Gálatas 1:6 - Chayahuita (Shahui)

⁶ Yosë ayonquirinquëmaꞌ imacamaso marëꞌ. Quisocristo inaora nohuanton nosoroatënquëmaꞌ, catahuarinquëmaꞌ niꞌton, imaramaꞌ. Imapiramahuëꞌ, aꞌnaroáchin ina naniantatomaꞌ, nisha nanan yaimaramaꞌ. Ina yonquiato, paꞌyanahuë.

Gálatas 1:6 ပူးပေါင်းရင်းမြစ်များ

Marcos 6:6

“¿Onpoatoncha isopita co yanatërinacohuëꞌ nicaya?” tënin, yonquiapon. Ina quëran yaꞌcariya ninanoroꞌsaquë paꞌsahuaton, piyapiꞌsaꞌ aꞌchintarin.

Juan 9:30

—¡Maꞌpitacha tënama paya! Intohuaransona huëꞌninso canpitaso co nitotopiramahuëꞌ, casoꞌ anoyarayatërinco.

Hechos 15:11

Sinioro Quisoso natëhuatëhuaꞌ, inaora nohuanton, nichaꞌësarinpoaꞌ. Nosoroatonpoaꞌ, oshanënpoa marëꞌ chiminin niꞌton, anoyacancantërinpoaꞌ. Inapochachin nisha piyapiꞌsantaꞌ anoyacancantërin, tënin Pitro.

Romanos 10:3

Yosëíchin anoyacancantërinpoaꞌ. Nipirinhuëꞌ, co nohuantopihuëꞌ ina nanan imacaisoꞌ. “Pënëntërinsoꞌ natëhuatëhuaꞌ, Yosë noya niꞌsarinpoaꞌ,” toconpi. “Quëma Sinioro anoyacancantocoi,” co itopihuëꞌ.

Romanos 5:2

Quisocristo cancanënpoa quëran natëhuatëhuaꞌ, nichaꞌësarinpoaꞌ. Nosoroatonpoaꞌ, ipora huantaꞌ catahuarinpoaꞌ noya imacaso marëꞌ. Aꞌna tahuëri Yosëꞌpaꞌ paꞌpatëhuaꞌ, Yosë pochin nisarëhuaꞌ. Ina yonquiatëhuaꞌ, nóya cancantarihuaꞌ.

Romanos 8:28

Yosë nosorohuatëhuaꞌ, noyasáchin yonquirinpoaꞌ. Maꞌsha onpohuatëhuara, naꞌcon catahuarinpoaꞌ. Piꞌpian parisitapirëhuahuëꞌ, ina nohuanton, parisitërëhua quëran noya noya pipiarëhuaꞌ. Achinicancaninpoaꞌ niꞌton, noya noya imarihuaꞌ. Nani huayoninpoaꞌ ina nohuantërinsoꞌ nicacaso marëꞌ.

Romanos 8:30

Nohuantërinpoaꞌ niꞌton, huëntonënquë chachin ayaꞌconinpoaꞌ. Oshanënpoaꞌ inquitatonpoaꞌ, noya niꞌninpoaꞌ. Ina nohuanton, aꞌna tahuëri inápaquë noya noya acoarinpoaꞌ.

1 Corintios 4:15

Notohuaroꞌ piyapiꞌsaꞌ Quisocristo nanamën aꞌchintopirinënquëmahuëꞌ, carimaꞌton pënënanquëmaꞌ niꞌton, imaramaꞌ. Quisocristo nanamën shaꞌhuitohuatënquëmara, natëramaꞌ. Napoaton tataparima pochin niꞌco.

2 Corintios 11:4

Quisocristo imacasoꞌ aꞌchintëranquëmaꞌ. Natëhuatamaꞌ, Ispirito Santo yaꞌcoancantërinquëmaꞌ. Inapitaso nipirinhuëꞌ nisha aꞌchintërinënquëmaꞌ. “Quisocristo nanamën chachin aꞌchintarainquëmaꞌ,” itopirinënquëmahuëꞌ, nisha nanan aꞌchintërinënquëmaꞌ. Nisha ispiritontaꞌ yaꞌhuërin, itërinënquëmaꞌ. Nisha nisha natëcasoꞌ aꞌchintohuachinquëmara, aꞌnaroáchin yaimaramaꞌ.

