Gálatas 2:20 - Chayahuita (Shahui)

²⁰ Quisocristo corosëquë chiminin. Ina imato, cantaꞌ corosëquë chiminahuëso pochin ninahuë. Iráca yonquirahuësoꞌ naniantërahuë. Napoaton co huachi oshahuanacaꞌhuasoꞌ yaꞌhuërinhuëꞌ. Iporasoꞌ Quisocristoíchin yonquirahuë. Co huachi caora nohuanto maꞌsha ninahuëꞌ. Quisocristo yaꞌcoancantërinco niꞌton, catahuarinco noya nicaꞌhuasoꞌ. ‘Nani tahuëri Yosë huiꞌnin chachin catahuarinco,’ taꞌto, noya cancantërahuë. Inasoꞌ paꞌpi nosororinco. Nosoroatonco, yaꞌhuërënamëhuë chiminin.

Gálatas 2:20 ပူးပေါင်းရင်းမြစ်များ

Mateo 20:28

Cantaꞌ Yosë quëran quëmapico niporahuëꞌ, co aꞌnapita camaicaꞌhuaso marëꞌ oꞌmarahuëꞌ. Piyapiꞌsaꞌ catahuacaꞌhuaso marëꞌ oꞌmarahuë. Chiminarahuë naꞌa piyapiꞌsaꞌ nichaꞌëcaꞌhuaso marëꞌ, itërin Quisosori.

Mateo 4:3

Naporoꞌ sopairi huëcapairin. —Tëhuënchachin Yosë huiꞌninquën nipatan, iso naꞌpiroꞌsa quëran cosharoꞌ atarantëquëꞌ, itopirinhuëꞌ,

Juan 1:49

—Quëmasoꞌ Maistro, Yosë huiꞌninquën. Israiroꞌsaꞌ copirnonquën, tënahuë, itërin.

Juan 10:11

Casoꞌ ohuica huaꞌanën pochin ninahuë. Imarinacosopita noya aꞌpairahuë. Huaꞌanën noya nipachina, ohuicanënpita aꞌpaiton, co chiminacasoꞌ tëꞌhuatërinhuëꞌ. Inapochachin cantaꞌ imarinacosopita marëꞌ chiminarahuë.

Juan 15:13

Niꞌcoꞌ iyaroꞌsaꞌ. Nipayarësoꞌ naꞌcon nosorohuatëra, ina nichaꞌëcaso marëꞌ chiminëꞌ. Inapochachin cantaꞌ naꞌcon nosoroatënquëmaꞌ, canpita nichaꞌëcaꞌhuanquëmaso marëꞌ chiminarahuë. Co insontaꞌ ina pochin nosororinquëmahuëꞌ.

Juan 17:21

Inapitantaꞌ catahuaquëꞌ napopianachin yonquiꞌinaꞌ. Canpoꞌ ninosororëso pochin ninosoroꞌinaꞌ. Quëma huiꞌnanco niꞌto, yonquiranso chachin yonquirahuë. Inapitantaꞌ catahuaquëꞌ canpo pochachin yonquiꞌinaꞌ. Ina quëran aꞌnapitantaꞌ natëarinaco. ‘Yosëri chachin aꞌpaimarin,’ tosapi.

Juan 3:16

Yosësoꞌ yaꞌipi piyapiꞌsaꞌ paꞌpi nosoromiatërin. Napoaton aꞌnaíchin huiꞌnin nipirinhuëꞌ, isoroꞌpaquë aꞌpaimarin chiminacaso marëꞌ. Ina natëtëhuaꞌ: “Ca marëꞌ chiminin,” topatëhuaꞌ, co parisitopiquë paꞌsarëhuahuëꞌ. Yosë nohuitatëhuaꞌ, nanpimiatarëhuaꞌ.

Juan 3:35

Tata Yosëri huiꞌnin paꞌpi nosororin. Chini chiníquën nanan quëtërin yaꞌipiya huaꞌanëntacaso marëꞌ.

Juan 6:57

Tatahuësoꞌ nanpimiatarin. Ina aꞌpaimarinco. Catahuarinco noya nanpicaꞌhuaso marëꞌ. Inapochachin imamiatohuatamaco, cosharo pochin achinicancanaranquëmaꞌ niꞌton, catahuaranquëmaꞌ Yosë nohuitatomaꞌ nanpimiatacaso marëꞌ.

