Gálatas 2:14 - Chayahuita (Shahui)

¹⁴ Ina niꞌsahuato, yaꞌipi piyapi niꞌtërantapaiquë Pitro chiníquën pënënahuë. “Cotio piyapinquën niponahuëꞌ, Quisocristo imaton, iráca pënëntërinsoꞌ naniantëran. Nisha piyapiꞌsarëꞌquën coshataponahuëꞌ, iporasoꞌ naquëranchin maꞌsha aꞌpoantaran. Ina pochin nicaton, piyapiꞌsaꞌ anishayonquiaran. ‘Co Quisocristoíchin nichaꞌërinpoahuëꞌ nimara. Iráca pënëntërinsontaꞌ natëcasoꞌ yaꞌhuërin,’ taꞌtonaꞌ, nonanarinënquën. ¿Nisha piyapiꞌsantaꞌ cotioroꞌsa pochin yaatarantëran ti?

Gálatas 2:14 ပူးပေါင်းရင်းမြစ်များ

Salmos 15:2

Noya nipisopitaráchin nanitopi inaquë yaꞌhuëcaisoꞌ. Aꞌnapita noꞌtëquën yonquirapicaso yaꞌhuërin. Noꞌtën nanansáchin yonquiatëhuaꞌ, noꞌtëquënáchin nonacaso yaꞌhuërin.

Salmos 84:11

Siniorosoꞌ Yosë niꞌton, paꞌpoyarinpoaꞌ. Aꞌpintatë pochin catahuarinpoa noꞌtëquën yonquicasoꞌ. Noyasáchin nipatëhuaꞌ, nosororinpoaꞌ. Noya nicatonpoaꞌ, noya nininsoꞌ co apiratërinpoahuëꞌ.

Levítico 19:17

Aꞌna piyapi tëhuëtohuachinquën, ama cancanën quëran noꞌhuiráquësohuëꞌ. Aꞌna piyapi tëhuëhuachin, noꞌtëquën pënënamaso yaꞌhuërin. Co pënënpatanhuëꞌ, quëmarinta catahuaran oshahuanacasoꞌ.

Hechos 10:28

Nani ninontohuachinara, Pitrori itërin: —Cotioroꞌsacoi inachintëraisoꞌ, nani iyaroꞌsaꞌ nitotëramaꞌ. Co onporontaꞌ nisha piyapiroꞌsataquë niꞌtapoi paꞌnaihuëꞌ. Co inapitaroꞌcoi niyontonaihuëꞌ. “Co Yosë nohuantërinhuëꞌ,” topiraihuëꞌ. Iporaso nipirinhuëꞌ Yosë nani anitotërinco. Insosona Yosëri noya niꞌpachina, cantaꞌ noya niꞌi. Yaꞌipi piyapi napopianachin noya nicaꞌhuasoꞌ yaꞌhuërin, tënahuë.

Hechos 15:1

Ina quëran aꞌnaquën quëmapiꞌsaꞌ Cotia parti quëran canquipi. Quisoso imaponaraihuëꞌ, Moisësë pënëntërinsontaꞌ imasapi. Napoaton Antioquiaquë canquihuachinara, imapisopita nisha aꞌchintopi. “Iráca Moisësë pënëninpoaꞌ marca niacotacasoꞌ. Co ina natëhuatamahuëꞌ, co Yosë anoyacancantarinquëmahuëꞌ,” itopi.

Hechos 15:24

Iꞌhua aꞌnaquën isëquëran paꞌpachinara, nisha aꞌchintërinënquëmaꞌ. ‘Co Moisësë pënëntërinsoꞌ natëhuatamahuëꞌ, co Yosë huëntonënquë yaꞌconaramahuëꞌ,’ itërinënquëmaꞌ. Co quiyari aꞌpapiraihuëꞌ, paꞌpi. Natanahuatomaꞌ, nisha nisha yonquiramaꞌ. Pirnapi Paonorë chachin huëcaton, nani shaꞌhuitirincoi. Ipora huarëꞌ nitotatoi, ninshitarainquëmaꞌ.

Hechos 15:5

Ina natanahuatonaꞌ, aꞌnaquën parisioroꞌsaꞌ Quisoso imaponaraihuëꞌ, co noyahuëꞌ natanpi. Napoaton huanirahuatonaꞌ, taponaꞌ: —Nisha piyapiꞌsaꞌ yaimapachinaꞌ, marca acotacasoꞌ yaꞌhuërin. Yaꞌipi Moisësë iráca pënëntërinsoꞌ imacaisoꞌ yaꞌhuërin. Inapita aꞌchintocoꞌ imainaꞌ, itopi.

Romanos 14:14

Yaꞌipi cosharoꞌ noya capacasoꞌ. Co mantaꞌ aꞌpocasoꞌ yaꞌhuërinhuëꞌ. Sinioro Quisoso imato, naporahuë. Napoaton nitotërahuë. Aꞌnaquënso nipirinhuëꞌ: “Co Yosë nohuantërinhuëꞌ nosha capacasoꞌ,” taponaraihuëꞌ, caꞌpachinaꞌ, tëhuënchachin oshahuanpi.

Gálatas 1:18

Cara piꞌipi quëran Quirosarinquë paꞌnahuë Pitro nohuitaꞌhuaso marëꞌ. Cato simana pochin pëinënquë yacaparahuë.

