Éxodo 6:6 - Chayahuita (Shahui)

^6-8 Napoaton piyapinëhuëpita iso pochin shaꞌhuitëquëꞌ: “Caso Sinioroco. Carinquëma Iquipito quëran ocoiaranquëmaꞌ. Iporasoꞌ chiníquën asacatopirënënquëmahuëꞌ, carinquëma chiníquën nanantato nichaꞌësaranquëmaꞌ. Chiníquën aparisitërinënquëma niꞌton, carinta noꞌtëquën iꞌhuërëtarahuë. Ocoirahuatënquëmaꞌ, piyapinëhuëpita pochin niꞌsaranquëmaꞌ. Canpitantaꞌ, casáchin chinotaramaco. Iporasoꞌ iquipitoroꞌsa chiníquën asacatatënquëma aparisitapirinënquëmahuëꞌ, ocoiaranquëmaꞌ. Ocoihuatënquëmaꞌ, Sinioroco ninahuësoꞌ nitotarama huachi. Iráca nani Apraan shaꞌhuitërahuë noꞌpaꞌ quëtaꞌhuasoꞌ. Isaco, Cacopo, inapitanta inachachin shaꞌhuitërahuë. Inaquë quëparahuatënquëma ina noꞌpa chachin ahuaꞌanëntaranquëmaꞌ. Caso Sinioroco, tënin,” itëquëꞌ, itërin.

Éxodo 6:6 ပူးပေါင်းရင်းမြစ်များ

Nehemías 1:10

Quiyasoꞌ quëma piyapinënpitacoi. Chini chiníquën nanantaton Iquipito quëran ocoirancoi.

Éxodo 1:11

Ninapotatonaꞌ, chiníquën asacatopi. Sacato huaꞌanoꞌsa acorahuatonaꞌ, inapitari chiníquën camaipi. Huaraon copirno cosharo tapacaso marëꞌ ninanoroꞌsa aocoipi. Piton, Namisisi, inapita itopisoꞌ.

Éxodo 15:13

Paꞌpi nosoromiatërancoi niꞌton, nichaꞌërancoi. Chiníquën nanantaton quëparancoi. Yaꞌhuëcaꞌhuaiso marëꞌ huayonanquë chachin quëparancoi.

Éxodo 16:6

Napohuachina, Moisësë, Aaron, inapitari israiroꞌsa itaponaꞌ: —Sinioro chachin Iquipito quëran ocoirinquëmasoꞌ, iꞌhuanahuanquë nitotaramaꞌ.

Éxodo 2:11

Moisësëso copirno pëinënquë huiꞌnapitahuaton, mashotërin huachi. Aꞌna tahuëri aꞌnapita israiroꞌsa yonquiaton, paꞌnin nicapon. Nani naꞌa piꞌipi Iquipitoquë yaꞌhuëhuanoꞌsari chiníquën asacatopi niꞌton, parisitápi quënanconin. Aꞌnanaya niꞌpirinhuëꞌ, aꞌnara Israiro quëmapi quënanin. Co manta onpoyapirinhuëꞌ Iquipito quëmapiri ahuëaton, yatëpararin.

Éxodo 32:11

Moisësëso napoaponahuëꞌ, noyasha nontaton Sinioro itapon: —Ama Sinioro napotëquësohuëꞌ, chiníquën nanantaton nani Iquipito quëran israiroꞌsa ocoiran.

Éxodo 6:2

Naquëranchin Siniorori Moisësë nontaantarin: —Caso Yosëco.

Hechos 13:17

Iráca quëran huarëꞌ israiroꞌsanpoaꞌ Yosë chinotërëhuaꞌ. Iráca chachin shimashonënpoapita acorin piyapinënpita nicacaiso marëꞌ. Iquipitoquë yaꞌhuëaponaꞌ, Yosë nohuanton, naꞌapi. Ina quëran Yosëri chachin chiníquën nanantaton, catahuarin inatohua quëran chaꞌëcaiso marëꞌ.

Deuteronomio 26:8

Chiníquën nanantaton, ocoirancoi. Nisha nisha maꞌsha sacai nininsopita iquipitoroꞌsa aꞌnotëran. Co niꞌchinpisohuëꞌ aꞌnotaton, aꞌpayanan.

Deuteronomio 4:23

Napoaponahuëꞌ, niꞌcona Siniororëꞌquënpoa anoyatërëhuaso naniantotamaꞌ. Ama manta mamanshi nicatoma moshacosohuëꞌ. Nani Sinioro anitotërinpoaꞌ, ama aꞌnaratipita nonanacaso marëhuëꞌ. Sinioronënpoasoꞌ paꞌpi aꞌpitërinpoaꞌ. Co natëhuatamahuëꞌ, noꞌhuitënquëmaꞌ pënquë ahuiquitërëso pochin anaꞌintarinquëmaꞌ.

Deuteronomio 6:12

Inapoapomarahuëꞌ, ama Sinioro naniantocosohuëꞌ. Canpitaso Iquipitoquë parisitapiramahuëꞌ, nichaꞌërinquëmaꞌ.

Deuteronomio 7:19

Sinioro chiníquën nanantaton Iquipito quëran nichaꞌërinquëmasoꞌ, yonquicoꞌ. Nani ina anitotërinpoa nisha nisha maꞌsha ninin quëran, chini chiníquën nanantërinsoꞌ. Iquipitoroꞌsa napotërinso chachin, tëꞌhuatëramasopita nacionoꞌsanta minsëapon.

Deuteronomio 7:8

Napoaton Iquipito quëran ocoirinquëmaꞌ. Inaquë canpitasoꞌ, chiníquën sacatatoma parisitëramaꞌ. Inapoápiramahuëꞌ, Sinioro nosororinquëmaꞌ. Nosoroatënquëma chiníquën nanantaton huaraon quëran nichaꞌërinquëmaꞌ. Naporahuaton shimashonënpoapita shaꞌhuitërinsoꞌ nanicaso marëꞌ napotërinpoaꞌ.

Deuteronomio 9:29

Israiroꞌsasoꞌ, quëma piyapinënpita nipi. Chiníquën nanantaton, Iquipito quëran ocoiran niꞌton, huaꞌanëntëran,’ itërahuë,” itërin.