Juan 6:69

Nani natërainquën. Quëmasoꞌ noyasáchin ninan. Yosë aꞌpaimarinquën, tënai, itërin Simon Pitrori.

Hechos 8:36

Nani aꞌchintohuachina, ira paꞌtapona pochin iiꞌ quënanconpi. —Niꞌquëꞌ iyasha. Iiꞌ yaꞌhuërin. Cantaꞌ aporintoco, topirahuëꞌ, itërin huaꞌani. [

Hechos 9:20

Shiarahuaton, cotio niyontonpiso pëiquë paꞌsahuaton, pënëntarin. “Quisososoꞌ Yosë huiꞌnin,” itahuaton, naꞌcon aꞌchinarin.

Romanos 1:17

“Yosëíchin anoyacancantërinpoaꞌ,” topatëhuaꞌ, Yosë noya niꞌsarinpoaꞌ. Oshanënpoaꞌ inquitatonpoaꞌ, co huachi inapita yonquiarinhuëꞌ. Quiricanën quëran ina anitotërinpoaꞌ. “Cancanënpoa quëran huarëꞌ Yosë natëhuatëhuaꞌ, noya niꞌsarinpoaꞌ niꞌton, noya nanpimiatarihuaꞌ,” tënin Yosë quiricanënquë. Co canpoara nanitërëhuahuëꞌ noya cancantacasoꞌ.

Romanos 14:7

Co canpoara nipaꞌyatacaso marëꞌ yaꞌhuërëhuahuëꞌ. Chiminpatëhuantaꞌ co canpoara marëꞌ chiminarihuahuëꞌ.

Romanos 3:22

Quisocristo imapatëhuaꞌ, Yosë noya niꞌsarinpoaꞌ. Insosona natëhuachin, anoyacancantarin. Co nisha nisha nontërinpoahuëꞌ.

Romanos 4:25

Yosë nohuanton, oshanënpoa marëꞌ chiminin. Inari chachin ananpitaantarin oshanënpoaꞌ inquitatonpoaꞌ, noya nicainpoaso marëꞌ.

Romanos 5:2

Quisocristo cancanënpoa quëran natëhuatëhuaꞌ, nichaꞌësarinpoaꞌ. Nosoroatonpoaꞌ, ipora huantaꞌ catahuarinpoaꞌ noya imacaso marëꞌ. Aꞌna tahuëri Yosëꞌpaꞌ paꞌpatëhuaꞌ, Yosë pochin nisarëhuaꞌ. Ina yonquiatëhuaꞌ, nóya cancantarihuaꞌ.

Romanos 5:6

Canpoara co nanitërëhuahuëꞌ chaꞌëcasoꞌ. Nipirinhuëꞌ, iráca oꞌmacasoꞌ nanihuachina, Quisocristo isoroꞌpaquë oꞌmarin. Oꞌmarahuaton, oshahuanoꞌsa marëꞌ chiminin.

Romanos 5:8

Quisocristoso nipirinhuëꞌ oshahuanoꞌsa marëꞌ chiminin. Oshahuanpirëhuahuëꞌ, yaꞌhuërëtërinpoaꞌ. Yosë nohuanton, canpoa marëꞌ chiminin. Napoaton: “Ma noyacha Yosë nosororinpoa paya,” tënëhuaꞌ.

Romanos 6:13

Niꞌcoꞌ. Imiramaꞌ, nantëmaꞌ, yaꞌpiramaꞌ, huëratëmaꞌ, nanamëmaꞌ, inapita yaꞌhuëtërinquëmaꞌ. Inapita quëran co noyahuë nicacaso yaꞌhuëpirinhuëꞌ. Ama nohuantocosohuëꞌ. Yosë natëcamasoáchin yonquicoꞌ. Chiminama quëran nanpiantëramaso pochin cancantatomaꞌ, yaꞌipi nonëma quëran huarëꞌ noyasáchin nicoꞌ.

Romanos 6:8

Co noyahuëꞌ cancansoꞌ naniantohuatëhuaꞌ, Quisocristo pochachin noyápiachin cancantarihuaꞌ. Ina nohuitatëhuaꞌ, noya noya nanpiarëhuaꞌ.

