Éxodo 4:5 - Chayahuita (Shahui)

⁵ Israiro huaꞌanoꞌsa niꞌtonënquë inapotëquëꞌ. Huaranën yaꞌhuan taraninso niꞌpachinaꞌ, yaꞌnotëranquënso natëtapi huachi: “Shimashonënpoapita Apraan, Isaco, Cacopo, inapitari Yosë chinotërin. Inari Moisësë yaꞌnotërin,” tosapi.

Éxodo 4:5 ပူးပေါင်းရင်းမြစ်များ

Génesis 12:7

Inaquë Siniorori, Apran yaꞌnotahuaton, itërin: “Yaꞌipi iso noꞌpaꞌ, shiparinpita quëtarahuë huaꞌanëntaponaꞌ,” itërin. Naporo chachin Apran Sinioro chinotacaso marëꞌ aꞌnara artaro ninin. Inaquë yaꞌnotërin niꞌton, chinotërin.

Génesis 17:1

Apran iscon shonca iscon piꞌipitasoꞌ, Siniorori yaꞌnotahuaton, itapon: —Caso Yosëco, yaꞌipi nanitaparahuë. Natëtonco, nohuantërahuësoráchin niquëꞌ.

Génesis 18:1

Insina nararoꞌ, Mamiriri huaꞌanëntërinquë Apraan yaꞌhuëarin. Inaquë nisoꞌ, Siniorori, yaꞌnotaantarin. Camotëchin pochin nisapasoꞌ yaꞌnotërin. Nëꞌmëtë pëinën yaꞌcoananënquë huënsasoꞌ, napoarin.

Génesis 26:2

Inaquë Siniorori yaꞌnotahuaton, itërin: “Ama Iquipitoquë paꞌmaquësohuëꞌ. Insëquësona quëparitacasoꞌ, carinquën shaꞌhuitaranquën.

Génesis 28:13

Naporahuaton, Sinioro chachiontaꞌ, ina pirayan huaniarin niꞌnin. Inari nontaton, itapon: “Caso Sinioroco. Quëmaquën Tata masho, Apraan itopisoꞌ chinotërinco. Tata parionta chinotërinco. Quëhuëntëransoꞌ noꞌpaꞌ quëtaranquën. Shiparinpitantaꞌ, iso noꞌpa chachin huaꞌanëntaponaꞌ. Isoso noꞌpaꞌ, Canaan itopi.

Génesis 48:15

Inaporahuaton Cosi noya yaꞌhuëcaso marëꞌ iso pochin shaꞌhuitërin: “Shimashonëhuëpita Apraan, Isaco, inapita Yosë natëpi. Canta huaꞌhuatërahuë quëran huarëꞌ ina chachin noya aꞌpairinco. Ina Anquëninën chachin yaꞌipi maꞌsha onporahuë quëran, nichaꞌërinco. Inari chachin isopita huiꞌnapiꞌsa catahuain. Notohuaroꞌ huiꞌninpita yaꞌhuëchinaꞌ. Huaꞌhuayátërahuë, isoroꞌpaquë naꞌainaꞌ. Inapita nicatona piyapiꞌsaꞌ, yonquiꞌinaco. Tata Isaco, tata masho Apraan, inapitanta yonquiꞌinaꞌ,” itërin.

Génesis 48:3

Cosisoꞌ, huiꞌninpitarë chachin yaꞌcoontarahuaton paꞌpin nontoonin. Ina quëran Cacoposoꞌ Cosi itapon: —Yosë yaꞌipi nanitaparinsoꞌ, Noso ninanoquë yaꞌnotërinco. Inaso ninanoꞌ, Canaan parti yaꞌhuërin. Yaꞌnotahuatonco, iso pochin noya yaꞌhuëcaꞌhuaso marëꞌ shaꞌhuitërinco: “Niꞌquëꞌ. Ca nohuanto, notohuaroꞌ huiꞌnanpita yaꞌhuëtarinquën. Quëmá quëran pipipisopita, naꞌa nacionoꞌsa ocoyaponaꞌ. Naporahuaton, inapita, iso noꞌpaꞌ quëtarahuë. Inapitari huaꞌanëntomiataponaꞌ,” itërinco.

1 Reyes 18:36

Ahuiquitacaso ora nanihuachina, artaro yaꞌcarirahuaton chiníquën Yosë nontërin: “¡Sinioro, quëmasoꞌ Apraan, Isaco, Cacopo, inapita chinotërinën! Ipora nontëranquënsoꞌ aꞌpanitonco, quëmasáchin Yosënquën ninansoꞌ anitotocoi. Canta piyapinënco niꞌto, camaitëranso chachin nisarahuë. Inanta nitochinaꞌ.

Éxodo 19:9

Nani shaꞌhuitohuachina, Siniorori itapon: —Natanquë shaꞌhuichinquën: Nontaranquënsoꞌ piyapiꞌsari natanacaiso marëꞌ chitoro yaráchin nininquë yaꞌnotaranquën. Ina natanpachinaꞌ, natëmiataponën huachi, itërin. Itohuachina, naquëranchin Moisësëri israiroꞌsa aꞌpanitopisoꞌ, Sinioro shaꞌhuitaantarin.

Éxodo 3:18

Napotohuatan, Israiro huaꞌanoꞌsaso natëarinquën tënahuë. Inapitarëꞌquën chachin Iquipito copirno paaparahuaton, napotëquëꞌ: “Yosë chinotëraisoꞌ, oꞌmarin nicaincoiso marëꞌ. Napoaton aꞌpacoi paꞌi inotëro parti nacapiꞌi. Cara tahuëri aquërinꞌpaꞌ paꞌsahuatoi, ina chinotaꞌhuaiso marëꞌ maꞌsha tëpaarai, itocoꞌ.

