Filipenses 3:18 - Chayahuita (Shahui)

¹⁸ Aꞌnaquënso nipirinhuëꞌ “Yosë imarahuë,” taponaraihuëꞌ, co noyahuëꞌ cancantopi. Quisocristo oshanënpoaꞌ inquitinpoaso marëꞌ corosëquë chiminin. Nipirinhuëꞌ, co inapitasoꞌ ina yonquipihuëꞌ. Ina nanan aꞌchinpatora, noꞌhuitopi. Iporantaꞌ inapita yonquiato, chiníquën sëtato, naꞌnërahuë. Co inapita nonanacasoꞌ yaꞌhuërinhuëꞌ.

Filipenses 3:18 ပူးပေါင်းရင်းမြစ်များ

Salmos 119:136

Quëma aꞌchinansopita co piyapiꞌsa natëpihuëꞌ. Ina marëꞌ sëtato naꞌnërárahuë.

Isaías 8:11

Sinioro chiníquën nanantaton achinirinco. Inapotahuatonco ama aꞌnapita pochin cancantaꞌhuaso marëhuëꞌ, pënëninco:

Jeremías 9:1

Maꞌcha inotëro parti yaꞌhuëcaꞌhuaso marëꞌ pëi yaꞌhuëtërincohuë paya. Inaquë paꞌsahuato yaꞌhuëꞌitohuëꞌ. Israiroꞌsasoꞌ quëmopinëhuëpita nipirinhuëꞌ, pachitohuëꞌ. Yaꞌipiya quëran inahuasoꞌ, co Yosëíchin cancantopihuëꞌ. Nonpintahuatona patopi. Inapitasoꞌ quëmopinëhuëpita nipirinahuëꞌ, naꞌcon taquiapi niꞌton, tahuëri tashirë chachin naꞌnëi, topirahuë. ¡Iꞌsha paꞌirinsoꞌ, huinan, inapita pochin yaꞌpiratërahuë naporini, noya noya niitonhuëꞌ!

Daniel 4:37

Iporaso ca Napocotonoco, Yosë inápaquë huaꞌanëntërinso chinotërahuë. Inasáchin noya nicato natërahuë. Inasoꞌ maꞌsha nipachina, noꞌtëquënáchin nisahuaton, noyasáchin ninin. “Caso noya noyaco,” topachina, inari nanitërin atapanacasoꞌ, tënahuë.

Lucas 19:41

Ina quëran Quirosarin notënanquë canconpi. Canconpachina, piyapiꞌsaꞌ yonquiaton, Quisoso sëtërin. Sëtaton, naꞌnërin.

Hechos 20:19

Quisocristoíchin natëto, Yosë marëꞌ sacatërahuë. Co aꞌnapita nocanahuëꞌ. ‘Casoꞌ noya noyaco,’ co tënahuëꞌ. Aꞌna tahuëri sëtato, naꞌnërahuë. Cotioroꞌsaꞌ naꞌcon chinotërinaco tëpainacoso marëꞌ. Chiníquën aparisitërinaco.

Romanos 9:2

Tëhuënchachin israiroꞌsaꞌ yonquiato, sëtërahuë. Cancanëhuë quëran huarëꞌ sëtárahuë.

1 Corintios 1:18

Aꞌchinpatëra, “Quisocristo corosëquë chiminin nichaꞌëinpoaso marëꞌ,” itërahuë. Aꞌnaquën natanpachinara, tëhuapi. Naporinsopita chiminpachinaꞌ, parisitomiatapi. Canpoaso nipirinhuëꞌ noya natanëhuaꞌ. Nani Yosë anoyacancantërinpoaꞌ. Yosëíchin nanitaparin nichaꞌëinpoasoꞌ.

1 Corintios 6:9

Co noyahuëꞌ nipisopita co Yosë huaꞌanëntërinquë yaꞌcoanpihuëꞌ. ¡Nani ina nitotëramaꞌ ipora! Ama ninonpintocosohuëꞌ. Aꞌnaquën co Yosë natëtonahuëꞌ, monshihuanapi. Mamanshi moshapi. Saꞌinaꞌ yaꞌhuëtopirinahuëꞌ, aꞌna sanapi sëꞌhuapi. Quëmapi capini nisëꞌhuapi. Taparosachin yonquipi. Inapita pochin nipisopitasoꞌ, co Yosëꞌpaꞌ paꞌsapihuëꞌ.

