Filipenses 1:1 - Chayahuita (Shahui)

¹ Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Iya Timotioroꞌco nanan aꞌpatarainquëmaꞌ. Quisocristo huaꞌanëntërincoi. Inasáchin natërai. Yaꞌipi Quisocristo imaramasopita Piriposëquë yaꞌhuëramasoꞌ, ninshitaranquëmaꞌ. Ansianoꞌsanquëmaꞌ naꞌcon yonquiranquëmaꞌ. Tiaconoꞌsanquëmantaꞌ yonquiranquëmaꞌ.

Filipenses 1:1 ပူးပေါင်းရင်းမြစ်များ

Marcos 13:34

Aꞌna quëmapi aquë yapaꞌninso pochin nisarin. Yapaꞌpachina, inpriatonënpita camairin. Aꞌnaya aꞌnaya shaꞌhuitërin maꞌsona nicacaiso marëꞌ. Yaꞌcoana toꞌshitonaꞌpintaꞌ shaꞌhuitaton: ‘Pëiꞌ noya niꞌquëꞌ,’ itërin.

Juan 12:26

Nohuantërahuësoꞌ yanipatamaꞌ, ca pochin cancantatomaꞌ imaco. Insëquësona paꞌpato, piyapinëhuëpita imasarinaco. Inquëma tërantaꞌ ca marëꞌ sacatohuatamaꞌ, Yosë noya niꞌsarinquëmaꞌ, itërin Quisosori.

Hechos 1:20

Yosë quiricanënquë ninoton, ninshitërin: ‘Ama insontaꞌ pëinënquë yaꞌhuëꞌinsohuëꞌ. Noꞌpanëontaꞌ, tanahuantërarin quëran pantachin,’ tënin. Ina quëran tantarin: ‘Ina yaꞌhuërënamën aꞌna acoantaquëꞌ,’ tënin antaꞌ Sarmo quiricaquë.

Hechos 20:28

Canpitantaꞌ niꞌcona piꞌpian tërantaꞌ Yosë naniantotamaꞌ. Quisoso imapisopitantaꞌ noya niꞌcoꞌ. Ispirito Santo nani acorinquëmaꞌ huaꞌanën pochin nicacamaso marëꞌ. Inapitantaꞌ Yosë huëntonënquë yaꞌconpi. Quisoso chiminaton, ayaꞌconinpoaꞌ.

Hechos 9:13

Ananiasëso nipirinhuëꞌ co yapaꞌninhuëꞌ. “Ina quëmapisoꞌ Sinioro, paꞌpi co noyahuëꞌ, topi natantërahuë. Quirosarinquë quëma imarinënquënsopita chiníquën aparisitërin.

Romanos 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Quisocristoíchin natërahuë. Ina acorinco paato nanamën aꞌchinaꞌhuaso marëꞌ. Yosë nohuanton, noya nanan aꞌchinárahuë.

Romanos 1:7

Napoaton Nomaquë yaꞌhuëramasopita ninshitaranquëmaꞌ. Yosë paꞌpi nosororinquëmaꞌ. Nani acorinquëmaꞌ piyapinënpita nicacamasoꞌ. Niꞌton, inasáchin yonquicasoꞌ yaꞌhuërin. Tata Yosë inaora nohuanton, catahuainquëmaꞌ. Asanocancainquëmaꞌ. Quisocristontaꞌ inapochachin catahuainquëmaꞌ. Inasoꞌ huaꞌanëntërinpoaꞌ.

1 Corintios 16:10

Iya Timotio cantonpachinquëmaꞌ, noya nontocoꞌ noya cancanchin. Ca pochachin inantaꞌ Yosë nanamën aꞌchinarin.

2 Corintios 1:1

Ca Paonoco ninshitantaranquëmaꞌ. ¿Noya canpitantaꞌ yaꞌhuaramaꞌ? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Iya Timotioroꞌco nanan aꞌpataranquëmaꞌ. Corintoquë yaꞌhuëramasopita ninshitaranquëmaꞌ. Yosë nohuanton, canpitantaꞌ huëntonënquë yaꞌconamaꞌ. Acaya parti nisha nisha ninanoroꞌsaquë imaramasopita yonquiatënquëmaꞌ, ninshitaranquëmaꞌ.

