Éxodo 33:19 - Chayahuita (Shahui)

¹⁹ —Noya niꞌnahuësopita nosoromiatërahuë. Napoaton naꞌhuëtohuatënquën, noya noya ninahuëso niꞌsaran. Naporoꞌ nininëhuë shaꞌhuiarahuë. Caora nohuanto piyapiꞌsa nosororahuë. Co noyahuëꞌ nipirinahuëꞌ, nosoroato catahuarahuë.

Éxodo 33:19 ပူးပေါင်းရင်းမြစ်များ

Nehemías 9:25

Naꞌa pairahuan ninanoroꞌsa yaꞌhuëpirinhuëꞌ. Noꞌpanënanta noya noya nipirinhuëꞌ. Pëiroꞌsaquënta notohuaroꞌ maꞌsha amëntatopi. Iꞌsha tapainanoꞌsaꞌ, oparoroꞌsaꞌ, oripororoꞌsaꞌ, nisha nisha cashinoꞌsaꞌ, inapita yaꞌhuëpirinhuëꞌ, yaꞌipi mapi. Inapoatona noya coshatopi, oꞌopi, napopi. Inapoatona amonpitërapi. Nosororan niꞌton, capa cancantopi.

Salmos 65:4

Nohuitaꞌhuainquënso marëꞌ huayonancoi niꞌton, noya cancantërai. Noya cosharo pëinënquë yaꞌhuërin. Ina aꞌcatë pochin nitatoncoi catahuacoi nohuitatëinquën noya noya cancanchii.

Isaías 7:14

Sinioro chachin napoahuarëꞌ maꞌsona aꞌnotarinquëma nitotamaso marëꞌ: Niꞌquëꞌ. Ca nohuanton nanon cayoapon. Inapoaton quëmapiaꞌhuaya huaipon. Inasoꞌ huaꞌhuin nohuitaton, Imanino itapon.

Isaías 9:6

Canpoa marëꞌ aꞌnara quëmapiaꞌhua nasitërin. Huiꞌnanpoa Yosë quëtërinpoaso pochin aꞌnara yaꞌipiya marëꞌ quëtërinpoaꞌ. Ina mini huaꞌanëntacaso marëꞌ acorinsoꞌ. Nisha nisha quëran nohuitaponaꞌ: “Paꞌyapiro yonquirinsoꞌ.” “Co minsëchináchinhuëꞌ Yosë.” “Yaꞌhuëmiatonaꞌpi tata.” “Sano cancantonaꞌpi huaꞌan.” Ina pochinpita nohuitaponaꞌ.

Jeremías 31:12

Napoaton huëantarahuatonaꞌ, Quirosarin motopiaꞌhuaroꞌsaquë cantaponaꞌ. Siniorori catahuarinsoꞌ yonquiatona capa cancantapi. Ina nohuanton trico, huino, tomaꞌ, ohuicaroꞌsaꞌ, ohuacaroꞌsaꞌ, inapita yaꞌhuëtaponaꞌ. Pairapipisoanaquë shaꞌpisoꞌ, noyá oporapitopinan pochin nisapi. Co huachi onporo tëranta sanpatërëso pochin nisapihuëꞌ.

Jeremías 31:14

Corto huaꞌanoꞌsantaꞌ, noya noya cosharo nininso caponaꞌ. Yaꞌipi piyapinëhuëpita yaꞌsotai huarëꞌ maꞌsha noya nininsoꞌ quëtapo. Ca Sinioroco shaꞌhuitaranquëmaꞌ,” tënin.

Zacarías 9:17

Naporo quëran huarëꞌ, piyapinënpita noya noya yaꞌhuëaponaꞌ. Notohuaroꞌ cosharoꞌ, huino, inapita yaꞌhuëapon. Napoatona huiꞌnapiꞌsanënpoaꞌ, nanoꞌsanënpoaꞌ, inapitantaꞌ, noya noya soꞌsoponaꞌ.

Romanos 2:4

Yosë nosororinpoasoꞌ co noꞌtëquën yonquiramahuëꞌ. “Co aꞌnaroáchin noꞌhuirinpoahuëꞌ,” taꞌtomaꞌ, co noyahuëꞌ ninamaꞌ. Tëhuënchachin co aꞌnaroáchin anaꞌintërinquëmahuëꞌ. “Oshaquëran co noyahuëꞌ yonquipisopita naniantaponaꞌ nimara,” taꞌton, ninarárin.

Romanos 9:23

Aꞌnaquënpoaso nipirinhuëꞌ, nosoroatonpoaꞌ nichaꞌësarinpoaꞌ. Inaora nohuanton, nosororinpoaꞌ. Iráca chachin yonquirinpoaꞌ nichaꞌëinpoaso marëꞌ. Anoyacancantohuachinpoaꞌ, piyapiꞌsaꞌ naꞌcon Yosë yonquiapi. “Ma noyacha catahuarin paya,” tosapi.

Deuteronomio 32:3

Ca marësoꞌ: ‘Sinioro, paꞌpi nóya,’ tënahuë. Canpitanta ina nohuitatomaꞌ: ‘Tëhuënchachin paꞌpi nóya,’ tocoꞌ.