2 Corintios 11:13

Inapitaso nipirinhuëꞌ naꞌcon nonpintërinënquëmaꞌ. “Quisocristo aꞌparincoi,” itopirinënquëmahuëꞌ, co tëhuënchachin aꞌparinhuëꞌ. Nonpintatënënquëmaꞌ, aꞌchintarinënquëmaꞌ.

2 Corintios 11:29

Aꞌnaquën co chiníquën cancantohuachinahuëꞌ, cantaꞌ ina pochin ninatanahuë. Aꞌna piyapi anishacancantohuachinquëmara, nosororanquëmaꞌ niꞌton, ina noꞌhuirë pochin cancantërahuë.

2 Corintios 2:4

Chiníquën sëtato, iꞌhua ninshitëranquëmaꞌ. “Co yanatërinacohuëꞌ,” taꞌto, sëtërahuë. Naꞌnëchináchin cancantërahuë. Co nohuantërahuëꞌ chiníquën asëtaꞌhuanquëmasoꞌ. Co noꞌhuiranquëmahuëꞌ. Naꞌcon nosororanquëmaꞌ. Ina nitotacamaso marëꞌ ninshitëranquëmaꞌ.

Gálatas 1:7

Co aꞌna nanan, iyaroꞌsaꞌ, yaꞌhuërinhuëꞌ chaꞌëcaso marëꞌ. Quisocristoíchin anoyacancantërinpoaꞌ. Ina imapatëhuaꞌ, oshanënpoaꞌ inquitarinpoaꞌ. Inasáchin yonquipiramahuëꞌ, aꞌnapita huëcatonaꞌ, nisha nanan aꞌchintarinënquëmaꞌ. Napoaton nisha nisha yonquiaramaꞌ. Yanonpintërinënquëmaꞌ. “Co Quisocristoráchin yonquicasoꞌ yaꞌhuërinhuëꞌ,” itërinënquëmaꞌ.

Gálatas 2:14

Ina niꞌsahuato, yaꞌipi piyapi niꞌtërantapaiquë Pitro chiníquën pënënahuë. “Cotio piyapinquën niponahuëꞌ, Quisocristo imaton, iráca pënëntërinsoꞌ naniantëran. Nisha piyapiꞌsarëꞌquën coshataponahuëꞌ, iporasoꞌ naquëranchin maꞌsha aꞌpoantaran. Ina pochin nicaton, piyapiꞌsaꞌ anishayonquiaran. ‘Co Quisocristoíchin nichaꞌërinpoahuëꞌ nimara. Iráca pënëntërinsontaꞌ natëcasoꞌ yaꞌhuërin,’ taꞌtonaꞌ, nonanarinënquën. ¿Nisha piyapiꞌsantaꞌ cotioroꞌsa pochin yaatarantëran ti?

Gálatas 2:21

Inaora nohuanton, Yosë nosoroatonpoaꞌ, huiꞌnin aꞌpaimarin chiminacaso marëꞌ. Co ina naniantërahuëꞌ. Inasáchin imarahuë niꞌton, Yosë noya niꞌsarinco huachi. Iráca pënëntërinsoꞌ natërëhuaso marëꞌ noya niꞌninpoaꞌ naporini, topinan quëran Quisocristo chimiintonhuëꞌ,” itërahuë.

Gálatas 5:21

Co noyahuëꞌ yonquihuachinara, aꞌnapita maꞌshanënpita noyapatonaꞌ, noꞌhuipi. Noꞌpipi, pitaroꞌsaquë caꞌmiatopi, oꞌomiatopi, aꞌnaratipita nipi. Iráca pënënanquëmaꞌ. Iporantaꞌ pënëantaranquëmaꞌ. Inapohuatamaꞌ, co Yosë huaꞌanëntërinquë yaꞌconaramahuëꞌ. Ina pochin nipisopita co Yosëꞌpaꞌ pantarapihuëꞌ.