Gálatas 1:10

Co piyapiꞌsaꞌ noya nicainacoso marëꞌ aꞌchinahuëꞌ. Yosë noya nicaincoso marëꞌ aꞌchinahuë. Piyapiꞌsaꞌ paꞌyatinacoso marëꞌ naꞌcon naꞌcon yonquirahuë naporini, co Quisocristo natëitohuëꞌ.

Gálatas 3:26

Iporasoꞌ Quisocristo imapatëhuaꞌ, huiꞌninpita pochin Yosë niꞌninpoaꞌ.

Gálatas 3:28

Yosësoꞌ co nisha nisha yonquirinpoahuëꞌ. Aꞌnaquënpoaꞌ cotio piyapinpoaꞌ, aꞌnaquëontaꞌ nisha piyapiꞌsaꞌ. Aꞌnaquëontaꞌ patronoꞌsaꞌ, aꞌnaquënsoꞌ piyapinënpita. Aꞌnaquën sanapiꞌsaꞌ, aꞌnaquënpoaꞌ quëmapinpoaꞌ nipirëhuahuëꞌ, yaꞌipinpoaꞌ Quisocristo imapatëhuaꞌ, aꞌna huëntoínchin pochin ninëhuaꞌ.

Efesios 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Canpitantaꞌ Quisocristo noya imaramaꞌ niꞌton, Yosë noya niꞌninquëmaꞌ. Ipisoquë yaꞌhuëramasopita ninshitaranquëmaꞌ.

Efesios 1:15

“Quisocristo anoyacancantërinpoaꞌ,” taꞌtomaꞌ, inasáchin imaramaꞌ. Ina imatomaꞌ, yaꞌipi imaramasopita capini noya ninosoroaramaꞌ, natantërahuë. Ina natantato, nóya cancantërahuë.

Efesios 6:24

Quisocristo huaꞌanëntarinpoaꞌ. Ina nosoromiatohuatamaꞌ, inaora nohuanton, Yosë noya catahuainquëmaꞌ, tënahuë. Amen. Nani ninshitëranquëma huachi. Paono

Filipenses 2:19

Huaꞌquiꞌ iyaroꞌsaꞌ canpitata quëran co nanan natantërahuëꞌ niꞌton, yonquiáranquëmaꞌ. Napoaton Timotio yaaꞌparahuë natantacaso marëꞌ. Quisocristo nohuantohuachin, co huaꞌqui quëranhuëꞌ aꞌpaarahuë. Ina quëran shaꞌhuitintahuachinco, noya cancantarahuë.

Filipenses 2:5

Noya ninicatomaꞌ, Quisocristo pochachin cancantocoꞌ.

Filipenses 3:12

Co yaꞌipi cancanëhuë quëran noya noya cancanchatërarahuëꞌ. Ipora huantaꞌ piꞌpian piꞌpian co noyahuëꞌ yonquirahuë. Co Yosë pochachin cancantopirahuëꞌ, Quisocristo nani acorinco ina pochin cancantaꞌhuaso marëꞌ. Napoaton nani tahuëri yonquiárahuë noya noya nicaꞌhuaso marëꞌ.

Filipenses 3:3

Yosë marcanën co nonënpoaquë niacotërëhuahuëꞌ. Cancanënpoaꞌ Yosë anoyacancantërinpoaꞌ. Cancanënpoa quëran ina chinotarëhuaꞌ. Ispirito Santo chachin catahuarinpoaꞌ noya chinotacaso marëꞌ. Co canpoara nanitërëhuahuëꞌ noya cancantacasoꞌ. Quisocristoíchin anoyacancantohuachinpoaꞌ, nichaꞌësarinpoaꞌ, tënëhuaꞌ. Napoaton canpoasoꞌ Yosë piyapinënpita ninëhuaꞌ.