Romanos 8:10

Oshahuanamaꞌ niꞌton, nonëmaso chiminacasoꞌ yaꞌhuërin. Napoaponahuë Quisocristo yaꞌcoancantatënquëmaꞌ, anoyacancantërinquëmaꞌ. Napoaton Yosë noya nicatënquëma ispiritonëma ananpitarin niꞌton, nanpimiataramaꞌ.

Romanos 8:37

Ina nipirinhuëꞌ, Quisocristo nosororinpoaꞌ. Parisitapirëhuahuëꞌ, nani tahuëri catahuarinpoaꞌ sopai minsëcaso marëꞌ. Nóya cancantarëhuaꞌ.

1 Corintios 6:17

Quisocristoíchin imapatëhuaꞌ, ina pochin cancantarëhuaꞌ.

2 Corintios 1:24

Co quiyasoꞌ huaꞌan pochin chiníquën pënëntëraihuëꞌ. Sanoanan quëran pënënainquëmaꞌ. Yosë nanamën noya natëramaꞌ. Yacatahuarainquëmaꞌ noya cancantacamaso marëꞌ.

2 Corintios 10:3

Piyapicoi quiyantaꞌ nipiraihuëꞌ, co aꞌnapita pochin yonquiraihuëꞌ. Co natëpisopitahuësoꞌ inimicotopirinacoihuëꞌ, co quiyaora yonquinëhuëi quëran yaminsëraihuëꞌ.

2 Corintios 11:10

Quisocristo catahuarinco niꞌton, noꞌtëquën nontaranquëmaꞌ. Co aꞌchinato canarahuëꞌ. Yaꞌipi Acaya parti topinan aꞌchinarahuë. Napoaton noya cancantërahuë. Co insontaꞌ nanitarinhuëꞌ nisha ayonquiincosoꞌ.

2 Corintios 13:3

“Chiníquën nanantëransoꞌ aꞌnotocoi nitochii,” itopiramacohuëꞌ. Paꞌpato, noꞌtëquën anaꞌintohuatënquëmaꞌ, nitotaramaꞌ. “Quisocristori aꞌparin niꞌton, chiníquën nanantërin,” tosaramaꞌ. Quisocristo co topinan quëran nontërinpoahuëꞌ. Chiníquën nanantaton, yaꞌipi nanitaparin.

2 Corintios 13:5

Canpitaso nipirinhuëꞌ nitantiacoꞌ. Canpitaora yonquinëma quëran yonquicoꞌ. Aꞌnaquëmaꞌ co cancanëma quëran huarëꞌ imashatëraramahuëꞌ nimara. Yaꞌipi cancanëma quëran imapatamaꞌ, Quisocristo yaꞌcoancantërinquëmaꞌ. ¿Co ina nitotëramahuëꞌ ti? Aꞌnaquëmaso nipirinhuëꞌ co tëhuënchachin imamaranquëmahuëꞌ.

2 Corintios 5:14

“Quisocristo naꞌcon nosororinpoaꞌ,” taꞌtoi, nanamën aꞌchinárai. Canpoa marëꞌ inasoꞌ chiminin. Ina imapatëhuaꞌ, canpoantaꞌ chiminëhuaso pochin niꞌninpoaꞌ.

2 Corintios 5:15

Tëhuënchachin canpoa marëꞌ chiminin noya noya cancantacaso marëꞌ. Co huachi canpoara costarëhuasoꞌ paꞌyatacasoꞌ yaꞌhuërinhuëꞌ. Inasáchin yonquicaso marëꞌ chiminin. Chiminaponahuëꞌ, nanpiantarin niꞌton, inasáchin yonquirëhuaꞌ.

2 Corintios 5:7

Co ipora quënanpirëhuahuëꞌ, “Yosë noꞌtëquën nontërinpoaꞌ,” taꞌtëhuaꞌ, natërëhuaꞌ. “Co onporontaꞌ nonpintarinpoahuëꞌ,” tënëhuaꞌ.

Gálatas 1:4

Oshanënpoaꞌ inquitinpoaso marëꞌ Quisocristo chiminin. Inaora nohuanton, yaꞌhuërëtërinpoaꞌ. Notohuaroꞌ piyapiꞌsaꞌ co noyahuëꞌ yonquipi. Ama inapita pochin cancantacaso marëhuëꞌ chiminaton, anoyacancantërinpoaꞌ. Tata Yosë nohuanton, nichaꞌërinpoaꞌ.