Gálatas 6:12

Aꞌnaquën ipora huantaꞌ marca yaacotarinënquëmaꞌ. Aꞌnapita cotioroꞌsari noya nicacaiso marëꞌ inapopi. “Quisocristo corosëquë chiminaton, anoyacancantërinpoaꞌ. Inasáchin nichaꞌërinpoaꞌ, topatëhuaꞌ, cotio huaꞌanoꞌsaꞌ aparisitarinënpoaꞌ,” topi. Ama inapitari noꞌhuicaiso marëhuëꞌ napopi.

Gálatas 6:14

Caso nipirinhuëꞌ piyapiꞌsaꞌ paꞌyataꞌhuasoꞌ co yonquirahuëꞌ. Quisocristo chimininsoáchin yonquirahuë. Corosëquë chiminaton, anoyacancantërinpoaꞌ. Niꞌton, inaroꞌco chiminahuëso pochin co maꞌsha isoroꞌpaquë yaꞌhuërinsoꞌ yonquirahuëꞌ. Naporahuaton, isoroꞌparáchin paꞌyatopisopita co huachi noya niꞌninacohuëꞌ.

Efesios 4:17

Quisocristo nanan quëtërinco niꞌton, pënënaranquëmaꞌ. Naꞌa piyapiꞌsaꞌ co imatonaraihuëꞌ, topinan quëran yaꞌhuërapi. Somaraya pochin cancantatonaꞌ, nisha nisha yonquipi. Co natantochináchinhuëꞌ cancantopi niꞌton, co Yosë nanamën nitotopihuëꞌ. Co Yosë yonquiatonaraihuëꞌ, co mantaꞌ Yosë nohuitopihuëꞌ. Ama inapita pochin nicosohuëꞌ.

Filipenses 1:4

Noya cancantato, canpita marëꞌ Yosë nontërahuë.

1 Tesalonicenses 4:6

Aꞌna quëmapi saꞌin ama sëꞌhuacosohuëꞌ. Ama ina pochin niꞌtomaꞌ, soꞌin nonpintocosohuëꞌ. Sëꞌhuahuatamaꞌ, Yosë noꞌtëquën anaꞌintarinquëmaꞌ. Iráca inachachin chiníquën pënënainquëmaꞌ.

2 Tesalonicenses 3:11

Nanan nani natantërahuë. Aꞌnaquëmaꞌ co yasacatatomahuëꞌ, topinan paꞌsáramaꞌ. Naporahuaton, maꞌtoma maꞌtoma nonatomaꞌ, piyapiꞌsaꞌ chinotëramaꞌ, natantërahuë.

2 Pedro 2:10

Aꞌnaquën co piꞌpisha tërantaꞌ Yosë yanatëpihuëꞌ. Inapitasoꞌ chini chiníquën anaꞌintarin. Co Yosë natëtonahuëꞌ, co noyahuëꞌ nicacaisoráchin yonquipi. Aꞌnaratipita taparoꞌ nisáponaraihuëꞌ, co ina marëꞌ tapanpihuëꞌ. “Caora noya nitotërahuë,” taꞌtonaꞌ, co inso tërantaꞌ yanatëpihuëꞌ. Chiníquën nanantopisopita Yosëri acorinsoꞌ co quënanpirinahuëꞌ, pinopi.

Judas 1:13

Pamantaꞌ yonquicoꞌ. Panca pamatohuachina, notohuaroꞌ saꞌpoꞌ, amoroꞌ, inapita quënin. Nonpinaꞌpiroꞌsasoꞌ, ina pochin co sano cancantopihuëꞌ. Co noyahuëꞌ nipi niꞌton tapanacaso nipirinhuëꞌ, co nitotapanpihuëꞌ. Ina marëꞌ Yosëri anaꞌintarin. Tayorantaꞌ yonquicoꞌ. Anotohuachina, tacopirin. Co huachi aꞌpininhuëꞌ. Inapochachin nisha aꞌchinaꞌpiroꞌsantaꞌ, tashinanquë paꞌmiatapi. Quisocristo aꞌpohuachinaꞌ, parisitopiquë pacacasoꞌ yaꞌhuërin huachi.