Filipenses 2:15 - Chayahuita (Shahui)

¹⁵ Noyasáchin nicoꞌ aꞌnapita nicatënquëmaꞌ, Yosë yonquiꞌinaꞌ. Ina huiꞌninpita pochin nicatomaꞌ, noyápiachin cancantocoꞌ. Co imapisopitasohuëꞌ nipirinhuëꞌ co Yosë nohuitatonahuëꞌ, co noyahuëꞌ cancantopi. Ninoꞌhuipi, monshihuanacaisoráchin yonquipi, nonpinápi. Co noyahuëꞌ yonquiatonaꞌ, tashi pochin cancantopi. Canpitaso nipirinhuëꞌ, tayoraroꞌsaꞌ tashiꞌ aꞌpintërinso pochin piyapiꞌsaꞌ catahuacoꞌ noꞌtëquën yonquicaiso marëꞌ.

Filipenses 2:15 ပူးပေါင်းရင်းမြစ်များ

Salmos 122:5

Isëquë coisëroꞌsa sacatopi. Tapi quëran pipipisopita copirnoroꞌsantaꞌ, isëquë huaꞌanëntopi.

Éxodo 34:35

Israiroꞌsari nirayahuachinara, Moisësë huënararayatërinso niꞌpi. Naporoꞌ naquëranchin nëꞌmëtërinquë nipaꞌcopirayatantarin. Ina pochin paꞌsárin. Yosë nontacaso nëꞌmëtë pëiquë yaꞌcontaquë huarëꞌ, Yosë nontacaso marëꞌ ocoiantarin.

Proverbios 8:8

Noyasáchin caso nonahuë. Co piꞌpian tëranta nonpintaranquëmahuëꞌ.

Isaías 60:1

Cota huëntonquë, Quirosarinquë, inaquëpita yaꞌhuëramasoꞌ, noya natancoꞌ: Sinioro noya noya nininsoꞌ, canpitarë nisarin. Inasoꞌ, huënaráchin huënaráchin aꞌpinarin. Napoaton canpitantaꞌ, aꞌpininso ahuënaratarinquëmaꞌ.

Daniel 6:4

Huaꞌanoꞌsaꞌ, chirinchiroꞌsaꞌ, inapitariso napoaponahuëꞌ, co quëꞌyapihuëꞌ. Inapoatona shaꞌhuirapicaiso marëꞌ maquë tëranta tëhuërinsoꞌ yonípi. Naniriso noyasáchin nisahuaton, co piꞌpian tëranta ihuatërinhuëꞌ. Napoaton co nanitopihuëꞌ shaꞌhuirapicaisoꞌ.

Mateo 10:16

Ina quëran itaantarin: “Niꞌcoꞌ iyaroꞌsaꞌ. Ohuicaroꞌsaꞌ co nanitopihuëꞌ niaꞌpaicaisoꞌ. Aꞌnaroáchin huëntonën niꞌniroꞌsari mapi. Aꞌchintohuatamaꞌ, aꞌnaquën piyapiꞌsaꞌ niꞌniroꞌsa pochin cancantatonaꞌ, noꞌhuiarinënquëmaꞌ. Napoaton noya yonquicoꞌ. Noꞌhuipirinënquëmaontaꞌ, ama noꞌhuicosohuëꞌ. Noya cancantatomaꞌ, sanoanan quëran nontocoꞌ.

Mateo 17:17

—¡Maꞌhuantacha ninama paya! Canpitasoꞌ co Yosë natëramahuëꞌ. Co natëtochináchinhuëꞌ cancantëramaꞌ. Nani huaꞌquiꞌ aꞌchintopiranquëmahuëꞌ, ¿onporo huarëtaꞌ yanatëramaco? itahuaton, —Huaꞌhuasha quëshico, itërin Quisosori.

Mateo 5:45

Inapotohuatamaꞌ, Yosë pochin cancantaramaꞌ. Inasoꞌ yaꞌipi piyapiꞌsaꞌ nosororin. Ina nohuanton, piꞌi, oꞌnan, inapita yaꞌhuërin noya nanpicaso marëꞌ. Co imarinsopita marëáchin piꞌi aꞌpininhuëꞌ. Noya nipisopita, oshahuanoꞌsantaꞌ, yaꞌipiya aꞌpintërin. Naporahuaton, oꞌnaontaꞌ napopianachin acotërinpoaꞌ maꞌsha apapotacaso marëꞌ.