Gálatas 1:6

Yosë ayonquirinquëmaꞌ imacamaso marëꞌ. Quisocristo inaora nohuanton nosoroatënquëmaꞌ, catahuarinquëmaꞌ niꞌton, imaramaꞌ. Imapiramahuëꞌ, aꞌnaroáchin ina naniantatomaꞌ, nisha nanan yaimaramaꞌ. Ina yonquiato, paꞌyanahuë.

Gálatas 2:3

Titontaꞌ nisha piyapi nipirinhuëꞌ, inatohuaꞌ quëparahuë. Co marca yaꞌhuëtopirinhuëꞌ, ansianoꞌsari noya niꞌpi. “Marca niacotëquëꞌ,” co itopihuëꞌ.

Gálatas 2:5

Napotopirinacoihuëꞌ, co piꞌpian tërantaꞌ nohuantëraihuëꞌ. “Quisocristoíchin anoyacancantërinpoaꞌ,” itërai. Canpitantaꞌ noꞌtëquën yonquicamasoꞌ nohuantërai. Napoaton nisha aꞌchintohuachinacoira, co mantaꞌ natëraihuëꞌ.

Gálatas 2:7

“Noꞌtëquën aꞌchinan,” itërinaco. Pitrori aꞌchintohuachina, Yosë nohuanton, naꞌa cotioroꞌsaꞌ Quisocristo imasapi. Carintaꞌ aꞌchintohuato, Yosë nohuanton, naꞌa piyapiꞌsaꞌ, nisha nisha niponaraihuëꞌ, imasapi inahuantaꞌ. Napoaton ansianoꞌsantaꞌ noya nontërinaco. “Yosëri Pitro acorin cotioroꞌsaꞌ aꞌchintacaso marëꞌ. Quëmaso nipirinhuëꞌ acorinquën nisha piyapiꞌsaꞌ aꞌchintacaso marëꞌ,” itërinaco.

Gálatas 2:9

Santiaco, Pitro, Coansha, inapitasoꞌ chini chiníquën nanantopi niꞌton, shaꞌhuitërinacoi. “Yosë naꞌcon catahuarinquën. Ina acorinquën nisha piyapiꞌsaꞌ aꞌchintacaso marëꞌ,” taꞌtonaꞌ, sëꞌquërinaco. Pirnapintaꞌ sëꞌquëpi. “Canpitasoꞌ nisha piyapiꞌsaꞌ aꞌchintocoꞌ. Quiyaso nipirinhuëꞌ cotioroꞌsaꞌ aꞌchintarai,” itohuachinacoira, “Noyahuaꞌ,” itërai.

Gálatas 6:12

Aꞌnaquën ipora huantaꞌ marca yaacotarinënquëmaꞌ. Aꞌnapita cotioroꞌsari noya nicacaiso marëꞌ inapopi. “Quisocristo corosëquë chiminaton, anoyacancantërinpoaꞌ. Inasáchin nichaꞌërinpoaꞌ, topatëhuaꞌ, cotio huaꞌanoꞌsaꞌ aparisitarinënpoaꞌ,” topi. Ama inapitari noꞌhuicaiso marëhuëꞌ napopi.

Colosenses 1:5

Iráca noya nanan natanamaꞌ. “Oshanënpoaꞌ inquitatonpoaꞌ, Quisocristo anoyacancantërinpoaꞌ,” itohuachinënquëmaꞌ, noꞌtëquën aꞌchintërinënquëmaꞌ. Aꞌchintohuachinënquëmaꞌ, natëramaꞌ. “Aꞌna tahuëri Yosëꞌpaꞌ noya ananpitaantarinpoaꞌ,” taꞌtomaꞌ, Quisocristo imaramaꞌ. Ina imatomaꞌ, ina tahuëri ninaramaꞌ.

1 Timoteo 5:20

Ansiano tëhuënchachin co noyahuëꞌ nipachina, pënënacasoꞌ yaꞌhuërin. Yaꞌipi imapisopita ayontonahuaton, chiníquën pënënquëꞌ. Aꞌnapitantaꞌ tëꞌhuatatonaꞌ, noya nicacaiso marëꞌ pënënquëꞌ.

Hebreos 12:13

Yosë iranën noꞌtëquën imapatamaꞌ, co pëshonaramahuëꞌ. Yosë catahuarinquëmaꞌ noya noya yonquicamaso marëꞌ. Aꞌnapitantaꞌ nicatënquëmaꞌ, chiníquën cancantapi. Co huachi sonpacha pochin cancantapihuëꞌ.

Hebreos 9:10

Iráca nisha nisha cosharoꞌ aꞌpopi. Nisha nisha oꞌocasontaꞌ aꞌpopi. Co noyahuëꞌ nipachinara, “Oshanëhuë inquiꞌi,” taꞌtonaꞌ, nisha nisha paꞌmopi. “Inapotohuatëhuaꞌ, Yosë noya niꞌsarinpoaꞌ,” topirinahuëꞌ, co ina marëꞌ noya cancantopihuëꞌ. Yosëri nasha nanan shaꞌhuitaton, anoyataquë huarëꞌ inapocaisoꞌ yaꞌhuërin.