Filipenses 1:27 - Chayahuita (Shahui)

²⁷ Iporasoꞌ iyaroꞌsaꞌ nóya nicoꞌ. Quisocristo nanamën yonquiatomaꞌ, ina pochachin cancantocoꞌ. Yosë huëntonënquë yaꞌconamaꞌ niꞌton, ina pochin cancantacasoꞌ yaꞌhuërin. Nicaponquëmaꞌ paꞌsamarahuë. Co aꞌnaꞌ nanitapohuëꞌ nimara. Ina niponahuëꞌ, nani tahuëri noya nicoꞌ noya nanan natanchi. Yaꞌipinquëmaꞌ, iyaroꞌsaꞌ, imamiatocoꞌ. Ama aꞌnayanquëma tërantaꞌ nisha yonquicosohuëꞌ. Napopináchin yonquiatomaꞌ, Quisocristo nanamën aꞌchinácoꞌ. Inapohuatamaꞌ, natantohuato, nóya cancantarahuë huachi.

Filipenses 1:27 ပူးပေါင်းရင်းမြစ်များ

Salmos 122:3

Iso ninanosoꞌ, Yosë chinotacaso marëꞌ ocoipi. Napoaton isëquësoꞌ, noya ninicatëhua yaꞌhuëaꞌahuaꞌ.

Mateo 12:25

Topinan yonquirapirinahuëꞌ, inaora yonquinën quëran Quisosori nitotaton, itërin: “Niꞌcoꞌ. Ninanoquë yaꞌhuëpisopita ninoꞌhuipi naporini, yanquëꞌitonahuëꞌ. Co huachi inaquë yaꞌhuëꞌitonahuëꞌ. Huëntonënquë yaꞌhuëpisopitantaꞌ ninoꞌhuipi naporini, inapitantaꞌ yanquëꞌitonahuëꞌ.

Hechos 2:46

Nani tahuëri Yosë chinotopiso pëiquë niyontonpi. Quisoso chimininsoꞌ yonquiatonaꞌ, aꞌna pëiquë aꞌna pëiquë coshatapatapi. Co apiratonaraihuëꞌ, noya cancantapi. Nóya cancantatonaꞌ, coshatapatapi.

Hechos 24:24

Huaꞌquimiáchin quëran Huirisë saꞌinë chachin huëantarahuaton, Paono amataantarin. Saꞌinsoꞌ cotio sanapi, Torosira itopi. Paono huëꞌpachina, itapon: “Quisocristo imaransoꞌ shaꞌhuitocoi noya nitochii,” itohuachina, “Tëhuënchachin Quisocristo imarahuë.

Hechos 4:32

Yaꞌipi Quisoso natëpisopita noya niniꞌtonaꞌ, yaꞌhuëpi. Napopianachin yonquipi. Aꞌnaya aꞌnaya pahuantohuachinara, niquëtopi. Co mantaꞌ niapiratopihuëꞌ.

Romanos 1:16

Co casoꞌ tapanahuëꞌ Quisocristo nanamën aꞌchinaꞌhuaso marëꞌ. Piyapiꞌsaꞌ natëhuachinaꞌ, Yosëri anoyacancantarin. Inaíchin nanitaparin nichaꞌëinpoasoꞌ. Cotioroꞌsariꞌton natëhuachinaꞌ, anoyacancantarin. Iporasoꞌ nisha nisha piyapiꞌsantaꞌ anoyacancantarin. Napoaton paꞌyatërahuë nanamën shaꞌhuicaꞌhuasoꞌ.

Romanos 1:5

Ina nosoroatonco, acorinco nisha nisha piyapiꞌsaꞌ aꞌchintaꞌhuaso marëꞌ. Inapitantaꞌ nanamën natëcaiso marëꞌ pënënarahuë. Natëhuachinaꞌ, “Quisocristosoꞌ noya noya,” tosapi.

Romanos 1:9

Yosë niꞌsárinco, noꞌtëquën nontaranquëmaꞌ. Yaꞌipi cancanëhuë quëran huarëꞌ Yosë imarahuë. Huiꞌnin nanamën aꞌchinárahuë. Nani tahuëriya canpita yonquiatënquëmaꞌ,

Romanos 10:8

¿Maꞌtaꞌ quiricanën quëran anitotërinpoaꞌ? “Ina nanansoꞌ, co sacaihuëꞌ nitotacasoꞌ. Nanamënpoa quëran shaꞌhuicaso yaꞌhuërin. Cancanënpoa quërantaꞌ, natëcaso yaꞌhuërin,” itërinpoaꞌ. Inasáchin natëcoꞌ, itëranquëmaꞌ cantaꞌ.

