Éxodo 19:16 - Chayahuita (Shahui)

¹⁶ Moisësë naporinso chachin naporo tahuëri nanihuachina, tashiramiachin chiníquën oꞌcoritaton, huirátarin. Yaráton chitoro nininso motopi imotërin. Naporahuaton carniro pomon chiníquën pihuipisoꞌ natanpi. Ina natanatonaꞌ, yaꞌipi israiroꞌsa yaꞌhuëpiquë paꞌyanpi. Paꞌyanatona ropa ropatapi.

Éxodo 19:16 ပူးပေါင်းရင်းမြစ်များ

2 Samuel 22:10

Piꞌiroꞌtë paꞌshintëransoꞌ paꞌshirëso pochin nitaton, oꞌmaran. Oꞌmahuatana, panca chitoro nininquë oꞌmaran. ¡Yara yaráchin nininquë oꞌmaran!

Copo naporinso' 38:25

Noꞌpaꞌ cashahuatëra, iꞌsha paꞌirinso pochin, panca oꞌnaonta canquirin. Huiraitohuachinantaꞌ, ira huëꞌshitë pochin ninin. Incarisona inapita ira aꞌnotatë pochin nitërinsoꞌ, ¡co quëma nitotëranhuëꞌ!

Éxodo 19:15

Naporahuaton itaantarin: —Tashiraya aquëtëran Sinioro oꞌmararin. Ama piꞌpian tëranta saꞌama cariapomarahuëꞌ, noya ninacoꞌ, itërin. Itohuachina, israiroꞌsa pëꞌsainahuatonaꞌ, cara tahuëri pochin co saꞌina yaꞌcaripihuëꞌ.

Éxodo 19:17

Napohuachina, Moisësëri israiroꞌsa yaꞌhuëpi quëran ocoirin. Ocoirahuaton, Yosë nacapicaiso marëꞌ motopi nanimarinꞌpaꞌ quëparin.

Éxodo 19:9

Nani shaꞌhuitohuachina, Siniorori itapon: —Natanquë shaꞌhuichinquën: Nontaranquënsoꞌ piyapiꞌsari natanacaiso marëꞌ chitoro yaráchin nininquë yaꞌnotaranquën. Ina natanpachinaꞌ, natëmiataponën huachi, itërin. Itohuachina, naquëranchin Moisësëri israiroꞌsa aꞌpanitopisoꞌ, Sinioro shaꞌhuitaantarin.

Éxodo 20:18

Noninsoꞌ, huiratërinsoꞌ, carniro pomon pihuipisoꞌ, inapita natanahuatonaꞌ, israiroꞌsasoꞌ paꞌpi tëꞌhuatopi. Oꞌcoriꞌ, pën, conaiꞌ, inapitanta quënanatonaꞌ, paꞌpi paꞌyanpi. Paꞌyanatona co nohuantopihuëꞌ yaꞌcaritacaisoꞌ.

Éxodo 20:21

Israiroꞌsasoꞌ, aquëranchin notëapi. Naporoꞌ Moisësësoꞌ, Yosë noninsoꞌ natanacaso marëꞌ chitoro yara yaráchin nininquë yaꞌconin. Inaquë piyapiꞌsa shaꞌhuitacaso marëꞌ Yosëri nani maꞌsha pënënarin.

Éxodo 40:34

Nani yaꞌipi tënihuachinara, chitorori Yosë chinotacaso marëꞌ nëꞌmëtë pëi ótënpisoꞌ, imotërin huachi. Yosë huënaratërinsontaꞌ, ina acoana noyá aꞌpintërin.

Éxodo 9:23

Huaranën sëꞌquërin quëran chachin Moisësësoꞌ, tanpaquën inápaquë ihuërin. Naporo chachin yaꞌipi Iquipito parti, oꞌcoritarin, huirátarin, ocai anotarin, naporin.

Mateo 24:31

Oꞌmantarahuato, naꞌa anquëniroꞌsaꞌ aꞌpararahuë. Panca tronpita pihuitonaꞌ, yaꞌipi parti paꞌsapi huayonahuësopita ayontonacaiso marëꞌ.

Hebreos 12:21

Niꞌsahuaton, Moisësëntaꞌ paꞌpi tëꞌhuatërin. “Cantaꞌ tëꞌhuatato, ropa ropátarahuë,” tënin.

Apocalipsis 1:10

Iꞌhua Tomio tahuëri Yosë chinotasoco, Ispirito Santo nohuanton, huaꞌnarëso pochin quënanahuë. Co huëꞌëpirahuëꞌ, pinëhuë quëran chiníquën nontërinco, natanahuë. Tronpita pihuirinso pochin natanahuë.

Apocalipsis 11:19

Ina quëran huaꞌnarëso pochin nicasoco, Yosë pëinën inápaquë yaꞌhuërinsoꞌ niꞌsoatërin niꞌnahuë. Iráca chinotopiso pëi acohuana Yosë caposonën yaꞌhuërin. Ina pochin nininsoꞌ inápaquë niꞌnahuë. Nicasoco, oꞌcoritërin, tënëntërin, huiratërin, ocohua paꞌnin, ocaiꞌ anotërin, naporin. Yosë chiníquën nanantërin niꞌton, naporin.

Apocalipsis 4:1

Ina quëran inápaquë nëꞌpërahuato, quënanahuë. Yosë yaꞌhuërinquë chachin yaꞌcoana niꞌsoatërin, niꞌnahuë. Naporahuaton, inápa quëran yaꞌnan nontërincosoꞌ nontaantarinco. Tronpita pihuipiso pochin natanahuë. —Isëquë huëntaquëꞌ. Nani maꞌsha aꞌnochinquën. Aꞌna tahuëri maꞌsha onpocasoꞌ ninoto, anitotaranquën, itërinco.

Apocalipsis 4:5

Yosë huaꞌanëntacasoꞌ shiranën quëran oꞌcori pochin nininsoꞌ pipiarin. Huënsha huënshaꞌtarin. Huira tacarintërinso pochin nonpisoꞌ natanahuë. Canchisë pën nënërinsoꞌ Yosë notënanquë chachin niꞌnahuë. Inapitasoꞌ canchisë ispiritoroꞌsaꞌ Yosëri camairinsoꞌ, tënahuë.

Apocalipsis 8:5

Ina quëran anquëni Yosë artaronënquë yaꞌcaritahuaton, naꞌa pënayaꞌ manin. Aꞌpëtinanquë acorahuaton, isoroꞌpaquë tëꞌyatërin. Tëꞌyatohuachina, aꞌnaroáchin huira pochin natanahuë. Chiníquën tënëntërin. Oꞌcorintaꞌ huënsha huënshaꞌtarin. Naporahuaton, panca ocohua paꞌnin. (Nani huachi Yosëri anaꞌintarin, tënahuë.)