Mateo 5:48

Tata Yosë pochin cancantacasoꞌ yaꞌhuërin. Inaso noyasáchin ninin niꞌton, canpitantaꞌ ina pochin cancantatomaꞌ, noyasáchin nicoꞌ,” tënin.

Lucas 1:6

Cato chachin noya Yosë imapi. Yaꞌipi pënëntërinsoꞌ noꞌtëquën natëpi.

Lucas 6:35

Canpitaso nipirinhuëꞌ inimiconëmantaꞌ nosorocoꞌ. Inapitantaꞌ catahuacoꞌ. Piyapiꞌsaꞌ pahuantohuachinaꞌ, coriqui aꞌnancoꞌ. ‘Co iꞌhuërëtaponcohuëꞌ nimara,’ tapomarahuëntaꞌ, aꞌnancoꞌ. Ina pochin nipatamaꞌ, Yosëꞌpaꞌ naꞌcon canaaramaꞌ. Yosë pochachin cancantaramaꞌ. Inasoꞌ yaꞌipi piyapiꞌsaꞌ nosoroaton, catahuarin. Oshahuanoꞌsantaꞌ nosororin. Co ‘Yosparinquën,’ itopirinahuëꞌ, catahuarin.

Juan 5:35

Coanshasoꞌ noya quëmapi. Huaroro noya orotërinso pochin niꞌton, noya anitotërinquëmaꞌ. Yaꞌnan natanpatamara, huaꞌquimiachin paꞌyatëramaꞌ.

Hechos 2:40

Itahuaton, naꞌcon pënënin. —Ipora yaꞌhuëpisopita co mantaꞌ Yosë yanatëpihuëꞌ. Ina marë noꞌtëquën anaꞌintarin. Canpitaso nipirinhuëꞌ ama inapita pochin cancantocosohuëꞌ. Yosë nontocoꞌ anoyacancanchinquëmaꞌ. Ina quëran chaꞌësaramaꞌ, itërin.

Hechos 20:30

Aꞌnaquëontaꞌ Quisoso imaponaraihuëꞌ, aꞌporahuatonaꞌ, nisha aꞌchinaponaꞌ. Yanonpintarinënquëmaꞌ. Inahuaꞌ imacamaso marëꞌ napotarinënquëmaꞌ.

Romanos 16:19

Canpitaso nipirinhuëꞌ noya natëramaꞌ niꞌton, yaꞌipi piyapiꞌsaꞌ natantopi. Ina marëꞌ noya cancantërahuë. Naꞌcon yonquicoꞌ noya nicacamaso marëꞌ. Ama oshahuanamaso marëꞌ yonquicosohuëꞌ.

1 Corintios 1:8

Oꞌmantaquë huarëꞌ inasoꞌ achinicancanarinquëmaꞌ. Oshanëmaꞌ inquitatënquëmaꞌ, noyápiachin cancan quëtërinquëmaꞌ. Imamiataramaꞌ niꞌton, oꞌmantahuachin, co insontaꞌ anaꞌintarinquëmahuëꞌ.

2 Corintios 6:17

Ina quëran Siniorori itantarin: “Aꞌnaquën co noyahuëꞌ cancantohuachinaꞌ, ama inapitarëꞌquëmaꞌ nipayacosohuëꞌ. Co noyahuëꞌ yonquipisoꞌ tananpitocoꞌ. Inapotohuatamaꞌ, noya niꞌsaranquëmaꞌ.

Efesios 5:27

Yaꞌipi imarëhuasopita noya noya acoinpoaso marëꞌ naporin. Co piꞌpian tërantaꞌ nëꞌhuëtërinso pochin cancantacasoꞌ nohuantërinhuëꞌ. Napoaton yaꞌipi co noyahuëꞌ yonquirëhuasopita inquitërinpoaꞌ. Noyápiachin cancan quëtërinpoa niꞌton, noya niꞌsarinpoaꞌ.

Deuteronomio 32:5

Canpitaso paꞌpi co noyanquëmahuëꞌ. Yosë chachin nipirinhuëꞌ tëhuëtëramaꞌ. Co huiꞌninpita pochin nicaimaso yaꞌhuërinhuëꞌ.

