Filipenses 4:8 - Chayahuita (Shahui)

⁸ Isoíchin iyaroꞌsaꞌ pënënaranquëmaꞌ. Noꞌtën nanansáchin yonquicoꞌ. Noya imatonaꞌ, noya nipisopita yonquicoꞌ. Ama nonpin nananoꞌsaꞌ natëtocosohuëꞌ. Noyápiachin cancantocoꞌ. Aꞌnapita noyasáchin yonquirapicoꞌ. Noya nahuininsoráchin yonquicoꞌ. Aꞌnapita noya nipisoꞌ yonquiatomaꞌ: “Ma noyacha Yosëri catahuarin paya,” itocoꞌ. Ina pochin yonquihuatamaꞌ, Yosë noya niꞌsarinquëmaꞌ.

Filipenses 4:8 ပူးပေါင်းရင်းမြစ်များ

Génesis 18:19

Nani ina huayonahuë huiꞌninpita, shinpita, inapita noya pënënacaso marëꞌ. Aꞌchintërahuësopita natëtonaꞌ, noya nicacaiso marëꞌ pënënarin. Inapohuachin, shaꞌhuitërahuëso chachin quëtarahuë huachi,” tënin yonquiaton.

2 Samuel 1:23

Saono, Conatan, canpitaso nosororainquëmaꞌ. Noyanquëma niꞌton, yaꞌipicoi nosororainquëmaꞌ. ¿Nanpipoma co niaꞌporamahuëꞌ pora? ¿Chiminamaquënta co niaꞌporamahuëꞌ paꞌ? ¡Panca onianoꞌsasoꞌ yanponpachinara, chiníquën paꞌpi! ¡Canpitaso napoaponahuë taꞌahuatamara, inapita quëran chini chiníquën paꞌnamaꞌ! ¡Paꞌpiniroꞌsantaꞌ, chiníquënoꞌsaꞌ. Canpitaso napoaponahuëꞌ, chini chiníquënoꞌsa ninamaꞌ!

2 Samuel 23:3

Israiroꞌsanpoa chinotërëhuasoꞌ, nontërinco. Yápaꞌpoyarinpoaso naporin: ‘Insosona copirno yaꞌconpachin, noyasáchin nicaton camaitapon. Ca tëꞌhuatatonco natëincoso yaꞌhuërin.

Proverbios 20:7

Aꞌnaquën noyasáchin nicatonaꞌ, co manta yaihuatopihuëꞌ. Napopisopita huiꞌninpitaso paꞌpina chiminpirinahuëꞌ, noya yaꞌhuatona capa cancantaponaꞌ.

Proverbios 31:10

Noya sanapi chachin yoniton mapatan, naꞌcon canaran. Naꞌpiraꞌhuaroꞌsa paꞌton nininsopita quëran, naꞌcon naꞌcon inasoꞌ paꞌtërin.

Proverbios 31:31

Nani maꞌsha nipachina, paꞌpi nóya ninin niꞌton, yaꞌipi piyapi natantonënquë noya nicatona natëapi. Huaꞌanoꞌsa quëran huarëꞌ, noya nicatona paꞌyatapi.

Mateo 22:16

Napoaton aꞌnaquën aꞌpapi Quisoso natanacaiso marëꞌ. Irotisë paꞌyatopisopitantaꞌ caraya paꞌpi. Canconahuatonaꞌ, noyásha nontonpi nonpintacaiso marëꞌ. —Quëmasoꞌ Maistro, noyanquën. Co onporontaꞌ nonpinanhuëꞌ. Yosë pënëninpoasoꞌ noꞌtëquën aꞌchintërancoi. Piyapiꞌsaꞌ noꞌhuipirinënquëontaꞌ, co ina yonquiranhuëꞌ. Co huaꞌan tërantaꞌ tëꞌhuatëranhuëꞌ.

Marcos 6:20

Irotisërisoꞌ Coansha noya natanin. “Nóya quëmapi inasoꞌ. Co oshahuanhuëꞌ,” taꞌton, co nohuantërinhuëꞌ atëpatacasoꞌ. Coanshari pënënpachina, nisha nisha yonquiaponahuëꞌ, noya natanin.

