Filipenses 3:8 - Chayahuita (Shahui)

⁸ Ina naꞌcon naꞌcon nohuantato, inasáchin yonquirahuë. Iráca cotioroꞌsaꞌ noya niꞌninaco. Huaꞌanoꞌsaquë huarëꞌ noya niꞌpirinacohuëꞌ, Quisocristo imapatëra, aꞌporinaco. Noꞌhuipirinacohuëꞌ, co ina yonquirahuëꞌ. Iráca yonquirahuësoꞌ amoro pochin nicato, co piꞌpisha tërantaꞌ nohuantërahuëꞌ. Quisocristo nohuitaꞌhuasoráchin nohuantërahuë. Ina nohuitacasoꞌ noya noya, tënahuë. Inasáchin huaꞌanëntërinco.

Filipenses 3:8 ပူးပေါင်းရင်းမြစ်များ

Salmos 126:6

Shaꞌtamarëꞌ yaꞌpirin quëpatëhua naꞌnëpirëhuahuëꞌ, capa cancantatëhua cantarëꞌnachin huënantarihuaꞌ. Trico tonporoꞌsa ipo ipotahuatëhuaꞌ, huënantarihuaꞌ.

Salmos 73:25

¡Quëmasáchin Sinioro nohuantëranquën! Imaranquën niꞌton, isoroꞌpaquë yaꞌhuërinsopita, co paꞌyatërahuëꞌ.

Isaías 53:11

Paꞌpi parisitërinso piquëran: “Tëhuënchachin yaꞌipi nanirahuë huachi,” tosarin. Ina nitotaton noya cancantarin. Sinioro piyapinënsoꞌ, noꞌtëquënáchin ninin. Inapoaton naꞌa piyapiꞌsa nichaꞌësarin. Co noyahuëꞌ nipiso marëꞌ parisitaton inapotarin.

Malaquías 2:3

Corto huaꞌanoꞌsanquëma nicatoma chiníquën nanantopiramahuëꞌ, ocoiaranquëmaꞌ. Chinotamacoso marëꞌ maꞌsharoꞌsa tëparamasopita chiꞌchinënquë, paꞌpirayataranquëmaꞌ. Naporahuaton chiꞌchi tëꞌyatërëso pochin, canpitanta corto huaꞌan quëran tëꞌyataranquëmaꞌ.

Números 14:30

Caripi, Cosoi, inapitaráchin yaꞌconaponaꞌ. Inaquë poꞌmoanquëmaso marëꞌ noꞌtëquën shaꞌhuitopiranquëmahuëꞌ, co natëtëramahuëꞌ niꞌton, canpitaso co yaꞌconaramahuëꞌ.

Lucas 1:43

Inasoꞌ yaꞌipiya huaꞌanëntarinpoaꞌ. Co casoꞌ chiníquën nanantopirahuëꞌ, ¡ma noyacha ina aꞌshinquën nipiranhuëꞌ, nicaponco huëꞌnan paya!

Lucas 11:20

Caso nipirinhuëꞌ, Yosë catahuarinco sopairoꞌsaꞌ aꞌpacaꞌhuasoꞌ. Ina nohuanton, aꞌparahuë. Napoaton Yosë chachin aꞌpaimarinco huaꞌanëntaꞌhuanquëmaso marëꞌ, tënahuë.

Juan 14:20

Nani nanpiantahuato, noya noya nohuitaramaco. Tëhuënchachin Tata Yosë pochin ninahuësoꞌ nitotaramaꞌ. Imamiataramaco niꞌton, canpitarëꞌco aꞌnaíchin pochin nisarahuë. Yaꞌcoancantaranquëmaꞌ niꞌton, nóya ninohuitarihuaꞌ.

Juan 14:7

Nohuitohuatamaco, Tatahuëntaꞌ nohuitaramaꞌ. Ipora quëran huarëꞌ ina nohuitaramaꞌ. Nani niꞌnamaꞌ, itërincoi.