Éxodo 3:4

Yaꞌcarirarinso niꞌsahuaton, Yosëri përarin: —¡Moisësë! ¡Moisësë! itërin. —Maꞌta Sinioro isëquë nisarahuë, tënin. —¡Ama aquëtë yaꞌcaricosohuëꞌ! ¡Isëquë yaꞌnotëranquën niꞌton, isëquë chachin sapatën ocoirahuaton chinotoco! itërin Yosëri.

Éxodo 3:6

Ina quëran itaantarin: —Caso Yosëco. Shimashonënpita: Apraan, Isaco, Cacopo, inapita chinotërinaco, itërin. Ina natanahuaton, Moisësë paꞌyanin. Nipaꞌcopirayatahuaton, co huachi Yosë niꞌcaso nohuantërinhuëꞌ.

Éxodo 4:1

Yosëri napotopirinhuëꞌ, Moisësëso taantarin: —Israiro huaꞌanoꞌsa yaꞌnotërancoso shaꞌhuitohuato, co natëtaponahuëꞌ: “Co ipora yaꞌnotopirinquënhuëꞌ, napoaran,” taꞌtonaꞌ, co natëponacohuëꞌ, itërin.

Éxodo 4:31

Ansianoꞌsasoꞌ, yaꞌipi natëpi. Parisitapirinahuë Yosëri yacatahuarinso natanahuatonaꞌ, noꞌpaquë huarëꞌ monshorahuatonaꞌ, Yosë chinotopi huachi.

Éxodo 4:4

Taꞌarapirinhuëꞌ, Yosëri itapon: —Huinamën quëran maantaquëꞌ, itërin. Moisësëri huinamën quëran mapachina, pitana chachin taraantarin. Naporoꞌ Yosëri itapon:

Juan 11:15

Iꞌhuara aquëtëran co paatorahuëꞌ, co anoyatërahuëꞌ. Canpita naꞌcon naꞌcon natëamacoso marëꞌ isëquë ninarahuë. Inasoꞌ noya tënahuë. Iporaso nipirinhuëꞌ, huëcoꞌ inatohuaꞌ paꞌahuaꞌ, itërincoi.

Juan 11:42

Nani tahuëri natanatonco, catahuaranco noya nicaꞌhuaso marëꞌ. Quëma chachin isoroꞌpaquë aꞌpaimaranco. Casoꞌ nitotopirahuëꞌ, isopitasoꞌ co nitotopihuëꞌ. Inapita natëinacoso marëꞌ aꞌninquëchin nontaranquën, tënin.

Juan 20:27

Ina quëran anquirahuaton, Tomasë itërin: —Imirahuë iyasha nicaton, sëꞌhuaquëꞌ. Nininpitëhuëntaꞌ sëꞌhuatoco. Ama huachi nisha nisha yonquiquësohuëꞌ. Natëco huachi, itërin.

Juan 20:31

Iso quiricaquë ninshitërahuësopitasoꞌ, Quisoso natëcamaso marëꞌ ninshitërahuë: “Inasoꞌ tëhuënchachin Cristo, Yosë huiꞌnin. Inari aꞌpaimarinsoꞌ,” taꞌtomaꞌ, ina imaco huachi. Imapatamaꞌ, Yosë nohuitatomaꞌ nanpimiataramaꞌ.

Juan 5:36

Inasoꞌ noꞌtëquën shaꞌhuitërinquëmaꞌ. ‘Yosëri chachin Quisoso aꞌpaimarin,’ itërinquëmaꞌ. Nipirinhuëꞌ, co inasáchin anitotërinquëmahuëꞌ. Yosësoꞌ chini chiníquën nanantaton, catahuarinco niꞌton, sacaiꞌ nininsoꞌ ninahuë. Caniaꞌpiroꞌsaꞌ aꞌnaroáchin anoyatërahuë. Yosë nohuanton, ina pochin ninahuë. Ina marëꞌ naꞌcon naꞌcon natëamacosoꞌ yaꞌhuërin.

Hechos 7:2

—Co onporontaꞌ api Yosë pinorahuëꞌ. Natanco, apiroꞌsaꞌ. Iyaroꞌsaꞌ canpitantaꞌ natanco noꞌtëquën shaꞌhuichinquëmaꞌ. Iráca quëran huarëꞌ shimashonënpoapita Yosë imapi. Cantaꞌ ina imarahuë. Tata Yosësoꞌ noya noya. Iráca Tata Apraan nisha noꞌpaquë yaꞌhuasoꞌ, yaꞌnotimarin. Co Aranquë paꞌshátëraponhuëꞌ, nontërin. Misopotamia parti yaꞌhuëpirinhuëꞌ, inaquë Yosëri itapon:

Hebreos 11:16

Nipirinhuëꞌ, co isoroꞌpaꞌ naꞌcon yonquipihuëꞌ. Yosë naꞌcon naꞌcon nohuantopi. Ina yaꞌhuërinquë chachin yaꞌhuëcaisoꞌ nohuantopi. Napoaton Yosë tapon: “Nóya yonquirinaco niꞌton, huiꞌnahuëpita pochin niꞌsarahuë. Aꞌna tahuëri inápaquë quëpantarahuë. Nani tapatërahuë yaꞌhuëcaisoꞌ,” tënin.