Gálatas 1:19 - Chayahuita (Shahui)

¹⁹ Naporoꞌ Santiacontaꞌ nohuitërahuë. Quisocristo iin inasoꞌ. Inapitasáchin nontërahuë. Aꞌnapita caꞌtanoꞌsasoꞌ co niꞌnahuëꞌ.

Gálatas 1:19 ပူးပေါင်းရင်းမြစ်များ

Mateo 10:3

Pinipi, Partoromi, Tomasë, Tatio, inapitantaꞌ nohuantaton, acorin. Mationtaꞌ coriqui Noma copirno marëꞌ maꞌpatopirinhuëꞌ, acorin caꞌtanacaso marëꞌ. Arpio huiꞌniontaꞌ acorin, Santiaco itopisoꞌ.

Mateo 12:46

Piyapiꞌsaꞌ nontasoꞌ, aꞌshin, iinpita, inapita huëꞌpi. Quisoso yanontopirinahuëꞌ, naꞌa piyapiꞌsaꞌ yamorapi niꞌton, co nanitopihuëꞌ yaꞌconacaisoꞌ. Aipiran huaniápirinahuëꞌ,

Mateo 13:55

Huaꞌhuatapon quëran huarëꞌ nohuitërëhuaꞌ. Paꞌpinsoꞌ nontëcamayo. Aꞌshinsoꞌ Maria itopi. Iinpitantaꞌ nohuitërëhuaꞌ. Santiaco, Cosi, Simon, Cotasë, inapita itopi.

Marcos 3:18

Antërisë, Pinipi, Partoromi, Matio, Tomasë, Tatio, inapitantaꞌ acorin. Aꞌnantaꞌ Santiaco itopi. Arpio huiꞌnin inasoꞌ. Aꞌna Simontaꞌ acorin. Iráca copirno noꞌhuinaꞌpiroꞌsaꞌ imapirinhuëꞌ, iporasoꞌ Quisoso imasarin huachi.

Marcos 6:3

Huaꞌhuatapon quëran huarëꞌ nohuitërëhuaꞌ. ¿Coꞌna nontëcamayo inasoꞌ? Aꞌshinsoꞌ Maria itopi. Iinpitantaꞌ nohuitërëhuaꞌ. Santiaco, Cosi, Cotasë, Simon, inapita itopi. Oshinpitantaꞌ isëquë canpoarëꞌ yaꞌhuarin. Co Quisoso chiníquën nanantërinhuëꞌ. Canpoa pochachin inantaꞌ, taꞌtonaꞌ, “¡Macari natëapon!” topi.

Lucas 6:15

Matio, Tomasë, inapitantaꞌ acorin. Aꞌna Santiacontaꞌ acorin. Arpio huiꞌnin inasoꞌ. Aꞌnantaꞌ Simon itopi. Inasoꞌ copirno noꞌhuinaꞌpiroꞌsaꞌ imapirinhuëꞌ, iporasoꞌ Quisoso imasarin huachi.

Lucas 8:20

Napoaton aꞌnaquëni shaꞌhuitërin. —Niꞌquëꞌ Maistro. Mamaparin, iyaparinpita, inapita huëcatonaꞌ, aipiran huaniapi. Yanontërinënquën, itopirinahuëꞌ, Quisososoꞌ tapon:

Hechos 1:13

Canconahuatonaꞌ, aꞌna pëiquë paꞌpi. Inapa pëꞌsatëꞌ pëiꞌ niꞌton, nanpëpi. Inaquë naporoꞌ yacapatapi. Pitro, Coansha, Santiaco, Antërisë, Pinipi, Tomasë, Partoromi, Matio, inapita yaꞌhuërapi. Aꞌnantaꞌ Santiaco. Arpio huiꞌnin inasoꞌ. Aꞌna Simontaꞌ yaꞌhuërin. Inasoꞌ copirno noꞌhuinaꞌpiroꞌsaꞌ imapirinhuëꞌ, inantaꞌ Quisoso imarin. Aꞌna Cotasëntaꞌ yaꞌhuërin. Santiaco huiꞌnin inasoꞌ.

Hechos 12:17

Inaso nipirinhuëꞌ imirin quëran anquitërin ama noncarocaiso marëhuëꞌ. —Sinioro chachin anquëninën aꞌpatimarinco. Tashinan pëi quëran ocoirinco. Iya Santiaco shaꞌhuitoncoꞌ nitochin. Yaꞌipi imapisopitantaꞌ shaꞌhuitocoꞌ, itërin. Ina quëran aꞌna parti paꞌnin.

1 Corintios 9:5

Aꞌnapita Quisocristori acorinsopitasoꞌ, saꞌatonaꞌ saꞌinarëꞌ iratopi. Nanamën aꞌchinacaiso marëꞌ paꞌpachinara, saꞌinë chachin paꞌpi. Quisocristo iinpita, Pitro, inapitantaꞌ inapopi. Nohuantërai naporini, quiyantaꞌ Quisocristo imarinsoꞌ macatoi, inaroꞌcoi chachin irachitoihuëꞌ.

Santiago 1:1

Ca Santiacoco ninshitaranquëmaꞌ, niꞌcoꞌ. ¿Noya canpitantaꞌ yaꞌhuaramaꞌ? Cantaꞌ isëquë noya yaꞌhuarahuë. Tata Yosë huaꞌanëntërinco niꞌton, Sinioro Quisocristoíchin natërahuë. Yaꞌipi cotioroꞌsanquëmaꞌ Quisocristo imaramasoꞌ ninshitaranquëmaꞌ. Canpitasoꞌ yanquëërahuatomaꞌ, nisha nisha parti yaꞌhuaramaꞌ. Yaꞌipi Yosë piyapinënpitanquëmaꞌ ninamasoꞌ ninshitaranquëmaꞌ.

Judas 1:1

Ca Cotasëco ninshitaranquëmaꞌ. Santiaco iinco casoꞌ. ¿Noyanquëmaꞌ canpitantaꞌ? Cantaꞌ noya yaꞌhuarahuë. Quisocristoíchin natërahuë. Ina acorinco pënëntaꞌhuaso marëꞌ. Quisocristo imaramasopita ninshitaranquëmaꞌ. Tata Yosë nohuanton, imaramaꞌ. Inasoꞌ naꞌcon nosororinquëmaꞌ. Quisocristo imaramaꞌ niꞌton, nóya aꞌpaiarinquëmaꞌ, nichaꞌësarinquëmaꞌ.