Juan 16:3

Co Tata Yosë nohuitopihuëꞌ. Cantaꞌ huiꞌninco nipirahuëꞌ, co nohuitërinacohuëꞌ niꞌtonaꞌ, aparisitarinënquëmaꞌ.

Juan 17:3

Quëmasáchin Yosënquën. Isoroꞌpaquë aꞌpaimaranco. Piyapiꞌsaꞌ nohuitahuatënënquën, cantaꞌ nohuitohuachinaco, nanpimiatapi.

Juan 17:8

Shaꞌhuitohuatancora, inachachin aꞌchintërahuë, natëtopi. Quëmá quëran oꞌmarahuë. Quëma chachin aꞌpaimarancosontaꞌ natëpi.

Juan 20:13

—¿Onpoatontaꞌ naꞌnëaran? itërin anquëniri. —Sinioronëhuë nonën nani quëpapi. Intohuasoꞌ quëpapisoꞌ co nitotërahuëꞌ, itërin.

Juan 20:28

—¡Quëma mini Sinioronëhuënquën! Natëranquën. Yosënëhuënquën niꞌton, chinotaranquën, itërin Tomasëri.

Hechos 20:24

Yatëpapirinacohuëntaꞌ, co casoꞌ tëꞌhuatërahuëꞌ. Co ina yonquirahuëꞌ. Sinioro Quisoso natëaꞌhuasoáchin cancantërahuë. Iráca ina shaꞌhuitërinco aꞌchinaꞌhuaso marëꞌ. ‘Yosëri yaꞌipi piyapi nosoroaton, anoyacancantacasoꞌ nohuantërin. Ina noya nanan chachin aꞌchintonquëꞌ,’ itërinco. Napoaton paato, aꞌchintárahuë. Co chiminaꞌhuasoꞌ tëꞌhuatërahuëꞌ.

Romanos 8:18

Isoroꞌpaquë piꞌpian parisitarihuarahuëꞌ, ama ina yonquiaꞌahuasohuëꞌ. Ama ina marëꞌ sëtahuasohuëꞌ. Aꞌna tahuëri Yosëꞌpaꞌ noya noya yaꞌhuëcontarihuaꞌ. Ina yonquiatëhuaꞌ, nóya cancantahuaꞌ tënahuë.

Romanos 8:39

Maꞌsha inápaquë yaꞌhuërinsopita, acoporoquë yaꞌhuërinsopita inapita co nanitopihuëꞌ Yosë quëran osërëinpoasoꞌ. ¡Co insontaꞌ nanitërinhuëꞌ Yosë ananiantinpoasoꞌ! Quisocristo huaꞌanëntërinpoaꞌ. Ina imarëhuaꞌ niꞌton, Yosë nosoromiatërinpoaꞌ.

1 Corintios 2:2

Coꞌhuara paꞌshatërapohuëꞌ, yonquirahuë. “Quisocristo naporinsoáchin aꞌchinarahuë. Corosëquë oshanënpoa marëꞌ chimininsoꞌ aꞌchinchi,” taꞌto, inaíchin shaꞌhuitëranquëmaꞌ. Inasáchin imacamaso marëꞌ.

1 Corintios 9:10

Canpoantaꞌ yonquiatonpoaꞌ, quiricanënquë aninshitërin. Quëmapi iminpachina, co topinan shaꞌninhuëꞌ. “Nitohuachin, masarahuë,” taꞌton, shaꞌnin. Ina quëran shaꞌninsoꞌ cayahuachina, manin.

2 Corintios 4:4

Sopai nohuanton, co nanitopihuëꞌ noꞌtëquën yonquicaisoꞌ. Maꞌsha aꞌpintërëso pochin nanamën quëran Yosë anitotërinpoaꞌ Quisocristo nohuitacaso marëꞌ. Inasoꞌ Yosë chachin ninin. Inapitaso nipirinhuëꞌ somaraya pochin cancantatonaꞌ, co nanitopihuëꞌ natëtacaisoꞌ.

