Éxodo 16:33 - Chayahuita (Shahui)

^33-34 Aaronta camairin: —Cato quiro pochin mana masahuaton, yonshaquë poꞌmoquëꞌ. Ina quëran Yosërëꞌquënpoa anoyatërëhuaso caposonën notënanquë acoaran. Aꞌna tahuëri shiparinpoapita nohuitacaiso marëꞌ inaquë tapaaran, itërin. Itohuachina, Yosëri Moisësë camairinso chachin, Aaronsoꞌ ninin.

Éxodo 16:33 ပူးပေါင်းရင်းမြစ်များ

Éxodo 16:32

Ina quëran Moisësëri israiroꞌsa camairin: —Iso pochin Yosë camaitërin: “Iquipito quëran ocoirahuatënquëmaꞌ, inotëro parti quësaranquëmaꞌ. Naporoꞌ cosharo quëtëranquëmasoꞌ shiparimapitanta nohuitacaiso marëꞌ, tapacoꞌ. Cato quiro pochin yaꞌconinsoꞌ, mana masahuatoma tapacoꞌ,” tënin, itërin.

Hebreos 9:4

Nëꞌmëtëꞌ yaꞌcariya aꞌna misaꞌhuaya yaꞌhuërin, oro quëran nipisoꞌ. Inaquë yonarin pochin pimóchin nininsoꞌ aꞌpëpi tomontacaso marëꞌ. Yosë caposonëontaꞌ yaꞌhuërin. Aipiran, acoporan, yaꞌipi oro quëran achinpitopi. Caposo acopoana yonsha oro quëran nipisoꞌ yaꞌhuërin. Inaquë piꞌpian cosharoꞌ Yosëri inápa quëran aꞌpaimarinsoꞌ poꞌmorin, mana itopisoꞌ. Aaron pitananëontaꞌ inaquë poꞌmorin. Inasoꞌ noyá yaniponahuëꞌ, Yosë nohuanton, aꞌnaroáchin papotantarin piyapinënpita yonquicaiso marëꞌ. Naporahuaton, catoꞌ naꞌpitëaꞌhuayantaꞌ inaquë acopi. Inaquë Yosë pënëntërinsoꞌ nani ninshitopi. Iráca anoyatërinsoꞌ itopisoꞌ.

Apocalipsis 2:17

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, noya cancantarama huachi. Iráca israiroꞌsaꞌ Yosëri cosharoꞌ aꞌpatimarin, mana itopisoꞌ. Inachachin poꞌorahuësoꞌ carimantaꞌ quëchinquëmaꞌ sano cancantacamaso marëꞌ. Imaramaco niꞌton, nasha nininëmaꞌ aꞌnaya aꞌnayanquëmaꞌ acoꞌinquëmaꞌ. Canpitaora nitotaramaꞌ. Huiri naꞌpiquë ninshitahuato, quëchinquëmaꞌ. Cancanëma quëran noya noya nohuitaramaco huachi. Nani huachi,” itëquëꞌ, ninshitohuatan, itërinco.