Romanos 15:16

Quisocristo chachin aꞌparinco nisha nisha piyapiꞌsaꞌ aꞌchintaꞌhuaso marëꞌ. Nanamën aꞌchintarahuë inapitantaꞌ imacaiso marëꞌ. Aꞌchinato, Yosë marëꞌ sacatarahuë. Nisha piyapiꞌsantaꞌ imapachinaꞌ, Ispirito Santori yaꞌcoancantarin. Noyápiachin cancan quëtarin. Ina marëꞌ Yosëri noya niꞌsarin.

Romanos 15:29

Canpitataquë paꞌpato, Quisocristo noya catahuarinco nanamën aꞌchintaꞌhuanquëmaso marëꞌ, tënahuë.

1 Corintios 1:10

Apira iyaroꞌsaꞌ Sinioro Quisocristo nanan quëtërinco niꞌton, pënënaranquëmaꞌ. Ina imaramaꞌ niꞌquëhuarëꞌ, noya ninontocoꞌ. Ama nisha nisha yonquiatomaꞌ, aꞌnaꞌ aꞌnaꞌ imacosohuëꞌ. Napopináchin yonquiatomaꞌ, noya niniꞌtomaꞌ yaꞌhuëcoꞌ.

1 Corintios 15:58

Napoaton iyaroꞌsaꞌ chiníquën cancantocoꞌ. Nosororanquëmaꞌ niꞌton, pënënaranquëmaꞌ: Ama nisha nisha yonquicosohuëꞌ. Naporahuaton, paatomaꞌ aꞌnapita aꞌchintëraꞌpiacoꞌ. Sinioro catahuahuachinquëmaꞌ, co onporontaꞌ topinan quëran aꞌchinaramahuëꞌ. Aꞌchinpatamaꞌ, Yosëri nohuantërinsopita imasapi huachi.

2 Corintios 13:11

Nani iyaroꞌsaꞌ ninshitëranquëmaꞌ. Noya cancantocoꞌ, tënahuë. Yaꞌipi cancanëma quëran Yosë imacoꞌ. Pënënanquëmasoꞌ noya natëtomaꞌ, niachinicancancoꞌ. Napopináchin yonquicoꞌ. Noya niniꞌtomaꞌ, yaꞌhuëcoꞌ. Inapohuatamaꞌ, Yosë catahuarinquëmaꞌ. Inasáchin nosoroatonpoaꞌ, catahuarinpoaꞌ sano cancantacaso marëꞌ.

2 Corintios 4:4

Sopai nohuanton, co nanitopihuëꞌ noꞌtëquën yonquicaisoꞌ. Maꞌsha aꞌpintërëso pochin nanamën quëran Yosë anitotërinpoaꞌ Quisocristo nohuitacaso marëꞌ. Inasoꞌ Yosë chachin ninin. Inapitaso nipirinhuëꞌ somaraya pochin cancantatonaꞌ, co nanitopihuëꞌ natëtacaisoꞌ.

2 Corintios 9:13

Catahuaramaꞌ niꞌton, noya cancantapi. “Ma noya Quisocristo nanamën natëtonaꞌ, catahuarinënpoaꞌ. Ma noyacha Yosësoꞌ niꞌton, ina nohuanton, naꞌa piyapiꞌsaꞌ catahuapi paya,” tosapi.

Gálatas 1:7

Co aꞌna nanan, iyaroꞌsaꞌ, yaꞌhuërinhuëꞌ chaꞌëcaso marëꞌ. Quisocristoíchin anoyacancantërinpoaꞌ. Ina imapatëhuaꞌ, oshanënpoaꞌ inquitarinpoaꞌ. Inasáchin yonquipiramahuëꞌ, aꞌnapita huëcatonaꞌ, nisha nanan aꞌchintarinënquëmaꞌ. Napoaton nisha nisha yonquiaramaꞌ. Yanonpintërinënquëmaꞌ. “Co Quisocristoráchin yonquicasoꞌ yaꞌhuërinhuëꞌ,” itërinënquëmaꞌ.

Efesios 1:13

Canpitantaꞌ Yosë nanamën natanamaꞌ. “Quisocristo anoyacancantohuachinquëmaꞌ, nichaꞌësarinquëmaꞌ,” itërainquëmaꞌ. Natanpatamara: “Noꞌtën nanan inasoꞌ,” taꞌtomaꞌ, natëramaꞌ. Quisocristo imapatamaꞌ, huiꞌnin pochin Yosë niꞌninquëmaꞌ. Napoaton Ispirito Santo ayaꞌcoancantërinquëmaꞌ. Sichoquë marca acopiso pochin ayaꞌcoancantërinquëmaꞌ huëntonënquë ayaꞌconinquëmasoꞌ nitotacaso marëꞌ. Iráca shaꞌhuirinso chachin napotërinquëmaꞌ.

