Filipenses 2:13 - Chayahuita (Shahui)

¹³ Co noyahuëꞌ cancantatomaꞌ, co canpitaora nanitëramahuëꞌ Yosë natëcamasoꞌ. Nipirinhuëꞌ, Yosë nontohuatamaꞌ, catahuarinquëmaꞌ nohuantacasoꞌ. Ina quëran Yosë yanatëhuatamaꞌ, inari chachin catahuarinquëmaꞌ noꞌtëquën natëcamasoꞌ. Inasoꞌ noya noya ayonquiarinquëmaꞌ.

Filipenses 2:13 ပူးပေါင်းရင်းမြစ်များ

Esdras 1:1

Pirsia copirno Siro itopisoꞌ, aꞌna piꞌipira huaꞌanëntarin. Naporoꞌ Irimiasë quëran Sinioro shaꞌhuirinsoꞌ nanicaso marëꞌ, Siroso nanan aꞌparin. Yaꞌipi huaꞌanëntërinquë nitotacaiso marëꞌ iso pochin ninshitahuaton aꞌparin:

Esdras 1:5

Ina nitotatona Cota huënton huaꞌanoꞌsaꞌ, Mincamin huënton huaꞌanoꞌsaꞌ, corto huaꞌanoꞌsaꞌ, nihuiroꞌsaꞌ, inapitaso yonquipi panantacaisoꞌ. Sinioro chinotacaso pëi Quirosarinquë yaanoyataantapi. Sinioro nohuanton ina pochin yonquiatonaꞌ, tapatapi huachi.

Esdras 7:27

Copirnori quirica quëtohuachina, Istrasësoꞌ Yosë nontaton tapon: “Yosparinquën Sinioro. Quëmaso Yosënquën. Shimashonëhuëpitanta chinotërinquën. Quëma nohuanton, Pirsia copirno noya yonquirin. Quirosarinquë chinotiinënso pëi noya nicaton, quëma marëꞌ sacataꞌhuaisoꞌ catahuarincoi. Quëma nohuanton copirno nosororinco. Ina ayonquipisopitantaꞌ, catahuarinaco. Aꞌnapita huaꞌanoꞌsanta napotërinaco. Ina marëꞌ chiníquën cancantërahuë. Inapita catahuarinaco niꞌton, chiníquën nanantopisopita israiroꞌsa ayontonahuë. Inapitarëꞌcoi pacaꞌhuaiso marëꞌ naporahuë,” itërin.

Salmos 110:3

Copirno yaꞌconanso tahuëri chachin, piyapinënpita noyá nitaparahuatonaꞌ, paꞌyataponën. Natëmiatinënquënso marëntaꞌ, shaꞌhuitaponën. Poroncayo nani tashi shipihuaninso pochin huiꞌnapitëransonta ina chachin nisápon.

Jeremías 31:33

Naporo tahuëriꞌsa israiroꞌsarëꞌco anoyatohuato, iso pochin nisarahuë: Aꞌchintërahuësopita yonquinëna quëran anitotarahuë. Ina nitotohuachinaꞌ, noꞌtëquën natëtacaisoꞌ catahuararahuë. Casáchin chinotarinaco. Inapitanta piyapinëhuëpita nisapi.

Lucas 12:32

Naquëranchin itaantarin: —Ama iyaroꞌsaꞌ paꞌyancosohuëꞌ. Ohuica pëꞌtahuanaꞌpi pochin nicato aꞌpaiaranquëmaꞌ. Caraichinquëmaꞌ nipomarahuëꞌ, Yosë noya niꞌninquëmaꞌ. Huaꞌanëntërinquë chachin ayaꞌconinquëmaꞌ.

Lucas 2:14

“¡Ma noyacha Yosëso paya! Inápaquë yaꞌhuaponahuëꞌ, piyapinquëmaꞌ yonquirinquëmaꞌ. Cancantatoma ina yanatëramasopitasoꞌ sano cancantaramaꞌ,” itopi anquëniroꞌsari.

Juan 3:27

—Co Yosë nohuantërinhuëꞌ naporini, co napoꞌitonahuëꞌ. Yaꞌipinpoaꞌ Yosë acorinpoaꞌ maꞌsona nicacasoꞌ.