2 Corintios 2:17

Aꞌnaquën nonpinatonaꞌ, inahuara canacaiso marëꞌ aꞌchinapi. “Yosë nanamën aꞌchintërainquëmaꞌ,” topirinahuëꞌ, co noꞌtëquën aꞌchinpihuëꞌ. Quiyaso nipirinhuëꞌ noꞌtëquën shaꞌhuitërainquëmaꞌ. Yosë aꞌparincoi niꞌton, ina nanansáchin aꞌchinarai. Yosë niꞌsárincoi niꞌton, Quisocristoíchin natëarai.

Gálatas 1:11

Noꞌtëquën iyaroꞌsaꞌ shaꞌhuitaranquëmaꞌ. Iráca quëran huarëꞌ co piyapi yonquirinsoꞌ aꞌchintëranquëmahuëꞌ.

Gálatas 1:15

Yosë nosoroatonco, nohuantërinco huiꞌnin imacaꞌhuaso marëꞌ. Coꞌhuara nasichátërapohuëꞌ, yonquirinco nanamën aꞌchinaꞌhuaso marëꞌ. Inaora nohuanton, nosororinco niꞌton, huiꞌnin anohuitërinco nisha piyapiꞌsaꞌ pënënaꞌhuaso marëꞌ. Ina marëꞌ acohuachincora, co piyapiꞌsaꞌ paaparahuëꞌ aꞌchintinacoso marëꞌ.

Gálatas 1:7

Co aꞌna nanan, iyaroꞌsaꞌ, yaꞌhuërinhuëꞌ chaꞌëcaso marëꞌ. Quisocristoíchin anoyacancantërinpoaꞌ. Ina imapatëhuaꞌ, oshanënpoaꞌ inquitarinpoaꞌ. Inasáchin yonquipiramahuëꞌ, aꞌnapita huëcatonaꞌ, nisha nanan aꞌchintarinënquëmaꞌ. Napoaton nisha nisha yonquiaramaꞌ. Yanonpintërinënquëmaꞌ. “Co Quisocristoráchin yonquicasoꞌ yaꞌhuërinhuëꞌ,” itërinënquëmaꞌ.

Gálatas 2:14

Ina niꞌsahuato, yaꞌipi piyapi niꞌtërantapaiquë Pitro chiníquën pënënahuë. “Cotio piyapinquën niponahuëꞌ, Quisocristo imaton, iráca pënëntërinsoꞌ naniantëran. Nisha piyapiꞌsarëꞌquën coshataponahuëꞌ, iporasoꞌ naquëranchin maꞌsha aꞌpoantaran. Ina pochin nicaton, piyapiꞌsaꞌ anishayonquiaran. ‘Co Quisocristoíchin nichaꞌërinpoahuëꞌ nimara. Iráca pënëntërinsontaꞌ natëcasoꞌ yaꞌhuërin,’ taꞌtonaꞌ, nonanarinënquën. ¿Nisha piyapiꞌsantaꞌ cotioroꞌsa pochin yaatarantëran ti?

Gálatas 2:2

Yosë ayonquirinco pacaꞌhuasoꞌ niꞌton, paꞌnahuë imapisopita nontaꞌhuaso marëꞌ. Ansianoꞌsarachin niyontonpachinara, shaꞌhuitërahuë. “Casoꞌ nisha piyapiꞌsaꞌ aꞌchintohuato, Quisocristoíchin imacaisoꞌ yaꞌhuërin, tënahuë. Iráca pënëntërinsoꞌ imacaisoꞌ co aꞌchintërahuëꞌ,” itërahuë. “Co noꞌtëquën aꞌchinanhuëꞌ,” itërinaco naporini, topinan quëran aꞌchinchitënquëmahuëꞌ, tënahuë yonquiato. Ansianoꞌsaso nipirinhuëꞌ “Noya aꞌchinan,” itërinaco.

Gálatas 2:5

Napotopirinacoihuëꞌ, co piꞌpian tërantaꞌ nohuantëraihuëꞌ. “Quisocristoíchin anoyacancantërinpoaꞌ,” itërai. Canpitantaꞌ noꞌtëquën yonquicamasoꞌ nohuantërai. Napoaton nisha aꞌchintohuachinacoira, co mantaꞌ natëraihuëꞌ.

