Ezequiel 2:6 - Chayahuita (Shahui)

⁶ Piyapinquën nipiranhuëꞌ, ama inapita tëꞌhuatëquësohuëꞌ. Maꞌsona itohuachinëontaꞌ, ama tëꞌhuaquësohuëꞌ. Nahuanoꞌsaꞌ, yonpincaroꞌsaꞌ, inapita huáncana yaꞌhuëaranso pochin cancantaran. Inapopiranhuëꞌ, maꞌsona itohuachinën ama tëꞌhuaquësohuëꞌ. Noꞌhuitatona nishinahuën niꞌtohuachinantaꞌ, ama tëꞌhuatëquësohuëꞌ. Co natantochináchinhuëꞌ cancantopirinahuëꞌ, ama tëꞌhuatëquësohuëꞌ.

Ezequiel 2:6 ပူးပေါင်းရင်းမြစ်များ

Jeremías 1:17

Quëmasoꞌ, chiníquën cancantaton paꞌsaran. Carinquën shaꞌhuitëranquënsoꞌ shaꞌhuicoanan. Ama manta inapita tëꞌhuatëquësohuëꞌ. Tëꞌhuatohuatan inapita niꞌtonënaquë aropátaranquën.

Jeremías 1:8

Ama insonta tëꞌhuatëquësohuëꞌ. Carinquën paꞌpoyaranquën. Caso Sinioroco niꞌto, noꞌtëquën shaꞌhuitaranquën,” itërinco.

Jeremías 18:18

Aꞌna tahuëri piyapiꞌsa chinotatonaco: “Huëco paꞌahua Irimiasë tëpacaiso marëꞌ shaꞌhuirapiaꞌhuaꞌ. Ama manta naporinso natëahuasohuëꞌ. Corto huaꞌanoꞌsa Yosë nanamën aꞌchintiinpoasoꞌ, co pahuanaponhuëꞌ. Yonquinahuanoꞌsanta pënënainpoasoꞌ, yaꞌhuëapon. Pënëntonaꞌpiroꞌsanta Yosë naporinsoꞌ anitotiinpoasoꞌ, yaꞌhuëapon,” topi.

Jeremías 6:28

“Yaꞌipi inapitaso Sinioro, co natantochináchinhuëꞌ cancantopi. Nanan paꞌyatopi, nitapicancanpi, napopi. Shaꞌpi huaꞌna pochin, huaꞌnamia pochin cancantopi.

Miqueas 3:8

Caso nipirinhuëꞌ, noꞌtëquën Sinioro marëꞌ pënëntarahuë niꞌto, achinirinco. Catahuarinco noya nicaꞌhuasoꞌ. Chiníquën cancantato, israiroꞌsa pënënarahuë: “Canpitaso co Yosë natëtomarahuëꞌ, naꞌcon oshahuanamaꞌ,” itárahuë.

Mateo 10:28

Ama piyapiꞌsaꞌ tëꞌhuatocosohuëꞌ. Tëpapirinënquëmaontaꞌ, co huaꞌyanëmaꞌ matarinënquëmahuëꞌ. Yosë tëhuënchinsoꞌ tëꞌhuatacasoꞌ yaꞌhuërin, tënahuë. Ina nohuanton, chiminëꞌ. Co noyahuëꞌ nipachinaꞌ, pënquë chachin aꞌpaarin huachi. Inatohuaꞌ huaꞌyanënarë chachin parisitomiatapi huachi. Napoaton Yosë naꞌcon naꞌcon tëꞌhuatacasoꞌ yaꞌhuërin. Co piyapiꞌsaꞌ tëꞌhuatacasoꞌ yaꞌhuërinhuëꞌ.

Lucas 10:19

Nani nanan quëtëranquëmaꞌ canpitantaꞌ sopai minsëcamaso marëꞌ. Ca yonquiatomaco, sopairoꞌsaꞌ nontohuatamaꞌ, patarinquëmaꞌ. Yaꞌhuan, yonpinca inapita iꞌnatohuatamaꞌ, co mantaꞌ onpotarinquëmahuëꞌ. Yaꞌhuan yaquëtërinposo pochin sopaintaꞌ yaacorinquëmaꞌ. Canpitariso nipirinhuëꞌ minsëaramaꞌ. Co mantaꞌ nanitarinhuëꞌ minsëinquëmasoꞌ.