Juan 6:45

Pënëntonaꞌpiroꞌsaꞌ iráca ninshitopi. “Yaꞌipi piyapiꞌsaꞌ Yosëri aꞌchintarin,” topi, ninshitatonaꞌ. Tatahuë natanatomaꞌ natëhuatamaꞌ, imasaramaco.

Juan 6:65

Ina quëran itantarin: —Napoaton itaranquëmaꞌ. Co Yosëri anitotohuachinhuëꞌ, co insontaꞌ nanitarinhuëꞌ imaincosoꞌ, itërin.

Hechos 11:21

Yosëri catahuarin niꞌton, naꞌa piyapiꞌsaꞌ natëtonaꞌ, imapi. Iráca yonquipisoꞌ naniantatonaꞌ, Quisoso imasapi.

Romanos 12:3

Yosë nosoroatonco, acorinco piyapiꞌsaꞌ aꞌchintaꞌhuasoꞌ. Nani tahuëri catahuarinco. Napoaton pënënaranquëmaꞌ. Yaꞌipinquëmaꞌ sano yonquicoꞌ. Ama aꞌnapita nocancosohuëꞌ. Yosë nisha nisha acorinpoaꞌ. Nisha nisha catahuarinpoaꞌ maꞌsona nohuantërinsoꞌ nicacasoꞌ. Napoaton, co aꞌnapita nocanacasoꞌ yaꞌhuërinhuëꞌ. Noꞌtëquën yonquiatomaꞌ, maꞌmarësona acorinquëmasoꞌ nitotocoꞌ. Aꞌnaya aꞌnayanquëmaꞌ anitotarinquëmaꞌ.

Romanos 9:11

“Huaꞌhua nininsoꞌ chini chiníquën nanantarin. Paninansoꞌ co onpopinchin chiníquën nanantaponhuëꞌ,” itërin. Ina quëran itantarin: “Cacopo nosoroato, huayonahuë. Isaoso nipirinhuëꞌ co onpopinchin nohuantërahuëꞌ,” tënin Yosë quiricanënquë. Coꞌhuara nasichátërasoihuëꞌ, naporin. Co yaꞌhuëyátërasoihuëꞌ, yonquiaton, huayonin. “Noya nininso marëꞌ Yosëri huayonin,” topiramahuëꞌ, co ina marëꞌ huayoninhuëꞌ. Inaora nohuanton, huayonin.

Romanos 9:16

Napoaton co canpoara nohuanton, Yosë huëntonënquë yaꞌconëhuahuëꞌ. Noya nipirëhuahuëntaꞌ, co canpoara nanitërëhuahuëꞌ yaꞌconacasoꞌ. Inaora nohuanton, Yosë ayaꞌconinpoaꞌ. Nosoroatonpoaꞌ, ayaꞌconinpoaꞌ.

1 Corintios 12:6

Aꞌnaya aꞌnayanpoaꞌ ananitërinpoaꞌ nisha nisha nicacaso marëꞌ. Yaꞌipinpoaꞌ Yosë chachin catahuarinpoaꞌ.

1 Corintios 15:10

Inaora nohuanton, Yosë catahuarinco. Co catahuarincohuëꞌ naporini, co mantaꞌ nanichitohuëꞌ. Catahuahuachincora, paꞌnahuë nanamën aꞌchinapo. Co topinan quëran catahuarincohuëꞌ. Casoꞌ naꞌcon naꞌcon Yosë marëꞌ sacatërahuë. Co carisoꞌ piyapiꞌsaꞌ anoyacancantërahuëꞌ. Yosë achinicancaninco aꞌchinaꞌhuaso marëꞌ. Ina catahuarinco niꞌton, aꞌchinpatëra naꞌa piyapiꞌsaꞌ imasapi.

2 Corintios 3:5

Quiyaora co piꞌpisha tërantaꞌ nanitëraihuëꞌ noya aꞌchintaꞌhuainquëmasoꞌ. Yosëíchin ananitërincoi. Co catahuarincoihuëꞌ naporini, co canpitantaꞌ cancanëma quëran imaitomahuëꞌ.

