Gálatas 1:4 - Chayahuita (Shahui)

⁴ Oshanënpoaꞌ inquitinpoaso marëꞌ Quisocristo chiminin. Inaora nohuanton, yaꞌhuërëtërinpoaꞌ. Notohuaroꞌ piyapiꞌsaꞌ co noyahuëꞌ yonquipi. Ama inapita pochin cancantacaso marëhuëꞌ chiminaton, anoyacancantërinpoaꞌ. Tata Yosë nohuanton, nichaꞌërinpoaꞌ.

Gálatas 1:4 ပူးပေါင်းရင်းမြစ်များ

Salmos 40:8

Quëma nohuantëranso chachin nohuantërahuë nicaꞌhuasoꞌ. Pënëntëransoꞌ, cancanëhuë quëran yonquirárahuë.

Isaías 65:17

Ina quëran Sinioro taantarin: “Niꞌquëꞌ. Aꞌna tahuëri nasha piꞌiroꞌtë acoarahuë. Isoroꞌpantaꞌ, nasha acoarahuë. Ipora yaꞌhuërinsopitasoꞌ, co huachi insonta yonquiaponhuëꞌ.

Mateo 13:22

Aꞌnaquën piyapiꞌsantaꞌ nahuanoꞌ yaꞌhuërinso pochin niconpi. Yosë nanamën natanpachinara, yaimapirinahuëꞌ, maꞌsharáchin yonquiatonaꞌ, naniantopi. ‘Naꞌa coriqui, maꞌsha, inapita yaꞌhuëtohuachincoi, nóya cancantarai,’ topirinahuëꞌ, co ina quëran noya cancantacasohuëꞌ nipirinhuëꞌ. Napoaton nahuanoꞌsari imotërinso pochin, maꞌsharáchin yonquiatonaꞌ, Yosë nanamën naniantopi. Co imamiatopihuëꞌ.

Mateo 20:28

Cantaꞌ Yosë quëran quëmapico niporahuëꞌ, co aꞌnapita camaicaꞌhuaso marëꞌ oꞌmarahuëꞌ. Piyapiꞌsaꞌ catahuacaꞌhuaso marëꞌ oꞌmarahuë. Chiminarahuë naꞌa piyapiꞌsaꞌ nichaꞌëcaꞌhuaso marëꞌ, itërin Quisosori.

Mateo 26:28

Ca huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë naꞌa piyapiꞌsaꞌ oshanënaꞌ inquitaꞌhuaso marëꞌ.

Mateo 26:42

Ina quëran paantarahuaton, Yosë nontaantarin. —Nohuantohuatan Tata, nichaꞌëco ama maꞌsha onpoꞌisohuëꞌ. Nipirinhuëꞌ co nohuantohuatanhuëꞌ, maꞌsona yaonpotohuatancontaꞌ noya, tënahuë. Noꞌtëquën yanatëranquën, itaantarin.

Mateo 6:9

Napoaton Yosë yanontohuatamaꞌ, iso pochin nontocoꞌ: ‘Tata Yosë, quëmaso inápaquë yaꞌhuaponahuëꞌ, natanancoi. Quëmasáchin noya noyanquën niꞌton, yaꞌipi piyapiꞌsaꞌ chinochinënquën.

Marcos 10:45

Cantaꞌ Yosë quëran quëmapico niporahuëꞌ, co aꞌnapita camaicaꞌhuaso marëꞌ oꞌmarahuëꞌ. Piyapiꞌsaꞌ catahuacaꞌhuaso marëꞌ oꞌmarahuë. Chiminarahuë naꞌa piyapiꞌsaꞌ nichaꞌëcaꞌhuaso marëꞌ, itërin Quisosori.

Lucas 22:19

Ina quëran cosharoꞌ masahuaton, “Yosparinquën, Tata,” itahuaton, sëꞌpanin. Inapotahuaton, aꞌnaya aꞌnaya quëtërin. —Ca nonëhuë pochin isoꞌ. Canpita marëꞌ chiminarahuë. Ca chinotatomaco, caꞌcoꞌ, itërin.

