Éxodo 3:7 - Chayahuita (Shahui)

^7-9 Napoaponahuëꞌ, Yosëri aquëtë chachin shaꞌhuitaantarin: —Piyapinëhuëpita israiroꞌsa itopisoꞌ, Iquipitoroꞌsari chiníquën asacatatona aparisitomiatapi. Sacato huaꞌanoꞌsari, ahuëanaquëranchin asacatapi. Napoaton catahuaꞌhuaso marëꞌ chiníquën nontërinaco. Ina natanato, inapita nichaꞌëcaꞌhuaso marëꞌ oꞌmarahuë. Iquipitoroꞌsari huaꞌanëntopirinahuëꞌ, ocoirahuato panca noꞌpaꞌ nininquë quëparahuë. Inaquësoꞌ, co manta pahuaninhuëꞌ. Iporasoꞌ inaquë: Cananoꞌsaꞌ, itiroꞌsaꞌ, amororoꞌsaꞌ, huirisëroꞌsaꞌ, iporoꞌsaꞌ, quiposoroꞌsaꞌ, inapita yaꞌhuërapi. Ina huëntonoꞌsasoꞌ, co chinotërinacohuëꞌ.

Éxodo 3:7 ပူးပေါင်းရင်းမြစ်များ

Génesis 16:11

Ipora cayoransoꞌ, quëmapiaꞌhuaya huaiyaran. Huaihuatan, Ismairo itëquëꞌ. Co napion ancantaton naꞌnëransoꞌ, Sinioro nataninquën niꞌton, ina nininën acotëquëꞌ.

Génesis 18:21

Napoaton inatohua paꞌsarahuë. ¿Shaꞌhuitërinacoso chachin taꞌma nisapi? taꞌto, nitotaꞌhuaso marëꞌ paꞌsarahuë.

Génesis 21:17

Yosëri, huiꞌnapi naꞌnërinsoꞌ natanin. Napoaton Yosë anquëninëni, inápa quëran përasahuaton nontërin: “¿Maꞌta Acara onporan? ¡Ama paꞌyanquësohuëꞌ! Yosëri, huiꞌnapi naꞌnërinsoꞌ natanin.

Génesis 29:32

Niasoꞌ, cayorahuaton quëmapiaꞌhuaya huairin. Inasoꞌ, Nopino itërin. “Sinioro sëtërahuësoꞌ nicaton, catahuarinco. Huaꞌhuanahuë niꞌton, iporasoꞌ soꞌyahuë nosoroaponco huachi,” taꞌton, ina pochin huaꞌhuin nohuitërin.

Génesis 31:12

Naporoꞌ anquëni itërinco: “Noya niꞌquëꞌ, yaꞌipi chipo mashoroꞌsaꞌ, chipo sanapiꞌsa toꞌquëpisopita, huiꞌtonpiroꞌsaꞌ, ninshipitonoꞌsaꞌ, iꞌcoapiroꞌsaꞌ, inapitaráchin toꞌquërapi. Napano nonpintërinquënso nitotato, niꞌnanso chachin aꞌninquënta nicacaso marëꞌ catahuaranquën.

Génesis 31:42

Apraan chinotërinso catahuarinco. Tata Isacontaꞌ, inachachin chinotërin. Coꞌsoꞌ ina catahuarincohuë naporini, topinamiáchin yaꞌhuërahuëquë aꞌpaꞌitoncohuëꞌ. Yosëso nipirinhuëꞌ, parisitërahuësoꞌ nitotërin. Chiníquën sacatato maꞌsha yaꞌhuëtërincosontaꞌ, nitotërin. Napoaton achin tashi pënëninquën, itërin Cacopori.

2 Samuel 22:28

Co manta nanitopisopitahuëꞌ, nichaꞌëran. ‘Cashachaꞌ,’ topisopitaso nipirinhuëꞌ, atapanaran.

Nehemías 9:9

Shimashonëhuëipita Iquipitoquë paꞌpi aparisitapirinahuëꞌ, Quëhuaiꞌ marë yonsanquë naꞌnëtërinënsoꞌ natanaton, catahuaran.

Salmos 145:19

Noya nicatona natëpisopitasoꞌ, Siniorori nohuantopisoꞌ acotërin. Catahuacaso marëꞌ nontohuachinara, natanaton nichaꞌësarin.

