Filipenses 4:9 - Chayahuita (Shahui)

⁹ Naꞌcon Yosë nanamën shaꞌhuitëranquëmaꞌ, natanamaꞌ. Yaꞌipi aꞌchintëranquëmasoꞌ noya natëcoꞌ. Canpitataquë yaꞌhuapo, noya ninahuë, niꞌnamaco. Ca pochachin noya nicoꞌ. Noya nipatamaꞌ, Yosë noya catahuarinquëmaꞌ. Ina nohuanton, noya niniꞌtomaꞌ, yaꞌhuaramaꞌ. Inasáchin asanocancaninpoaꞌ.

Filipenses 4:9 ပူးပေါင်းရင်းမြစ်များ

Isaías 41:10

Ama manta tëꞌhuacosohuëꞌ, caꞌtanaranquëmaꞌ. Ama paꞌyancosohuëꞌ. Caso Yosëco niꞌsáranquëmaꞌ. Carinquëma achiniatënquëma catahuaranquëmaꞌ. Chiníquën nanantato inchinanëhuë quëran sëꞌquëaranquëmaꞌ.

Isaías 8:10

Onpo ahuëtamaso yonquihuatamantaꞌ, topinan quëran yonquiaramaꞌ. Maꞌsona nicamasoꞌ nonpatamaꞌ, co napoarinhuëꞌ. Yosëso quiyarëꞌcoi chachin yaꞌhuëarin niꞌton, co inapoaramahuëꞌ.

Mateo 1:23

“Aꞌna tahuëri nanon inaora cayoapon. Co quëmapiri sëꞌhuapirinhuëꞌ, napoapon. Quëmapiaꞌhuaya huaihuachin, Imanino itapi,” tënin. Yosë chachin oꞌmaton, yacaparinpoaꞌ, tapon naporin. Ina pochin nasitimahuachina, iráca ninopisoꞌ nanirin huachi.

Mateo 28:20

Ina quëran yaꞌipi shaꞌhuitëranquëmasoꞌ aꞌchintocoꞌ natëinaco. Insëquësona paꞌpatamaꞌ, carinquëmaꞌ caꞌtanaranquëmaꞌ. Nani tahuëri catahuaranquëmaꞌ. Ayaroꞌ tahuëri naniquë huarëꞌ caꞌtanaranquëmaꞌ. Co onporontaꞌ pataranquëmahuëꞌ, itërin Quisosori. Nani huachi.

Mateo 7:21

Ina quëran itaantarin: “Naꞌa piyapiꞌsaꞌ: ‘Sinioro, Sinioro,’ itopirinacohuëꞌ, aꞌnaquën co cancanëna quëran imarinacohuë niꞌton, co Yosë huaꞌanëntërinquë yaꞌconapihuëꞌ. Yosë natëpisopitaráchin inatohuaꞌ yaꞌhuëcontapi huachi.

Lucas 6:46

Ina quëran itantarin: “Aꞌnaquëmaꞌ ‘Sinioro, Sinioro,’ itapomaracohuëꞌ, ¿onpoatontaꞌ co natëramacohuëꞌ?

Lucas 8:21

—Yosë natëpisopita iyahuëpita pochin niꞌnahuë. Sanapiꞌsantaꞌ Yosë nanamën natëhuachinaꞌ, mamahuë pochin niꞌnahuë, itërin.

Juan 13:17

Nani nitotëramaꞌ ipora. Ca pochin nipatamaꞌ, nóya cancantaramaꞌ.

Juan 15:14

Natëhuatamaco, tëhuënchachin nipayarahuëso pochin niꞌsaranquëmaꞌ.

Juan 2:5

Napotopirinhuëꞌ, inpriatoroꞌsaꞌ quënanconahuaton, aꞌshini itapon: —Maꞌsona Quisoso shaꞌhuitohuachinquëmaꞌ, natëcoꞌ, itërin.

Hechos 9:6

Iporasoꞌ huanirahuaton, ninanoquë paquëꞌ. Inaquë shaꞌhuitarinënquën maꞌsona nicamasoꞌ,” itërin.

Romanos 15:33

Yosëíchin asanocancaninpoaꞌ. Canpitantaꞌ noya catahuainquëmaꞌ, tënahuë. Amen.

Romanos 16:20

Yosëíchin catahuarinpoaꞌ sano cancantacasoꞌ. Sopai yanonpintopirinquëmahuëꞌ, Yosë catahuarinquëmaꞌ niꞌton, aꞌnaroáchin sopai minsëaramaꞌ. Canpita marëꞌ Yosë nontarahuë. Inaora nohuanton, Sinioro Quisocristo noya catahuainquëmaꞌ, tënahuë.

1 Corintios 10:31

Maꞌsona tërantaꞌ nipatamaꞌ, Yosë yonquiatomaꞌ, noya nicoꞌ aꞌnapitantaꞌ Yosë noya yonquicaiso marëꞌ. Napoaton coshatohuatamaꞌ, oꞌopatamaꞌ, maꞌsona tërantaꞌ nipatamaꞌ, ina yonquicoꞌ.