Lucas 16:15

Tëhuapirinahuëꞌ, Quisosori itërin: “Canpitasoꞌ Yosë imaramaso pochin nipomarahuëꞌ, co tëhuënchachin imaramahuëꞌ. Nonpinamaꞌ. Yonquiramaso chachin Yosë nitotërin. Piyapiꞌsaꞌ noya niꞌpirinënquëmahuëꞌ. Cancanëma quëranso yanonpinamaꞌ niꞌton, Yosë co piꞌpian tërantaꞌ noya niꞌsarinquëmahuëꞌ,” itërin.

Lucas 2:25

Quirosarinquë chachin aꞌna quëmapi yaꞌhuërin, Simion itopisoꞌ. Nóya quëmapi inasoꞌ. Nani tahuëri Yosë chinotërin. “Aꞌna tahuëri Yosë nichaꞌësarinpoaꞌ,” taꞌton, Cristo aꞌpaimacasoꞌ ninarárin. Ispirito Santori noyá yaꞌcoancantërin.

Lucas 23:50

Aꞌna cotio huaꞌan yaꞌhuërin, Arimatiaquë yaꞌhuërinsoꞌ. Cosi itopi. Cotio huaꞌan niponahuëꞌ, noya quëmapi. Yosë noꞌtëquën chinotërin. “Aꞌna tahuëri Yosë acorinsoꞌ isoroꞌpaquë huaꞌanëntapon,” taꞌton, Yosë chinotërin. Aꞌnapitari Quisoso yatëpahuachinara, “Ama tëpacosohuëꞌ,” itopirinhuëꞌ, co yanatëpihuëꞌ.

Juan 7:18

Aꞌnaquënsoꞌ inahuara yonquinëna quëran aꞌchinpi. Piyapiꞌsari paꞌyatacaiso marëꞌ napopi. Casoꞌ nipirinhuëꞌ Yosëíchin yonquiato, noꞌtëquën aꞌchinahuë. Inaíchin paꞌyatacaisoꞌ yaꞌhuërin, tënahuë. Co nonpintëranquëmahuëꞌ.

Hechos 10:22

—Capitan Cornirio aꞌparincoi. Inasoꞌ nóya quëmapi. Nisha piyapi niponahuëꞌ, Yosë chinotërin. Yaꞌipi cotioroꞌsari noya niꞌpi. Iꞌhuara yaꞌhuasoꞌ, aꞌnanaya anquëniri yaꞌnotimarahuaton, shaꞌhuitimarin. “Piyapiꞌsaꞌ aꞌpaquëꞌ Pitro macontaꞌinaꞌ. Ina aꞌchintarinquën, noya natanquëꞌ,” itërin niꞌton, aꞌparincoi huëꞌnai, itërin.

Hechos 22:12

Ina ninanoquë chachin aꞌna quëmapi yaꞌhuërin, Yosë noya chinotërinsoꞌ. Ananiasë itopi. Moisësë iráca pënëntërinsoꞌ noꞌtëquën natërin. ‘Inasoꞌ noya quëmapi,’ topi yaꞌipi cotioroꞌsaꞌ.

Hechos 6:3

Napoaton iyaroꞌsaꞌ, canchisë yaꞌpi huayoncoꞌ catahuaꞌinacoiso marëꞌ. Ispirito Santori noyá yaꞌcoancantërinsoꞌ huayoncoꞌ, noya yonquipisoꞌ. Noya quëmapisáchin acoaꞌahuaꞌ cosharoꞌ yocacaiso marëꞌ.

Romanos 13:13

Tahuëri nipachina, aꞌninquëchin niꞌton, noyasáchin ninëꞌ. Aꞌnaquënso nipirinhuëꞌ pitasachin paꞌyatopi. Naꞌa tahuëri nansarápi, oꞌosápi, coshatápi, noꞌpiápi. Ama pitasoꞌ paꞌyatocosohuëꞌ. Ama noꞌpicosohuëꞌ. Ama piꞌpisha tërantaꞌ nimonshitacamasoꞌ yonquicosohuëꞌ. Ama ninoꞌhuicosohuëꞌ. Ama aꞌna piyapi noyapatomaꞌ, noꞌhuicosohuëꞌ.

