Éxodo 20:4 - Chayahuita (Shahui)

⁴ Ama manta nonanpisoꞌ nicatoma moshacosohuëꞌ: Inápaquë yaꞌhuërinsoꞌ, isoroꞌpaquë, acoporoquë, marëquë, co inaquëpita yaꞌhuërinso nonanatomaꞌ, moshacamaso yaꞌhuërinhuëꞌ. Ama manta mamanshi chinotocosohuëꞌ.

Éxodo 20:4 ပူးပေါင်းရင်းမြစ်များ

1 Reyes 12:28

Inapo yonquirinso huaꞌanoꞌsa shaꞌhuitërin. Inapitarë nonsahuaton, cato toroaꞌhua oro quëran anitërin. Tënihuachinara israiroꞌsa itapon: “Canpoaso israiroꞌsanpoaꞌ, nani naꞌaro Quirosarinquë paꞌnëhuaꞌ. Maꞌtana yosënënpoapita. Isopita mini Iquipito quëran ocoirinpoaꞌ,” itërin.

Éxodo 20:23

Ama mamanshi ca pochin chinotamaso marëꞌ nicosohuëꞌ. Oro, prata, co inapita quëran nicacaso yaꞌhuërinhuëꞌ.

Éxodo 32:1

Israiroꞌsaso Moisësë huaꞌquirinso niꞌsahuatonaꞌ, Aaron paahuapi: —Moisësë Iquipito quëran ocoipirincoihuëꞌ. ¿Intohuaso paꞌmara? Co nitotëraihuëꞌ. Napoaton catahuaincoiso marëꞌ, mamanshi nitocoi, itopi.

Éxodo 32:23

Huëcapairahuatonaco: “Moisësë Iquipito quëran ocoipirincoihuëꞌ, ¿Intohuaso paꞌmara? Co nitotëraihuëꞌ. Napoaton catahuaincoiso marëꞌ, mamanshi nitocoi,” itërinaco niꞌton: “Oro yaꞌhuëtohuachinquëmaꞌ, quëshico,” itërahuë. Ina quëran quëpachinara pënquë tëꞌyatërahuë, tëꞌyatohuatëra ¡Iso toroaꞌhuaya pipirin! toconin.

Éxodo 32:4

Aaronsoꞌ ina masahuaton, asoquirin. Nani soquihuachina huaꞌnatëquë sacataton, toroaꞌhuaya nonanin. Tënihuachina yaꞌipiya quëran nonca topi: —¡Iso mini yosënënpoa Iquipito quëran ocoirinpoasoꞌ! topi.

Éxodo 32:8

Pënënahuësopita naniantatonaꞌ, aꞌnaroáchin pëshonpi huachi. Oro asoquirahuatona moshacaiso marëꞌ, toroaꞌhuaya nonanpi. Ina chinotacaiso marëꞌ pëꞌtahuanëna tëparahuatonaꞌ, ahuiquitopi. Nani chinotahuatonaꞌ: “¡Iso mini yosënënpoa Iquipito quëran ocoirinpoasoꞌ!” toconpi, itërin.

Éxodo 34:17

Ama onporo tëranta huaꞌna asoquirahuatomaꞌ, mamanshi nicosohuëꞌ.

Isaías 42:17

Mamanshi chinotatonaꞌ: ‘Canpitaso yosënëhuënquëmaꞌ,’ topisopitaso nipirinhuëꞌ, tapanatona taꞌananpiponaco,” tënin.

Isaías 42:8

Ina quëran Sinioro taantarin: “Caso Sinioroco. Ina mini nininëhuë. Casáchin noya noyaco niꞌton, paꞌyatiinacoso yaꞌhuërin. Co mamanshiroꞌsasoꞌ noya nicatona natëcaiso yaꞌhuërinhuëꞌ.

Isaías 45:16

Yaꞌipi mamanshi ninaꞌpiroꞌsasoꞌ, taparo nicaponaꞌ. Mamanshinënari co catahuarinhuë niꞌton, naní quëran tëhuayataponaꞌ.

Levítico 19:4

Ama mamanshi chinotocosohuëꞌ. Ama huaꞌna asoquirama quëran mamanshi ca pochin chinotamaso marëꞌ nicosohuëꞌ. Caso Yosëco napotaranquëma niꞌton, natëco.

Números 12:8

Napoaton inarëꞌcosoꞌ, aꞌninquëchin nonai. Ina pochin inarëꞌco nonahuë niꞌton, co onporonta canpitaso ina pinocamaso yaꞌhuërinhuëꞌ,” itërin.

Hechos 17:29

Napoaton Yosëntaꞌ canpoa pochin nanpirárin antaꞌ. Co inasoꞌ mamanshi pochinhuëꞌ. Mamanshiso nipirinhuëꞌ piyapiꞌsari inahuara yonquinëna quëran nipi. Oro quëran, prata quëran, naꞌpi quëran, ina quëranpita nipi. Ama Yosësoꞌ mamanshi pochin cancantocosohuëꞌ.

Romanos 1:23

Yosësoꞌ noyasáchin ninin. Co onporontaꞌ chiminaponhuëꞌ. Inaso nipirinhuëꞌ, co ina yonquipihuëꞌ. Ina naniantatonaꞌ, mamanshi nipi moshacaiso marëꞌ. Mamanshi piyapi nonanpisoꞌ moshapi. Co piyapi yaꞌhuëmiatopirinhuëꞌ, ina yamoshapi. Nisha nisha maꞌsharoꞌsantaꞌ moshapi. Aꞌnaquën anpiantëhuanoꞌsaꞌ, aꞌnaquën noꞌpaquë niohuaratërinsopita, inapita moshapi.

Apocalipsis 16:2

Ina natanahuaton, aꞌnaraꞌ paꞌnin. Isoroꞌpaꞌ nocorahuaton, minëquë yaꞌhuërinsoꞌ tëꞌyanantërin. Tëꞌyanantohuachina, naꞌa piyapiꞌsaꞌ panca taꞌtarapi. Sëncopi pochin pipitëraꞌpiaponaꞌ. Co noyatochináchinhuëꞌ nisapi. Maꞌsha paꞌpi tëꞌhuatoroꞌ nininsoꞌ imapisopita parisitapi. Marcanën niacotopi niꞌton, Yosë nohuanton, taꞌtaráchin nisapi. Mamanshinëntaꞌ moshapi niꞌton, parisitáponaꞌ. Aꞌna tahuëri maꞌsha onpocasoꞌ ninoton, aꞌnotërinco, niꞌnahuë.

Apocalipsis 9:20

Naꞌa piyapiꞌsaꞌ chiminpirinahuëꞌ, co naporo tërantaꞌ aꞌnapitasoꞌ yonquiapihuëꞌ. Niꞌsaponaraihuëꞌ, inachachin co noyahuëꞌ cancantapi. Aquëtë chachin sopairoꞌsaꞌ chinotapi. Nisha nisha mamanshi moshapi. Oro quëran, prata quëran, huaꞌna quëran, naꞌpi quëran, nara quëran, ina quëranpita nipisoꞌ. Co inapitasoꞌ quënantopihuëꞌ, co natantopihuëꞌ, co iratopihuëꞌ. Co nanpipirinahuëꞌ, mosharapi.