Efesios 1:15

“Quisocristo anoyacancantërinpoaꞌ,” taꞌtomaꞌ, inasáchin imaramaꞌ. Ina imatomaꞌ, yaꞌipi imaramasopita capini noya ninosoroaramaꞌ, natantërahuë. Ina natantato, nóya cancantërahuë.

Efesios 4:1

Quisocristo nanamën aꞌchinahuëso marëꞌ tashinan pëiquë poꞌmopirinacohuëꞌ, iporahuantaꞌ pënënáranquëmaꞌ. Yosë nichaꞌëtënquëmaꞌ, huëntonënquë ayaꞌconinquëmaꞌ. Napoaton noyasáchin nicoꞌ.

Filipenses 1:5

Iráca Yosë nanamën aꞌchintohuatënquëmara, aꞌnaroáchin imaramaꞌ. Naporo quëran huarëꞌ catahuaramaco aꞌnapitantaꞌ aꞌchintaꞌhuaso marëꞌ. Iporahuantaꞌ aꞌnapita aꞌchintaramaꞌ Yosë imacaiso marëꞌ. Ina yonquiato, noya cancantërahuë.

Filipenses 2:12

Iráca canpitataquë yaꞌhuapo, noya natanamaco. Noya natanatomaco, Yosë natëramaꞌ. Iporantaꞌ iyaroꞌsaꞌ nosororanquëmaꞌ niꞌton, co inatohuaꞌ yaꞌhuaporahuëꞌ, noya noya natëcoꞌ. Yaꞌnan imapomaꞌ, Yosë anoyacancantërinquëmaꞌ. Napoaton noya cancantatomaꞌ, imamiatocoꞌ. “Catahuaco Sinioro noya imainquën. Co caora nanitërahuëꞌ,” taꞌtomaꞌ imamiatocoꞌ. Niꞌcona Yosë naniantotamaꞌ.

Filipenses 2:24

Yosë nohuanton, tashinan pëi quëran ocoiarinaco, topirahuëꞌ. Ocoihuachinco, cantaꞌ nicaponquëmaꞌ paꞌsarahuë. Co huaꞌqui quëranhuëꞌ paꞌsarahuë, tënahuë.

Filipenses 3:18

Aꞌnaquënso nipirinhuëꞌ “Yosë imarahuë,” taponaraihuëꞌ, co noyahuëꞌ cancantopi. Quisocristo oshanënpoaꞌ inquitinpoaso marëꞌ corosëquë chiminin. Nipirinhuëꞌ, co inapitasoꞌ ina yonquipihuëꞌ. Ina nanan aꞌchinpatora, noꞌhuitopi. Iporantaꞌ inapita yonquiato, chiníquën sëtato, naꞌnërahuë. Co inapita nonanacasoꞌ yaꞌhuërinhuëꞌ.

Filipenses 3:20

Canpoaso nipirinhuëꞌ, inápaquë yaꞌhuërinsoꞌ naꞌcon naꞌcon yonquiaꞌahuaꞌ. Inatohuaꞌ yaꞌhuëmiatarihuasoꞌ. Sinioro Quisocristo nichaꞌërinpoaꞌ niꞌton, ina ninarëhuaꞌ. Aꞌna tahuëri inápa quëran oꞌmantararin.

Filipenses 4:1

Napoaton iyaroꞌsaꞌ Quisocristo imamiatocoꞌ. Naꞌcon nosororanquëmaꞌ. Yaꞌnipishahuëꞌ yaniꞌnanquëmaꞌ. Canpita yonquiatënquëmaꞌ, nóya cancantërahuë. Noya imaramaꞌ niꞌton, co topinan quëran aꞌchintëranquëmahuëꞌ, tënahuë.

Colosenses 1:10

Catahuaquëꞌ Sinioro quëma nohuantëranso chachin niinaꞌ. Inapohuachinaꞌ, noya noya niꞌsaran. Catahuaquëꞌ noyasáchin niinaꞌ. Naꞌcon naꞌcon nohuichinënquën.

1 Tesalonicenses 3:6

Iporasoꞌ nani huënantaton, nanan shaꞌhuitiirincoi. “Ipora huantaꞌ noya imasapi. Inahua capini noya ninosoroapi,” itiirincoi. Naꞌcon yonquiramacoi. Quiya pochin cancantatomaꞌ, canpitantaꞌ yaniꞌnamacoi.