Efesios 1:11

Inaora nohuanton, acorinpoaꞌ piyapinënpita nicacaso marëꞌ. Quisocristo imapatëhuaꞌ, huiꞌnin pochin niꞌsarinpoaꞌ. Napoaton aꞌna tahuëri Yosëꞌpaꞌ noya noya acoarinpoaꞌ. Iráca chachin yonquirinpoaꞌ niꞌton, huëntonënquë ayaꞌconinpoaꞌ.

Efesios 1:5

Iráca quëran huarëꞌ nosoroatonpoaꞌ, acorinpoaꞌ huëntonënquë yaꞌconacasoꞌ. Quisocristo anoyacancantërinpoaꞌ niꞌton, huiꞌnin pochachin niꞌninpoaꞌ. Inaora nohuanton, noya yonquirinpoaꞌ.

Efesios 1:9

Inaora nohuanton, nóya yonquirinpoaꞌ. Co canpoara nitotopirëhuahuëꞌ, yonquirinpoasoꞌ anitotërinpoaꞌ. Iráca quëran huarëꞌ yonquirin Quisocristo aꞌpaimacasoꞌ.

Efesios 2:8

Nosoroatonpoaꞌ, inaora nohuanton nichaꞌërinpoaꞌ. “Quisocristoíchin anoyacancantërinpoaꞌ,” topatëhuaꞌ, oshanënpoaꞌ inquitatonpoaꞌ, nichaꞌërinpoaꞌ. Co canpoara nanitërëhuahuëꞌ Yosë imacasoꞌ. Ina catahuarinpoaꞌ cancanënpoa quëran natëcasoꞌ.

2 Tesalonicenses 1:11

Napoaton nani tahuëri canpita marëꞌ Yosë nontërai: “Quëma nohuanton Sinioro imarinënquën. Napoaton, catahuaquëꞌ noyasáchin niinaꞌ. Noya noya yaimarinënquën niꞌton, catahuaquëꞌ noyápiachin cancanchinaꞌ. Quiyaora co nanitëraihuëꞌ. Quëmasáchin Sinioro ananitaparancoi. Catahuaquëꞌ yaꞌipi cancanëna quëran natëinënquën,” itërahuë, Yosë nontato. Noya nipatamaꞌ, Yosë noya niꞌsarinquëmaꞌ.

2 Timoteo 1:9

Yosë chachin anoyacancantërinpoaꞌ. Oshanënpoaꞌ inquitatonpoaꞌ, acorinpoaꞌ nóya nicacaso marëꞌ. Inaora nohuanton, nosororinpoaꞌ. Co noyahuëꞌ nipirëhuahuëꞌ, nosoroatonpoaꞌ, catahuarinpoaꞌ. Coꞌhuara isoroꞌpaꞌ acoyátërasohuëꞌ, ninotonpoaꞌ, nosororinpoaꞌ. Naporoꞌ chinotërin Quisocristo aꞌpaimacasoꞌ. Ina imapatëhuaꞌ, anoyacancantërinpoaꞌ.

Hebreos 13:21

Yosë naꞌcon catahuainquëmaꞌ ina nohuantërinsoꞌ nicacamaso marëꞌ. Piꞌpian tërantaꞌ co noyahuëꞌ yonquihuatamaꞌ, anoyacancanchinquëmaꞌ. Quisocristo catahuahuachinpoaꞌ, nani tahuëri nóya nisarëhuaꞌ. Ina quëran noya niꞌsarinpoa huachi. Yaꞌipi piyapiꞌsaꞌ inasáchin chinochinaꞌ. Ama onporontaꞌ ina naniantahuasohuëꞌ. Amen.

1 Pedro 1:3

Ma noyacha Tata Yosëso paya. Quisocristo paꞌpin inasoꞌ. Naꞌcon nosoroatonpoaꞌ, nasitantarëso pochin nasha cancan quëtërinpoaꞌ ina nohuitacaso marëꞌ. Quisocristo huaꞌanëntërinpoaꞌ. “Chiminaponahuëꞌ, nanpiantarin niꞌton, canpoantaꞌ nanpiantarihuaꞌ,” taꞌtëhuaꞌ, noya ninarëhuaꞌ. Natëtomiatërëhuaꞌ.