1 Corintios 14:33

Yosësoꞌ co nisha nisha ayonquirinpoahuëꞌ. Catahuarinpoaꞌ sano cancantacasoꞌ. Niyontonëhuaquëntaꞌ catahuarinpoaꞌ aꞌnaya aꞌnayanpoaꞌ pënëntatëhuaꞌ noya Yosë chinotacaso marëꞌ. Yaꞌipi Yosë imarëhuasopita nisha nisha niyontonëhuaquë,

1 Corintios 4:16

Ina pochin cancantatomaco, nonanco, tënahuë.

2 Corintios 13:11

Nani iyaroꞌsaꞌ ninshitëranquëmaꞌ. Noya cancantocoꞌ, tënahuë. Yaꞌipi cancanëma quëran Yosë imacoꞌ. Pënënanquëmasoꞌ noya natëtomaꞌ, niachinicancancoꞌ. Napopináchin yonquicoꞌ. Noya niniꞌtomaꞌ, yaꞌhuëcoꞌ. Inapohuatamaꞌ, Yosë catahuarinquëmaꞌ. Inasáchin nosoroatonpoaꞌ, catahuarinpoaꞌ sano cancantacaso marëꞌ.

Filipenses 3:17

Yaꞌipinquëmaꞌ iyaroꞌsaꞌ nonanco. Nicatahuacoꞌ ca pochachin imacamaso marëꞌ. Aꞌnaquën nani quiya pochin cancantapi. Inapitantaꞌ nicatomaꞌ, nonancoꞌ.

Filipenses 4:7

Apira apira Yosë nontohuatamaꞌ, asanocancanarinquëmaꞌ. Co imapisopitasohuëꞌ nipirinhuëꞌ co sano cancantopihuëꞌ. Maꞌsha onpohuachinara, aꞌnaroáchin paꞌyanpi. Canpoaso nipirinhuëꞌ Quisocristo imarëhuaꞌ niꞌton, ina yonquiatëhuaꞌ, sano cancantarihuaꞌ.

1 Tesalonicenses 1:6

Ina marëꞌ aparisitopirinacoihuëꞌ, noya cancantërai. Canpitantaꞌ Yosë nanamën noya natanamaꞌ. Imaramaso marëꞌ aparisitopirinënquëmahuëꞌ, Ispirito Santo catahuarinquëmaꞌ niꞌton, nóya cancantëramaꞌ. Quiya pochin cancantatomaꞌ, chiníquën cancantëramaꞌ. Nonanpatamacoi, Quisocristo chachin nonanaramaꞌ.

1 Tesalonicenses 2:14

Iráca Cotia parti naꞌa piyapiꞌsaꞌ Quisocristo imatonaꞌ, natëpi. Aꞌnapita cotioroꞌsariso nipirinhuëꞌ, noꞌhuitonaꞌ chiníquën aparisitopi. Iporasoꞌ iyaroꞌsaꞌ canpitantaꞌ parisitëramaꞌ. Yaꞌhuëhuanoꞌsaꞌ inapochachin aparisitarinënquëmaꞌ.

1 Tesalonicenses 5:23

Yosëíchin asanocancaninpoaꞌ. Canpita marëꞌ ina nontarahuë noyásha anoyacancanchinquëmaꞌ. “Catahuaquëꞌ Sinioro, yaꞌipi cancanëna quëran noyápiachin yonquiꞌinaꞌ. Naporahuaton, yaꞌipi yonquinëna quëran noya nininsopitaráchin nohuanchinaꞌ. Quëma nohuanton, yaꞌipi nonëna quëran huarë noyasáchin niinaꞌ,” itërahuë. Ina quëran Sinioro Quisocristo oꞌmantahuachin, nóya niꞌsarinquëmaꞌ.

2 Tesalonicenses 3:4

Pënënpatëinquëmara, noya natëramacoi. Co aꞌpoatomahuëꞌ, imamiataramaꞌ. Yosë catahuarinquëmaꞌ niꞌton, noya imasaramaꞌ, tënahuë.

2 Timoteo 4:22

Sinioro Quisocristo achinicancainquën. Yaꞌipinquëmaꞌ imaramasopita inaora nohuanton, noya catahuainquëmaꞌ. Nani huachi. Paono

Santiago 1:22

Noꞌtëquën yonquicoꞌ. Yosë nanamën aꞌchintohuachinënquëmaꞌ, ama topinan quëran natancosohuëꞌ. Yaꞌipi cancanëma quëran huarëꞌ natëcoꞌ.

2 Pedro 1:10

Napoaton iyaroꞌsaꞌ, naꞌcon yonquicoꞌ yaꞌipi cancanëma quëran huarëꞌ imacamaso marëꞌ. Yosë huayonatënquëmaꞌ, nontërinquëmaꞌ niꞌton, noyá matërëso pochin imamiatocoꞌ. Inapohuatamaꞌ, co nisha cancantatomaꞌ, aꞌpoaramahuëꞌ.

1 Juan 3:22

Yosë pënëninpoasoꞌ natëhuatëhuaꞌ, noya natanarinpoaꞌ. Ina nohuantërinsoáchin yonquihuatëhuaꞌ, catahuarinpoaꞌ. Ina pochin cancantohuatëhuaꞌ, maꞌpitaso nipatëhuaꞌ, quëtarinpoaꞌ.