Filipenses 1:10

Yosë nanamën naꞌcon yonquihuatamaꞌ, noya noya nitotatomaꞌ, noya nisaramaꞌ. Noꞌtëquën yonquihuatamaꞌ, noyápiachin cancantaramaꞌ. Noyasáchin nipatamaꞌ, Quisocristo oꞌmantahuachina, nóya niꞌsarinquëmaꞌ. Co anaꞌintarinquëmahuëꞌ.

Filipenses 3:6

Inasáchin imato, Quisocristo imapisopita chiníquën aparisitërahuë. “Iráca pënëntërinsoꞌ noꞌtëquën natërahuë,” taꞌto, noya piyapico, topirahuëꞌ.

1 Tesalonicenses 5:23

Yosëíchin asanocancaninpoaꞌ. Canpita marëꞌ ina nontarahuë noyásha anoyacancanchinquëmaꞌ. “Catahuaquëꞌ Sinioro, yaꞌipi cancanëna quëran noyápiachin yonquiꞌinaꞌ. Naporahuaton, yaꞌipi yonquinëna quëran noya nininsopitaráchin nohuanchinaꞌ. Quëma nohuanton, yaꞌipi nonëna quëran huarë noyasáchin niinaꞌ,” itërahuë. Ina quëran Sinioro Quisocristo oꞌmantahuachin, nóya niꞌsarinquëmaꞌ.

1 Timoteo 3:10

Ama aꞌnaroáchin ayaꞌconcosohuëꞌ. Piꞌpian tënitomaꞌ, niꞌcoꞌ. Noya nipachinaꞌ, yaꞌcoinaꞌ.

1 Timoteo 3:2

Napoaton yayaꞌconpachinaꞌ, nóya nipisopitaráchin yaꞌcoinaꞌ. Ama piyapiꞌsari pinocaiso marëhuëꞌ noyasáchin niinaꞌ. Aꞌna saꞌináchin yaꞌhuëchinaꞌ. Co monshihuanacaisoꞌ yaꞌhuërinhuëꞌ. Sano yonquiꞌinaꞌ. Ama nisha nisha yonquiꞌinasohuëꞌ. Yaꞌipi cancanëna quëran imainaꞌ. Niꞌtoroꞌsaꞌ huëꞌpachinaꞌ, noya nonchinaꞌ, oꞌshichinaꞌ. Aꞌchinacaisoꞌ noya nitochinaꞌ.

1 Timoteo 5:14

Napoaton nanoꞌsaꞌ soꞌinari ayananpihuachinaꞌ, soꞌyantaꞌinaꞌ, tënahuë. Soꞌyantatonaꞌ, huaꞌhuaantaꞌinaꞌ. Soꞌinaꞌ, huaꞌhuinpita, inapita nocomahuachinaꞌ, noya nisapi. Napohuachinaꞌ, co aꞌnapitari pinosapihuëꞌ.

1 Timoteo 5:20

Ansiano tëhuënchachin co noyahuëꞌ nipachina, pënënacasoꞌ yaꞌhuërin. Yaꞌipi imapisopita ayontonahuaton, chiníquën pënënquëꞌ. Aꞌnapitantaꞌ tëꞌhuatatonaꞌ, noya nicacaiso marëꞌ pënënquëꞌ.

1 Timoteo 5:7

Nani api shaꞌhuitëranquën. Yaꞌipi imapisopita pënënquëꞌ natëinaꞌ. Ama aꞌnapitari pinocaiso marëhuëꞌ noya niinaꞌ.

Tito 1:6

Ansianoꞌsaꞌ yaacohuatan, noya imapisopitaráchin acoquëꞌ. Aꞌnaíchin saꞌin yaꞌhuëtërinsoꞌ. Huiꞌninpitantaꞌ Quisocristo imainaꞌ. Aꞌnaquënsoꞌ ansiano yayaꞌconpirinahuëꞌ, huiꞌninpita co noya cancantopihuëꞌ. Co yonquínahuan nipihuëꞌ. Co paꞌpinaꞌ yanatëpihuëꞌ. Co huiꞌninpita tërantaꞌ pënënpachinahuëꞌ, aꞌnapitarintaꞌ co yanatëponahuëꞌ. Napoaton co inapita acocasoꞌ yaꞌhuërinhuëꞌ.