2 Corintios 4:6

Yaꞌnan isoroꞌpaꞌ acoapon yaꞌipi parti tashipirinhuëꞌ: “Niiꞌsohuanchin huachi,” tënin Yosë. Napohuachina, tahuëri yaꞌhuërin. Inapochachin iporasoꞌ cancanënpoaquë aꞌpintërinpoaꞌ ina nohuitacaso marëꞌ. Inasoꞌ noya noya. Quisocristo yaꞌpirin quëran aꞌpintërinpoaso pochin ninin. Ina yonquihuatëhuaꞌ, Yosë chachin anohuitarinpoa huachi.

Efesios 4:13

Inapohuatëhuaꞌ, yaꞌipinpoaꞌ imarëhuasopita napopináchin yonquiarihuaꞌ. Yosë huiꞌnin chachin nóya nohuitarihuaꞌ. Ina quëran noya noya cancantarihuaꞌ. Soꞌsorëso pochin oshaquëran Quisocristo pochachin cancantacasoꞌ yaꞌhuërin.

Filipenses 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Iya Timotioroꞌco nanan aꞌpatarainquëmaꞌ. Quisocristo huaꞌanëntërincoi. Inasáchin natërai. Yaꞌipi Quisocristo imaramasopita Piriposëquë yaꞌhuëramasoꞌ, ninshitaranquëmaꞌ. Ansianoꞌsanquëmaꞌ naꞌcon yonquiranquëmaꞌ. Tiaconoꞌsanquëmantaꞌ yonquiranquëmaꞌ.

Filipenses 3:10

Aquë aquëtëꞌ Quisocristo yanohuitërahuë. Iráca nanpiantarahuaton, chini chiníquën nanantërin. Yaꞌipi nanitaparin niꞌton, catahuaincosoꞌ nohuantërahuë. Noya noya nicaꞌhuaso marëꞌ catahuainco, tënahuë. Iráca Yosë natëton, parisitërin. Canpoa marëꞌ chiminin. Iporasoꞌ cantaꞌ aparisitopirinacohuëꞌ, Quisocristo pochin Yosë natëi. Chimininso pochin yaꞌipi co noyahuëꞌ yonquirahuësoꞌ naniantato, noyápiachin cancanchi, tënahuë.

Filipenses 3:12

Co yaꞌipi cancanëhuë quëran noya noya cancanchatërarahuëꞌ. Ipora huantaꞌ piꞌpian piꞌpian co noyahuëꞌ yonquirahuë. Co Yosë pochachin cancantopirahuëꞌ, Quisocristo nani acorinco ina pochin cancantaꞌhuaso marëꞌ. Napoaton nani tahuëri yonquiárahuë noya noya nicaꞌhuaso marëꞌ.

Filipenses 3:7

Ina marëꞌ Yosë noya niꞌsarinco, tënahuë iráca. Iporaso nipirinhuëꞌ iráca yonquirahuësoꞌ aꞌporahuë Quisocristo imacaꞌhuaso marëꞌ.

2 Timoteo 4:6

Maꞌsha Yosë marëꞌ tëpapiso pochin co huaꞌquiya quëranhuëꞌ aꞌchinahuëso marëꞌ tëpaarinaco. Nani tahuëri naniriarin chiminaꞌhuasoꞌ.

Hebreos 3:14

Iráca Quisocristo natërëhuaꞌ. Chiminaquë huarëꞌ noya imahuaꞌ. Co aꞌpohuatëhuahuëꞌ, Quisocristorëꞌquënpoaꞌ yaꞌhuëcontarihuaꞌ.

1 Pedro 2:7

Quisocristo natëhuatëhuaꞌ, ina naꞌcon nohuantarihuaꞌ. Aꞌnaquënso nipirinhuëꞌ co natëtonaraihuëꞌ, co Quisocristo nohuantopihuëꞌ. Quiricanën quëran naporin: “Naꞌpi quënanpachinara, sacatoroꞌsaꞌ co nohuantopihuëꞌ. Tëꞌyatopi. Ina naꞌpiso nipirinhuëꞌ noya noya ninin pëicaso marëꞌ,” tënin. Inapochachin Quisocristo noya nipirinhuëꞌ co nohuantopihuëꞌ.