Lucas 22:42

“Quëma nohuantohuatan Tata, nichaꞌëco, ama maꞌsha onpoꞌisohuëꞌ. Main oꞌorëso pochin parisitaꞌhuasoꞌ yaꞌhuërin. Co parisitaꞌhuasoꞌ nohuantaporahuëꞌ, quëma nohuantohuatan, maꞌsona yaonpotohuatancontaꞌ noya, tënahuë. Noꞌtëquën yanatëranquën,” itërin. [

Juan 10:11

Casoꞌ ohuica huaꞌanën pochin ninahuë. Imarinacosopita noya aꞌpairahuë. Huaꞌanën noya nipachina, ohuicanënpita aꞌpaiton, co chiminacasoꞌ tëꞌhuatërinhuëꞌ. Inapochachin cantaꞌ imarinacosopita marëꞌ chiminarahuë.

Juan 12:31

Iporasoꞌ co natëpisopitahuëꞌ noꞌhuiarinaco niꞌton, anaꞌintacasoꞌ yaꞌhuërin huachi. Huaꞌquiꞌ sopairi piyapiꞌsaꞌ camaipirinhuëꞌ, cari minsërahuato, ocoiarahuë.

Juan 5:30

Ina quëran Quisosori itantarin: “Co caora nohuanto mantaꞌ ninahuëꞌ. Tata Yosë shaꞌhuitohuachincora, inachachin shaꞌhuirahuë. Co casoꞌ nisha yonquirahuëꞌ. Tata yonquirinsoráchin nohuantërahuë. Napoaton noꞌtëquën anaꞌintarahuë.

Juan 6:38

Co caora nohuanto, maꞌsha ninahuëꞌ. Inápa quëran oꞌmarahuë Tata Yosë natëcaꞌhuaso marëꞌ. Ina aꞌpaimarinco.

Romanos 1:7

Napoaton Nomaquë yaꞌhuëramasopita ninshitaranquëmaꞌ. Yosë paꞌpi nosororinquëmaꞌ. Nani acorinquëmaꞌ piyapinënpita nicacamasoꞌ. Niꞌton, inasáchin yonquicasoꞌ yaꞌhuërin. Tata Yosë inaora nohuanton, catahuainquëmaꞌ. Asanocancainquëmaꞌ. Quisocristontaꞌ inapochachin catahuainquëmaꞌ. Inasoꞌ huaꞌanëntërinpoaꞌ.

Romanos 12:2

Iporasoꞌ notohuaroꞌ piyapiꞌsaꞌ co Yosë natëpihuëꞌ. Maꞌsharáchin yonquiatonaꞌ, co Yosë yonquipihuëꞌ. Ama inapita nonancosohuëꞌ. Nani tahuëri Yosë nontocoꞌ yonquirinso chachin quëchinquëmaꞌ. Ina yonquihuatamaꞌ, nohuantërinso chachin anitotarinquëmaꞌ. Ina quëran noya noya cancantohuatamaꞌ, noya niꞌsarinquëmaꞌ.

Romanos 4:25

Yosë nohuanton, oshanënpoa marëꞌ chiminin. Inari chachin ananpitaantarin oshanënpoaꞌ inquitatonpoaꞌ, noya nicainpoaso marëꞌ.

Romanos 8:27

Yaꞌipi yonquirëhuasopita Yosë nitotërin. Ispirito Santori nontohuachina, natanin. Yosë nohuantërinso chachin nitotaton, canpoa marëꞌ noya nontërin.

Romanos 8:3

Iráca Yosë pënënpirinpoahuëꞌ. Co noyahuëꞌ cancantatëhuaꞌ, co nanitërëhuahuëꞌ noꞌtëquën natëcasoꞌ. Ina quëran huiꞌnin chachin isoroꞌpaquë aꞌpaimarin. Piyapi chachin nasitimarin. Co oshahuanaponahuëꞌ, oshanënpoaꞌ inquitinpoaso marëꞌ chiminin. Inapoaton, nichaꞌërinpoaꞌ ama huachi anaꞌintinpoaso marëhuëꞌ.

Romanos 8:32

Yosë chachin nosoroatonpoaꞌ co huiꞌnin tërantaꞌ apiratërinpoahuëꞌ. Isoroꞌpaquë aꞌpaimarin chiminacaso marëꞌ. Canpoa marëꞌ chiminin. Ipora chachintaꞌ nosoroatonpoaꞌ, catahuarinpoaꞌ. ¡Quisocristo imarëhuaꞌ niꞌton, co mantaꞌ pahuantarinpoahuëꞌ Yosë pochin cancantacaso marëꞌ! Nóya nichaꞌësarinpoaꞌ.