Lucas 11:12

Ataricayontaꞌ natanpachinquëmaꞌ, co yonpinca quëtaramahuëꞌ. Noya cosharoꞌ quëtaramaꞌ.

Lucas 12:4

Ina quëran itaantarin: “Ama iyaroꞌsaꞌ, piyapiꞌsaꞌ tëꞌhuatocosohuëꞌ. Tëpapirinënquëmaontaꞌ, co huaꞌyanëmaꞌ matarinënquëmahuëꞌ.

Hechos 4:13

Ina natanahuatonaꞌ, cotio huaꞌanoꞌsaꞌ ninontopi. “Isopitasoꞌ topinan piyapiꞌsaꞌ. Co maistroꞌsahuëꞌ. Co naꞌcon quirica nitotaponaraihuëꞌ, co tëꞌhuatërinënpoahuëꞌ. Maꞌpitacha nitotopi paya. Quisoso caꞌtanpi niꞌton, ina pochin cancantopi,” nitopi.

Hechos 4:19

Napotopirinahuëꞌ, Pitro Coansharë chachin co yanatëtopihuëꞌ. —Yosë natëtoi, co nanitëraihuëꞌ canpita natëcaꞌhuainquëmasoꞌ. Co quiyasoꞌ nanitëraihuëꞌ taꞌtahuaisoꞌ. Niꞌnaisoꞌ shaꞌhuirápoi. Natanaisontaꞌ shaꞌhuirápoi. “Co Yosë natëcasoꞌ yaꞌhuërinhuëꞌ,” ¿tënamaꞌ ti? itopi.

Hechos 4:29

Iporasoꞌ Sinioro, quiyantaꞌ noꞌhuirinacoisoꞌ, nitotëran. Quëmasáchin yanatërainquën niꞌton, catahuacoi chiníquën cancantatoi, quëma nanamën shaꞌhuii.

Efesios 6:19

Ca marëntaꞌ Yosë nontocoꞌ catahuainco nanamën noya aꞌchinchi. Chiníquën cancantato, aꞌchinchi. Yosësoꞌ yanichaꞌëpirinpoahuëꞌ, naꞌa piyapiꞌsasoꞌ co nitochátërapihuëꞌ.

Filipenses 1:28

Aꞌnaquën co Quisocristo imatonahuëꞌ, noꞌhuiarinënquëmaꞌ, aparisitarinënquëmaꞌ. Noꞌhuipirinënquëmaontaꞌ, ama tëꞌhuatocosohuëꞌ. Chiníquën cancantohuatamaꞌ, yonquiapi. “Ma inacha Yosë imapisopitaso paya. Yosëri catahuarin niꞌton, chaꞌësapi. Co imarëhuasopitasohuëꞌ nipirinhuëꞌ, co nichaꞌësarinpoahuëꞌ,” tosapi. Yosëíchin catahuarinpoaꞌ chiníquën cancantacasoꞌ.

2 Timoteo 1:7

Yosë co nohuantërinhuëꞌ tëꞌhuacasoꞌ. Ispirito Santo chachin achinicancaninpoaꞌ sopai minsëcaso marëꞌ. Inasáchin ananitërinpoaꞌ piyapiꞌsaꞌ nosorocasoꞌ. Catahuarinpoaꞌ cancanënpoa quëran noꞌtëquën yonquicasoꞌ.

Hebreos 11:27

Yosë natëton, Moisësë Iquipito quëran pipirin. Copirnori noꞌhuipirinhuëꞌ, co tëꞌhuatërinhuëꞌ. “Yosë co quënanaporahuëꞌ, niꞌsárinco,” taꞌton, chiníquën cancantërin. Chiníquën cancantaton, Yosë piyapinënpita catahuarin.

1 Pedro 3:14

Aꞌna tahuëriso nipirinhuëꞌ imaramaso marëꞌ aparisitohuachinënquëmaꞌ, ama tëꞌhuatocosohuëꞌ. “Quisocristo marëꞌ parisitarëhuaꞌ,” taꞌtomaꞌ, noya cancantocoꞌ. Yosë noya catahuarinquëmaꞌ niꞌton, ama paꞌyancosohuëꞌ.

Apocalipsis 9:10

Naporahuaton, yonpinca pochin huiꞌnotopi. Iquin huitatonaꞌ, aꞌnatërápo yoqui pochin aparisitapi.