Romanos 13:3

Noya nipatamaꞌ, co huaꞌanoꞌsaꞌ noꞌhuiarinënquëmahuëꞌ. Co natëhuatamahuëꞌ, noꞌhuiarinënquëmaꞌ niꞌton, tëꞌhuatacasoꞌ yaꞌhuërin. ¿Nohuantëramaꞌ huaꞌanoꞌsaꞌ noya nicainënquëmasoꞌ? Noya nicoꞌ nipachin noya niꞌinënquëmaꞌ.

Romanos 14:18

Ina pochin Quisocristo imapatëhuaꞌ, Yosë noya niꞌsarinpoaꞌ. Piyapiꞌsantaꞌ noya niꞌsarinpoaꞌ.

Romanos 2:29

Yaꞌipi cancanënpoa quëran Yosë imapatëhuaꞌ, tëhuënchachin piyapinënpita pochin niꞌsarinpoaꞌ. Marcanën cancanënpoaquë acotërinpoaꞌ. Co nonënpoaquë acotërinpoahuëꞌ. Ispirito Santo anoyacancantërinpoaꞌ. Ina quëran noya niꞌninpoaꞌ. Co piyapiꞌsaꞌ paꞌyatopirinënpoahuëꞌ, Yosësoꞌ noya niꞌsarinpoaꞌ.

1 Corintios 4:5

Napoaton iporasoꞌ ama nishaꞌhuirapiahuasohuëꞌ. Aꞌna tahuëri Sinioro oꞌmantahuachin, yaꞌipi piyapinpoaꞌ tëniarinpoaꞌ. Yaꞌipi ninëhuasopita anitotarinpoaꞌ. Poꞌoana quëran ninëhuasopitantaꞌ aꞌninquëchin shaꞌhuitarinpoaꞌ. Yonquirëhuasopitantaꞌ nitotërin. Maꞌmarësona tërantaꞌ naporëhuasoꞌ anitotarinpoaꞌ. Naporoꞌ yaꞌipinpoaꞌ noꞌtëquën nontarinpoaꞌ. Noya nipatëhuaꞌ, noya niꞌsarinpoaꞌ.

2 Corintios 13:7

Canpita marëꞌ Yosë nontarai. “Catahuaquëꞌ noyasáchin niinaꞌ,” itërai. Co aꞌnapita noya nicainacoiso marë naporaihuëꞌ. Canpita noya noya imacamaso marëꞌ naporai. Aꞌnapita co noyahuëꞌ yonquiarapipirinacoihuëꞌ, co ina yonquiraihuëꞌ.

2 Corintios 6:8

Aꞌnaquën noya niꞌninacoi. Aꞌnaquënso nipirinhuëꞌ noꞌhuirinacoi. Aꞌna tahuëri: “Paono nóya aꞌchinin,” topi. Aꞌna tahuëriso nipirinhuëꞌ pinorinacoi. Noꞌtëquën aꞌchintopiraihuëꞌ: “Nonpiánpi,” topi aꞌnaquëntaꞌ.

2 Corintios 8:18

Aꞌna iyayantaꞌ aꞌpaarai. Titorëꞌ paꞌsarin. “Inantaꞌ nóya imaton, Quisocristo nanamën noya aꞌchinin,” topi yaꞌipi imapisopita.

2 Corintios 8:21

Noyasáchin nisarai Yosë noya nicaincoiso marëꞌ. Piyapiꞌsantaꞌ noya nicainacoisoꞌ nohuantërai.

Gálatas 5:22

Nipirinhuëꞌ, Ispirito Santo natëhuatëhuaꞌ, catahuarinpoaꞌ ninosorocasoꞌ. Catahuahuachinpoaꞌ, Yosë nohuitatëhuaꞌ, capa cancantarihuaꞌ. “Yosë noya niꞌsarinco,” taꞌtëhuaꞌ, sano cancantarihuaꞌ niꞌton, noya ninicatëhuaꞌ yaꞌhuarihuaꞌ. Piyapiꞌsaꞌ noꞌhuipirinpoahuëntaꞌ, co yanoꞌhuirihuahuëꞌ. Maꞌsha onpohuatëhuantaꞌ, ahuantarihuaꞌ. Nosoroatëhuaꞌ, nóya nontarihuaꞌ. Ispirito Santo catahuahuachinpoaꞌ, noya nicarihuaꞌ. Noꞌtëquën nontarihuaꞌ; co piꞌpisha tërantaꞌ nonpintarihuahuëꞌ.

