Filipenses 3:1 - Chayahuita (Shahui)

¹ Iporasoꞌ iyaroꞌsaꞌ Quisocristo yonquiatomaꞌ, nóya cancantocoꞌ. Iráca quëran huarëꞌ inachachin inachachin pënënápiranquëmahuëꞌ, co amirahuëꞌ. Naquëranchachin natantahuatamaꞌ, yonquiantaramaꞌ. Ina quëran noya noya imasaramaꞌ, tënahuë.

Filipenses 3:1 ပူးပေါင်းရင်းမြစ်များ

Nehemías 8:10

Ina quëran Istrasëri itapon: “Paatoma noya coshatocoꞌ. Huino shaꞌmoronta oꞌocoꞌ. Naporahuaton aꞌnaquën co manta yaꞌhuëtohuachinahuëꞌ, përaco caꞌpainëmaꞌ, oꞌopainëmaꞌ. Sinioro marëꞌ tahuëri acorëhua niꞌton, inapocoꞌ. Ama sëtatomarahuëꞌ Sinioro yonquiatoma noya cancantocoꞌ. Inasoꞌ, noya aꞌpaiarinpoaꞌ,” itërin.

Salmos 32:11

Sinioro yonquiatoma capa cancantocoꞌ. Noya piyapitatoma aꞌnapita maꞌshanënanta noya niꞌpatamaꞌ, capa cancantatomaꞌ, “yai,” charácoꞌ.

Salmos 33:1

Noyasáchin ninaꞌpinquëma noya cancantocoꞌ. Yaꞌipi cancanëna quëran imapisopitari Sinioro chinotohuachinaꞌ, noya noya cantapi.

Salmos 37:4

Sinioroíchin nosoroaton capa cancantëquëꞌ. Ina nohuanton nohuantomiatëransopita natanansoꞌ, yaꞌhuëtarinquën.

Salmos 42:4

Ina yonquihuatora, paꞌpi sëtërahuë. Iráca naꞌa niyontonahuatoi, Yosë chinotërai. Pëinënquë yapaꞌpatoira, cari piyapiꞌsa quëparahuë. Capa cancantatoi nonca nonca tërarai. “Yosparinquën Sinioro,” tëcatoi, panca pita ninai. Iporaso napoaponahuëꞌ, parisitárahuë.

Isaías 41:16

Trico pintiarëso pochin nitohuatamaꞌ, panca ihuani quiquirinso pochin yaꞌipi inimiconëmapita ataꞌhuantapomaꞌ. Canpitaso napoaponahuëꞌ, Sinioro yonquiatoma capa cancantaramaꞌ. Naporahuatomaꞌ: ‘Ma noyacha Sinioro imarai paya,’ tosaramaꞌ. Caso noyasáchin ninahuë niꞌton, Israiro chinotërinco.

Isaías 61:10

¡Sinioro yonquiato, capa cancantërahuë! Inasoꞌ Yosënëhuë niꞌton, acapacancaninco. Nichaꞌërinco niꞌton, naporahuë. Noꞌtëquën yonquinaꞌpi pochin acorinco. Saꞌanaꞌpi yancotë ayancotopiso pochin ninahuë. Nanonta soꞌyacaso marëꞌ nisha nishaquë nitaparinso pochin ninahuë.

Joel 2:23

Quirosarinquë yaꞌhuëramasopitantaꞌ, capa cancantocoꞌ. Yaꞌipi Cota huëntonquë yaꞌhuëramasopita, noya cancantocoꞌ. Sinioroso Yosënënpoa niꞌton, ina yonquiatoma noya cancantocoꞌ. Ina nohuanton nohuantasëhua chachin oꞌnaantarin. Iráca, tahuërinënquë chachin oꞌnaninso pochin niaantarin.

Mateo 5:12

Iracantaꞌ Yosë piyapinënpita pënëntohuachinara, aꞌnaquëni inapochachin noꞌhuipi. Napoaton aꞌnapita noꞌhuihuachinënquëmaꞌ, noya cancantocoꞌ. Parisitëramaso marëꞌ Yosëꞌpaꞌ naꞌcon acanaarinquëmaꞌ. Ina yonquiatomaꞌ, capa cancantocoꞌ,” itërin Quisosori.

Lucas 1:47

Anoyacancantërinco niꞌton, nóya cancantërahuë.

Romanos 5:11

Naporahuaton, “Yosë nosororinpoaꞌ,” taꞌtëhuaꞌ, ina paꞌyatërëhuaꞌ. Huiꞌnin chachin nanan anoyatërinpoaꞌ niꞌton, noya cancantërëhuaꞌ.

2 Corintios 13:11

Nani iyaroꞌsaꞌ ninshitëranquëmaꞌ. Noya cancantocoꞌ, tënahuë. Yaꞌipi cancanëma quëran Yosë imacoꞌ. Pënënanquëmasoꞌ noya natëtomaꞌ, niachinicancancoꞌ. Napopináchin yonquicoꞌ. Noya niniꞌtomaꞌ, yaꞌhuëcoꞌ. Inapohuatamaꞌ, Yosë catahuarinquëmaꞌ. Inasáchin nosoroatonpoaꞌ, catahuarinpoaꞌ sano cancantacaso marëꞌ.

