Ezequiel 18:30 - Chayahuita (Shahui)

³⁰ Carimasoꞌ, aꞌnaya aꞌnayanquëma noꞌtëquën yonquirapiranquëmaꞌ. Noya nipatamaꞌ, noya niꞌsaranquëmaꞌ. Co noyahuëꞌ nipatamasoꞌ, anaꞌintaranquëmaꞌ. Ca Sinioroco shaꞌhuitaranquëmaꞌ. Yaꞌipi co noyahuëꞌ ninamasopita aꞌpochinaco huachi. Ama canpitaora tëhuënëmaquë taꞌhuantamaso marëhuëꞌ inapocoꞌ.

Ezequiel 18:30 ပူးပေါင်းရင်းမြစ်များ

Eclesiastés 3:17

Napoaponahuëꞌ, isoroꞌpaquëso maꞌsha nicacaiso tahuërinën yaꞌhuëtëraꞌpiarin. Ina yonquiato co huachi aquëtë sëtërahuëꞌ. Noya nipisopita, co noyahuëꞌ nipisopita, tahuërinën nanihuachin, Yosëri coisë pochin nicaton maꞌsona onpotacasoꞌ, noꞌtëquën shaꞌhuitapon.

Ezequiel 18:21

Ina quëran Sinioro taantarin: “Co noyahuëꞌ ninaꞌpinta oshanën aꞌporahuaton, yaꞌipi pënëntërahuësoꞌ natëhuachin, co chiminaponhuëꞌ. Noyasáchin nicaton noꞌtëquën natërincoso marëꞌ, nanpipon.

Ezequiel 18:29

Ina natanatona israiroꞌsasoꞌ: ‘Sinioro co noyahuëꞌ nisarin,’ tëcaponaꞌ. ¡Caso mini noya nisarahuë! ¡Canpita tëhuënchinsoꞌ co noꞌtëquën yonquiatomahuëꞌ, co noyahuëꞌ nisaramaꞌ!

Ezequiel 33:11

Napopiramahuëꞌ, caso Sinioroco niꞌton, noꞌtëquën shaꞌhuitaranquëmaꞌ. Co caso nohuantërahuë co noyahuëꞌ nipisopita chiminacaisoꞌ. Co noyahuëꞌ nipiso aꞌporahuatona nanpicaisoꞌ nohuantërahuë. Israiroꞌsanquëmaꞌ, co noyahuëꞌ ninamasopita aꞌpocoꞌ. Ama chiminacamaso nohuantocosohuëꞌ,’ tënin Sinioro, itëquëꞌ,” itërinco.

Ezequiel 33:20

Naporahuëso marëꞌ canpitasoꞌ: ‘Sinioro co noꞌtëquën nisarinhuëꞌ,’ taantaramaꞌ. Napopiramahuëꞌ, carimaso aꞌnaya aꞌnayanquëmaꞌ, noya nipatamaꞌ acanaponquëmaꞌ. Co noyahuëꞌ nipatamasoꞌ, anaꞌintaranquëmaꞌ,” itërin.

Ezequiel 34:20

Naporamaso marëꞌ aꞌna tahuëri noya coisë pochin nicato, amonënoꞌsa anaꞌintarahuë. Nansëyaroꞌsaso nipirinhuëꞌ, catahuararahuë. Ca Sinioroco napotaranquëmaꞌ.

Daniel 9:13

Moisësë pënëntërinsoꞌ quiricaquë ninshitërinso pochachin paꞌpi chiníquën parisitërai. Inapoapiraihuëꞌ, co chinotërainquënhuëꞌ. Co noyahuëꞌ ninaisopitanta co aꞌporaihuëꞌ. Noꞌtë nanan aꞌchintërancoisontaꞌ, co imaraihuëꞌ.

Malaquías 3:18

Noya nipisopitasoꞌ, noya nicato nichaꞌësarahuë. Co noyahuëꞌ nipisopitasoꞌ, noꞌtëquën anaꞌintarahuë. Ina nicatoma canpitasoꞌ: ‘Yosësoꞌ, co napopináchin piyapinpoa niꞌninpoahuëꞌ. Ina chinotohuatëhuaꞌ, noya acoarinpoaꞌ. Coꞌsoꞌ chinotohuatëhuahuëꞌ, noꞌtëquën anaꞌintarinpoaꞌ,’ tosarama huachi,” tënin.

Mateo 16:27

Yosë quëran quëmapico niꞌto, aꞌna tahuëri oꞌmantararahuë. Tatahuë huënaratërinso pochin cantaꞌ huënaratarahuë. Anquëniroꞌsapitarëꞌco oꞌmantararahuë. Naporoꞌ coisë pochin noꞌtëquën shaꞌhuitarahuë huachi. Noya nipachinaꞌ, noya acoarahuë. Co noyahuëꞌ nipachinaꞌ, anaꞌintarahuë huachi.

Mateo 25:32

Yosë nohuanton, nisha nisha nananquë nonpisopita niyontonapi. Niyontonpachinaꞌ, pëꞌtahuatonaꞌpi pochin nisarahuë. Niꞌcoꞌ. Tahuëri nipachina, ohuicaroꞌsaꞌ, chiporoꞌsaꞌ napopianachin paꞌsapi coshatacaiso marëꞌ. Inaquëráchin yaꞌhuëpirinahuëꞌ, tashihuachina, nisha nisha acorin huachi.