2 Pedro 1:2

Yosë inaora nohuanton noya catahuainquëmaꞌ. Asanocancainquëmaꞌ. Noya noya nohuitohuatamaꞌ, noya noya cancantaramaꞌ. Sinioro Quisocristo nohuitohuatamaꞌ, naꞌcon catahuarinquëmaꞌ sano cancantacamaso marëꞌ.

2 Pedro 1:3

Quisocristosoꞌ chiníquën nanantaton, yaꞌipiya nanitaparin. Ina imapatëhuaꞌ, catahuarinpoaꞌ Yosë pochin cancantacaso marëꞌ. Ina Yosë anohuitërinpoaꞌ. Huëntonënquë nani ayaꞌconinpoaꞌ. Inasoꞌ nóya niꞌton, nohuantërin canpoantaꞌ inapochachin cancantacasoꞌ. Ina nohuitohuatëhuaꞌ, catahuarinpoaꞌ onporahuatësona noya noya chinotacasoꞌ.

2 Pedro 1:8

Ina pochin Yosë pënëninpoaꞌ noya noya imacaso marëꞌ. Ina pochin cancantohuatamaꞌ, co topinan quëran imasaramahuëꞌ. Oshaquëran noya noya cancantohuatamaꞌ, noya noya Quisocristo nohuitaramaꞌ.

2 Pedro 3:18

Canpitaso nipirinhuëꞌ, Sinioro Quisocristoíchin yonquicoꞌ. Inaora nohuanton, nosororinquëmaꞌ niꞌton, nani tahuëri yacatahuarinquëmaꞌ. Inasáchin yonquihuatamaꞌ, oshaquëran noya noya nohuitaramaꞌ. Inasoꞌ nichaꞌësarinpoaꞌ. Yaꞌipi piyapiꞌsari chinochinaꞌ. Ayaroꞌ tahuëriquë huarëꞌ inasáchin yonquiaꞌahuaꞌ. Amen. Nani ninshitëranquëma huachi. Pitro

1 Juan 1:3

Inápaquë yaꞌhuaponahuëꞌ, oꞌmahuachina, piyapicoi niꞌnai, aꞌchininsontaꞌ natanai. Paꞌpiontaꞌ anohuitërincoi. Huiꞌnin nohuitatoi, nohuitërai. Nipayarëso pochin ninai. Napoaton ninshitaranquëmaꞌ canpitantaꞌ Quisocristo nohuitacamaso marëꞌ. Quiya pochachin Yosë nohuitocoꞌ nipayarëso pochin nicacamaso marëꞌ.

1 Juan 2:19

“Quiyantaꞌ imarai,” topirinahuëꞌ, nani pipipi. Co tëhuënchachin Yosë huëntonënquë yaꞌconpihuëꞌ. Yaꞌconpi naporini, co pipiitonahuëꞌ. Pipipi quëran nitotërëhuaꞌ. “Co onporontaꞌ cancanëna quëran huarëꞌ imapihuëꞌ,” tënëhuaꞌ.

1 Juan 5:20

Yosë huiꞌnin chachin oꞌmaton, noꞌtëquën Yosë anohuitërinpoaꞌ. Inasáchin noꞌtëquën yonquirin. Yosë nohuitatëhuaꞌ, yonquirinsoráchin imasarëhuaꞌ. Quisocristo nohuitërëhuaꞌ niꞌton, catahuarinpoaꞌ noꞌtëquën yonquicaso marëꞌ. Inaíchin Yosësoꞌ niꞌton, chinotacasoꞌ yaꞌhuërin. Ina nohuitohuatëhuaꞌ, nanpimiatarihuaꞌ.