Efesios 4:25

Yaꞌipi imarëhuasopita Yosë huëntonënquë chachin yaꞌconëhuaꞌ. Iyanpoa pochin ninëhuaꞌ. Napoaton ama ninonpintahuasohuëꞌ. Noꞌtëquënáchin ninontahuaꞌ.

Efesios 5:9

Tahuëri pochin cancantohuatamaꞌ, nóya nisaramaꞌ. Noꞌtëquënáchin yonquiatomaꞌ, noyápiachin cancantaramaꞌ.

Efesios 6:14

Napoaton chiníquën cancantatomaꞌ, panca sintoronquë nitonpotopiso pochin noꞌtën nanan naꞌcon nohuantocoꞌ. Ina imatomaꞌ, noꞌtëquën noncoꞌ. Co piꞌpisha tërantaꞌ nonpinacasoꞌ yaꞌhuërinhuëꞌ. Huaꞌna coton aꞌmopiso pochin noyasáchin nicoꞌ Yosë catahuainquëmaso marëꞌ.

Filipenses 3:1

Iporasoꞌ iyaroꞌsaꞌ Quisocristo yonquiatomaꞌ, nóya cancantocoꞌ. Iráca quëran huarëꞌ inachachin inachachin pënënápiranquëmahuëꞌ, co amirahuëꞌ. Naquëranchachin natantahuatamaꞌ, yonquiantaramaꞌ. Ina quëran noya noya imasaramaꞌ, tënahuë.

Colosenses 4:5

Co imarinsopitasohuëꞌ huëꞌpachinaꞌ, noya nontocoꞌ. Ama tapanatomahuëꞌ, noya aꞌchintocoꞌ. Onpopiontaꞌ noya nanan shaꞌhuitocoꞌ.

1 Tesalonicenses 4:12

Inapohuatamaꞌ, noya yaꞌhuaramaꞌ. Co imapisopitahuëntaꞌ noya niꞌsarinënquëmaꞌ. Napohuatamaꞌ, co mantaꞌ pahuantarinquëmahuëꞌ. Co topinan maꞌpatacasoꞌ yaꞌhuëaponhuëꞌ.

1 Timoteo 2:2

Copirnoroꞌsa marëꞌ Yosë nontocoꞌ noya huaꞌanëntacaiso marëꞌ. Yaꞌipi huaꞌanoꞌsa marëꞌ Yosë nontocoꞌ noya nicacaiso marëꞌ. Noya huaꞌan nipachin, co aquëtëꞌ piyapiꞌsaꞌ ninoꞌhuiapihuëꞌ. Sano yonquiatëhuaꞌ, noya yaꞌhuarihuaꞌ. Ina quëran Yosë yonquiatëhuaꞌ, noya nisarihuaꞌ.

1 Timoteo 3:11

Tiaconaroꞌsantaꞌ natëtonoꞌsaꞌ niinaꞌ. Ama maꞌtona maꞌtona noinasohuëꞌ. Ama pinochinasohuëꞌ. Ama noꞌpiinasohuëꞌ. Noyasáchin niinaꞌ.

1 Timoteo 3:4

Yaꞌipi pëinënquë yaꞌhuëpisopita noya aꞌpaiatonaꞌ, aꞌchinchinaꞌ. Huiꞌninpita noya pënëinaꞌ noꞌtëquën natëcaiso marëꞌ. Sanoanan quëran pënënpachinaꞌ, noya natërapi. Paꞌpinaꞌ noya niꞌsapi.

1 Timoteo 4:12

Co mashonquënhuëꞌ niponahuëꞌ, noya pënëntëquëꞌ mashoroꞌsantaꞌ natëinënquën. Yaꞌipi piyapiꞌsaꞌ noya nontëquëꞌ. Nosoroaton, catahuaquëꞌ. Cancanën quëran huarëꞌ Yosë natëquëꞌ. Sano yonquiaton, noyápiachin cancantëquëꞌ. Noyasáchin niquëꞌ imapisopita nonainënquënso marëꞌ.

1 Timoteo 5:10

Noya nininsoráchin acoꞌinaꞌ. Iso pochin nipisopita: Huaꞌhuinpita noya asoꞌsorinsoꞌ. Niꞌtoroꞌsaꞌ huëꞌpachinara, oꞌshitërinsoꞌ. Co mantaꞌ apirarinsohuëꞌ. Piyapinën pochin cancantaton, imapisopita catahuarinsoꞌ. Parisitopisopita nosororinsoꞌ. Noyasáchin nininsoꞌ. Ina pochin nipisopita acoꞌinaꞌ.

