Filipenses 3:9 - Chayahuita (Shahui)

⁹ Quisocristoíchin imasarahuë huachi. Co caora noya nicato chaꞌërahuëꞌ. Co pënëntërinsoꞌ natëto, chaꞌërahuëꞌ. Quisocristoíchin anoyacancantërinco, taꞌto, ina imarahuë. Imapatora, oshanëhuë inquitatonco, anoyacancantërinco. Ina quëran Yosë catahuarinco noya nicaꞌhuasoꞌ. Ina marëꞌ noya niꞌninco.

Filipenses 3:9 ပူးပေါင်းရင်းမြစ်များ

Génesis 7:23

Noisáchin chaꞌërin. Panca nanchaquë yaꞌconpisopitarëꞌ, chaꞌërin. Aꞌnapitaso nipirinhuëꞌ, yaꞌipi taꞌhuantopi. Pëꞌtahuaroꞌsaꞌ, anpiantëhuanoꞌsaꞌ, niohuaratërinsopita, inapitanta yaꞌipi taquiitopi huachi.

1 Reyes 8:46

Quiyasoꞌ piyapicoi, yaꞌipicoi oshahuancoi. Co quëma natëtëinquënhuëꞌ naporai. Napoaton israiroꞌsa tëhuëtatënën oshahuanpachinaꞌ, quëmarisoꞌ chiníquën noꞌhuiton anaꞌintaran. Inimiconënpitari minsëatonaꞌ, yaꞌhuëpiso noꞌpaꞌpaꞌ quëpaponaꞌ. Aquëhuë nipon, yacariahuë nipon, quëpaponaꞌ.

Salmos 14:3

¡Coꞌchi paya! Yaꞌipiya pëshonpi. Chihuërëso pochin nicatona nitapicancanpi. ¡Co aꞌnaya tëranta noya ninaꞌpi yaꞌhuërinhuëꞌ!

Salmos 19:12

Co noyahuëꞌ nipatoira, co quiyaora nitotëraihuëꞌ. Tëhuëtatëinquën oshahuanpiraihuëꞌ, co nitotëraihuëꞌ. Ina marëꞌ anaꞌintancoiso nipirinhuëꞌ, nichaꞌëcoi.

Isaías 53:11

Paꞌpi parisitërinso piquëran: “Tëhuënchachin yaꞌipi nanirahuë huachi,” tosarin. Ina nitotaton noya cancantarin. Sinioro piyapinënsoꞌ, noꞌtëquënáchin ninin. Inapoaton naꞌa piyapiꞌsa nichaꞌësarin. Co noyahuëꞌ nipiso marëꞌ parisitaton inapotarin.

Isaías 53:6

Yaꞌipinpoa ohuicaroꞌsa chihuëpiso pochin ninëhuaꞌ. Canpoara yonquirëhuaso imatëhua naporëhuaꞌ. Napopirëhuahuëꞌ, Siniorori co noyahuëꞌ ninëhuaso marëꞌ inasá aparisitarin.

Isaías 6:5

Ina yonquiato: “¡Maꞌhuantacha caso nicato chiminarahuë paya! ¡Caso co noyahuëꞌ cancantato naponi nonahuë! ¡Aꞌnapitanta ca pochachin cancantopi nipirinhuëꞌ, inapitarëꞌco yaꞌhuërahuë! ¡Napoaporahuëꞌ, Sinioro yaꞌipi nanitapaton yaꞌipi huaꞌanëntërinso quënanahuë!” tënahuë.

Jeremías 23:6

Ina copirno nicasoꞌ, Cota huënton israiroꞌsa chaꞌëponaꞌ. Aꞌnapita israiroꞌsantaꞌ, sano cancan quëran yaꞌhuëaponaꞌ. Nininën nohuitatonaꞌ, ‘Sinioro nichaꞌërinpoasoꞌ,’ itaponaꞌ,” tënin.

Daniel 9:24

Quirosarin ninanoꞌ, israiroꞌsaꞌ, inapita Yosëri anaꞌintërinsoꞌ, canchisë shonca simana pahuanarin nanicasoꞌ. Ina nápo simana nanihuachin, nichaꞌësarinquëmaꞌ. Co noyahuëꞌ nicatoma Yosë tëhuëtëramaꞌ, co natantochináchinhuëꞌ cancantatoma oshahuanamaꞌ. Inapopiramahuëꞌ, nichaꞌësarinquëmaꞌ. Ina piquëranso huachi noyasáchin nicatoma yaꞌhuapomaꞌ. Naporo huachi huaꞌnaton niꞌnansopita naniarin. Pënëntonaꞌpiroꞌsanta Yosë nohuanton anitotërinëmasoꞌ, nanipon. Naporo huachi Noya Noya nininsoꞌ, Yosë marëꞌ acoaponaꞌ.