1 Corintios 15:3

Yaꞌnan aꞌchintaponquëmaꞌ, Yosë anitotërincoso chachin shaꞌhuitëranquëmaꞌ: “Oshanënpoaꞌ inquitinpoaso marëꞌ Quisocristo chiminin,” itëranquëmaꞌ. Iráca Yosë quiricanën quëran ninorinso chachin chiminin.

2 Corintios 4:4

Sopai nohuanton, co nanitopihuëꞌ noꞌtëquën yonquicaisoꞌ. Maꞌsha aꞌpintërëso pochin nanamën quëran Yosë anitotërinpoaꞌ Quisocristo nohuitacaso marëꞌ. Inasoꞌ Yosë chachin ninin. Inapitaso nipirinhuëꞌ somaraya pochin cancantatonaꞌ, co nanitopihuëꞌ natëtacaisoꞌ.

Gálatas 2:20

Quisocristo corosëquë chiminin. Ina imato, cantaꞌ corosëquë chiminahuëso pochin ninahuë. Iráca yonquirahuësoꞌ naniantërahuë. Napoaton co huachi oshahuanacaꞌhuasoꞌ yaꞌhuërinhuëꞌ. Iporasoꞌ Quisocristoíchin yonquirahuë. Co huachi caora nohuanto maꞌsha ninahuëꞌ. Quisocristo yaꞌcoancantërinco niꞌton, catahuarinco noya nicaꞌhuasoꞌ. ‘Nani tahuëri Yosë huiꞌnin chachin catahuarinco,’ taꞌto, noya cancantërahuë. Inasoꞌ paꞌpi nosororinco. Nosoroatonco, yaꞌhuërënamëhuë chiminin.

Gálatas 6:14

Caso nipirinhuëꞌ piyapiꞌsaꞌ paꞌyataꞌhuasoꞌ co yonquirahuëꞌ. Quisocristo chimininsoáchin yonquirahuë. Corosëquë chiminaton, anoyacancantërinpoaꞌ. Niꞌton, inaroꞌco chiminahuëso pochin co maꞌsha isoroꞌpaquë yaꞌhuërinsoꞌ yonquirahuëꞌ. Naporahuaton, isoroꞌparáchin paꞌyatopisopita co huachi noya niꞌninacohuëꞌ.

Efesios 1:11

Inaora nohuanton, acorinpoaꞌ piyapinënpita nicacaso marëꞌ. Quisocristo imapatëhuaꞌ, huiꞌnin pochin niꞌsarinpoaꞌ. Napoaton aꞌna tahuëri Yosëꞌpaꞌ noya noya acoarinpoaꞌ. Iráca chachin yonquirinpoaꞌ niꞌton, huëntonënquë ayaꞌconinpoaꞌ.

Efesios 2:2

Coꞌhuara Quisocristo imashatërapomahuëꞌ, sopai huaꞌan natëtomaꞌ, co noyahuëꞌ ninamaꞌ. Inasoꞌ ihuan yaꞌhuërinquë yaꞌhuaton, yaꞌipi sopairoꞌsaꞌ huaꞌanëntarin. Co quënanpirëhuahuëꞌ, isoroꞌpaquë sacatárin minsëinpoaso marëꞌ. Yonquinëmaquë camairinquëmaꞌ niꞌton, co Yosë natëramahuëꞌ.

Efesios 5:16

Ama tahuëri chiniacosohuëꞌ. Iporasoꞌ naꞌa piyapiꞌsaꞌ co noyahuëꞌ cancantopi. Napoaton apira apira aꞌnapita catahuacoꞌ Yosë yonquicaiso marëꞌ. Onpopiontaꞌ nanamën anitotocoꞌ.

Efesios 5:2

Quisocristo nosoroatonpoaꞌ, canpoa marëꞌ chiminin. Oshanënpoa marëꞌ chiminpachina, Yosëri noya niꞌnin. Napoaton canpoantaꞌ nani tahuëriya inapochachin ninosoroaꞌahuaꞌ Yosë noya niꞌinpoaꞌ.