Tito 2:10

Ama ihuachinasohuëꞌ. Noꞌtëquën natëtonaꞌ, ama piꞌpian tërantaꞌ nonpiinasohuëꞌ. Noya nipachinaꞌ, aꞌnapitarintaꞌ noya niꞌsapi. “Tata Yosë imatonaꞌ, noya nipi. Ma noyacha Yosë nanamënso paya,” taponaꞌ. Inasoꞌ tëhuënchachin nichaꞌësarinpoaꞌ.

Tito 2:15

Ina nanan aꞌchintáquëꞌ. Noya nontaton, achinicancanquëꞌ. Co noyahuëꞌ nipachinaꞌ, chiníquën nanantaton, pënënquëꞌ. Co mashonquënhuëꞌ niponahuëꞌ, Quisocristo nanamën aꞌchintëran niꞌton, natëinënquënsoꞌ yaꞌhuërin.

Hebreos 7:26

Quisocristoíchin nanan anoyatërinpoaꞌ. Inasoꞌ corto huaꞌan chini chiníquën nanantërinso pochin nicaton, nóya ninin. Co piꞌpian tërantaꞌ oshahuaninhuëꞌ. Co nëꞌhuëtërinso pochin nininhuëꞌ. Co oshahuanoꞌsa pochin cancantërinhuëꞌ. Inápaquë panantahuachina, Yosëri chini chiníquën nanan quëtërin.

1 Pedro 2:12

Co imapisopitahuëꞌ pinorinënquëmaꞌ. “Co noyahuëꞌ nipi,” topi. Ina nipirinhuëꞌ, noyasáchin nicoꞌ niꞌinënquëmaꞌ. Ina quëran aꞌna tahuëri Yosëri catahuarin niꞌton, noꞌtëquën yonquihuachinaꞌ, yonquiarinënquëmaꞌ. “Ma noyacha Yosëri catahuarin niꞌton, noya nipi paya,” tosapi.

1 Pedro 2:9

Imarëhuasopitaso nipirinhuëꞌ nohuantërinpoaꞌ. Huayoninpoaꞌ ina nohuitacaso marëꞌ. Inasáchin huaꞌanëntërinpoaꞌ. Nani acorinpoaꞌ corto huaꞌanoꞌsa pochin nicatëhuaꞌ, ina marëꞌ sacatacasoꞌ. Noyápiachin cancan quëtërinpoaꞌ. Yosë piyapinënpoaꞌ ninëhuaꞌ. Iráca tashi pochin cancantopirëhuahuëꞌ, Yosë nichaꞌërinpoaꞌ tahuëri pochin cancantacaso marëꞌ. Acorinpoaꞌ Yosë noya nosororinpoasoꞌ shaꞌhuicaso marëꞌ.

2 Pedro 3:14

Napoaton iyaroꞌsaꞌ, ina ninatomaꞌ naꞌcon yonquicoꞌ noyasáchin nicacamaso marëꞌ. “Quisocristo nanan anoyatërinpoaꞌ,” taꞌtomaꞌ, noya niniꞌtomaꞌ, yaꞌhuëcoꞌ. Yaꞌipi co noyahuëꞌ yonquiramasopita naniantatomaꞌ, noyápiachin cancantocoꞌ. Ina quëran oꞌmantahuachin, noya niꞌsarinquëmaꞌ.

Apocalipsis 2:5

Iráca naporamasoꞌ yonquiantatomaꞌ, noya niantacoꞌ. Yaꞌipi co noyahuëꞌ yonquiramasopita naniantatomaꞌ, yaꞌipi cancanëma quëran nosoroantaco. Naporahuaton canpita capinintaꞌ noya ninosoroantacoꞌ. Co noya cancantantahuatamahuëꞌ, paaparahuatënquëmaꞌ, anaꞌintaranquëmaꞌ. Nanparin tacopirinso pochin nisaramaꞌ. Aꞌna tahuëri yaꞌhuëramaquë co insontaꞌ imasarinacohuëꞌ.

Apocalipsis 3:9

Aꞌnaquën nonpintatënënquëmaꞌ, ‘Yosë piyapinënpitacoi quiyantaꞌ,’ itopirinënquëmahuëꞌ, Satanasë huëntonënquë yaꞌconpi. Aꞌna tahuëri ca nohuanto, inapitantaꞌ isonahuatonaꞌ, noya nontarinënquëmaꞌ. ‘Tëhuënchachin noꞌtëquën imaramaꞌ. Quisocristo nosororinquëmaꞌ,’ itarinënquëmaꞌ.