Filipenses 4:6 - Chayahuita (Shahui)

⁶ Maꞌsha onpohuatamaꞌ, ama paꞌyancosohuëꞌ. Ama nisha nisha yonquicosohuëꞌ. Yosë nontocoꞌ catahuainquëmaꞌ. Maꞌsha pahuantohuachinquëmaꞌ, nitocoꞌ. “Ma noya catahuarancoi niꞌton, ‘Yosparinquën, Sinioro,’ ” itocoꞌ.

Filipenses 4:6 ပူးပေါင်းရင်းမြစ်များ

1 Reyes 8:28

Ina niponahuëꞌ, Sinioro quëmaso Yosënëhuëinquën. Canta piyapinënco niꞌton, apira nontaranquënsoꞌ natanco. Chinotiinënquënso marëꞌ iso pëiquë huëꞌpachinaꞌ, tahuëri tashirë chachin niꞌsáquëꞌ. Isëquë quëma nininën yaꞌhuëarin niꞌton, nontëranquënsoꞌ natanco.

Salmos 51:15

Catahuaco Sinioro nichaꞌërancosoꞌ shaꞌhuiꞌi. Noya noyanquën ninansoꞌ yonquiato, cantanën cantai.

Proverbios 15:8

Co noyahuëꞌ nipisopita Yosë marëꞌ maꞌsha acopisoꞌ, Yosëri co noyahuëꞌ niꞌsarin. Noya nipisopitari nontohuachinasoꞌ, noya natanaton catahuarin.

Daniel 3:16

Napotohuachina, inahuaso taponaꞌ: —Co ina naꞌcon yonquiraihuëꞌ sinioro copirno. Yosë chinotëraisoꞌ nohuantohuachin, nanitërin pën quëran nichaꞌëincoisoꞌ. Quëmá quëraonta nanitërin nichaꞌëincoisoꞌ. Napoaponahuëꞌ co yanichaꞌëhuachincointaꞌ, noyatapon. Co yosëroꞌsa mosharanso moshapoihuëꞌ. Mamanshi oro quëran anitëransontaꞌ, co isonahuatoi moshapoihuëꞌ, itopi.

Daniel 6:10

Camaitopiso Naniri nitotaponahuëꞌ, co natëtërinhuëꞌ. Pëinënquë paꞌsahuaton, huëꞌërinso patoanaquë yaꞌconin. Huintananënpita Quirosarin parti notëtopisoꞌ iꞌsohuatahuaton, isonin. Isonahuaton Yosë nontërin, chinotërin, naporin. Inachintërin nichinapon chachin nani tahuëri cararo naporin.

Mateo 10:19

Inaquëpita quëpahuachinënquëmaꞌ, ama paꞌyancosohuëꞌ. ‘¿Maꞌcha tonoꞌpoya?’ ama tocosohuëꞌ. Naporoꞌ Yosë anitotarinquëmaꞌ noꞌtëquën aꞌpanitacamaso marëꞌ.

Mateo 13:22

Aꞌnaquën piyapiꞌsantaꞌ nahuanoꞌ yaꞌhuërinso pochin niconpi. Yosë nanamën natanpachinara, yaimapirinahuëꞌ, maꞌsharáchin yonquiatonaꞌ, naniantopi. ‘Naꞌa coriqui, maꞌsha, inapita yaꞌhuëtohuachincoi, nóya cancantarai,’ topirinahuëꞌ, co ina quëran noya cancantacasohuëꞌ nipirinhuëꞌ. Napoaton nahuanoꞌsari imotërinso pochin, maꞌsharáchin yonquiatonaꞌ, Yosë nanamën naniantopi. Co imamiatopihuëꞌ.

Mateo 6:34

Napoaton ama tashiraya maꞌsha onpoamasoꞌ yonquiatomaꞌ, paꞌyancosohuëꞌ. Tashirayantaꞌ maꞌsha onpohuatamaꞌ, paꞌyanacaso yaꞌhuapon niꞌton, co ipora quëranchin ina yonquiatoma co napion ancantápamaso yaꞌhuërinhuëꞌ,” tënin Quisoso.