Efesios 6:12

Inimiconënpoaꞌ co piyapi pochin quënanëhuahuëꞌ. Sopai huaꞌansoꞌ yaminsërinpoaꞌ. Naꞌa sopairoꞌsantaꞌ inápaquë yaꞌhuatonaꞌ, yacamairinënpoaꞌ. Co quënanpirëhuahuëꞌ, yonquinënpoa quëran yacamairinënpoaꞌ co noyahuëꞌ nicacaso marëꞌ. Iporasoꞌ notohuaroꞌ piyapiꞌsaꞌ tashi pochin cancantatonaꞌ, sopai natëpi. Inari camairin niꞌton, paꞌpi co noyahuëꞌ yonquipi.

Filipenses 4:20

Ma noyacha Tata Yosë chinotërëhuasoso paya. Ipora quëran huarëꞌ yaꞌipi piyapiꞌsari chinochinaꞌ. Amen.

1 Tesalonicenses 3:11

Tata Yosë chachin catahuaincoi onpopiontaꞌ paꞌii. Sinioro Quisosontaꞌ catahuahuachincoi, paꞌsarai nicapoinquëmaꞌ.

1 Tesalonicenses 3:13

Noya ninosorohuatamaꞌ, Quisocristo achinicancanarinquëmaꞌ noyasáchin nicacamaso marëꞌ. Catahuahuachinquëmaꞌ, noyápiachin cancantaramaꞌ. Ina quëran Quisocristo oꞌmantahuachin, Yosë noya niꞌsarinquëmaꞌ. Aꞌna tahuëri yaꞌipi piyapinënpitarë chachin oꞌmantararin.

2 Tesalonicenses 2:16

Sinioro Quisocristo catahuainquëmaꞌ chiníquën cancantacamaso marëꞌ. Inaora nohuanton, Tata Yosëntaꞌ nosoroatonpoaꞌ, achinicancamiatërinpoaꞌ. Aꞌna tahuëri yaꞌhuërinquë chachin quëpantarinpoaꞌ. Shaꞌhuitërinpoaꞌ niꞌton, ina ninarëhuaꞌ.

1 Timoteo 2:6

Quisocristo inaora nohuanton, nichaꞌëinpoaso marëꞌ chiminin. Chiminaton, oshanënpoaꞌ inquitërinpoaꞌ. Tahuëri nanihuachinaꞌ, Yosë yanichaꞌërinpoasoꞌ anitotërinpoaꞌ.

Tito 2:14

Iráca canpoa marëꞌ chiminin oshanënpoaꞌ inquitinpoaso marëꞌ. Anoyacancantërinpoaꞌ piyapinënpita nicacaso marëꞌ. Huëntonënquë chachin yaꞌconpatëhuaꞌ, noya nicacasoráchin nohuantarihuaꞌ.

Hebreos 2:5

Iráca quëran huarëꞌ Yosë yonquihuachinpoara, co nohuantërinhuëꞌ anquëniroꞌsaꞌ huaꞌanëntinpoasoꞌ. Aꞌna tahuëri nasharoꞌpaꞌ nipachin, co inapita huaꞌanëntarinënpoahuëꞌ. Ina shaꞌhuitaranquëmaꞌ.

Hebreos 6:5

Yosë nanamën noya natanpi. Yosë chiníquën nanantaton catahuarinsontaꞌ nicaponaraihuëꞌ,

Hebreos 9:14

Quisocristo huënainënso nipirinhuëꞌ noya nóya. Inasoꞌ Yosë huiꞌnin niꞌton, co piꞌpisha tërantaꞌ oshahuaninhuëꞌ. Ispirito Santo yaꞌhuëmiatërinsori catahuarin niꞌton, canpoa marëꞌ chiminaton anoyacancantomiatërinpoaꞌ. Inaso huënainën aꞌparin oshanënpoaꞌ inquitinpoaso marëꞌ. Inapoaton noyápiachin cancan quëtërinpoaꞌ. Ina quëtohuachinpoaꞌ, Yosë noya chinotarihuaꞌ. Inasoꞌ nanpiarin niꞌton, canpoantaꞌ ina marëꞌ noya sacatarihuaꞌ.