Salmos 22:24

Popriyaroꞌsa parisitohuachinara, Siniorosoꞌ co topinan niꞌsárinhuëꞌ. Co naꞌpitatë pochin nicaton, tananpitaponhuëꞌ. Co napion ancatatona nontohuachinara, natanahuaton catahuararin.

Salmos 34:4

Maꞌsha onpoato Sinioro chinotërahuë. Paꞌpi paꞌyanpirahuëꞌ, ina nichaꞌërinco huachi.

Salmos 34:6

Saꞌahuaya pochin cancantato, chiníquën Sinioro nontërahuë. Inasoꞌ, nani maꞌsha onporahuë quëran nichaꞌërinco.

Éxodo 1:11

Ninapotatonaꞌ, chiníquën asacatopi. Sacato huaꞌanoꞌsa acorahuatonaꞌ, inapitari chiníquën camaipi. Huaraon copirno cosharo tapacaso marëꞌ ninanoroꞌsa aocoipi. Piton, Namisisi, inapita itopisoꞌ.

Éxodo 1:8

Huaꞌqui quëran nasha copirno Iquipitoquë huaꞌanëntërin. Cosisoꞌ, nani iráca chiminin niꞌton, naporinso co nitotërinhuëꞌ. Napoaton co israiroꞌsa nosoroatonhuëꞌ, piyapinënpita itapon:

Éxodo 33:13

Tëhuënchachin napohuatan, yonquiransopita anitotoco. Ina nitotohuato, noya noya natëaranquën. Israiroꞌsasoꞌ, quëma piyapinënpita. Ama ina naniantëquësohuëꞌ, itërin.

Éxodo 5:10

Napotohuachina Iquipito sacato huaꞌanoꞌsaꞌ, Israiro sacato huaꞌanoꞌsa inapitari israiroꞌsa itaponaꞌ: “Iquipito copirno naporin: ‘Ama huachi shinpitë quëtocosohuëꞌ, inahuara chachin mainaꞌ. Napoaponahuëꞌ, onposona natricho nisapisoꞌ, nápo chachin acocaiso yaꞌhuërin,’ tënin,” itopi.

Éxodo 5:6

Napotahuaton, naporo tahuëri chachin Iquipito sacato huaꞌanoꞌsaꞌ, Israiro sacato huaꞌanoꞌsaꞌ, inapita amatërin. Huëꞌpachinara camairin: “Ama huachi israiroꞌsa shinpitë quëtocosohuëꞌ. Inahuara chachin paatona mainaꞌ.

Números 20:16

Parisitápatoi catahuaincoiso marëꞌ Sinioro nontërai. Chiníquën nontohuatoira natanahuatoncoi catahuarincoi. Anquëninën aꞌpaimarin Iquipito quëran ocoincoiso marëꞌ. Iporasoꞌ Catisë ninanoquë yaꞌhuëarai, canpita noꞌpanëma naniconinquë nisarai.

Hechos 7:34

Piyapinëhuëpita Iquipitoquë yaꞌhuëpirinahuëꞌ, parisitápi niꞌnahuë. Chiníquën aparisitopi niꞌton, tarëtápi, natanahuë. Napoaton nichaꞌësarahuë huachi. Huëquëꞌ inatohuaꞌ aꞌpaꞌinquën nichaꞌëcamaso marëꞌ,” itantarin.

Hebreos 4:15

Inasoꞌ yaꞌipinpoaꞌ noyá nohuitërinpoaꞌ. Sopai yaminsërinpoasontaꞌ nitotërin. Co chiníquën cancantërëhuahuëꞌ niꞌton, sopai shaꞌhuitarinpoaꞌ ama Yosë natëcaso marëhuëꞌ. Quisosontaꞌ isoroꞌpaquë nipon, sopairi naꞌcon yanonpintaton, nisha nisha shaꞌhuitopirinhuëꞌ minsëcaso marëꞌ, co inasoꞌ sopai natërinhuëꞌ.

1 Samuel 9:16

“Tashiraya ipora pochin aꞌnara Mincamin huënton quëmapi aꞌpatiaranquën. Ina masahuaton israiroꞌsa huaꞌanën nicacaso marëꞌ acoaran. Huiristinoꞌsari piyapinëhuëpita huaꞌanëntápirinahuëꞌ, inari nichaꞌësarin. Inapitari aparisitopiso marëꞌ chiníquën nontërinaco niꞌton, nosoroantarahuë,” itërin.