Mateo 3:2

—Yosë huaꞌanëntiinpoasoꞌ tahuëri nani yaꞌcariarinpoaꞌ. Napoaton co noyahuëꞌ yonquiramasopita naniantatomaꞌ, Yosë chachin tahuërëtantaco huachi, itarin. Nani tahuëri ina pochin pënënárin.

Mateo 3:8

Co noyahuëꞌ yonquiramasopita naniantatomaꞌ, noya nico huachi.

Lucas 13:3

Co inapita naꞌcon naꞌcon oshahuanpihuëꞌ. Canpitantaꞌ co noyahuëꞌ yonquiramaꞌ. Co ina naniantohuatamahuëꞌ, anaꞌintarinquëmaꞌ. Chiminatomaꞌ, parisitomiataramaꞌ.

Hechos 26:20

Tamascoquë yaꞌhuëpisoꞌton shaꞌhuitërahuë. Ina quëran Quirosarinquëntaꞌ shaꞌhuiantarahuë. Yaꞌipi Cotia partintaꞌ inachachin shaꞌhuiantarahuë. Nisha piyapiꞌsantaꞌ aꞌchintërahuë. ‘Co noyahuëꞌ yonquiramasopita naniantatomaꞌ, Yosë chachin tahuërëtaantacoꞌ. Tëhuënchachin imapatamaꞌ, noya nisaramaꞌ,’ itërahuë.

Romanos 2:5

Canpitaso nipirinhuëꞌ, co natantochináchinhuëꞌ cancantëramaꞌ. Co oshanëmaꞌ yaaꞌporamahuëꞌ. Napoaton ayaroꞌ tahuëri chini chiníquën anaꞌintarinquëmaꞌ. Naporoꞌ yaꞌipi piyapiꞌsaꞌ noꞌtëquën anaꞌintarin.

Santiago 1:15

Ipora huantaꞌ piꞌpian co noyahuëꞌ yonquirëhuaꞌ. Co aꞌnaroáchin naniantohuatëhuahuëꞌ, co noyahuëꞌ nisarëhuaꞌ. Naporahuatëhuaꞌ, oshahuanarëhuaꞌ. Oshahuanpatëhuaꞌ, chiminpatëhuaꞌ parisitomiatarëhuaꞌ. Niꞌcoꞌ. Sanapi huaꞌhuanpachina, oshaquëran oshaquëran huaꞌhuin nanihuachina, huairin. Inapochachin co noyahuëꞌ yonquihuatëhuaꞌ, oshaquëran oshaquëran co noyahuëꞌ nisarëhuaꞌ. Ina marëꞌ oshahuanarëhuaꞌ.

1 Pedro 1:17

Yosë nontohuatamara, “Tata,” itëramaꞌ. Aꞌna tahuëri inasoꞌ coisë pochin niꞌton, yaꞌipi piyapiꞌsaꞌ noꞌtëquën shaꞌhuitarin. Co noyahuëꞌ nipisopita noꞌtëquën anaꞌintarin. Yaꞌipi oshahuaninsopita anaꞌintarin niꞌton, tëꞌhuatacasoꞌ yaꞌhuërin. Chiminaquë huarëꞌ ina yonquiatomaꞌ, noya nicoꞌ.

Apocalipsis 2:16

Napoaton yaꞌipi co noyahuëꞌ yonquiramasopita naniantocoꞌ. Insosona co naniantohuachinhuëꞌ, chiníquën anaꞌintarahuë. Nanamëhuë quëran sahuëni inëshin nininsoꞌ yaꞌhuëarin oshahuanoꞌsaꞌ anaꞌintaꞌhuaso marëꞌ.

Apocalipsis 2:5

Iráca naporamasoꞌ yonquiantatomaꞌ, noya niantacoꞌ. Yaꞌipi co noyahuëꞌ yonquiramasopita naniantatomaꞌ, yaꞌipi cancanëma quëran nosoroantaco. Naporahuaton canpita capinintaꞌ noya ninosoroantacoꞌ. Co noya cancantantahuatamahuëꞌ, paaparahuatënquëmaꞌ, anaꞌintaranquëmaꞌ. Nanparin tacopirinso pochin nisaramaꞌ. Aꞌna tahuëri yaꞌhuëramaquë co insontaꞌ imasarinacohuëꞌ.

Apocalipsis 20:12

Ayaroꞌ tahuëri nani nanirin niꞌton, yaꞌipi chiminpisopita inatohuaꞌ huaniáponaꞌ. Huaꞌanoꞌsaꞌ, topinan piyapiꞌsaꞌ, inapita yaꞌipiya inaquë paꞌsapi. Yosëri anaꞌintacaso marëꞌ ayontonarin. Naporoꞌ quiricaroꞌsaꞌ inápaquë ninshitërinsoꞌ aꞌnaya aꞌnaya oniriarin. Aꞌnasoꞌ nanpirin quirica itopisoꞌ. Inaquë Yosë imapisopita nininënpita nani ninshitopi. Aꞌna quiricantaꞌ yaꞌhuërin. Inaquë yaꞌipi ninëhuasopita ninshitërinpoaꞌ. Noya ninëhuasopita, co noyahuëꞌ ninëhuasopita, yaꞌipiya nani ninshitërinpoaꞌ. Ina nontaton, Yosëri anaꞌintarin.

Apocalipsis 22:12

Ina quëran Quisoso chachin itërinco: “Tëhuënchachin co huaꞌquiya quëranhuëꞌ oꞌmantararahuë. Oꞌmantahuato, yaꞌipiya noꞌtëquën iꞌhuërëtarahuë. Co noyahuëꞌ nipisopita anaꞌintarahuë. Noya nipisopitasoꞌ acanaarahuë.