Mateo 9:13

Oshahuanoꞌsaꞌ pënënaꞌhuaso marëꞌ oꞌmarahuë. “Co noyahuëꞌ yonquiramasopita naniantatomaꞌ, Yosë chachin tahuërëtantacoꞌ,” itërahuë. Aꞌnapitasoꞌ: “Quiyasoꞌ co oshahuancoihuëꞌ,” topiso marëꞌ co naꞌcon aꞌchintërahuëꞌ. Paatomaꞌ, Yosë quiricanën noya nitotocoꞌ noꞌtëquën yonquicamaquë. Inaquë iráca ninshitopi: “Aꞌnaquën topinan quëran chinotatonaco oshanëna marëꞌ maꞌsha tëpapirinahuëꞌ, co aꞌnapita nosoropihuëꞌ. Nosorotacasoꞌ naꞌcon naꞌcon nohuantërahuë,” tënin Yosë, itërin Quisosori.

Romanos 1:17

“Yosëíchin anoyacancantërinpoaꞌ,” topatëhuaꞌ, Yosë noya niꞌsarinpoaꞌ. Oshanënpoaꞌ inquitatonpoaꞌ, co huachi inapita yonquiarinhuëꞌ. Quiricanën quëran ina anitotërinpoaꞌ. “Cancanënpoa quëran huarëꞌ Yosë natëhuatëhuaꞌ, noya niꞌsarinpoaꞌ niꞌton, noya nanpimiatarihuaꞌ,” tënin Yosë quiricanënquë. Co canpoara nanitërëhuahuëꞌ noya cancantacasoꞌ.

Romanos 10:10

“Yosë co onporontaꞌ nonpintarinpoahuëꞌ,” taꞌtëhuaꞌ, cancanënpoa quëran natëhuatëhuaꞌ, noya niꞌsarinpoaꞌ. “Casoꞌ Quisocristo imarahuë,” topatëhuaꞌ, naporo chachin anoyacancantarinpoaꞌ.

Romanos 16:7

Antronico, Coniasë inapitantaꞌ saludos aꞌpatarahuë. Inapitasoꞌ ca pochin cotio piyapi nipi. Quisocristo imapi antaꞌ. Imaraiso marëꞌ napopináchin tashinan pëiquë poꞌmorinacoi. Yosë nohuanton, iráca inahuantaꞌ acopi aꞌchinacaiso marëꞌ. Noya aꞌchinpi. Coꞌhuara ca imayatërasocohuëꞌ, imapi.

Romanos 5:21

Oshahuanëhuaꞌ niꞌton, chiminpatëhuaꞌ, parisitomiatacasoꞌ yaꞌhuëpirinhuëꞌ. Yosësoꞌ inaora nohuanton, nosoroatonpoaꞌ, catahuarinpoaꞌ. Sinioro Quisocristo anoyacancantohuachinpoaꞌ, nanpimiatarihuaꞌ.

Romanos 8:1

Napoaton iporasoꞌ Quisocristo imapatëhuaꞌ, co huachi anaꞌintinpoasoꞌ yaꞌhuërinhuëꞌ.

Romanos 8:3

Iráca Yosë pënënpirinpoahuëꞌ. Co noyahuëꞌ cancantatëhuaꞌ, co nanitërëhuahuëꞌ noꞌtëquën natëcasoꞌ. Ina quëran huiꞌnin chachin isoroꞌpaquë aꞌpaimarin. Piyapi chachin nasitimarin. Co oshahuanaponahuëꞌ, oshanënpoaꞌ inquitinpoaso marëꞌ chiminin. Inapoaton, nichaꞌërinpoaꞌ ama huachi anaꞌintinpoaso marëhuëꞌ.

1 Corintios 1:30

Yosë nohuanton, Quisocristo imarëhuaꞌ. Imapatëhuaꞌ, yaꞌcoancantërinpoaꞌ niꞌton, yonquínahuan pochin Yosë niꞌninpoaꞌ. Naporahuaton, catahuarinpoaꞌ noꞌtëquën yonquicasoꞌ. Oshanënpoaꞌ inquitohuachinpoaꞌ, noya huachi niꞌninpoaꞌ. Nasha cancan quëtërinpoaꞌ noya nicacaso marëꞌ. Quisocristo chachin nichaꞌërinpoaꞌ.

2 Corintios 5:17

Quisocristo imapatëhuaꞌ, Yosë anoyacancantarinpoaꞌ. Nasha cancan yaꞌhuëtarinpoa huachi. Iráca yonquirëhuasopita naniantërëhuaꞌ. Nashamiachin pochin cancantatëhuaꞌ, noya noya yonquiarihua huachi.

2 Corintios 5:21

Iráca Quisocristo co mantaꞌ oshahuanaponahuëꞌ, Yosë nohuanton, yaꞌhuërëtërinpoaꞌ. Oshahuan pochin nicaton, Yosëri chiníquën anaꞌintërin. Canpoa marëꞌ chiminin niꞌton, co huachi oshahuan pochin niꞌninpoahuëꞌ. Quisocristo imapatëhuaꞌ, Yosë nóya niꞌsarinpoaꞌ.