Filipenses 3:8

Ina naꞌcon naꞌcon nohuantato, inasáchin yonquirahuë. Iráca cotioroꞌsaꞌ noya niꞌninaco. Huaꞌanoꞌsaquë huarëꞌ noya niꞌpirinacohuëꞌ, Quisocristo imapatëra, aꞌporinaco. Noꞌhuipirinacohuëꞌ, co ina yonquirahuëꞌ. Iráca yonquirahuësoꞌ amoro pochin nicato, co piꞌpisha tërantaꞌ nohuantërahuëꞌ. Quisocristo nohuitaꞌhuasoráchin nohuantërahuë. Ina nohuitacasoꞌ noya noya, tënahuë. Inasáchin huaꞌanëntërinco.

1 Tesalonicenses 1:1

Ca Paonoco ninshitaranquëmaꞌ, niꞌcoꞌ. Noyanquëmaꞌ canpitantaꞌ. Noya quiyantaꞌ yaꞌhuarai. Yaꞌipi Yosë imaramasopita Tisaronicaquë yaꞌhuëramasoꞌ ninshitaranquëmaꞌ. Siripano, Timotio, inapitantaꞌ isëquë yaꞌhuapi. Inapitaroꞌcoi nanan aꞌpatarainquëmaꞌ. Canpitantaꞌ Tata Yosë chinotatomaꞌ, Sinioro Quisocristo imaramaꞌ. Inaora nohuanton, Yosë noya catahuainquëmaꞌ. Asanocancainquëmaꞌ. Quisocristontaꞌ inapochachin catahuainquëmaꞌ, tënahuë.

1 Tesalonicenses 2:2

Piriposëquë aꞌchinapiraihuëꞌ, noꞌhuitonacoi, chiníquën aparisitërinacoi. Inapotopirinacoihuëꞌ, canpitataquë canconpatëira, co tëꞌhuaraihuëꞌ. “Yosë catahuarincoi,” taꞌtoi, Quisocristo nanamën aꞌchintërainquëmaꞌ. Aꞌnapita noꞌhuipirinacoihuëꞌ, chiníquën cancantatoi, pënënainquëmaꞌ.

2 Tesalonicenses 1:1

Ca Paonoco ninshitaranquëmaꞌ, niꞌcoꞌ. Noyanquëmaꞌ canpitantaꞌ. Noya quiyantaꞌ yaꞌhuarai. Yaꞌipi Yosë imaramasopita Tisaronicaquë yaꞌhuëramasoꞌ ninshitaantaranquëmaꞌ. Siripano, Timotio, inapitantaꞌ isëquë yaꞌhuapi. Inapitaroꞌcoi nanan aꞌpatarainquëmaꞌ. Tata Yosë natëtomaꞌ, Sinioro Quisocristo imaramaꞌ. Huëntonënquë chachin ayaꞌconinpoaꞌ niꞌton, “Tata” itërëhuaꞌ.

2 Tesalonicenses 1:10

Oꞌmantahuachin, imarëhuasopitasoꞌ quënanarihuaꞌ. “Ma noyacha Quisocristoso paya. Anoyacancantërinpoaꞌ. Inasáchin yaꞌipiya chinochinaꞌ,” tosarëhuaꞌ. Yaꞌipi imarëhuasopita napoarëhuaꞌ. Aꞌchintohuatëinquëmara, canpitantaꞌ natëramaꞌ niꞌton, noya niꞌsaramaꞌ.

1 Timoteo 1:2

Timotionquën ninshitaranquën. Aꞌchintëranquën niꞌton, Quisocristo natëton, ina imaran. Napoaton huiꞌnahuë pochachin niꞌnanquën. Naꞌcon nosororanquën. Tata Yosë inaora nohuanton, catahuainquën. Noya nosoroinquën. Nani tahuëri asanocancainquën. Quisocristontaꞌ inapochachin catahuainquën. Inasáchin natërëhuaꞌ.

1 Timoteo 3:8

Ansianoꞌsaꞌ catahuarinsopitasoꞌ tiaconoꞌsaꞌ topi. Inapitantaꞌ natëtonoꞌsaꞌ niinaꞌ. Noꞌtëquënáchin noinaꞌ. Ama nisha nisha noinasohuëꞌ. Ama noꞌpiinasohuëꞌ. Ama nonpinatonaꞌ, coriqui canainasohuëꞌ.