1 Timoteo 5:2

Sanapiꞌsantaꞌ pënënacasoꞌ yaꞌhuërin. Payaroꞌsaꞌ nipachin, mama pochin nicaton, sanoanan quëran pënënquëꞌ noya cancanchinaꞌ. Imoyaroꞌsantaꞌ napopináchin piꞌipitëramasoꞌ oshiparin miáchin pochin niꞌquëꞌ. Ama inapita piꞌpian tërantaꞌ narintëquësohuëꞌ. Noyasáchin yonquiaton, nontëquëꞌ.

Tito 1:8

Niꞌtoroꞌsaꞌ huëꞌpachinaꞌ, noya nonchinaꞌ, oꞌshichinaꞌ. Pahuantërinsopita nosoroꞌinaꞌ. Noyasáchin niꞌtonaꞌ, aꞌnapita catahuainaꞌ. Sano yonquiꞌinaꞌ. Yosë natëtonaꞌ, ina pochin cancanchinaꞌ. Piꞌpisha tërantaꞌ co noyahuëꞌ yonquihuachinaꞌ, aꞌnaroáchin nanianchinaꞌ. Ina pochin cancantohuachinaꞌ, noya ansiano yaꞌconacasoꞌ, tënahuë.

Tito 2:14

Iráca canpoa marëꞌ chiminin oshanënpoaꞌ inquitinpoaso marëꞌ. Anoyacancantërinpoaꞌ piyapinënpita nicacaso marëꞌ. Huëntonënquë chachin yaꞌconpatëhuaꞌ, noya nicacasoráchin nohuantarihuaꞌ.

Tito 2:2

Quëmapiꞌsaꞌ quëmá quëran mashomiachin nipisopita pënënquëꞌ natëtonoꞌsaꞌ niinaꞌ. Ama nisha nisha yonquiꞌinasohuëꞌ. Noya yonquiatona yaꞌhuëꞌinaꞌ. Yosë nanamën noꞌtëquën imainaꞌ. Yaꞌipi piyapi nosoroꞌinaꞌ. Aparisitopirinahuëntaꞌ, ama yaiꞌhuërëchinasohuëꞌ, ahuanchinaꞌ.

Tito 2:7

Quëmantaꞌ api, noyasáchin niquëꞌ aꞌnapita nonanainquënso marëꞌ. Noya cancantaton, Yosë nanamën noꞌtëquën aꞌchinquëꞌ. Yaꞌipi yonquinën quëran huarëꞌ aꞌchinquëꞌ.

Tito 3:14

Yaꞌipi imapisopitantaꞌ shaꞌhuitëquëꞌ noya niinaꞌ. Pahuantërinsopita catahuainaꞌ. Inapotohuachinaꞌ, co topinan yaꞌhuapihuëꞌ.

Hebreos 11:2

Iráca quëran huarëꞌ ina pochin cancantohuachinara, Yosëri noya niꞌnin.

Hebreos 13:18

Quiya marëꞌ Yosë nontocoꞌ. Noya nisarai, taꞌtoi, noyápiachin cancantërai. Yaꞌipi cancanëhuëi quëran Yosë yanatërai.

Santiago 1:27

Tëhuënchachin Yosë chinotohuatëhuaꞌ, piyapiꞌsaꞌ nosoroarëhuaꞌ. Saꞌahuaroꞌsaꞌ, quëyoronoꞌsaꞌ, inapita catahuarëhuaꞌ. Maꞌsha pahuantohuachinaꞌ, quëtacasoꞌ yaꞌhuërin. Aꞌnaquën piyapiꞌsaꞌ co noyahuëꞌ cancantatonaꞌ, co Yosë imapihuëꞌ. Ama inapita nonanhuansohuëꞌ. Noyápiachin cancantohuatëhuaꞌ, noya imasarëhuaꞌ. Inapohuatëhuaꞌ, Yosë noya niꞌsarinpoaꞌ.

