌ. Noꞌtëquën nontarihuaꞌ; co piꞌpisha tërantaꞌ nonpintarihuahuëꞌ.

Gálatas 6:4

Ama aꞌnapita napopisoꞌ nicatomaꞌ, nitantiacosohuëꞌ. Quëmaora naporanso yonquiaton, nitantiaquëꞌ. Noya cancantohuatan, Yosë noya niꞌsarinquën. Ina quëran “Yosë noya niꞌsarinco,” taꞌton, capa cancantaran.

Colosenses 4:13

Naꞌcon yonquirinquëmaꞌ. Co chirorinhuëꞌ Yosë nontacasoꞌ. Naotisiaquë, Iraporisëquë inaquëpita yaꞌhuëpisopitantaꞌ yonquiaton, Yosë nontárin. Noya Yosë marëꞌ sacatarin. Cari niꞌnahuë.

1 Tesalonicenses 2:8

Naꞌcon nosoroatëinquëmaꞌ, Yosë nanamën aꞌchintërainquëmaꞌ. Ina marëꞌ parisitopiraihuëꞌ, co ina yonquiraihuëꞌ. Yaꞌipi cancanëhuëi quëran nosororainquëmaꞌ niꞌton, naꞌcon catahuarainquëmaꞌ.

1 Tesalonicenses 5:13

Naꞌcon catahuarinënquëmaꞌ noya noya Yosë imacamaso marëꞌ. Napoaton nosoroatomaꞌ, noya yonquirapicoꞌ. Yaꞌipinquëmaꞌ noya niniꞌtomaꞌ, yaꞌhuëcoꞌ.