Tito 1:1

Ca Paonoco ninshitaranquën, niꞌquëꞌ. ¿Noya yaꞌhuaran? Noya cantaꞌ yaꞌhuarahuë. Tata Yosë huaꞌanëntërinco niꞌton, inasáchin natërahuë. Quisocristo acorinco nanamën aꞌchinaꞌhuaso marëꞌ. Yosë huayoninpoaꞌ niꞌton, huëntonënquë yaꞌconëhuaꞌ. Nóya natëcaiso marëꞌ aꞌchinarahuë. Noꞌtën nanan aꞌchinaꞌhuaso marëꞌ acorinco. Ina natëhuatëhuaꞌ, noꞌtëquën imasarëhuaꞌ.

Tito 1:7

Yosë nohuanton, ansianoꞌsaꞌ yaꞌhuëpi imapisopita catahuacaiso marëꞌ. Yosëri acorin niꞌton, noyasáchin niinaꞌ. Ama nocanchinasohuëꞌ. “Casáchin noꞌtëquën nitotërahuë,” topachinaꞌ, ama acoquësohuëꞌ. Ama yanoꞌhuichinasohuëꞌ. Ama noꞌpiinasohuëꞌ. Ama yaahuëchinasohuëꞌ. Ama coriquiráchin cancanchinasohuëꞌ. Ama piꞌpian tërantaꞌ nonpinatonaꞌ, canainasohuëꞌ. Insosona ina pochin cancantohuachin, ama ansiano acoquësohuëꞌ.

Filemón 1:1

Iya Pirimon, ca Paonoco ninshitaranquën, niꞌquëꞌ. ¿Noya quëmantaꞌ yaꞌhuaran? Noya cantaꞌ yaꞌhuarahuë. Quisocristo nanamën aꞌchinahuëso marëꞌ tashinan pëiquë poꞌmorinaco. Iya Timotioroꞌco nanan aꞌpatarainquën. Nosororainquën iyasha. Quëmantaꞌ catahuarancoi aꞌchinaꞌhuaiso marëꞌ.

Hebreos 13:23

Co huaꞌquiya quëranhuëꞌ nicaponquëmaꞌ paꞌsarahuë. Iya Timotio nani tashinan pëi quëran ocoipi. Manóton huëꞌpachin, inaroꞌco paꞌsarai.

Santiago 1:1

Ca Santiacoco ninshitaranquëmaꞌ, niꞌcoꞌ. ¿Noya canpitantaꞌ yaꞌhuaramaꞌ? Cantaꞌ isëquë noya yaꞌhuarahuë. Tata Yosë huaꞌanëntërinco niꞌton, Sinioro Quisocristoíchin natërahuë. Yaꞌipi cotioroꞌsanquëmaꞌ Quisocristo imaramasoꞌ ninshitaranquëmaꞌ. Canpitasoꞌ yanquëërahuatomaꞌ, nisha nisha parti yaꞌhuaramaꞌ. Yaꞌipi Yosë piyapinënpitanquëmaꞌ ninamasoꞌ ninshitaranquëmaꞌ.

1 Pedro 2:25

Ohuica chihuërinso pochin nicatëhuaꞌ, co Yosë nohuitopirëhuahuëꞌ, iporasoꞌ Quisocristo imarëhuaꞌ. Inasoꞌ ohuicaroꞌsaꞌ huaꞌanën pochin niꞌton, noya aꞌpaiarinpoaꞌ.

2 Pedro 1:1

Ca Simon Pitroco ninshitaranquëmaꞌ, niꞌcoꞌ. ¿Noya yaꞌhuaramaꞌ? Noya cantaꞌ yaꞌhuarahuë. Quisocristoíchin huaꞌanëntërinco niꞌton, inasáchin natërahuë. Ina acorinco nanamën aꞌchinaꞌhuaso marëꞌ. Yosë nohuanton, canpitantaꞌ Quisocristo natëramaꞌ. Quiya pochin imaramaꞌ niꞌton, canpitantaꞌ nichaꞌësarinquëmaꞌ. Ma noyacha Quisocristo anoyacancantërinpoa paya, tënëhuaꞌ. Inasoꞌ Yosë niꞌton, chinotërëhuaꞌ. Oshanënpoaꞌ inquitatonpoaꞌ, nóya niꞌninpoaꞌ. Napopianachin nosororinpoaꞌ niꞌton, catahuarinquëmaꞌ canpitantaꞌ cancanëma quëran huarëꞌ natëcamasoꞌ.