1 Tesalonicenses 4:1

Iporasoꞌ iyaroꞌsaꞌ Sinioro Quisoso nanan quëtërincoi niꞌton, pënëantarainquëmaꞌ. Iráca pënënainquëmaꞌ noya nicacamaso marëꞌ. “Noya nipatamaꞌ, Yosë noya niꞌsarinquëmaꞌ,” itërainquëmaꞌ, natëramacoi. Iporasoꞌ aquë aquëtëꞌ natëtatomaꞌ, noyasáchin nicoꞌ, tënahuë.

1 Timoteo 1:11

Yosë nanamënsoꞌ noya nóya. Ina quëran nichaꞌërinpoaꞌ. “Ma noyacha Yosëso paya,” itërëhuaꞌ. Ina chachin acorinco nanamën shaꞌhuicaꞌhuaso marëꞌ.

1 Timoteo 1:19

Inasáchin natëton, pënëntëquëꞌ. Quisocristo nohuantërinsoráchin yonquiaton, noya niquëꞌ. Noyápiachin cancantaton, piyapiꞌsaꞌ aꞌchintëquëꞌ. Aꞌnaquënso nipirinhuëꞌ cancanëna quëran noya nicacaisoꞌ nitotopirinahuëꞌ, co yanatëpihuëꞌ. Nani Yosë naniantatonaꞌ, co huachi yonquipihuëꞌ. Quisocristo aꞌpoatonaꞌ, co huachi imapihuëꞌ.

2 Timoteo 4:7

Iráca Yosë shaꞌhuitërinco aꞌnapita aꞌchintaꞌhuasoꞌ. Nani tiquirahuë. Chiníquën sacatërahuë pochin Quisocristo nóya natërahuë. Co piꞌpian tërantaꞌ aꞌporahuëꞌ.

Tito 2:10

Ama ihuachinasohuëꞌ. Noꞌtëquën natëtonaꞌ, ama piꞌpian tërantaꞌ nonpiinasohuëꞌ. Noya nipachinaꞌ, aꞌnapitarintaꞌ noya niꞌsapi. “Tata Yosë imatonaꞌ, noya nipi. Ma noyacha Yosë nanamënso paya,” taponaꞌ. Inasoꞌ tëhuënchachin nichaꞌësarinpoaꞌ.

Santiago 3:18

Yosë yonquihuatëhuaꞌ, sano cancantatëhuaꞌ, nanan anoyatarihuaꞌ. Napoaton, noya niniꞌtëhuaꞌ yaꞌhuarihuaꞌ. Noya nipatëhuaꞌ, aꞌnapitantaꞌ nicatonpoaꞌ, noya nisapi.

2 Pedro 3:11

Co mantaꞌ yaꞌhuëmiatarinhuëꞌ. Yaꞌipi taꞌhuantarin niꞌton, ¡Yosë pochin cancantatëhuaꞌ, noyasáchin niahuaꞌ!

2 Pedro 3:14

Napoaton iyaroꞌsaꞌ, ina ninatomaꞌ naꞌcon yonquicoꞌ noyasáchin nicacamaso marëꞌ. “Quisocristo nanan anoyatërinpoaꞌ,” taꞌtomaꞌ, noya niniꞌtomaꞌ, yaꞌhuëcoꞌ. Yaꞌipi co noyahuëꞌ yonquiramasopita naniantatomaꞌ, noyápiachin cancantocoꞌ. Ina quëran oꞌmantahuachin, noya niꞌsarinquëmaꞌ.

Judas 1:3

Carinquëmaꞌ iyaroꞌsaꞌ nosororanquëmaꞌ. Iꞌhuamiáchin yonquirahuë ninshitaꞌhuanquëmaso marëꞌ. Yosë anoyacancantërinpoasoꞌ noya noya yaaꞌchintopiranquëmahuëꞌ, apira nanan natantërahuë. Aꞌnaquënsoꞌ nonpin nanan aꞌchintarinënquëmaꞌ, natantërahuë. Napoaton pënënaꞌhuanquëmasoꞌ yaꞌhuërin, tënahuë. Quisocristo nanamën noꞌtëquën aꞌchintërainquëmaꞌ. Yosë nohuanton, noꞌtëquën ninshitërai yaꞌipi imapisopita nitotacaiso marëꞌ. Nani yaꞌipiya nanamën anitotërinpoaꞌ. Inasáchin natëtomaꞌ, aꞌnapitantaꞌ aꞌchintocoꞌ noꞌtëquën yonquicaiso marë antaꞌ. Ama piꞌpian tërantaꞌ nisha aꞌchintocosohuëꞌ, tënahuë.