Gálatas 2:16

Napopirëhuahuëꞌ, Moisësë pënëntërinsoꞌ natëhuatëhuaꞌ, co ina marëꞌ Yosë noya niꞌsarinpoahuëꞌ. Quisocristoíchin imapatëhuaꞌ, noya niꞌsarinpoaꞌ. Napoaton canpoantaꞌ Quisocristo natërëhuaꞌ oshanënpoaꞌ inquitinpoaso marëꞌ. Co inso tërantaꞌ pënëntërinsoꞌ natërinso marëꞌ Yosëꞌpaꞌ paꞌsarinhuëꞌ. Quisocristoráchin nichaꞌërinpoaꞌ.

Gálatas 3:11

“Pënëntërinsoꞌ natëto chaꞌësarahuë,” co taꞌcasoꞌ yaꞌhuërinhuëꞌ. Ina pochin cancantohuatëhuaꞌ, co Yosë noya niꞌsarinpoahuëꞌ. Quiricanën quëran noꞌtëquën shaꞌhuitërinpoaꞌ: “Cancanënpoa quëran huarëꞌ natëtohuatëhuaꞌ, Yosë noya niꞌsarinpoa niꞌton, noya nanpimiatarihuaꞌ,” tënin quiricanënquë.

Gálatas 5:24

Quisocristo corosëquë chiminaton, oshanënpoaꞌ inquitërinpoaꞌ. Napoaton canpoantaꞌ ina imapatëhuaꞌ, co noyahuëꞌ yonquirëhuasopita corosëquë patanantatë pochin nitatëhuaꞌ, naniantacasoꞌ yaꞌhuërin. Co huachi nohuantarihuahuëꞌ sopai pochin cancantacasoꞌ.

Gálatas 6:14

Caso nipirinhuëꞌ piyapiꞌsaꞌ paꞌyataꞌhuasoꞌ co yonquirahuëꞌ. Quisocristo chimininsoáchin yonquirahuë. Corosëquë chiminaton, anoyacancantërinpoaꞌ. Niꞌton, inaroꞌco chiminahuëso pochin co maꞌsha isoroꞌpaquë yaꞌhuërinsoꞌ yonquirahuëꞌ. Naporahuaton, isoroꞌparáchin paꞌyatopisopita co huachi noya niꞌninacohuëꞌ.

Efesios 3:17

Yaꞌipi cancanëna quëran natëtatonaꞌ, Quisocristoíchin yonquiꞌinaꞌ. ‘Cancanëhuëquë yaꞌhuërarin,’ taꞌtonaꞌ, noya noya nohuichinën. Catahuaquëꞌ noya nosoroꞌinën. Yaꞌipi piyapiꞌsantaꞌ nosoroꞌinaꞌ, Nara itëquën acopoꞌ paꞌpachina, co inpaninhuëꞌ. Inapochachin inapitantaꞌ ‘Quisocristo naꞌcon nosororincoiꞌ,’ taꞌtonaꞌ, aꞌnapitantaꞌ nosoroꞌinaꞌ. Noya ninosorohuachinaꞌ, Ispirito Santori catahuararin chiníquën cancantacaisoꞌ.

Efesios 5:2

Quisocristo nosoroatonpoaꞌ, canpoa marëꞌ chiminin. Oshanënpoa marëꞌ chiminpachina, Yosëri noya niꞌnin. Napoaton canpoantaꞌ nani tahuëriya inapochachin ninosoroaꞌahuaꞌ Yosë noya niꞌinpoaꞌ.

Efesios 5:25

Quëmapiꞌsantaꞌ saꞌinaꞌ nosoroꞌinaꞌ. Quisocristosoꞌ imarëhuasopita naꞌcon nosororinpoaꞌ. Nosoroatonpoaꞌ, yaꞌhuërënamënpoaꞌ chiminin. Ina nosororinpoaso pochachin quëmapiꞌsaꞌ saꞌinaꞌ nosoroꞌinaꞌ.

Filipenses 1:21

Co tëpahuachinacohuëꞌ, Quisocristo natëto noya cancantarahuë. Tëpahuachinacosoꞌ nipirinhuëꞌ, canamiatarahuë.