Santiago 4:4

Canpitasoꞌ co huachi Yosëíchin yonquiramahuëꞌ. Yosë yonquipiramahuëꞌ, nani maꞌsha naꞌcon naꞌcon nohuantatomaꞌ, yamonshihuaninso pochin cancantëramaꞌ. Capa cancantacasoáchin paꞌyatëramaꞌ. Maꞌsharáchin yonquiatomaꞌ, Yosë inimiconën pochin cancantëramaꞌ.

1 Pedro 2:24

Quisocristo isoroꞌpaquë oꞌmaton, piyapi chachin nasitimarin. Oshanënpoa marëꞌ corosëquë chiminin. Inaora yaꞌhuërëtërinpoaꞌ. Yaꞌipi co noyahuëꞌ yonquirëhuasopita naniantatëhuaꞌ noya nicacaso marëꞌ chiminin. Corosëquë parisitaton, anoyacancantërinpoaꞌ.

1 Pedro 3:18

Quisocristontaꞌ nóya niponahuëꞌ, oshahuanëhuaso marëꞌ parisitërin. Oshanënpoaꞌ inquitinpoaso marëꞌ chiminin. Aꞌnaromarëáchin chiminin. Noya niponahuëꞌ, oshahuanoꞌsa marëꞌ chiminin. Canpoantaꞌ Yosë nohuitacaso marëꞌ chiminin. Piyapi niꞌton tëhuënchachin tëpapi. Chiminaponahuëꞌ, nanpiantarin niꞌton, noya noya yaꞌhuantarin.

1 Juan 2:2

Yaꞌhuërënamënpoaꞌ chiminin niꞌton, nontohuatëhuaꞌ, oshanënpoaꞌ inquitarinpoaꞌ. Oshanënpoaꞌ inquitatonpoaꞌ, nanan anoyatërinpoaꞌ. Yaꞌipi piyapi marëꞌ chiminin. Yaꞌipinpoaꞌ oshanënpoaꞌ inquitinpoasoꞌ nohuantopirinhuëꞌ.

1 Juan 3:16

Quisocristoso nipirinhuëꞌ naꞌcon nosoroatonpoaꞌ, nichaꞌëinpoaso marëꞌ chiminin. Chiminaton, nosororinpoasoꞌ anitotërinpoaꞌ. Inapochachin iyaroꞌsaꞌ, yaꞌipi Quisocristo imapisopita nosorocasoꞌ yaꞌhuërin. Naꞌcon ninosoroaꞌahuaꞌ. Quisoso yaꞌhuërënamënpoaꞌ chimininso pochachin nosorocasoꞌ yaꞌhuërin.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.

Apocalipsis 5:9

Chinotatonaꞌ, inahuara yonquinëna quëran nasha cantanën cantarapi. “Noya noyanquën, Sinioro, niꞌton, nanan yaꞌhuëtërinquën quirica niꞌcamasoꞌ. Toꞌni iꞌshotohuatan, nani maꞌsha anitotarancoi. Iráca tëparinënquën. Chiminaton, piyapiꞌsaꞌ sopai quëran ocoiran Yosë imacaiso marëꞌ. Napoaton quëmasáchin nanitëran yaꞌipiya huaꞌanëntacasoꞌ. Nisha nisha parti yaꞌhuëpirinahuëꞌ, imarinënquën, Sinioro. Nisha nisha nananquë nonpisopita imarinënquën. Nisha nisha copirnori huaꞌanëntërinsopita niponaraihuëꞌ, natërinënquën.

Apocalipsis 7:9

Ina quëran huaꞌnarëso pochin niantarahuë. Huaꞌhuayatërahuëꞌ piyapiꞌsaꞌ Yosëꞌpaꞌ quënanahuë. Co pichicasohuëꞌ. Nisha nisha piyapiꞌsaꞌ Yosë huaꞌanëntacasoꞌ shiranën notënanquë huaniapi, nisha nisha nananquë nonpisopita. Nisha nisha parti quëran huëcatonaꞌ, Carniroaꞌhua yamotatonaꞌ, notërapi. Inapitasoꞌ huiríchin aꞌmopi. Mërëmë pochin nininsoꞌ sëꞌquërahuatonaꞌ, Yosë chinotapi.