Mateo 6:8

Ama inapita pochin cancantocohuëꞌ. Coꞌhuara Yosë nonchátërasënquëmahuëꞌ, yaꞌipi pahuantërinquëmasopita nitotërin.

Lucas 10:41

—Imoya. Nisha nisha maꞌsha yonquiaton, co noya cancantëranhuëꞌ.

Lucas 12:22

Ina quëran caꞌtanoꞌsanënpita itapon: “Aꞌnaquën maꞌsharáchin yonquipi. Capacaisoꞌ, oꞌocaisoꞌ, aꞌmocaisoꞌ, inasáchin yonquipi. ‘Nani maꞌsha yaꞌhuëtohuachinco, nóya yaꞌhuarahuë,’ topirinahuëꞌ yonquinëna quëran. Ama iyaroꞌsaꞌ ina pochin cancantocosohuëꞌ.

Lucas 12:29

Ama maꞌsha yonquiatomaꞌ, paꞌyancosohuëꞌ. ‘¿Maꞌcha caꞌnëꞌpoya? ¿Maꞌcha oꞌorëꞌpoya?’ ama tocosohuëꞌ.

Lucas 18:1

“Chiníquën cancantatëꞌ, apira apira Yosë nontacasoꞌ yaꞌhuërin,” taꞌton, pënënto nanan shaꞌhuitantarin ama amitonaꞌ aꞌpocaiso marëhuëꞌ. Aꞌchintaton, itapon:

Lucas 18:7

¡Yosëso nipirinhuëꞌ nóya niꞌton, huayoninsopita naꞌcon catahuarin! Aꞌnapitari aparisitohuachinaꞌ, Yosëri noꞌtëquën anaꞌintarin. Tahuërirë chachin, tashirë chachin ina nontopi niꞌton, catahuaarin. Co naniantarinhuëꞌ.

1 Corintios 7:21

Aꞌnaquëmaꞌ patron marërachin sacatohuatamaꞌ, ama ina marëꞌ sëtocosohuëꞌ. Nipirinhuëꞌ nanitohuatamaꞌ, pipimiatatomaꞌ, canpitaora marëꞌ sacatocoꞌ.

1 Corintios 7:32

Nani maꞌsha yonquihuatëra, sacaiꞌ Yosë marëꞌ sacatacasoꞌ. Co nohuantërahuëꞌ canpitasoꞌ nisha nisha yonquiatomaꞌ, napion cancantamasoꞌ. Quëmapi co saꞌin yaꞌhuëtohuachinhuëꞌ, co nani maꞌsha yonquicasoꞌ yaꞌhuërinhuëꞌ. Nanitërin Sinioroáchin yonquicasoꞌ.

2 Corintios 1:11

Canpitantaꞌ quiya marëꞌ chiníquën Yosë nontocoꞌ catahuaincoi. Naꞌanquëmaꞌ quiya marëꞌ Yosë nontohuatamaꞌ, Yosë catahuarincoi. Ina quëran canpitantaꞌ noya cancantaramaꞌ. “Ma noyacha Yosëri catahuarin paya,” taꞌtomaꞌ, “Yosparinquën Sinioro,” tosaramaꞌ.

Efesios 5:20

Nani tahuëri Tata Yosë nontatomaꞌ: “Yosparinquën,” itocoꞌ. Maꞌsha onpoapomarahuëntaꞌ, noya cancantocoꞌ. “Sinioro Quisocristo nanan quëtërinco niꞌton, nontaranquën,” taꞌtomaꞌ Yosë nontocoꞌ.