Filipenses 4:13

Co caora nanitapapirahuëꞌ, Quisocristo achinicancaninco niꞌton, yaꞌipiya nanitaparahuë. Maꞌsha onpoaporahuëntaꞌ, noya ahuantërahuë.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

1 Tesalonicenses 1:10

Ina chinotatoi, huiꞌnin chachin ninarai. Canpoa marëꞌ Quisocristo chiminin. Ina quëran Yosëri ananpitaantarin. Aꞌna tahuëri inápa quëran oꞌmantahuachin, nichaꞌësarinpoaꞌ. Co imapisopitasohuëꞌ nipirinhuëꞌ, Tata Yosëri noꞌhuiton anaꞌintarin huachi, tënamaꞌ,” topi, natantërai.

1 Tesalonicenses 5:10

Canpoa marëꞌ inasoꞌ chiminin. Aꞌnaquënpoaꞌ nanpiarëhuaꞌ, aꞌnaquënpoaꞌ chiminarihuarahuëꞌ, oꞌmantahuachin, yaꞌipi imarëhuasopita quëpantarinpoaꞌ. Inarëꞌquënpoaꞌ yaꞌhuëmiatarihuaꞌ.

Tito 2:14

Iráca canpoa marëꞌ chiminin oshanënpoaꞌ inquitinpoaso marëꞌ. Anoyacancantërinpoaꞌ piyapinënpita nicacaso marëꞌ. Huëntonënquë chachin yaꞌconpatëhuaꞌ, noya nicacasoráchin nohuantarihuaꞌ.

Hebreos 8:3

Iráca corto huaꞌanoꞌsaꞌ maꞌsha tëpapi piyapiꞌsaꞌ oshanëna marëꞌ. Quisocristoso nipirinhuëꞌ inaora nohuanton, chiminin oshanënpoaꞌ inquitinpoaso marëꞌ.

1 Pedro 1:8

Quisocristo co onporontaꞌ quënanapomarahuëꞌ, nosororamaꞌ. Ipora huantaꞌ co nicapomarahuëꞌ, “Co nonpintarincohuëꞌ. Catahuarinco,” taꞌtomaꞌ, ina natëramaꞌ. Cancanëma quëran ina nohuitatomaꞌ, nóya cancantëramaꞌ. Ina yonquiatomaꞌ, capa cancantëramaꞌ.

1 Juan 1:7

Yosësoꞌ noyasáchin ninin. Tahuëri pochin cancantërin. Canpoantaꞌ tahuëri pochin yonquihuatëhuaꞌ, Yosë nohuitarihuaꞌ. Naporahuaton, noya niniꞌtëhuaꞌ yaꞌhuarihuaꞌ. Huiꞌnin chachin chiminin niꞌton, yaꞌipi oshanënpoaꞌ inquitarinpoaꞌ. Huënainën quëran anoyacancantarinpoaꞌ.

1 Juan 4:14

Tata Yosëri huiꞌnin isoroꞌpaquë aꞌpaimarin nichaꞌëinpoaso marëꞌ. Quiyarisoꞌ niꞌnai. Nani tahuëri piyapiꞌsaꞌ shaꞌhuitárai.

1 Juan 5:20

Yosë huiꞌnin chachin oꞌmaton, noꞌtëquën Yosë anohuitërinpoaꞌ. Inasáchin noꞌtëquën yonquirin. Yosë nohuitatëhuaꞌ, yonquirinsoráchin imasarëhuaꞌ. Quisocristo nohuitërëhuaꞌ niꞌton, catahuarinpoaꞌ noꞌtëquën yonquicaso marëꞌ. Inaíchin Yosësoꞌ niꞌton, chinotacasoꞌ yaꞌhuërin. Ina nohuitohuatëhuaꞌ, nanpimiatarihuaꞌ.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.

Apocalipsis 3:20

Cancanëmaquë yayaꞌcoancantëranquëmaꞌ. Ina marëꞌ nontaranquëmaꞌ. Yaꞌcoana piꞌnirëso pochin ninaranquëmaꞌ. Natanahuatamaco: ‘Yaꞌcoancantoco,’ itohuatamaco, yaꞌcoancantaranquëmaꞌ. Niichicoshatërëso pochin nóya ninohuitarihuaꞌ.