Filipenses 1:7 - Chayahuita (Shahui)

⁷ Naꞌcon nosororanquëmaꞌ niꞌton, ina pochin noya yonquiranquëmaꞌ. Iráca Quisocristo nanamën aꞌchinpatëra, catahuaramaco. Tashinan pëiquë poꞌmohuachinacorantaꞌ, co naniantëramacohuëꞌ. Inaquëntaꞌ catahuaramaco. Imarahuëso marëꞌ shaꞌhuirapirinaco. Coisëquë quëpapirinacohuëꞌ, co tapanatohuëꞌ, Yosë nanamën noꞌtëquën shaꞌhuitërahuë. Canpitantaꞌ “Yosë catahuarinpoaꞌ,” taꞌtomaꞌ, co tapanaramahuëꞌ. Napoaton canpita yonquiatënquëmaꞌ, noya cancantërahuë. Iyahuëpita pochachin niꞌnanquëmaꞌ.

Filipenses 1:7 ပူးပေါင်းရင်းမြစ်များ

Hechos 20:23

Nisha nisha ninanoroꞌsaquë paꞌpatora, Ispirito Santo nohuanton, shaꞌhuitëraꞌpiarinaco: ‘Quirosarinquë paꞌpatan, tashinan pëiquë poꞌmoarinënquën, chiníquën aparisitarinënquën,’ itërinaco.

Hechos 21:33

Capitan huaꞌani canconahuaton, Paono maconin. “Catoꞌ catinaquë tonpotanpatëquëꞌ,” itohuachina, aꞌna sontarori nitonpotanpatërin. Aꞌna tanpain quëraontaꞌ aꞌna sontarori inapotërin. Inapotohuachinara, capitansoꞌ piyapiꞌsaꞌ natanin: “¿Maꞌnintaꞌ iso quëmapi? ¿Maꞌtaꞌ onporinsoꞌ?” tënin.

1 Corintios 13:7

Co noyahuëꞌ nanan natantohuatëhuaꞌ, co aꞌnaroáchin natëtarihuahuëꞌ. Noya yonquiatëhuaꞌ, natëarihuaꞌ. “Yosë nohuanton, oshaquëran noya cancantapon,” taꞌtëhuaꞌ, ninarëhuaꞌ. Maꞌsha onpotopirinënpoahuëntaꞌ, yaꞌipi ahuantarihuaꞌ.

1 Corintios 9:23

Ina pochin Yosë nanamën aꞌchinpato, naꞌcon naꞌcon piyapiꞌsari ina nohuitapi antaꞌ. Ina marëꞌ cantaꞌ noya cancantërahuë.

2 Corintios 3:2

Canpitasoꞌ cartanëhuëi pochin ninamaꞌ, cancanëhuëiquë Quisocristori ninshitërinsoꞌ. Nanamën chachin aꞌchintohuatëinquëmara, noya imaramaꞌ. Yaꞌipi piyapiꞌsaꞌ niꞌninënquëmaꞌ. “Paono caꞌtaninsopitarë chachin aꞌchintërin niꞌton, noya cancantopi,” taꞌtonaꞌ, noya niꞌninacoi.

2 Corintios 7:3

Co nocanatënquëmaꞌ pënënanquëmahuëꞌ. Naꞌcon nosororainquëmasoꞌ nani shaꞌhuitërainquëmaꞌ. Chiminaꞌhuaiquë huarëꞌ nosoromiatarainquëmaꞌ.

Gálatas 5:6

Quisocristo imapatëhuaꞌ, co marca yonquiarihuahuëꞌ. Aꞌnaquënsoꞌ nani niacotopi. Aꞌnaquënso nipirinhuëꞌ co niacotopihuëꞌ. Co ina yonquicasoꞌ yaꞌhuërinhuëꞌ. Cancanënpoa quëran huarëꞌ imacasoꞌ yaꞌhuërin. “Quisocristo catahuarinpoaꞌ. Co nonpintarinpoahuëꞌ,” taꞌtëhuaꞌ, yaꞌipi cancanënpoa quëran natëahuaꞌ. Ina natëhuatëhuaꞌ, catahuarinpoaꞌ nóya ninosorocasoꞌ. Ina pochin cancantohuatëhuaꞌ, Yosë noya niꞌsarinpoaꞌ.

Efesios 3:1

Napoaton isonahuato, canpita marëꞌ Yosë nontarahuë. Nisha piyapiꞌsanquëmaꞌ nipomarahuëꞌ, Quisocristo nanamën aꞌchintëranquëmaꞌ niꞌton, tashinan pëiquë poꞌmorinaco.