Gálatas 2:7

“Noꞌtëquën aꞌchinan,” itërinaco. Pitrori aꞌchintohuachina, Yosë nohuanton, naꞌa cotioroꞌsaꞌ Quisocristo imasapi. Carintaꞌ aꞌchintohuato, Yosë nohuanton, naꞌa piyapiꞌsaꞌ, nisha nisha niponaraihuëꞌ, imasapi inahuantaꞌ. Napoaton ansianoꞌsantaꞌ noya nontërinaco. “Yosëri Pitro acorin cotioroꞌsaꞌ aꞌchintacaso marëꞌ. Quëmaso nipirinhuëꞌ acorinquën nisha piyapiꞌsaꞌ aꞌchintacaso marëꞌ,” itërinaco.

Gálatas 5:14

Iráca Yosë pënëntohuachina, ninosorocasoꞌ naꞌcon naꞌcon nohuantërin. “Quëmaora ninosororanso pochachin aꞌnapitantaꞌ nosorocoꞌ,” tënin.

Gálatas 5:4

“Noꞌtëquën natëhuatëhuaꞌ, Yosë noya niꞌsarinpoaꞌ,” topatamaꞌ, co Quisocristo imaramahuëꞌ. Yosë inaora nohuanton, nosoropirinquëmahuëꞌ, Quisocristo naniantohuatamaꞌ, co huachi catahuarinquëmahuëꞌ.

2 Tesalonicenses 2:14

Yosë nanamën aꞌchintohuatëinquëmara, canpitantaꞌ imaramaꞌ. Yosë acorinquëmaꞌ Sinioro Quisocristo pochin nicacamasoꞌ. Aꞌna tahuëri oꞌmantahuachin, ina pochin yaꞌnoaramaꞌ.

1 Timoteo 1:14

Sinioro chachin inaora nohuanton, nosoroatonco, naꞌcon catahuarinco. Catahuahuachincora, “Quisocristoíchin anoyacancantarinco,” taꞌto, ina natërahuë. Ina imato, nosororahuë cantaꞌ.

1 Timoteo 1:3

Iꞌhua Masitoniaquë yapaꞌpatëra, shaꞌhuitëranquën. “Ipisoquë yaꞌhuëtaquëꞌ pënëntamaso marëꞌ,” itëranquën. Iporantaꞌ inachachin shaꞌhuitaranquën. Inaquëranchin yaꞌhuaton, pënëntáquëꞌ. Aꞌnaquën nisha nisha nanan aꞌchinapi. Inapita shaꞌhuitëquëꞌ ama ina pochin aꞌchiꞌinasohuëꞌ.

2 Timoteo 1:9

Yosë chachin anoyacancantërinpoaꞌ. Oshanënpoaꞌ inquitatonpoaꞌ, acorinpoaꞌ nóya nicacaso marëꞌ. Inaora nohuanton, nosororinpoaꞌ. Co noyahuëꞌ nipirëhuahuëꞌ, nosoroatonpoaꞌ, catahuarinpoaꞌ. Coꞌhuara isoroꞌpaꞌ acoyátërasohuëꞌ, ninotonpoaꞌ, nosororinpoaꞌ. Naporoꞌ chinotërin Quisocristo aꞌpaimacasoꞌ. Ina imapatëhuaꞌ, anoyacancantërinpoaꞌ.

2 Timoteo 2:1

Quëmantaꞌ api: “Quisocristo catahuarinco,” taꞌton chiníquën cancantëquëꞌ. Ina imapatëhuaꞌ, inaora nohuanton catahuarinpoaꞌ chiníquën cancantacasoꞌ. Huiꞌnahuë pochin nicatënquën, pënënaranquën.

1 Pedro 1:15

Tata Yosë noyasáchin ninin. Huëntonënquë ayaꞌconinquëmaꞌ niꞌton, canpitantaꞌ ina pochin cancantocoꞌ.

2 Pedro 1:3

Quisocristosoꞌ chiníquën nanantaton, yaꞌipiya nanitaparin. Ina imapatëhuaꞌ, catahuarinpoaꞌ Yosë pochin cancantacaso marëꞌ. Ina Yosë anohuitërinpoaꞌ. Huëntonënquë nani ayaꞌconinpoaꞌ. Inasoꞌ nóya niꞌton, nohuantërin canpoantaꞌ inapochachin cancantacasoꞌ. Ina nohuitohuatëhuaꞌ, catahuarinpoaꞌ onporahuatësona noya noya chinotacasoꞌ.

Apocalipsis 22:21

Sinioro Quisoso noya catahuainquëmaꞌ. Yaꞌipi imaramasopita nosoroatënquëmaꞌ, catahuainquëmaꞌ. Nani ninshitëranquëma huachi. Coansha