Ezequiel 18:20 - Chayahuita (Shahui)

²⁰ Insosona oshahuaninsoꞌ, inaora chachin chiminacaso yaꞌhuërin. Co paꞌpin oshanën marëꞌ huiꞌnin anaꞌintacaso yaꞌhuërinhuëꞌ. Inapochachin huiꞌnin oshanën marëntaꞌ, co paꞌpin anaꞌintacaso yaꞌhuërinhuëꞌ. Noya nipisopitasoꞌ, noya nipiso marëꞌ noꞌtëquën acanapo. Co noyahuëꞌ ninaꞌpintaꞌ, co noyahuëꞌ nininso marëꞌ noꞌtëquën anaꞌintaꞌhuaso yaꞌhuërin,” itërinco.

Ezequiel 18:20 ပူးပေါင်းရင်းမြစ်များ

1 Reyes 8:32

Naporinso natanahuaton, noꞌtëquën nonsahuachin paꞌpoyaquëꞌ. Insosona tëhuëhuachin, noꞌtëquën anaꞌintëquëꞌ.

Éxodo 32:33

—Insosona tëhuëtatonco oshahuanpachin, inasáchin quiricanëhuë quëran tapiarahuë. Napoaton paꞌmaquëꞌ. Shaꞌhuitëranquënsoꞌ noꞌpaquë israiroꞌsa quëpaquëꞌ. Anquëninëhuë aꞌnotarinquën noꞌtëquën pacacaso marëꞌ. Napoaponahuëꞌ, anaꞌintaꞌhuaso tahuëri nanihuachin, anaꞌintarahuë. Co noyahuëꞌ nipiso marëꞌ noꞌtëquën anaꞌintarahuë huachi, itërin.

Isaías 53:11

Paꞌpi parisitërinso piquëran: “Tëhuënchachin yaꞌipi nanirahuë huachi,” tosarin. Ina nitotaton noya cancantarin. Sinioro piyapinënsoꞌ, noꞌtëquënáchin ninin. Inapoaton naꞌa piyapiꞌsa nichaꞌësarin. Co noyahuëꞌ nipiso marëꞌ parisitaton inapotarin.

Ezequiel 18:13

Coriqui aꞌnanpachinarantaꞌ, naꞌcon naꞌcon ananpërin. Ina pochin nipachinaꞌ, co nanpicaso yaꞌhuërinhuëꞌ. Yaꞌipi inapita co costapirahuëꞌ, naporinso marëꞌ onpopionta chiminapon. Inaora tëhuënënquë napoapon.

Ezequiel 18:30

Carimasoꞌ, aꞌnaya aꞌnayanquëma noꞌtëquën yonquirapiranquëmaꞌ. Noya nipatamaꞌ, noya niꞌsaranquëmaꞌ. Co noyahuëꞌ nipatamasoꞌ, anaꞌintaranquëmaꞌ. Ca Sinioroco shaꞌhuitaranquëmaꞌ. Yaꞌipi co noyahuëꞌ ninamasopita aꞌpochinaco huachi. Ama canpitaora tëhuënëmaquë taꞌhuantamaso marëhuëꞌ inapocoꞌ.

Ezequiel 18:4

Yaꞌipi piyapiroꞌsa cari huaꞌanëntërahuë. Mashoroꞌsanta huiꞌninarë chachin huaꞌanëntërahuë. Insosona co noyahuëꞌ nicaton oshahuanpachin, inasoꞌ chiminapon.

Ezequiel 33:10

Naquëranchin Sinioro nontatonco: “Quëmasoꞌ piyapinquën nipiranhuëꞌ, nanan quëtaranquën israiroꞌsa pënënacaso marëꞌ. Napotëquëꞌ: ‘Canpitaso nonpatamara naporamaꞌ: “Quiyasoꞌ oshahuanatoi panca tëhuërai. Inapoatoi panca pëꞌpëtëraiso pochin nisarai. Napoaton nanpichinapoi chachin chanatërëso pochin nisarai. ¿Onporahuatoicha noya nicatoi yaꞌhuëꞌi nicaya?” tënamaꞌ.