Gálatas 2:16

Napopirëhuahuëꞌ, Moisësë pënëntërinsoꞌ natëhuatëhuaꞌ, co ina marëꞌ Yosë noya niꞌsarinpoahuëꞌ. Quisocristoíchin imapatëhuaꞌ, noya niꞌsarinpoaꞌ. Napoaton canpoantaꞌ Quisocristo natërëhuaꞌ oshanënpoaꞌ inquitinpoaso marëꞌ. Co inso tërantaꞌ pënëntërinsoꞌ natërinso marëꞌ Yosëꞌpaꞌ paꞌsarinhuëꞌ. Quisocristoráchin nichaꞌërinpoaꞌ.

Filipenses 3:6

Inasáchin imato, Quisocristo imapisopita chiníquën aparisitërahuë. “Iráca pënëntërinsoꞌ noꞌtëquën natërahuë,” taꞌto, noya piyapico, topirahuëꞌ.

2 Timoteo 1:9

Yosë chachin anoyacancantërinpoaꞌ. Oshanënpoaꞌ inquitatonpoaꞌ, acorinpoaꞌ nóya nicacaso marëꞌ. Inaora nohuanton, nosororinpoaꞌ. Co noyahuëꞌ nipirëhuahuëꞌ, nosoroatonpoaꞌ, catahuarinpoaꞌ. Coꞌhuara isoroꞌpaꞌ acoyátërasohuëꞌ, ninotonpoaꞌ, nosororinpoaꞌ. Naporoꞌ chinotërin Quisocristo aꞌpaimacasoꞌ. Ina imapatëhuaꞌ, anoyacancantërinpoaꞌ.

Tito 3:5

Co canpoara noya ninëhuaso marëꞌ nichaꞌërinpoahuëꞌ. Inaora nohuanton, Yosë nosoroatonpoaꞌ, nichaꞌërinpoaꞌ. Amatërëso pochin yaꞌipi oshanënpoaꞌ inquitërinpoaꞌ. Oshanënpoaꞌ inquitatonpoaꞌ, anasitaantarëso pochin nasha cancan quëtërinpoaꞌ. Ispirito Santo nohuanton, ina pochin cancantërëhuaꞌ.

Hebreos 6:18

Yosë chachin shaꞌhuitërinpoaꞌ. Naporahuaton “Casoꞌ Yosëco niꞌto, noꞌtëquën nontëranquëmaꞌ,” itomantarinpoaꞌ. Napoaton co onporontaꞌ nonpintarinpoahuëꞌ. Co piꞌpian tërantaꞌ nishataponhuëꞌ, tënëhuaꞌ. Ina yonquiatëhuaꞌ, chiníquën cancantahuaꞌ. Iráca Yosëíchin imarëhuaꞌ catahuainpoaso marëꞌ. “Nichaꞌësarinpoaꞌ,” taꞌtëhuaꞌ, yaꞌipi cancanënpoa quëran imahuaꞌ.

Santiago 3:2

Yaꞌipinpoaꞌ co noyahuëꞌ nicatëhuaꞌ, oshahuanëhuaꞌ. Noyasáchin nonacasosoꞌ saca sacaiꞌ. Noyasáchin nonëhuaꞌ naporini, Yosë pochachin cancanchitërihuahuëꞌ. Co huachi aquëtëꞌ tëhuëꞌitërihuahuëꞌ.

2 Pedro 1:1

Ca Simon Pitroco ninshitaranquëmaꞌ, niꞌcoꞌ. ¿Noya yaꞌhuaramaꞌ? Noya cantaꞌ yaꞌhuarahuë. Quisocristoíchin huaꞌanëntërinco niꞌton, inasáchin natërahuë. Ina acorinco nanamën aꞌchinaꞌhuaso marëꞌ. Yosë nohuanton, canpitantaꞌ Quisocristo natëramaꞌ. Quiya pochin imaramaꞌ niꞌton, canpitantaꞌ nichaꞌësarinquëmaꞌ. Ma noyacha Quisocristo anoyacancantërinpoa paya, tënëhuaꞌ. Inasoꞌ Yosë niꞌton, chinotërëhuaꞌ. Oshanënpoaꞌ inquitatonpoaꞌ, nóya niꞌninpoaꞌ. Napopianachin nosororinpoaꞌ niꞌton, catahuarinquëmaꞌ canpitantaꞌ cancanëma quëran huarëꞌ natëcamasoꞌ.

1 Juan 3:4

Yosë pënëninpoaꞌ. Co ina natëhuatëhuahuëꞌ, oshahuanëhuaꞌ. Co noyahuëꞌ nipatëhuaꞌ, co Yosë natërëhuahuëꞌ.