Santiago 3:17

Yosëso nipirinhuëꞌ, noꞌtëquën ayonquirinpoaꞌ. Ina catahuahuachinpoaꞌ, noyápiachin cancantarihuaꞌ. Co mantaꞌ noꞌhuitarihuahuëꞌ. Sanoanan quëran nontarihuaꞌ. Aꞌnapita pënënpachinpoaꞌ, noya natanarihuaꞌ. Piyapiꞌsaꞌ nosoroarihuaꞌ. Naporahuaton noyasáchin nisarëhuaꞌ. Co nisha nisha yonquiarihuahuëꞌ. Co nonpintarihuahuëꞌ. Yosëíchin catahuarinpoaꞌ ina pochin cancantacasoꞌ.

1 Pedro 1:22

Yosë nanamënsoꞌ noꞌtën nanan. Ina natëhuatamaꞌ, yaꞌipi co noyahuëꞌ yonquiramasopita naniantaramaꞌ. Noyápiachin cancantaramaꞌ. Yosë anoyacancantërinquëmaꞌ ninosorocamaso marëꞌ. Napoaton imaramasopita capini noya ninosorocoꞌ. Tëhuënchachin cancanëma quëran huarëꞌ ninosorocoꞌ.

1 Pedro 2:12

Co imapisopitahuëꞌ pinorinënquëmaꞌ. “Co noyahuëꞌ nipi,” topi. Ina nipirinhuëꞌ, noyasáchin nicoꞌ niꞌinënquëmaꞌ. Ina quëran aꞌna tahuëri Yosëri catahuarin niꞌton, noꞌtëquën yonquihuachinaꞌ, yonquiarinënquëmaꞌ. “Ma noyacha Yosëri catahuarin niꞌton, noya nipi paya,” tosapi.

1 Pedro 4:8

Yaꞌipi cancanëma quëran noya ninosorocoꞌ. Ina naꞌcon naꞌcon Yosë nohuantërin. Piyapi nosorohuatamaꞌ, co noyahuëꞌ nipirinahuëntaꞌ, aꞌnaroáchin nanan anoyataramaꞌ. Co noyahuëꞌ nipisopita naniantatomaꞌ, co huachi yonquiaramahuëꞌ.

2 Pedro 3:1

Nosororanquëmaꞌ iyaroꞌsaꞌ. Iꞌhua quirica aꞌpatëranquëmaꞌ nontacamaso marëꞌ. Iporasoꞌ naquëranchin ninshitantatënquëmaꞌ, pënëantaranquëmaꞌ noꞌtëquën yonquicamaso marëꞌ.

1 Juan 3:18

“Yaꞌipi imapisopita nosororahuë,” topatëhuaꞌ, ama, apiaꞌhuaroꞌsaꞌ, topinan quëran napoaꞌhuasohuëꞌ. Cancanënpoa quëran huarëꞌ nosoroatëhuaꞌ, catahuahuaꞌ.

1 Juan 3:3

“Aꞌna tahuëri Quisocristo niꞌsarëhuaꞌ,” taꞌtëhuaꞌ, co noyahuëꞌ yonquirëhuasopita naniantarëhuaꞌ. Quisocristosoꞌ noyápiachin cancantërin niꞌton, canpoantaꞌ noyápiachin cancantacasoꞌ nohuantarihuaꞌ.

1 Juan 4:1

Naꞌcon iyaroꞌsaꞌ nosororanquëmaꞌ niꞌton, pënënaranquëmaꞌ. Naꞌa nonpin nanan pënëntonaꞌpiroꞌsaꞌ nonpin nanan aꞌchinapi. “Yosë nanamën aꞌchinahuë,” topirinahuëꞌ, co noꞌtëquën aꞌchinpihuëꞌ. Napoaton aꞌchintohuachinënquëmaꞌ, ama aꞌnaroáchin natëtocosohuëꞌ. “Nonpin nanan nimara,” taꞌtomaꞌ, yonquicoꞌ. Yaꞌipi Yosë quiricanën quëran aꞌchintërinpoasoꞌ yonquiatomaꞌ, tantiacoꞌ. Co ina pochin aꞌchintohuachinënquëmahuëꞌ, ama natëcosohuëꞌ.

Rota naporinso' 3:11

Ama imoya tëꞌhuaquësohuëꞌ. Yaꞌipi yaꞌhuërahuëquë yaꞌhuëpisopita noya sanapi ninansoꞌ nani nitotopi. Napoaton shaꞌhuitërancoso chachin nisarahuë.