Ezequiel 33:6

Aꞌpaitonaꞌpisoꞌ, inimicoroꞌsa huëꞌsarinso nicaponahuëꞌ, co pomon pihuirinhuëꞌ. Inapitaso canquirahuatona inso tëranta tëpahuachinaꞌ, inasoꞌ, inaora oshanën marëꞌ chiminapon. Napoaponahuëꞌ ina chimininso marëꞌ, aꞌpaitonaꞌpintaꞌ anaꞌintaꞌhuaso yaꞌhuërin.

Levítico 16:22

Inapotohuachin, chipo inotëro parti chihuëaton, israiroꞌsa oshanëna co piyapi yaꞌhuërinquëhuëꞌ quëpatapon.

Levítico 19:8

Inso tëranta ina caꞌpachin, anaꞌintaꞌhuaso yaꞌhuërin. Ca marëꞌ nininsoꞌ co tëꞌhuatërinhuëꞌ niꞌton, yaꞌhuërama quëran ocoicamaso yaꞌhuërin.

Mateo 16:27

Yosë quëran quëmapico niꞌto, aꞌna tahuëri oꞌmantararahuë. Tatahuë huënaratërinso pochin cantaꞌ huënaratarahuë. Anquëniroꞌsapitarëꞌco oꞌmantararahuë. Naporoꞌ coisë pochin noꞌtëquën shaꞌhuitarahuë huachi. Noya nipachinaꞌ, noya acoarahuë. Co noyahuëꞌ nipachinaꞌ, anaꞌintarahuë huachi.

Deuteronomio 24:16

Aꞌnaya aꞌnaya oshanën marëꞌ noꞌtëquën anaꞌintacaso yaꞌhuërin. Aꞌna piyapi tëhuërinso marëꞌ, co paꞌpin co aꞌshin anaꞌintacaso yaꞌhuërinhuëꞌ. Inapochachin paꞌpinhuë nipon, aꞌshinhuë nipon tëhuërinso marëꞌ co huiꞌnin anaꞌintacaso yaꞌhuërinhuëꞌ.

Hebreos 9:28

Quisocristontaꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarin. Nani oshanënpoaꞌ inquitohuachinpoaꞌ, aꞌna tahuëri oꞌmantararin. “¡Ma noyacha Quisocristosoꞌ niꞌton, nichaꞌërinpoa paya!” taꞌtëhuaꞌ, ina ninarëhuaꞌ. Oꞌmantahuachin, imarëhuasopita maquimarinpoa huachi.

1 Pedro 2:24

Quisocristo isoroꞌpaquë oꞌmaton, piyapi chachin nasitimarin. Oshanënpoa marëꞌ corosëquë chiminin. Inaora yaꞌhuërëtërinpoaꞌ. Yaꞌipi co noyahuëꞌ yonquirëhuasopita naniantatëhuaꞌ noya nicacaso marëꞌ chiminin. Corosëquë parisitaton, anoyacancantërinpoaꞌ.

Apocalipsis 2:23

Sanapi imarinsopitasoꞌ co natërinacohuëꞌ niꞌton, ataꞌhuantarahuë. Ina nicatonaꞌ, yaꞌipi imarinacosopitantaꞌ yonquiapi. ‘Tëhuënchachin Sinioro nohuitërinpoaꞌ. Yonquirëhuasontaꞌ nitotërin. Co noyahuëꞌ nipatëhuaꞌ, noꞌtëquën anaꞌintarinpoaꞌ,’ tosapi.

Apocalipsis 20:12

Ayaroꞌ tahuëri nani nanirin niꞌton, yaꞌipi chiminpisopita inatohuaꞌ huaniáponaꞌ. Huaꞌanoꞌsaꞌ, topinan piyapiꞌsaꞌ, inapita yaꞌipiya inaquë paꞌsapi. Yosëri anaꞌintacaso marëꞌ ayontonarin. Naporoꞌ quiricaroꞌsaꞌ inápaquë ninshitërinsoꞌ aꞌnaya aꞌnaya oniriarin. Aꞌnasoꞌ nanpirin quirica itopisoꞌ. Inaquë Yosë imapisopita nininënpita nani ninshitopi. Aꞌna quiricantaꞌ yaꞌhuërin. Inaquë yaꞌipi ninëhuasopita ninshitërinpoaꞌ. Noya ninëhuasopita, co noyahuëꞌ ninëhuasopita, yaꞌipiya nani ninshitërinpoaꞌ. Ina nontaton, Yosëri anaꞌintarin.