Judas 1:1

Ca Cotasëco ninshitaranquëmaꞌ. Santiaco iinco casoꞌ. ¿Noyanquëmaꞌ canpitantaꞌ? Cantaꞌ noya yaꞌhuarahuë. Quisocristoíchin natërahuë. Ina acorinco pënëntaꞌhuaso marëꞌ. Quisocristo imaramasopita ninshitaranquëmaꞌ. Tata Yosë nohuanton, imaramaꞌ. Inasoꞌ naꞌcon nosororinquëmaꞌ. Quisocristo imaramaꞌ niꞌton, nóya aꞌpaiarinquëmaꞌ, nichaꞌësarinquëmaꞌ.

Apocalipsis 1:1

Tata Yosë nohuantërin yaꞌipinpoaꞌ iso nanan nitotacasoꞌ. Napoaton aꞌna tahuëri maꞌsha onpocasoꞌ nininsoꞌ Quisocristo shaꞌhuitërin anitotinpoaso marëꞌ. Inasoꞌ anquëni aꞌpaimarin ca Coanshaco shaꞌhuitiincoso marëꞌ. Quisocristoíchin casoꞌ natërahuë. Anquëni oꞌmarahuaton, nani maꞌsha aꞌnotërinco.

Apocalipsis 1:20

Niꞌnansoꞌ co quëmaora nitotopiranhuëꞌ, aꞌchinchinquën nitotëquëꞌ. Canchisë sëꞌparahuan nanparinoꞌsasoꞌ noya aꞌpinin. Inapochachin canchisë ninanoroꞌsaquë imarinacosopita yaꞌhuapi. Niyontonatonaꞌ, chinotarinaco. Canchisë tayoraroꞌsaꞌ sëꞌquërahuëso pochin ansianoꞌsaꞌ aꞌpaiarahuë, itërinco.

Apocalipsis 19:10

Naporoꞌ isonahuato, yachinotopirahuëꞌ. “Ama chinotocosohuëꞌ. Casoꞌ anquënico. Co Yosëcohuëꞌ. Canpita pochachin cantaꞌ Yosë natërahuë. Quisoso nanamën imaramaꞌ niꞌton, Yosëíchin yonquiquëꞌ,” itërinco. Quisoso nanamënáchin aꞌchinpatëhuaꞌ, noꞌtëquën pënëntarëhuaꞌ.

Apocalipsis 2:12

Ina quëran shaꞌhuitaantarinco: —Ansiano Pircamoquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Chiníquën nanantato, sahuëni cato quëran chachin toꞌnapinan pochin nininsoꞌ yaꞌhuëtërinco anaꞌintaꞌhuaso marëꞌ.

Apocalipsis 2:8

Ina quëran shaꞌhuitaantarinco: —Ansiano Ismirinaquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Iráca quëran huarëꞌ yaꞌhuërahuë. Co onporontaꞌ taꞌhuantarahuëꞌ. Chiminaporahuëꞌ, nanpiantarahuë.

Apocalipsis 22:9

Yachinotopirahuëꞌ, shaꞌhuitërinco. “Ama chinotocosohuëꞌ. Casoꞌ anquënico. Canpita pochachin cantaꞌ Yosë natërahuë. Iráca quëran huarëꞌ aꞌnaquën Yosë nanamën pënëntërin. Quëmantaꞌ pënëntëran. Aꞌnapita iso quirica natanahuatonaꞌ, natëapi. Yaꞌipinpoaꞌ Yosë natërëhuaꞌ. Napoaton inasáchin chinotëquëꞌ,” itërinco.