Efesios 4:1

Quisocristo nanamën aꞌchinahuëso marëꞌ tashinan pëiquë poꞌmopirinacohuëꞌ, iporahuantaꞌ pënënáranquëmaꞌ. Yosë nichaꞌëtënquëmaꞌ, huëntonënquë ayaꞌconinquëmaꞌ. Napoaton noyasáchin nicoꞌ.

Efesios 6:20

Quisocristo chachin aꞌparinco aꞌchintaꞌhuaso marëꞌ. Ina marëꞌ tashinan pëiquë poꞌmorinaco. Poꞌmopirinacohuëꞌ, Yosë nontocoꞌ ama tëꞌhuaisohuëꞌ. Chiníquën cancantato, aꞌninquëchin aꞌchintaꞌhuasoꞌ yaꞌhuërin.

Filipenses 1:12

Maꞌsha onpotopirinacohuëꞌ, inantaꞌ noya, tënahuë. Ina shaꞌhuichinquëmaꞌ. Tashinan pëiquë poꞌmopirinacohuëꞌ, ina marëꞌ naꞌcon naꞌcon piyapiꞌsaꞌ Yosë nanamën natanapi.

Filipenses 1:13

Yaꞌipi sontaroꞌsaꞌ isëquë yaꞌhuëpisopita natanapi. “Paono co mantaꞌ onpopirinhuëꞌ, Quisocristo imarin niꞌton, tashinan pëiquë poꞌmopi,” topi. Yaꞌipi piyapiꞌsaꞌ ina nitotopi.

Filipenses 1:14

Tashinan pëiquë poꞌmopirinacohuëꞌ, chiníquën cancantërahuë. Ina natanatonaꞌ, naꞌa imapisopita co huachi aquëtëꞌ tëꞌhuapihuëꞌ. “Quisocristo catahuarincoi quiyantaꞌ,” taꞌtonaꞌ, chiníquën cancantapi. Chiníquën cancantatonaꞌ, Yosë nanamën naꞌcon naꞌcon aꞌchinapi.

Filipenses 1:5

Iráca Yosë nanamën aꞌchintohuatënquëmara, aꞌnaroáchin imaramaꞌ. Naporo quëran huarëꞌ catahuaramaco aꞌnapitantaꞌ aꞌchintaꞌhuaso marëꞌ. Iporahuantaꞌ aꞌnapita aꞌchintaramaꞌ Yosë imacaiso marëꞌ. Ina yonquiato, noya cancantërahuë.

Filipenses 2:22

Timotioso nipirinhuëꞌ nohuitëramaꞌ. “Inasoꞌ noya quëmapi,” topi yaꞌipi piyapiꞌsaꞌ. Huiꞌnahuë pochin niꞌton, catahuarinco Yosë nanamën aꞌchinaꞌhuaso marëꞌ. Inantaꞌ nitotëramaꞌ.

Filipenses 4:14

Inaso nipirinhuëꞌ, ma noyanquëmaꞌ canpitasoꞌ niꞌton, catahuaramaco. Isëquë yaꞌhuato parisitopirahuëꞌ, noya catahuaramaco.

Filipenses 4:15

Iráca Masitonia parti pacapo, Yosë nanamën aꞌchintëranquëmaꞌ. Ina marëꞌ aꞌna parti yapaꞌpatëra, canpita catahuaramaco. “Ma noya quëmasoꞌ catahuarancoi Quisocristo imaꞌhuaisoꞌ,” itatomaco, coriqui aꞌpatëramaco. Canpitasáchin inapotëramaco.

Filipenses 4:3

Quëmantaꞌ iyasha naꞌcon catahuaranco niꞌton, inapita catahuaquëꞌ noya ninonchinaꞌ. Cato chachin nóya sanapiꞌsaꞌ. Naꞌcon catahuarinaco Quisoso nanamën aꞌchinaꞌhuaso marëꞌ. Iya Crimintintaꞌ noya catahuarinco. Aꞌnapitantaꞌ catahuarinaco aꞌchinaꞌhuaso marëꞌ. Co nininënpita isëquë ninshitopirahuëꞌ, Yosëri nohuitërin. Nanpirin quiricaquë nininënpita nani ninshitërin. Inaquë ninshitohuachinpoaꞌ, nanpimiatarihuaꞌ.