Efesios 6:10

Nani iyaroꞌsaꞌ pënënanquëmaꞌ. Yosë imatomaꞌ, nani tahuëri ina nontocoꞌ achinicancainquëmaꞌ. Inasoꞌ chini chiníquën nanantaton, yaꞌipi nanitaparin niꞌton, catahuarinquëmaꞌ.

Deuteronomio 12:18

Insëquësona Siniorori huayonin niꞌton, ina chinotacaso nëꞌmëtë pëi acoramaꞌ. Inaquësáchin inasoꞌ, quëpatoma caꞌsaramaꞌ. Huiꞌnamaꞌ, piyapinëmaꞌ, inapitanta canpitarë chachin capa cancantaponaꞌ. Nihuiroꞌsanta canpitarë yaꞌhuërinsoꞌ, naporo capa cancanchinaꞌ. Sacatëramaquë, pëꞌtahuatëramaquë, inaquëpita Yosë catahuarinquëmaso yonquiatomaꞌ, capa cancantaramaꞌ.

Filipenses 3:3

Yosë marcanën co nonënpoaquë niacotërëhuahuëꞌ. Cancanënpoaꞌ Yosë anoyacancantërinpoaꞌ. Cancanënpoa quëran ina chinotarëhuaꞌ. Ispirito Santo chachin catahuarinpoaꞌ noya chinotacaso marëꞌ. Co canpoara nanitërëhuahuëꞌ noya cancantacasoꞌ. Quisocristoíchin anoyacancantohuachinpoaꞌ, nichaꞌësarinpoaꞌ, tënëhuaꞌ. Napoaton canpoasoꞌ Yosë piyapinënpita ninëhuaꞌ.

Filipenses 4:4

Nani tahuëri Quisocristo yonquiatomaꞌ, noya cancantocoꞌ. Naquëranchin inachachin shaꞌhuichinquëmaꞌ. Maꞌsha onpoapomarahuëꞌ, noya cancantocoꞌ, tënahuë.

Filipenses 4:8

Isoíchin iyaroꞌsaꞌ pënënaranquëmaꞌ. Noꞌtën nanansáchin yonquicoꞌ. Noya imatonaꞌ, noya nipisopita yonquicoꞌ. Ama nonpin nananoꞌsaꞌ natëtocosohuëꞌ. Noyápiachin cancantocoꞌ. Aꞌnapita noyasáchin yonquirapicoꞌ. Noya nahuininsoráchin yonquicoꞌ. Aꞌnapita noya nipisoꞌ yonquiatomaꞌ: “Ma noyacha Yosëri catahuarin paya,” itocoꞌ. Ina pochin yonquihuatamaꞌ, Yosë noya niꞌsarinquëmaꞌ.

1 Tesalonicenses 4:1

Iporasoꞌ iyaroꞌsaꞌ Sinioro Quisoso nanan quëtërincoi niꞌton, pënëantarainquëmaꞌ. Iráca pënënainquëmaꞌ noya nicacamaso marëꞌ. “Noya nipatamaꞌ, Yosë noya niꞌsarinquëmaꞌ,” itërainquëmaꞌ, natëramacoi. Iporasoꞌ aquë aquëtëꞌ natëtatomaꞌ, noyasáchin nicoꞌ, tënahuë.

1 Tesalonicenses 5:16

Ama sëtocosohuëꞌ. Yosë yonquiatomaꞌ, nani tahuëri noya cancantocoꞌ.

Santiago 1:2

Nisha nisha maꞌsha onpoapomarahuëꞌ iyaroꞌsaꞌ, ama sëtocosohuëꞌ. Noya cancantocoꞌ.

1 Pedro 3:8

Yaꞌipinquëmaꞌ noya niniꞌtomaꞌ, yaꞌhuëcoꞌ. Aꞌnaquën sëtohuachinaꞌ, noya nontocoꞌ ama aquëtëꞌ sëchinasohuëꞌ. Noya cancantohuachinaꞌ, canpitantaꞌ noya cancantocoꞌ. Imaramaso capini ninosorocoꞌ. Ninosoroatomaꞌ iyaroꞌsaꞌ nicatahuacoꞌ. Ama ninocancosohuëꞌ. Canpitantaꞌ imoyaroꞌsaꞌ, noya ninontocoꞌ.

1 Pedro 4:13

Quisocristo parisitërinso pochin parisitohuatamaꞌ, noya cancantocoꞌ. Ina quëran chiníquën nanantaton oꞌmantahuachin, noya noya cancantaramaꞌ.

2 Pedro 3:1

Nosororanquëmaꞌ iyaroꞌsaꞌ. Iꞌhua quirica aꞌpatëranquëmaꞌ nontacamaso marëꞌ. Iporasoꞌ naquëranchin ninshitantatënquëmaꞌ, pënëantaranquëmaꞌ noꞌtëquën yonquicamaso marëꞌ.

1 Samuel 2:1

Naporoꞌ Anantaꞌ, Yosë nontaton itapon: “Sinioro yonquiato capa cancantërahuë. Yaꞌipi cancanëhuë quëran capa cancantërahuë. Achinirinco niꞌton, inimicoroꞌsa aꞌpaniaꞌhuaso nanitërahuë. Catahuarinco niꞌton, noya cancantërahuë.