Efesios 6:18

Apira apira Yosë nontocoꞌ. Maꞌsha onpohuatamantaꞌ, ina nontocoꞌ catahuainquëmaꞌ. Noya yonquiatomaꞌ, chiníquën nontocoꞌ. Ispirito Santo catahuarinpoaꞌ cancanënpoa quëran huarëꞌ noya nontacasoꞌ. Ama amiatomahuëꞌ, niꞌsácoꞌ ama aꞌnanaya sopai minsëinquëmaso marëhuëꞌ. Yaꞌipi imarëhuasopita marëꞌ Yosë nontocoꞌ.

Colosenses 3:15

Quisocristoíchin asanocancaninpoaꞌ. Ina yonquihuatëhuaꞌ, noya ninicatëhuaꞌ, yaꞌhuarëhuaꞌ. Ina marëꞌ aꞌna huënton pochin Yosë acorinpoaꞌ. Ina catahuahuachinpoaꞌ, co huachi paꞌyanarihuahuëꞌ. Napoaton inasáchin yonquicoꞌ asanocancainquëmaꞌ. Nani tahuëri: “Yosparinquën Sinioro,” itocoꞌ.

Colosenses 3:17

Maꞌsona tërantaꞌ yanipatamaꞌ, Sinioro Quisoso yonquiatomaꞌ, nicoꞌ. Ina yonquiatomaꞌ, noya noncoꞌ. Quisoso catahuarinquëmaꞌ niꞌton, “Yosparinquën,” Tata Yosë itocoꞌ.

Colosenses 4:2

Nani tahuëri Yosë nontocoꞌ. Ama amiatomahuëꞌ, nontácoꞌ. Ama topinan nontocosohuëꞌ. Yaꞌipi cancanëma quëran huarëꞌ noya yonquiatomaꞌ, nontocoꞌ. “Yosparinquën Sinioro,” itocoꞌ.

1 Timoteo 2:1

Yaꞌipi piyapi marëꞌ Yosë nontacasoꞌ yaꞌhuërin. Niyontonpatamaꞌ, naꞌcon nontocoꞌ Yosëri catahuain. “Aꞌpaniarinpoaꞌ mini,” taꞌtomaꞌ: “Yosparinquën Sinioro,” itocoꞌ. Inaꞌton pënënaranquëmaꞌ.

1 Timoteo 5:5

Aꞌnaquën quëyoronoꞌsaso nipirinhuëꞌ, co huaꞌhuinpita yaꞌhuëtërinhuëꞌ. Yosëíchin yonquiarin. “Ina catahuarinco,” taꞌton, nani tahuëri Yosë nontarin. Tashirë chachin nontarin. Inapitasoꞌ catahuahuaꞌ.

1 Pedro 4:7

Ayaroꞌ tahuëri nani yaꞌcariarinpoaꞌ. Napoaton ama nisha nisha yonquicosohuëꞌ. Noya yonquiatomaꞌ, Yosë nontácoꞌ.

1 Pedro 5:7

Ama maꞌsha onpochináchin yonquicosohuëꞌ. Yaꞌipiya Yosë shaꞌhuitocoꞌ catahuainquëmaꞌ. Ina quëran: “Nosoroatonpoaꞌ, co naniantarinpoahuëꞌ,” taꞌtomaꞌ sano cancantocoꞌ.

1 Samuel 1:15

—Co apiya noꞌpirahuëꞌ. Co huino oꞌorahuëꞌ. Co maꞌsha tëranta main nininsoꞌ oꞌoporahuëꞌ, co napion ancantato Yosë nontarahuë. Parisitërahuësoꞌ Sinioro shaꞌhuitarahuë.

1 Samuel 7:12

Ina quëran Samoirosoꞌ, panca naꞌpi macacaiso camaitërin. Ina macatona Mispa quëran Sën itopiso motopiaꞌhuayaquë ira paꞌninsoꞌ huáncana acorin. Ina naꞌpi acorinsoꞌ, aninihuanin: “Ipini-sëri,” itërin. “Isëquë huarëꞌ Sinioro catahuarinpoaꞌ,” tapon ina pochin nohuitërin.