Colosenses 4:18

Ca Paonoco naꞌcon yonquiatënquëmaꞌ, saludos aꞌpataranquëmaꞌ. Caora imirahuë quëran isoíchin ninshitaranquëmaꞌ. Tashinan pëiquë yaꞌhuarahuë. Ama naniantocosohuëꞌ. Yosë inaora nohuanton, noya catahuainquëmaꞌ. Nani ninshitëranquëma huachi. Paono

Colosenses 4:3

Quiya marëntaꞌ Yosë nontocoꞌ. Paꞌsápato, Quisocristo nanamën aꞌchinpirahuëꞌ. Ina marëꞌ tashinan pëiquë poꞌmorinaco. Naꞌa piyapiꞌsaꞌ co nanamën nitochátërapihuëꞌ. Inahuantaꞌ nitochinaꞌ. Napoaton Yosë nontohuatamaꞌ, quiya marëntaꞌ nontocoꞌ catahuaincoi aꞌchintohuatoira, Yosë nanamën nohuanchinaꞌ.

1 Tesalonicenses 5:5

Quisocristo imaramaꞌ niꞌton, tahuëri pochin cancantatomaꞌ, nitotaramaꞌ. Yaꞌipinpoaꞌ imarëhuasopita co tashi pochin cancantërëhuahuëꞌ.

2 Timoteo 1:8

Ama tapanatonhuëꞌ, Sinioro nanamën aꞌchináquëꞌ. Ina aꞌchinahuëso marëꞌ tashinan pëiquë poꞌmorinaco. Ama ina marëntaꞌ tapanquësohuëꞌ. Quëmantaꞌ aꞌchinanso marëꞌ aparisitohuachinënquën, chiníquën cancantëquëꞌ. Napohuatan, Yosë catahuarinquën noya ahuantamasoꞌ.

2 Timoteo 2:9

Ina aꞌchinahuëso marëꞌ parisitërahuë. Noꞌhuitonaco, tashinan pëiquë poꞌmorinaco. Apinaꞌpi pochin nicatonaco, catinatërinaco. Inapotopirinacohuëꞌ, Yosë nanamënsoꞌ co nanitopihuëꞌ inapotacaisoꞌ. Nisha nisha parti aꞌchinapi niꞌton, nahuinin.

Filemón 1:13

Isëquë quëparitacasoꞌ nohuantopirahuëꞌ, aꞌpataranquën. Quisocristo nanamën aꞌchinahuëso marëꞌ tashinan pëiquë yaꞌhuarahuë. Quëmantaꞌ isëquë yaꞌhuaran naporini, catahuaitoncohuëꞌ, tënahuë. Onisimo quëma yaꞌhuërënamën pochin catahuarinco niꞌton, co yaaꞌpaporahuëꞌ, aꞌpataranquën.

Hebreos 3:1

Imaramaꞌ niꞌton, Yosë anoyacancantërinquëmaꞌ. Huëntonënquë ayaꞌconinquëmaꞌ. Napoaton iyaroꞌsaꞌ Quisocristo naꞌcon yonquicoꞌ. Yosëri aꞌpaimarin nanamën aꞌchintinpoaso marëꞌ. Corto huaꞌan chini chiníquën nanantërinso pochin acorin. Ina nohuanton, imarëhuaꞌ.

1 Pedro 4:13

Quisocristo parisitërinso pochin parisitohuatamaꞌ, noya cancantocoꞌ. Ina quëran chiníquën nanantaton oꞌmantahuachin, noya noya cancantaramaꞌ.

1 Pedro 5:1

Yaꞌipi ansianoꞌsanquëmantaꞌ pënënanquëmaꞌ. Cantaꞌ ansianoco niꞌto, achinicancainquëmaꞌ, tënahuë. Quisocristo isoroꞌpaquë nipon, nohuitërahuë. Corosëquë parisitohuachina, cari niꞌnahuë niꞌton, shaꞌhuirárahuë. Oꞌmantahuachin, canpoantaꞌ inarëꞌquënpoaꞌ huaꞌanëntarihuaꞌ. Napoaton iporasoꞌ pënënaranquëmaꞌ noya nicacamaso marëꞌ.

2 Pedro 1:13

Coꞌhuara ca chimiyantërapohuëꞌ, ina nanan chachin shaꞌhuichinquëmaꞌ ama naniantacamaso marëhuëꞌ, tënahuë.

1 Juan 3:14

Iráca canpoantaꞌ ina pochin co noyahuëꞌ cancantërëhuaꞌ. Co Yosë nohuitatëhuahuëꞌ, chimipi pochin nipirëhuahuëꞌ, Yosë anoyacancantërinpoaꞌ ina nohuitatëhuaꞌ nanpimiatacaso marëꞌ. Napoaton iporasoꞌ ninosororëhuaꞌ. Ina quëran Yosë huëntonënquë yaꞌconëhuasoꞌ nitotërëhuaꞌ. Co ninosorohuatamahuëꞌ, co Yosë anoyacancantërinquëmahuëꞌ. Chimipi pochin cancantaramaꞌ.